Joni 2
2
Sa cakava na wai ko Jisu me waini, 1-11. Sa lako cake ko koya ki Jerusalemi, ka vakasavi ira na dauveivoli mai na vale ni soro, 13-17. Sa tukuna na nona mate, kei na nona bula tale mai, 18-22. E so na tamata era sa vakabauti koya, 23-25.
1IA e nai katolu ni siga sa dua na solevu ni vakawati mai Kena e Kalili; a sa tiko maikina na tina i Jisu: 2a sa sureti ko Jisu, kei iratou talega na nona tisaipeli, ki na solevu ni vakawati. 3Ia ni sa oti na waini, sa kaya vei Jisu na tinana, Sa sega vei ira na waini. 4Sa kaya vua ko Jisu, Yalewa, a cava vei iko kei au? sa sega ni yaco mai na noqu gauna. 5Sa kaya na tinana vei ira na tamata, A ka kecega sa kaya vei kemudou ko koya, dou kitaka. 6Ia ka sa tu maikina e ono na saqa vatu ni wai, sa dauvakanavasa-vataki ira kina ko ira na kai Jutia, sa tauyarua se tauyatolu nai vakarau. 7Sa kaya vei ira ko Jisu, Vakasinaita na veisaqa ni wai e na wai. A ra sa vakasinaita me vuabale sara. 8A sa kaya vei ira ko koya, Dou qai takiva, ka kauta vua sa lewa na solevu. A ra sa kauta. 9Ia ni sa tovolea na wai sa caka me waini ko koya sa lewa na solevu, a sa sega ni kila se sa maivei: (ia ko ira na tamata sa takiva na wai era sa kila;) o koya sa lewa na solevu sa kaciva na wati ni yalewa, 10a sa kaya vua, A tamata yadua sa dauviritu eliu na waini vinaka; ia ni ra sa gunuva vakalevu na tamata, sa qai muri na kena sa vinaka vakalailai ga: ko iko, ko sa maninitaka na waini vinaka ka yacova na tiki-ni-siga o qo.
11Ai vakatekivu o qo ni veika-mana sa cakava ko Jisu mai Kena e Kalili, a sa vakaraitaka kina na nonai ukuuku; a sa vakabauti koya ko iratou na nona tisaipeli.
12Ni sa oti o qo eratou sa lako sobu ki Kaperinaumi, o koya, kei na tinana, kei iratou na tacina, kei iratou na nona tisaipeli: a ratou sa sega ni bogi vuqa kina.
13A SA voleka na nodra solevu ni lako-sivia na kai Jutia; a sa lako cake ki Jerusalemi ko Jisu; 14a sa kunei ira e na vale ni soro era sa volitaka e so na karavau kei na sipi kei na ruve, kei ira sa veisaui lavo era sa mai tiko. 15Ia ni sa cakava oti e dua na kuita wa qaliqali, sa vakasavi ira kecega mai na vale ni soro, kei na sipi, kei na karavau; a sa sovaraka yani na nodrai lavo era sa veisaui lavo, a sa vukica na veitutu; 16a sa kaya vei ira sa volitaki ruve, Kauta tani na veika o qo; kakua ni cakava na vale i Tamaqu me vale ni veivoli. 17A sa nanuma ko iratou na nona tisaipeli ni sa volai, Sa kani au na loloma katakata ki na nomu vale.
18Sa qai vosa ko ira na kai Jutia, ka kaya vua, A cava nai vakatakilakila ko sa vakatakila vei keitou, ni ko sa kitaka na veika o qo? 19Sa vosa ko Jisu, ka kaya vei ira, Dou talaraka na vale o qo, kaʼu na qai tara vakaotia e na bogi tolu. 20Era sa qai kaya na kai Jutia, A vale ni soro o qo sa vasagavulu ka mani ono na yabaki ni sa tara tiko; ia ko na tara vakaotia e na bogitolu, ne? 21Ia na vale sa vosataka ko koya, a yagona.
22Ni sa qai tu cake tale mai na mate ko koya, sa nanuma ko iratou na nona tisaipeli, ni sa tukuna ko koya na ka o qo vei ira; a ratou sa vakadinata nai Vola, kei na vosa sa kaya ko Jisu.
23Ia ni sa tiko ko koya mai Jerusalemi, ni sa ia tiko na solevu ni lako-sivia, sa lewe vuqa era sa vakadinata na yacana, ni ra sa raica na veika-mana sa cakava ko koya. 24A sa sega ni vakararavi vei ira ko Jisu, ni sa kilai ira kecega, 25a sa sega ni yaga vua me dua me vakatakilai ira na tamata: ni sa kila ko koya na ka sa tu e na loma ni tamata.
נבחרו כעת:
Joni 2: FIJ1864
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
First full Bible in the Fijian language © British and Foreign Bible Society, 1864.
