Luke 24
24
Sa tukuna na agilose e rua vei ira na yalewa ni sa tu cake tale mai ko Jisu, 1-12. Sa rairai ko Jisu vei rau na tamata e lewe rua, ka emuri vei ira kecega, ka vakavulici ira, 13-49 Sa qai lako cake ki lomalagi ni ra sa raica tiko, 50-53.
1IA e nai matai ni siga ni wiki, e na mataka caca sara, eratou sa lako mai ki nai bulubulu, a ratou sa kauta mai na veika boivinaka eratou a vakarautaka, kei iratou tale e so vata kei iratou. 2A ratou sa kunea ni sa vaqiqici tani na vatu mai nai bulubulu. 3Ia ni ratou sa curu, eratou sa sega ni kunea na yago ni Turaga ko Jisu. 4A sa yaco, ni ratou sa kidacala vakalevu kina, raica, e lewe rua na tamata sa tu voleka vei iratou e nai sulu lumilumisa: 5ia ni ratou sa rere, ka cuva sobu na matadratou ki na qele, erau sa kaya vei iratou, Dou sa vakasaqarai koya sa bula e na kedra maliwa na mate e na vuku ni cava? 6Sa sega eke ko koya, a sa tu cake tale: nanuma na nona vosa vei kemudou ni sa tiko kei kemudou mai Kalili, 7ni sa kaya, Ena soli yani na Luve ni tamata ki na ligadra na tamata ca, ka na vakoti ki na kauveilatai, ka tu cake tale e nai katolu ni siga.
8A ratou sa qai nanuma na nona vosa. 9A ratou sa qai suka tani e nai bulubulu, a ratou sa tukuna na ka kecega o qo vei iratou na tinikadua, vei ira kece talega sa vo. 10O iratou eratou sa tukuna na veika o qo vei iratou nai apositolo, o Meri na kai Makitala, kei Joana, kei Meri na tina i Jemesi, vata kei ira na yalewa tani. 11A sa vaka nai tukutuku walega vei ira na nodratou vosa, a ra sa sega ni vakadinata.
12Sa qai ia ko Petero, ka cici ki nai bulubulu; ia ni sa cuva sobu, sa raica na gatu wale ni sa no, a sa qai lako tani, a sa kidacala c lomana e na vuku ni ka sa yaco.
13Ka raica, sa lewe rua vei ira sa lako e na siga dina ko ya ki na dua na koro lailai ko Emeo na yacana, e vitu na maili ka savu na kena vakayawa ki Jerusalemi. 14A rau sa veivosakitaka na ka kecega o qo sa qai yaco. 15A sa yaco, ni rau sa veivosaki ka veitarogi, sa toro voleka ko Jisu, ka lako vata kei rau. 16A sa vakamatawataki na matadrau me rau kakua ni kilai koya.
17A sa kaya vei rau ko koya, Ai tukutuku cava o qo drau sa talanoataka, ni drau sa lako voli, ka vakaveveku mata kina? 18A sa dua vei rau, na yacana ko Kilopa, sa vosa ka kaya vua, O iko duadua beka na vulagi mai Jerusalemi, ka sega kina ni kila na veika sa qai yaco kina e na gauna o qo?
19A sa tarogi rau ko koya, A ka cava? A rau sa kaya vua, A ka kei Jisu na kai Nasareci, a parofita sa levu e na cakacaka kei na vosa e na mata ni Kalou ka e matadra kecega na tamata: 20a sa soli koya ko ira na bete levu kei ira na neimami turaga me lewai me mate, a ra sa vakota ki na kauveilatai. 21Ia keimami a vakasama ni sai koya ga o qo ena vakabulai ira na Isireli: ia o qori talega, sa kenai katolu ni siga edaidai ni sa caka oti na veika o qo. 22Ia ka so talega na neimami yalewa, eratou sa vakidacalataki keimami, ni ratou sa lako ki nai bulubulu e na mataka caca; 23ia ni ratou sa sega ni kunea na yagona, eratou sa lako mai, ka tukuna, ni ratou a raica e so na agilose sa sikavotu vei iratou, ka kaya ni sa bula ko koya. 24O iratou talega e so eratou sa dautiko vata kei keimami, eratou sa lako ki nai bulubulu, a ratou sa kunea ni sa vaka na ka eratou a kaya na yalewa: ia ka ratou sa sega ni kunei koya.
25A sa kaya vei rau ko koya, Drau sa sesewa, ka tawa via vakabauta na ka kecega sa tukuna ko ira na parofita: 26e sega beka ni kilikili kei koya na Karisito me vosota mada na veika o qo, me qai curu ki na nonai ukuuku? 27A sa vakatekivu maivei Mosese ka yacovi ira kecega na parofita, a sa tusanaka vei rau mai nai Vola kecega na vosa ka tukuni kina ko koya.
28A ratou sa torova na koro lailai erau sa lako kina: a sa lako ko koya me vaka sa via lako vaka kiliu. 29A rau sa cikeva matua, ka kaya, Tiko ga mai vei keirau, ni sa qai yakavi, a sa kala na siga. A sa curu ko koya me tiko vei rau.
30A sa yaco, ni ratou sa tiko kaya me kana, sa taura na madrai ko koya, ka vatonaka, ka dovia, ka solia vei rau. 31A sa qai lau na matadrau, a rau sa kilai koya; a sa takali ko koya mai na matadrau. 32A rau sa veikayaka vakai rau, Sa sega li ni kama eloma na yalodaru, ni datou sa veivosaki kaya e na gau-ni-sala, ni sa vakamacalataka talega vei kedaru nai Vola ko koya?
33A rau sa tu cake e na tiki-ni yakavi ga ko ya, ka lesu tale ki Jerusalemi, a rau sa kunei iratou na lewe tinikadua ni ratou sa soqoni vata mai, kei ira era dautiko vata kei iratou; 34a ra sa kaya, Sa dina ni sa tu cake tale na Turaga, a sa rairai vei Saimoni. 35A rau sa tukuna talega na veika ni gau-ni-sala, ni rau sa kilai koya talega ni sa dovia tiko na madrai.
36Ia ni ra sa vosa tiko vakaoqo, sa tu sara e na kedra maliwa ko Jisu, ka kaya vei ira. Dou vakacegu ga. 37A ra sa kidroa ka rere sara, a ra sa vakasama ni ra sa raica e dua na yalo. 38A sa kaya vei ira ko koya, Dou sa kidroa e na vuku ni cava? a sa tubu na vakanananu e na lomamudou e na vuku ni cava? 39raica na ligaqu kei na yavaqu, ni sai au dina ga: tarai au, ka raica; ni sa sega ni vakalewena se vaka-suina na yalo, me vaka dou sa raica ni sa tu vei au. 40Ia ni sa vosa oti vakaoqo ko koya, sa vakaraitaka vei ira na ligana kei na yavana. 41Ia ni ra sa sega ni vakabauta e na vuku ni ra sa reki, ka kidacala, sa tarogi ira ko koya, Sa dua na kakana sa tu eke vei kemudou, se segai? 42A ra sa solia vua e dua na tiki ni ika tavu, ka so mai na qa-ni-oni sa tawa. 43A sa taura ko koya, ka kana e matadra.
44A sa kaya vei ira ko koya, O qo na vosa kaʼu a daukaya vei kemudou niʼu a tiko kei kemudou, ni na yaco kecega na vosa sa tukuni au, sa volai e na vunau i Mosese, kei na nodrai vola na parofita, kei na Veisere. 45Sa qai basuka na lomadra ko koya, me ra kila rawa nai Vola, 46a sa kaya vei ira, Sa volai vakaoqo, a sa kilikili kei koya na Karisito me vosota vakakina, me tu cake talega mai na mate e nai katolu ni siga: 47me vunautaki talega na veivutuni, kei na bokoci ni valavala ca, e na vuku ni yacana, vei ira na lewe ni veivanua kecega, me vakatekivu e Jerusalemi. 48Ia koi kemudou, dou na dautukutuku e na veika o qo. 49Ia ka raica, au sa tala vei kemudou na ka sa yalata ko Tamaqu: ia dou tiko ga e na koro ko Jerusalemi, me yaco mada vei kemudou na kaukauwa maicake.
50A sa kauti ira ki nai bili ki Pecania, a sa qai laveta cake na ligana, ka vosavakalougatataki ira. 51A sa yaco, ni sa vosavakalougatataki ira tiko, sa kau tani vei ira, a sa kau cake ki lomalagi. 52A ra sa soro vua, ka lesu tale ki Jerusalemi, ka reki vakalevu: 53a ra sa dautiko e na vale ni soro, a ra sa vakarokorokotaka tiko na Kalou, ka vakavinavinaka vua. Emeni.
נבחרו כעת:
Luke 24: FIJ1864
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
First full Bible in the Fijian language © British and Foreign Bible Society, 1864.
