Yohanes 2
2
As Kana nengabo kelabo top tareka
1Nen ik phende wameka wilindip sum eneko as Kana Galilea so'oag agha nengabo kelabo top tangkamnepne sembe sani yolamekpa, Yesus ilin babe aneko wamog. 2Nengabori kelabo tomnepne sembe sani yobaek nimi tanekori, “Yalulom,” aro Yesusap eldi yubu ka'ero neleptop nimiap babe yopsiek. 3Yopsiekpa piek aghana, anggur lolterop mag tero sumbanep komdina, ilindi Yesusag yubu ambarelamogti, “Sindi anggur lolterop mag nimiag tebatsinepne orog tal,” aro ambarog.
4Wene aro ambarogpa, Yesusti ilinag samoro, “Nanin, wene aro ambatnelam tanena, ‘Welaro uaho,’ sembalamdi leplam? Na lag nenep tanep sum eneko anam kwelekto paiamla kom,” seog.
5Wene seogpa, Yesus ilindi yeplamsiek nimi tanekoag ambarelamsiogti, “Eldi sa'a-sa'a ambatsilenge sunsunum uro ualulom,” seog.
6Wamekag aneko sin Yahudi nimiri Allah omektopne sunsunum uro sembenga a'alenne sembe mag tero liroba hogtop kirik no'opbare wamog. Mag liroba hogtop kirik no'opbare taneko nubungena, kau sa'obare teknero hogtop kirik nhonag mag agha ikto libanba, teknep tanep. Ni no'opbare babe a'ero-a'ero undo libanba, teknep tanep.#2:6 Mag agha ikto libanba teknep tanep nena, 75 liter anabi 120 liter anabiag saog wamla.
7Nimi yeplamsiek nimi tanekoag Yesusti yubu lelamogti, “Mag liro pairoba wamlange mag teknero lipli pululom,” seog.
Wene seogpa, sindi mag tero tekneloplo piek.
8Mag tero teknelobekpa, Yesusti sinag yubu lelamogti, “Wene mag tero libalom mag aneko olog kwepto tepmundi, sani purum toamlange ponekoag tarel pululom,” seog.
Wene seogne sunsunum uro tarel piek. 9Sani purum toamogne ponekori elag tarek mag aneko tero yamolamogpa, mag aneko agha anggur mag taog. Sin mag kwepto tarel pina yeplamek nimi taneko agha uro yabiogne sembe el uro wamek.
Sani purum toamogne ponekori tero yamolamog abeneko, “Tala siba payaang mag,” aro ekon wamog. Ekon wamogti, ponekori kelabo tomnepne poneko yobogti, 10yubu lelamogti, “Nimiri mag anggur tebatsirop nena, wali sirik mag samenag tebatsinep. Tanena nimiri maiknoro tendi, ‘Sao wali, sao mali,’ semban koma wamnep tanena, amik olog sao malinge nimiag tebatsinep. Aghana nangkae, andi mag anggur wali sirikne paia ulamlam mag aneko weneog tebatnuahilam,” seog.
11Yesusti undo, “Allah mikibari el pere agha ual,” senenne kekneba samne as Kana Galilea so'oag uaog. Undo unuaogneag agha, Allahri imang wareroba elag wamlange samenag alniro lag taog. Eldi undo unuaogneag agha eldi yubu ka'ero neleptop nimi taneko elag sikne aro wana palilamek.
12Aneko Yesusti undo unuaogti, ilinap ilipsabo taptopneap, eldi yubu ka'ero neleptop nimi tanekoap nhon as Kapernaum sip kulukul piekti, ik etpare as anekoag wamek.
Yesusti Allahri Mem Ae aramag wa'ina nimi yag lambahiogha
(Matius 21:12-13; Markus 11:15-17; Lukas 19:45-46)
13Wamogpa Yahudi nimiri ik nubu sum Paskah seneragto ul palamekne peram taogpa, Yesus as Yerusalem waelbaog. 14Yerusalem pina Allahri Mem Ae aramag aneko piog. Ae aramag wa'ina kemelamsiogpa, nimiri pham sapiap, pham dombaap, winang yalmaap, “Yingkirop nimiri Allah sembe tatnepne kamna kapto tobukang,” aro pail alamek. Kamna kaptoba wanange nhonag agha nhonag amomoro kaplamek nimi babe aneko pukamekpa ipsiog. 15Ipsiogti Yesusti haing agha sumbongkia pham dombaap, pham sapiap yagto pabahineba suku-sengero saelbamogti, nia pail wa'ina tolameka taneko Allahri Mem Ae aramag agha yag lanalamsiog. Sin kamna kaptoba wanange nhonag agha nhonag amomoro kaplamek nimi tanekori kamna kaptoba wanange meja alibag paiamekne aneko Yesusti teng-tengero nagsiog. Teng-tengero nagsiogpa, kamna kaptoba wanange yam-yamoro so'oag pelengelolamsiogti taluplopsiog. 16Yam-yamoro taluplopsiogti, sin winang yalma paliro kamna kaplamek nimi tanekoag ambarelamsiogti, “Nia tane popmundi pululom. Na Naniri aeag aneko nia mangkina pail wa'ina kamna kapto tonag nembaheng kom,” aro ambatsiog.
17Undo unuaogpa, Yesusti yubu ka'ero neleptop nimi tanekori seneraghekti, Allahri Yubu toro pairop momeag wamlange el taek. El taek momena,
“Andi Ae o'omne nenelamnangeri
na wana telamnelul,”
aro mome toro pairopne sembe el taek.#Sepna 69:10
18Yesusti unulamogne sembe Yahudi nimi nubunang tanekori elag yubu lelamekti, “Andi kekneba huropne agha uamen andarina, nuri ililameberi, an sembe, ‘Allahri mikipne elag piboba, nia aneko ulamla,’ sembaukap?” aro haibaek.
19Wene aro haibaekpa, Yesusti sinag samoro yubu lelamogti, “Mem Ae ene kwerekto loba nembamunba, ik wilindi sum agha nen sekitnun,” seog.
20Wene seogpa, Yahudi nimi nubunang tanekori, “Mem Ae ene sonne hengkun teng nhon epto supna tarabare agha sobaek aghana andi, ‘Ik wilindi sum agha nen sobanun,’ selam te?” aro haibaek. 21Aghana Yesusti, “Mem Ae,” seogne eldamne Yesus nong sembe lebog.
22Eldamne nong sembe lebog ane sembe, Yesus amik tebaogti, teptop nimi anabiag agha kamag taogpa, eldi yubu ka'ero neleptop nimi tanekori seneraghek. El taekti, “Samenag lebog yubuap, Allahri Yubu toro pairop momeag wamlangeap abeneko sik uro yabio,” aro sik sembaek.
Yesusti nimi ni iamsildi, el wamla
23Yahudi nimiri kwaneng roti walerop komne tero ulamek ko'o alnirop sum Paskah sum eneko sembe Yesus as Yerusalem wamog. Aneko wamogti, “Allahri mikipne el pere agha ulamla,” senenne kekneba ulamogpa, nimi maiknori ililamekti, el siag sikne aro seneraglamek. 24Sik senelamek aghana, Yesusti nimi ni el wamsiog ane sembe, “Nanag wana khapto palilamneang,” senelamog komdi, el mori sin nimi tanekoag wana palilamog kom. 25Nimiri wanaag uropne el wamogti, ekon uro koma wamog ane sembe, mog so'oag nimi sembe nimi nhondi babe elag sikne tibin nenero ambatnepne wamog kom.
נבחרו כעת:
Yohanes 2: kklKOS
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2023 (Active), Wycliffe Bible Translators, Inc. All rights reserved.
