Marcos 10
10
Aplheianma Jesús metka neniamasma entava
1Apteiapmek nak mokhom Jesús na temma Capernaum, apmeiekho lhnak iokhalhma Judea. Apkelvekho lhnak na temma akieto aktepa knem alvata Jordán. Apvakhei'avek nak enenlhet'avok Jesús ma'a, ka apketlhekmoskamo lhnak aptemakha lhna mota apankek ma'a. 2Ka apkelteteskai'o lhnak fariseos apkenmahai'a eliepkonek Jesús ma'a, apkelelmalhneiangka lhnak ma'a, lhna aptaiangkok:
—¿Ngkeltemengke nlho ley eieniok aptava enenlhet, he? —lhna aptaiangkok.
3Ka apkellatemmoiangka lhnak Jesús ma'a:
—¿Ko la aktemakha henganemakha Moises, he?
4Ka apkellatemmoiangka lhnak Fariseos ma'a, lhna aptaiangkok:
—Apkaiangkavek nak nanek Moises eienio'ok aptava enenlhet, aptalheskeskangkek nak na lhema vakkahak aktemakha neniamasma entava ankok —lhna aptaiangkok fariseos.
5Koka lhna aptemak mokhom Jesús apkellanemo m'a:
—Aliennaktema lhnak nane songkek apvalho'ok enenlhet'avok ma'a, 6koka mang nak nanek na nkotnemak ampai'akhasekha m'a. Eniapom Neten nak nanek apkelanai'a apkenno kakpota nhan ngkelvana. 7Ka ngkanek ntasek eieniok aptema apnemolhema ngkana'ak apkenno kakpota eloka lheme mota aptava m'a. 8Ngkotnangkokhak hata nhan m'a malha lhema, mmaskek malha hanet. 9Ka apiepetkeskama nak Eniapom Neten, mangapvankek angelhpankesek ma'a —lhna aptemak Jesús ma'a.
10Netamen apkeltaqhemo lhnak apkakhaiangkolha m'a, ka apkelelmalhneiangka lhnak mokhom apkeltamesaikamok aktemakha neniamasma entava'. 11Ka apkellatemmoiangka lhnak Jesús ma'a, lhna aptemak:
—Apieniavkek hata nkek aptava enenlhet, nkoliemhapekhak mo'ok ngkelvana, aptevaskek ma'a amanie lhkek aliemhapma. 12Nnavek na ngkelvana nieniavkek hata nkek atava', nkoliemhapekhak hata po'ok apkenno', ntevaskek na m'a amanie lhta aliemhapma —lhna aptemak Jesús.
Apkeltaqmelkeskama Jesús nematkak
13Apkeliantemekho lhnak enenlhet moklhem'a nematkak apnakha Jesús kakpota enmangvomok ma'a, koka apeliennai'avek nak apkeltamesaikamok enenlhet'avok aptangko apkeliantemaiam nematkak. 14Natheskangkek noka nhan Jesús, lhna aptemak apkellanemo apkeltamesaikamok:
—¡Meliasamo lhma nematkak anak anmahai'a helteteska! Ngkanek allelto nhan anko'ok aptema nak Apveske Eniapom Neten. 15Ntasek enmankok takha m'a aptema nak apveske Eniapom Neten ka aktaiangkolha nak nematkak anak. Koka mankonmak'o la enmankok takha m'a, melentalhnengvomek hata m'a —lhna aptemak Jesús apkellanemo apkeltamesaikamok.
16Ka apkakheskamo lhnak Jesús aptek apio'ok nematkak, apnengkanmo lhnak na apmeiok takhalhet'ok, apkeleltemo nhan nkoltaqmelek allaniemhaikama m'a.
Apketkok nkeskama apketsekama
17Neksa apmahai'ak eniempekhak nak aplhengama Jesús ma'a, apketkaiakmo lhnak na apketkok apkenmangkolha ma'a, apkelteklhekvai'o lhnak aptapno'ok napaqtek ma'a, lhna aptemak apkanemo:
—Hengetlhekmoskama apiamolhma, ¿ko la atneskesek avomok akiennaktemakha enneniek mangkotnengvaiam annelha, he?
18Ka apkatemmoiangka lhnak Jesús ma'a, lhna aptemak:
—¿Se lha ntak heltangko nak asiamolhma, he? Vanlha Eniapom Neten apto apiamolhma. 19Apiavek lheiap henganemakha aptalheskama lhnak na nek Moises. Meniaqha nkek po'ok, metvesangkek aliemhapma, memenielh, metnama nkek apmopvana ania'a apmahai'a eselhnanak po'ok, meiennengkes ankek na po'ok, ellasekho ta ngkana'ak —lhna aptemak Jesús ma'a.
20Ka apkatemmoiangka lhnak apketkok anak ma'a, lhna aptemak:
—Hengetlhekmoskama, ka henganemakha nak astemakha eietkok askasekhai'o m'a —lhna aptemak ma'a.
21Apkelanei'avek nak Jesús apketkok anak, apkamelaiangka lhnak ma'a, lhna aptemak apkanemo:
—Lhema qaselha nkaimelhkak elana', elieniav hata lhamakho apanko'ok anak, etenia ta akianmoma patakkom kakpota ellangkok metka nak apkelletsekama, kakpota heieplomaha'. Ka apto la m'a, ngkoitek hata ngkeskama qaselha apanko'ok anmennave m'a neten —lhna aptemak Jesús.
22Aiosek na ntemak apvalhok aplengai'o apketkok nak ma'a, mang nak eiennaktemak aplhengamo ngkanek mang nantek apketsekama m'a. 23Ka apkelan'o lhnak Jesús nepiava', apkelpaqmetkeskamo lhnak apkeltamesaikamok, lhna aptemak:
—¡Nientelhek ankek eklhek aknema apketsekama akieto nak aptemakha Apveske Eniapom Neten!
24Nkeliemaskangkek nak apvalho'ok apkellengai'a apkeltamesaikamok ma'a, ka apkelpaqmetkesekho lhnak mokhom Jesús ma'a, lhna aptemak:
—¡Eietkak, nientelhek ankek eklhek enenlhet apielhanmekama nak ngkeskama apketsekama akieto aptemakha nak apveske Eniapom Neten! 25Alhievai'a nke niekhe koka m'a nkoklhek alahak aktek#10:25 Ka alahak anak akvesai'a lhema atong atkok akientalhnema eklhek enenlhet. anak iama etanlheng, mangkolhnok ma'a eklhek ngkeskama nak apketsekama akieto aptemakha nak Apveske Eniapom Neten —lhna aptemak ma'a.
26Ka akpelapkeskamo lhnak apkellengai'a apkeltamesaikamok, lhna aptaiangkok ma'a:
—¡Malha nak mamma nkovongkasalhkak tep! —lhna aptaiangkok ma'a.
27Ka apkatemmoiangka lhnak Jesús ma'a, lhna aptemak:
—Enenlhet mankapvankek ma'a, Eniapom Neten koka apvankek elanak apmak'akha la elana —lhna aptemak.
28Koka lhnak aptemak Pedro:
—Apveske', nelpekkenakhe lhta lhamakho qaselha engankok ennengko'o, ka nelieplavengka lheiap —lhna aptemak.
29Ka apkatemmoiangka lhnak Jesús ma'a, lhna aptemak:
—Have niapak ankek enenlhet'avok apkelieniekha la apkakhaiangkolha, apkelialheng'a kanhan apkelialheng'a ngkelvana'ak, apkeliapom, ngkana'ak, apnaqteiangka'a, apketkak kakpota nhan lhepop apanko'ok aniem'o helieplekama apkenmaikamok na takha ania'a aktaqmanma. 30Etlhevangkok hata aklhamakma qaselha apanko'ok hengke'e, ka akto nak apkakhaiangkolha, apkelialheng'a kanhan apkelialheng'a ngkelvana'ak, ngkana'ak, apketkak, lhepop apanko'ok nahan, koka mangkolhek hata nhan allamelangka m'a. Netamen hata m'a apmaniaie nak etlhevangkok aliennaktema apnenio'ok mankotnengvaianlha nnelha. 31Moklhem'a enenlhet'avok kolhvave nak aptaikamok anak apmaniaie, alhaiek hata etnangkokhak ma'a. Koka moklhem'a enenlhet kolhvave nak metnaikamo nak apmaniaie', apmaniaie ta etnangkokhak ma'a —lhna aptemak Jesús.
Aplhenekho mokhom Jesús ematong hata
32Apkenmeiekho lhnak aplhamakho enenlhet'avok akieto m'a Jerusalen, apmaniaie lhnoka aplhengama Jesús. Nkeliemaskangkek nak apvalho'ok ma'a apkeltamesaikamok apketlhengamo neptamen, apkellai'o lhnak na m'a. Ka apkellaveiangka lhnak Jesús apkeltamesaikamok apkeliantemo lhnak tep apketsek mok apankavek ma'a, apkeleltennaskamo lhnak akmak'akha ta ngkotnek apkaniemhaikama, lhna aptemak:
33—Ellailhono, ka nenmeiakhelha nak Jerusalen, ngkolhek hata angkongvakmo Enenlhet Apketka nak apkelemhama apmaniaie' sacerdotes kakpota nhan escribas. Etlhenekha ta nhan apkenmahai'a ennapok ma'a, ellangkongvomok hata nhan ma'a metnangko nak judios. 34Elvannama ta nhan ma'a, eliaqpelhketangkok hata nhan ma'a, elelhpaqhangkok hata nhan apkeliemanong ma'a, ennapok hata nhan. Koka hanetolhem'a knem hata ngkotnek apketsepma m'a, elhatekhangvomok hata mokhom —lhna aptemak ma'a.
Lhema qaselha apkeltemo Jacobo kanhan Juan
35Jacobo kakpota nhan Juan, Zebedeo apketkak, apkelteteskai'o lhnak Jesús ma'a, lhna aptaiangkok apkellanemo:
—Hengetlhekmoskama, nengeltave ennengko'o angelelmalhnama lhema qaselha —lhnak aptaiangkok.
36—¿Se lha qaselha apkellelto ie, he? —lhnak aptemak Jesús.
37Ka apkellatemmoiangka lhnak ma'a, lhna aptaiangkok:
—Hata apto ta apiav'akha apveske apiennaktema lheiap, nengeltavek angaqhangkok napokha lheiap, lhema akiennakha' kakpota nhan sanqalvelha' —lhna aptaiangkok ma'a.
38Ka apkellatemmoiangka lhnak Jesús ma'a, lhna aptemak:
—Meliohok ketlhengkap aptangkolha nak helelmalhnekama, ¿apvanka'a nlho ennaksepok akmaska aimenek#10:38 Ka akmaska aimenek anak akvesai'a akientalhnema aplengaiangko Jesús. asmak'ak hata ainek ko'o lha, he? ¿Apvanka'a nlho nhan malha nema allavkesaikamok la aiseksek akientalhnakha akmak'ak hata ngkotnek ko lha, he? —lhnak aptemak Jesús.
39Ka apkellatemmoiangka lhnak ma'a, lhna aptaiangkok:
—Hai', engvanka'a ie' —lhnak aptaiangkok ma'a.
Netamen lhna aptemak apkellanemo mokhom Jesús:
—Hai', have niapak ankek ketlhengkap ennaksepok hata akmaska malha asmak'akha ta ngkotnek ko'o. Ngkotnek hata nhan malha knema allavkeskama ta konne akientalhnakha ketlhengkap, malha akmak'ak hata nhan ngkotnek ko'o. 40Koka mongvapvankek hata aliekieksek enenlhet alhneksek na neheqha akiennakha, sanqalvelha nhan, nnengkek koka aliekieskamo m'a —lhna aptemak Jesús.
41Nkennatheskangkek nak 10 apkeltamesaikamok ma'a apkellengai'o apkelelmalhnekama Juan kakpota nhan Jacobo. 42Ka apkellaveiangka lhnak aplhamakho apkeltamesaikamok Jesús, lhna aptemak apkellanemo m'a:
—Apkeliave nlho ketlhengkap apkelanma apmaniaie' metnangko nak judios aptangkek malha apanko'ok alhma nkek ham, keliekaskeiakmek apkelientalhnemo, apkeliekai'avek aptemo lhemek enenlhet. 43-44Koka ketlhengkap metnamo nkek aptaiangkelha nak ma'a. Apmak'ak hata nkek etnek apmanie panke, ntasek etnek malha aptemakha nak nema asennaikama nak nema apianmoma. 45Nkanek Enenlhet apketka nak apvai'ak hengke'e kakpota etnek nema asennaikama, have apteniai'a ngkolhek annengkasengka mota. Apvai'ak hengke'e kakpota eniangkok ematong ma'a, el·hatsoskakhak na apentalhnema enenlhet'avok anmaikama nak ngkollatsekama nak apkellanekamok —lhna aptemak.
Jesús aptaqmelkeskaiam metka apaqto'ok Bartimeo
46Jesús kakpota nhan apkeltamesaikamok apkelentalhnengvekho lhnak na temma Jerico, netamen nak ma'a apkelentepekho lhnak mokhom, apkelieplekhek nak enenlhet'avok ma'a. Apnemo lhnak nekha amai metka apaqto'ok apvesai'a Bartimeo, Timeo apketka lhnak ma'a, apkelelmalhneiangka lhna mota qaselha enenlhet. 47Ka aplengai'o lhnak Bartimeo ania'a Jesús ko Nazaret nak apiekai'ak apnakha m'a, ka apveneiangka lhnak ma'a:
—¡Jesús, David aptaven neptamen, eietno neha'at, hepasem! —lhna aptemak ma'a.
48—¡Evanma ham! —lhna aptaiangkok enenlhet ma'a.
Koka apiangveskaiakmek nak apvenekama mokhom:
—¡Jesús, David aptaven neptamen, eietno neha'at, hepasem! —lhna aptemak.
49Ka apkenengvaiakmo lhnak Jesús ma'a, lhnak aptemak:
—¡Ellavamanoho! —lhna aptemak.
Ka apkellaveiangka lhnak enenlhet Bartimeo m'a, lhna aptaiangkok:
—¡Elheng nak, meniaga, Jesús apkavemaha! —lhna aptaiangkok ma'a.
50Kolhvavek anke nak apkenmekhak neten Bartimeo m'a, apiamasmo lhnak apkaqlammap, apteteskaiakmo lhnak Jesús ma'a, lhna aptemak:
51—¿Se lha apkelto allanak lheiap ke, he? —lhna aptemak.
—Askeltave atekha lhma' mokhom ko'o —lhna aptemak Bartimeo.
52Koka lhna aptemak Jesús apkanemo:
—Hai, mei'askeiam ntaqmelkasakhak lheiap, etaqhekha ta apankek apnemakha —lhna aptemak Jesús.
Kolhvavek ankek nak aptaqmelekhak Bartimeo m'a, ka apieplekho lhnak Jesús neksa aplhengama.
©2023 LETRA Paraguay
