मेथा 7
7
श्येम्माला क्यो़न ॱमातो़न
(लुका ६:३७-३८,४१-४२)
1“श्येम्माला क्यो़न ॱमाचुक, देरे झ्यीना को़न्क्षोकगी ठीम ख्यो़ला ॱमेफोक्कीलाक। 2घीझ्येरी ॱनाना ख्यी़ श्येम्माला घारे झ्येरी क्यो़न चुक्यी, देरेराङ ख्यो़ला ठीम चेगीलाक। ख्यी़ छे घाङ झ्येरी ग्याप्यी, होदे छेलाराङ ख्यो़ला ग्याप्कीलाक। 3राङगी ॱमीकला हो़गीन दुङमागोवा ॱमेथोङाला, राङगी पी़नगी ॱमीक नाङला हो़गीन स्यीङडुकगो, घीझ्येरी थोङाले? 4याङ राङगी ॱमीकला दुङमा हो़ती-हो़ती ख्यो़री पी़नला, ‘ख्यी़ ॱमीकने स्यीङडुक तो़न्दु च्युक,’ ॱनेरी घाङ झ्येरी ॱना थुक्वाले? 5ख्यो़ शोक्पो, एन्ला राङगी ॱमीकने दुङमा तो़न धेनी ख्यो़री पी़नगी ॱमीकने स्यीङडुक तो़न्येला सावो थोङगीलाक।
6“धाम्पा हीन्गीनगो कीला ॱमाते घीझ्येरी ॱनाना देक्या खा लोक्ती, ख्यो़ला ॱमुक्तु हुङगीलाक धेनी ख्यो़री मुतीकक्या फाकक्याई दोङदु ॱमायुक, देरे झ्यीना देक्याई काङबी ॱलेगीलाक।
श्यी़, चो धेनी दुङ
(लुका ११:९-१३)
7“श्यी़ धेनी ख्यो़ला ॱनाङगीलाक, चो धेनी ख्यो़ला ॱङेगीलाक, घो दुङ धेनी ख्यी़ क्षीला पेगीलाक। 8घीझ्येरी ॱनाना श्युगीन घीरीला थोप्कीलाक, चागीन घीरीला ॱङेगीलाक धेनी घो दुङगीन घीरीगी क्षीला घो पेगीलाक। 9खेक्याने राङगी भीजागी ग्याङगा ॱनुङ ॱनी घाङला, सी़ धोगोङ तेरगीले? 10याङ खी़ ङ्या ॱलाङी घाङला, डुल तेरकीले? 11होझ्येरी खेक्या ङेन्पा झ्येरीया राङगी टुवाक्याला ॱङेन्बा शाङा तेर स्येना, नाम्खे श्यीङखामदु श्युक्कीन ख्यी़ यापगी, खोङला श्यी़गीनक्याला घाजो़ माङा शाङा हो़गीनक्या ॱनाङी हेटु।
12“होझ्येरी मी श्येम्मागी खेक्याला घारे झ्यीगीनगो दो़दी, होदेरेराङ श्येम्माक्याला झ्यी। देराङ क्षो़ठीम धाङ ॱङो़नस्येखेनक्याई तो़न्गीनगी दो़न दोरधी़गो लाक।
घो दोक्वा धाङ याङा
(लुका १३:२४)
13“घो दोक्वाने जु। घीझ्येरी ॱनाना तोरस्यीकला ठीक्कीन घो नी, याङा धाङ लाम नी लेल्हा हुङालाक धेनी देने जुगीनक्या माङा हुङालाक। 14हीना मीछेला क्यागीन घो नी, दोक्वा धाङ घाक्वा हुङालाक धेनी दे लाम ॱङेगीनक्या ङ्युङा हुङालाक।
ॱङो़नस्येखेन शोक्पोक्या
(लुका ६:३३-३४;१३:२५-२७)
15“ॱङो़नस्येखेन शोक्पोक्याने शाप-शाप झ्यी। देक्या लुकगी पाउ घो़न्दी हुङालाक, हीना नाङने जीक्टाक्षे चुङगुक्या च्योक्रे हुङालाक। 16खुङक्याई ढेबुक्याने खेक्याई ङोस्येगीलाक। छेम्मागी दोङबोने घुन्डुम याङना ॱरेक्याने सेयाप दुवाले? 17होझ्येरी स्यीङदोङ शाङपोक्याने ढेबु शाङपो केलालाक हीना स्यीङदोङ ङेन्पाक्याने ढेबु ङेन्पा केलालाक। 18स्यीङदोङ शाङपोने ढेबु ङेन्पा धाङ स्यीङदोङ ङेन्पाने ढेबु शाङपो के ॱमीथुक्वालाक। 19ढेबु शाङपो ॱमेकेगीन स्यीङदोङ घीरी, च्येदी मेला ॱयुक्वालाक। 20होझ्येरी ॱङो़नस्येखेन शोक्पोक्याई ढेबुक्याला तेरी, खेक्याई खुङक्या ङोस्येगीलाक।
21“ङाला ‘चोवो चोवो’ ॱनेरी भो़गीन घीरी, नाम्खागी ग्यासीला ॱमीछी़गीलाक हीना नाम्खे श्यीङखामदु श्युक्कीन, ङी यापगी थुकोङ डुप्कीनगो च्यीगा, दे नाङदु छी़गीलाक। 22होदे ङीमागोला मी माङागी ङाला, ‘चोवो, चोवो, खेराङगी छेनने हीकी ॱङो़न ॱमास्येपे धेनी खेराङगी छेनगी थोक्ने धी़क ॱमातो़न्बे धेनी खेराङगी छेनगी थोक्ने हीकी ॱहाङसागीन लेगा माङा माझ्येबे?’ ॱनेरी ॱनागीलाक। 23धेनी ङा खुङक्याला सावो ॱनायेहीन, ‘ङी खेक्याला नामा ङो ॱमास्ये। खे ङेन्पा लेगा झ्यीगीनक्या ङाने ॱहाला सोङ।’
खेवा धाङ ॱलेन्पो चीक्चोवा ॱङी
(लुका ६:४७-४९)
24“होझ्येरी ङी का देक्या ङेन्दी, झ्यीगीन घीरी, राङगी खाङबा फोङगीङगी खाला चीक्कीन, मी खेवा च्यीक च्योक्रे लाक। 25धेनी क्षावा भाप्ती क्षुलोक होवालाक धेनी ल्हाक्पा ग्याप्ती खाङबा देला फोक्तीया, होदे फोङगीङगी खाला चीक्चा झ्येरी माधीप्पालाक। 26हीना ङी ॱनागीन काक्या ङेन्दी, होदे च्योक्रे मीझ्यीगीनक्या, राङगी खाङबा भेमा खाला चीक्चा मी ॱलेन्पो च्यीक च्योक्रे लाक। 27धेनी क्षावा भाप्ती क्षुलोक होवालाक धेनी ल्हाक्पा ग्याप्ती खाङबा देला फोक्ती, होदे खाङबा ॱमीच्यीकी जीक्टाक्षे झ्येरी धीप्पालाक।”
28येशुगी का दे घीरी सुङसारती, खोङबागी सुङगीन देला मीछोकक्या याम्सावालाक। 29घीझ्येरी ॱनाना खोङबागी क्षो़ठीमगी ॱलोपो़नक्या च्योक्रे मेन्दा, वाङगी थोक्ने क्षो़ तो़न जेपालाक।
© 2023, Wycliffe Bible Translators, Inc. and Nepal Bible Society
