Va'Atəŋ 4
4
Kayin də Abel
(4:1-26)
1Ɗəf asəntək ɗak nan Hawwa. Təɗiyək daway, tuwak Kayin, yaŋ təmna: «Nərahək ɗəf səza Yawe.» 2Yaŋ təmsak uwa Abel məlməni.
Abel məzuteɗ timeŋgiɗi, na Kayin na, məzinse dəlvafuŋgi. 3Mawala agap na, Kayin akiyək zəga na Mabardaw ərəh nan naka dəlvafuŋ kawvəl dəndən sən Yawe; 4#IBR 11:4Abel tam akiyək uwa na məlviya net gilew nani gəm səlhã neti. Yawe awələk aza Abel də əvəl nani, 5ya duwəl aza Kayin də əvəl nan ɓa. Kayin adəkgədəv diyɗa, ampak kiyən afuŋgu. 6Yawe anah sən Kayin na: «Vimi kədawdagədəv di? Vimi kəmpa kiyuk afuŋ di? 7An moggon kəgəɗ na, wakəsilgin kiyko. Ya an moggon kəgəɗ ɓa na, mambray tay a maddambok ɗuffo, man aka əska wəloko. Dəɗah nok, aska wəlani.»
8 #
MAT 23:35; LUK 11:51; 1YOH 3:12 Yaŋ Kayin anah sən Abel, məlmən na: «Damsa awra ɗa.» Adan addoŋgu, ndən akan le', bay əbayni.
9Yawe anah sən Kayin na: «Ngay məlmuk Abel di?» «Amna, nəsən ɓa. Məzutaɗa na məlmuw nan sa?» 10#IBR 12:24Anahək na: «Miy kəgəɗəŋ di? Wəlet mbel na məlmuk Abel səfuŋ, tay əhəmaŋ kəlazawa. 11Kakaŋ na, mərayguk kənan aka dələv məs dəkol man kawtef mbel na məlmuk səvoko. 12Pay kinsi aka dəlvafuŋgu, azban na əgəɗ suk zəga əmpa ɓa. Slorslor kədassok məza əffet ɓa aka dəlvafuŋ.»
13Kayin anah sən Yawe na: «Heslepe nawəŋ adayək ki nawsla. 14Yaŋ na kərɓahawək dəpaŋ səka dəlvəŋka, wanəɗam faraɗa səma horoko, wanəbbal aka dəlvafuŋ slorslor məza əffet ɓa. Ɗəf an dərəhuw pak wabaywa.» 15Yawe aɓsən na: «Vi vaski ɗəf dəbay Kayin na, kampəlni kiyən təl buhulu.»
Yaŋ Yawe agəɗ zəga aka Kayin nawsənən azani, vi ɗəf dərəh pak adawbayin ɓa. 16Yaŋ Kayin azar səba Yawe, alək əsan aka dələv na Nod kəlammba pay nampum na Eden.
Zev Kayin
17Kayin asəntək ɗak nani, təɗiyək daway, ndət bok uwa Henok. Kayin ampak walaŋgəla-metiŋ, alvan na Henok də iya na wətən naka. 18Henok tam awa Irad, afən Mehuya'el; Mehuya'el, bok Metusa'el, Metusa'el van tam awa Lamek.
19Lamek akayək gil sula; iya nat taka na Ada, akən maɓɓat tam, Silla. 20Ada tuwak Yabal; ndəni afit ɗiy naddəv gizlirke dit gazlaŋɗe. 21Iya na məlmən na, Yubal; ndəni afit məbayaŋ gəzləŋtəndəŋ gəm muffoŋ pozlorɗe. 22Nat Silla tam tuwa Tubal-Kayin, məŋzla məzuɗel zəgeɗ məs met pakə məzərsla təbəz pepreŋge, gəm təbəz titir pakə; məlmən Tubal-Kayin muguluŋgut tat iya nat na, Na'ama.
23Lamek aɓsit gil nan na:
«Ada dət Silla, məprəm əpel nawa,
gil na Lamek, məpak sləmokum
ammba an nədawnəhã!
An vaŋvi aɗiyək azawa, in ɗəf nan bayə,
an gəla ərga yi, in muzliya bayə.
24Vi əmpəlkiya na Kayin wagəɗ təl buhulu,
ya na Lamek wasan gap təl kaklaw buhulu kiyən buhulu.»
25Adam asəntək ɗak nan əmpa, tuwək wiyna, təlvan na, Set, «Təmna: vi Maŋgəlva aɗi suwək zəŋve maɓɓan a gəla Abel, məs Kayin abayəŋka.»
26Yaŋ Set, awə wiyin tamə, alvan na, Enos. Səza daski ləŋ mətəŋ əkkaman Maŋgəlva də iya na Yawe.
All right reserved