Matta 18
18
Ɓə wonə pɨri ka kpanətə a həmnə pwa?
(Markus 9.33-41; Luka 9.46-50)
1A itɨngɨn lagbe da Yesu a shi hakan a ɗiyən atɨ, “Wonə pɨri ka kpanətə kat a vor həmnə pwa?”
2Nda wa a nzə-ɓyeləngə a kangdən a wakasərən. 3Nda sarən atɨ, “Diyalə na dɨ boyownə, anda hwunaa nggəɗə a gə ɓətɨ ji-kurkuryi, hwunaa dɨ ga pɨrə vor həmnə pwa. 4Gə ləngɨn, ma hyata nəngɨn ɓətɨ nza nə, sɨnə pɨri ka kpanətə kat a vor həmnə pwa.
5“Ma kat luu nzə-ɓyelənge ɓətɨ wule anə gəkɨlə le de, mangɨn luri. 6Shezə anda ama ɓa ɗɨkdə hiɗə dɨ vor ji-kurkuryinə 'ye mwadiyale ke nda pawo a fukə vor səhase, ndɨka mya ɓoyə mangɨn tɨmtɨ-sɨdatə a wurangɨn a ɗiman a vor gbɨnuwtɨ sɨkorən.
7“Sə oti ka vɨratə gəkɨlə wule shinə a vɨratə 'ye dɨ ɗɨkdə ɓwaare təna pawo a fokə vor səhase. Mbak-mbak wule shinə ɓa ɗa, shezə sə oti ka ma ɓa gəə mgbaalə səhasəngɨn. 8Anda tɨfanga naasə mbwaranga nə ɓa ɗɨkda hye ɗa səhase, bənggən ɗongdən. Ndɨka hye ɗɨm myente kaaru-kaaru ka tɨfe hiɗə, naasə mgban ka mbwara hiɗə, angɨn pɨrgə ite mya ɗongda a vor ɗiya dɨ ləwi kaaru-kaaru ka tyefinga dɨ kpeyə naasə ka mbwayinga dɨ kpeyə. 9Anda diisa nə mgban ɓa ɗɨkda hye ɗa səhase, hye gwangaɗagərə a ɗongdə. Ndɨka hye pɨrə myente kaaru-kaaru ka diitə hiɗə, angɨn nə pɨrgə ite mya ɗongda a vor ɗiye ka diinga dɨ kpeyə kat.
Byelə səɗe a nə nzə-mbagaa kipi
(Luka 15.3-7)
10“Hwuna bədə myensəwnə, ɓe hwunaa ushi nagi hiɗə dɨ vor ji-kurkuryinə. Hɨnə dɨ səwnə atɨ, malyenye darən nee dɨ nidə humwa Baagi arə a vor pwa. 11Hɨn Nze da Ɓwaara na shi gəkɨlə na mbədə myee kyepi.#18.11 Dorshi kwamətə tam ka Matta 18.11.
12“Ya hwuna niya? Ama ka mbage haru, hiɗə dɨ vorsərən a ɗeyə a kipə. Ndaa dɨ ɗaka irə bəwtə dombiɗə a mbiɗi-dombiɗə a nə mwe a wudə a ɨl itɨrə kipi? 13Anda ɓə ɨlə ɗɨmatɨrə, diyalə na dɨ səwnə, haa ɓa nɨngən a pɨrgə bəwtə dombiɗə a mbiɗi-dombiɗə 'ye aa ɗeyə. 14Sə mgban, Baagəwnə arə a vor pwa aa mwosən nə atɨ hiɗə dɨ vor ji-kurkuryinə a kipə.
Anda kpeyəsa ɗəw səhase
(Luka 17.3)
15“Kpeyəsa kana ɗəw səhase, wudə hakan bɨlən səhase dan hwun dɨ kpeyə. Anda ɓə sardə kwakingɨn kɨlta, ɓə wula, hye viriwadən a tɨfe. 16Anda ɓə kwo ndaa kɨlta, mɨni wa ama hiɗə, naasə mgban ɓwaare kpe ‘gəkɨlə dɨ kwaamɨ ji-takale kpe naasə mwaakɨn, byele a dɨ nzaa diyalə.’ 17Mangɨn kana kwo ndaa kɨltɨrən, hye boyə mbiɗitɨ ji-kottə kat a vɨnə hiwtə, ndi kana kwo ndaa kɨl le da ji-kottə, hye ɗakan a mɨndən ɓətɨ wule ma aa le Həmɨnpwa, naasə mgban hye mɨndən ɓətɨ nzə-luu taa shemti.
18“Diyalə na dɨ boyownə, sa kat hwuna ɓoyə ganə a vɨratə mye ɓoyə gaarə a vor pwa, sa kat hwuna paran ganə a vɨratə mye paran gaarə a vor pwa.
19“Diyalə na mɨna dɨ boyownə atɨ, ɓwaare kpe a vor vɨratɨnə kana kɨləsə, a mwasə a nə sa təna nyishi, Baagi arə a vor pwa ɓa ɗəwnə səngɨn. 20Gəkɨlə haa ɓwaare kpe naasə mwaakɨn a peyə də a vor kwaka, hɨne də a wakaa mingɨn.”
Byelə səɗe a nə kɨsa aawa ɗa purutə
21Də Bitrus a shi haka Yesu a ɗiyən atɨ, “Həmɨmiye, laka ya hɨn ɓa ngguro kpeyəshi a ɗe səhase? Laka tukolukpe ma?”
22Yesu a luwa a san atɨ, “Hɨnə dɨ boyu, ɓa pɨrgə tukolukpe. Hya nggurən gən bəwtə tukolukpe laka tukolukpe.
23“Gəkɨlə ləngɨn mye ɓa kana həmnə pwa ka a həmə, a dɨ mwi atɨ nda lee kiira nda dɨ koɗə ji-hwodan, gələ mya mbwan. 24Ite nda tiya kot kiirəngɨn, ama hiɗə dɨ vor ji-lyentɨngɨn nə ka kiirə taa a nəngɨn kɨr-kɨr. Mya kɨsa mangɨn a shikan a haka həmɨn. 25Na ite mangɨn tamdə ka asə ɓa mbwa taangɨn, həməngɨn a sa atɨ a mya kɨttən ka mesən ka jingɨn kat a ɗərdərən gə mya mbwa kiirəngɨn.
26“Kɨsangɨn a gyerə a nyisə, nda sa, ‘Zə nggur mbasɨtə ke, na mbow kat.’ 27Həmɨn a ɗa purusən, a nggurəngə kiirəngɨn a ɗakan nda muɗə.
28“Ite kɨsangɨn a dɨmgə humwa həmɨn, nda zagə hiɗə dɨ vor ndewe lyentɨ dan, a kɨsən kiirə taa ɓyeləng. Nda pan a gbaamə a kɨsə wurangɨn pɨp ta gbəkedən a san atɨ, ‘Mbwagə kiira hye kɨshi.’
29“Ndewe lyentɨ dan a gyerə njiya a nyisən a san atɨ, ‘Mbasɨsa ke hɨn ɓa mbow.’
30“Nda kwon ləngɨn a ɗɨkə mya gbən a gbərəwe baa nda mbwagə kiirəngɨn. 31Ite mbiɗitɨ ndewe lyentɨ darən a naa ləngɨn, yedingrən a kɨɗərən kɨr-kɨr, təna zə a dɨ boyə həmɨn ləngɨn kat ka sa ɗa.
32“Də həmɨn a wa mangɨn nda pɨrə hakan. Nda san atɨ, ‘Hye kɨsa hasə, na nggurugə kiire dəw kat gəkɨlə hye nyishi. 33Ɓə hye aa nda kana hye nda ɗa purutɨ nduwanga nzə-lyenti ɓətɨ na ɗa purusa?’ 34Ka yedi-kɨttə həmɨ-hwodan a ləkədən a haka ji-jin ji-gbərəwye, gəkɨlə mya tofidən baa nda mbwagə kiira a nəngɨn kat.
35“Sə mgban Baagi arə a vor pwa ɓa ɗa ka nagi ndo ma a wakasəwnə a ma aa ngguro kpeyəsən gə səhase dan dɨ vor hubosən.”
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
