Mataayo 9
9
Yeesu ari na obhuturo bhwa okufwira echigongo ebhibhiibhi
(Maariko 2:1‑12; Ruuka 5:17‑26)
1Mbe, Yeesu ˆnaariinya mu‑ngama, ˆnaambuka inyanja ya Gariraaya rindi, ˆnaasubha Kaperinaawumu, mu‑musi gunu aariga eekaaye‑mo. 2Ejire aakinga eyo, abhaanu abhandi nibhamureetera omuunu unu aariga afuuwe omubhiri, amaamire kw‑iraro. Yeesu ejire aarora eriikirisya ryebhwe, ˆnaabhwira omurwaye oyo ati, “Omwana waani, siiriika! Waafwirwa echigongo ebhibhiibhi bhyawo.”
3Niwo abheeyigisya abhandi bha ebhiraagiro bhya Muusa bhanu bhaariga bhari awo, nibheeyayikira mu‑mitima jeebhwe ati, “Omuunu unu keefumirisya Nyamuwanga!” 4Nawe Yeesu aasombookerwaga joone jinu bhaariga nibheeganirisya, ˆnaabhabhuusya ati, “Ni kurwa ki omwiganirisya emibhiibhi mu‑myoyo jeemwe? 5Woori ni guuya omwangu okukira ogundi? Okumubhwira ati, ‘Waafwirwa echigongo ebhibhiibhi bhyawo,’ amwi okumubhwira ati, ‘Imereeguru, uribhate’? 6Nawe eneenda mumenye ati, anye Omwana wa Omuunu niyaaywe obhuturo bhwa okufwira echigongo ebhibhiibhi mu‑chaaro munu.” Neeya Yeesu ˆnaabhwira omuunu unu aariga afuuwe omubhiri ati, “Imereeguru! Ugege riraro ryawo, ugende iika ewaawo.” 7Awoawo, omurwaye oyo ˆneemuka, ˆnaagenda iika ewaaye. 8Abhaanu bhejire bhaarora ejo, nibharuguura na okuubhaya muno. Nibhakusya Nyamuwanga unu ayaaye abhaanu obhuturo bhwa imbaga eyo.
Yeesu eejire okuchungura abha ebhibhiibhi
(Maariko 2:13‑17; Ruuka 5:27‑32)
9Yeesu ejire aasooka awo, bhunu aaribhataga ku‑njira, ˆnaarora omutobhesya umwi wa rigooti unu aatogwaga ati, Mataayo. Omutobhesya oyo, aariga eenyanjire mw‑itobhesisyo rya rigooti. Yeesu ˆnaamubhwira ati, “Nuunduubhe.” Awoawo, Mataayo ˆneemuka, ˆnaamuruubha.
10Mbe, Yeesu ˆnaagenda na abheeyigisibhwa bhaaye okurya ebhiryo iika wa Mataayo. Omwanya gunu aariga acheenyanjire mu‑nju omwo, ringira, nibheengira abhatobhesya bhaafu bha rigooti, na abhakosi bha ebhibhiibhi abhandi, nibheenyanja ku‑nenda okurya ebhiryo na Yeesu aamwi na abheeyigisibhwa bhaaye. 11Abhafarisaayo bhejire bhaarora ejo, nibhabhwira abheeyigisibhwa bha Yeesu ati, “Mbawo, omwiyigisya weemwe kaarya aamwi na abhatobhesya bha rigooti na abhakosi bha ebhibhiibhi!”
12Yeesu ejire oongwa emisango jeebhwe, ˆnaabhabhwira ati, “Abhaanu bhanu bhatarwaye bhatakukena omuragusi, tari abharwaye nibho abhamukena! 13Mbe, mugende mwiyigire obhugajuro bhwa emisango ja Nyamuwanga mu‑Bhikaame Ebhyeru. Kaayika ati, ‘Eneenda mubhe na echigongo okukira okusoosya echoogo.’#9:13 Ringira Woseya 6:6. Mbe, anye ꞉niteejire okubhirikira abhaanu abharengeresi bhayindukire Nyamuwanga, tari abhakosi bha ebhibhiibhi.”
Emisango emiyaaya ejitaasyanya na eja kara
(Maariko 2:18‑22; Ruuka 5:33‑39)
14Niwo abheeyigisibhwa bha Yowana Omubhatiija nibhaaja ku‑Yeesu, nibhamubhwira ati, “Eswe na Abhafarisaayo, echiiyimaga okurya ebhiryo. Angu, ni kurwa ki abheeyigisibhwa bhaawo bhatakwiyima okurya ebhiryo?” 15Yeesu ˆnaabhasubhya ati, “Angu, abhaanu bhanu bhakokerwe mu‑bhuregesi, abhatura kutiki okusurumbara omutwasi achaari aamwi nabho? Nawe jisiku ejiija, jinu omutwasi arisoosibhwa‑wo. Mbe ku‑mwanya ogwo, niwo bhariiyima okurya ebhiryo.
16“Atari‑wo omuunu unu kaabhariirira echirepa echiyaaya ku‑mwenda omukokoro. Araabha aakakora kutyo, echirepa echiyaaya echo, chiritemuka, riwundu rya omwenda ogwo, riribha egari muno. 17Ka wone, abhaanu bhatakutuuraga echifuufu#9:17 Echifuufu. Ku‑meeresyo amaafu, ringira mu‑Meeresyo inguru ya Emisango Emikomeeye. echiyaaya mu‑sagwa ja jinjayi jingʼokoro. Araabha bhakakora kutyo, jisagwa ejo, ejaatika, echifuufu nichiwurura na jisagwa ejo joone ejinyamuka. Nawe, abhaanu abhatuuraga echifuufu echiyaaya mu‑sagwa jinyaaya. Kurwa ejo, jisagwa jinyaaya na echifuufu echiyaaya, bhibhiri bhyone ebhibhiikwa kisi!”
Yeesu kaasuurura omuyarakaji na okuwosya omugasi wa echisiiro
(Maariko 5:21‑43; Ruuka 8:40‑56)
18Omwanya gunu Yeesu aariga achaayika emisango ejo, ˆnaaja omukuru umwi wa inju ya eriikofyanyo, ˆneefukama imbere yaaye, ˆnaamubhwira ati, “Omuyaasya waani, kaamara okufwa woori anu! Enisabhwa chigende, umuteere‑ko okubhoko kwawo, omwoyo oguja okumusubha‑mo rindi.” 19Niwo, Yeesu na abheeyigisibhwa bhaaye, nibheemuka nibharuubhana na omukuru oyo.
20Mbe, omwanya ogwoogwo omugasi umwi unu aariga arwaye echisiiro emiguuga ekumi na ebhiri, ˆnaaja inyuma ya Yeesu, ˆnaakuunʼya ku‑bhisangʼarye bhya ku‑bhufunyiro bhwa omwenda#9:20 Ku‑bhisangʼarye bhya ku‑bhufunyiro bhwa omwenda. Abhayawudi bhaariga nibhafwara emyenda jinu omwanya ogundi ku‑sonde jaajo bhyariga bhiri‑ko ebhisangʼarye. Nyamuwanga niwe ꞉aabharagiriiye okukora kutyo korereki rubhe orwichukyo ku‑bheene na ku‑rwibhuro rwebhwe ati abheendwa bhabhe abheeyikanyibhwa ku‑bhiraagiro bhya Nyamuwanga. Ringira Obhukumi 15:37‑41; Orwichuko rwa Ebhiraagiro 22:12. gwa Yeesu. 21Okubha ꞉eeyayikiiye mu‑mwoyo gwaye ati, “Araabha nikakuunʼya ku‑mwenda gwaye era, enija okuwora.” 22Ejire aayikuunʼya‑ko, awoawo Yeesu ˆneekebhuukira inyuma. Ejire aarora omugasi oyo, ˆnaamubhwira ati, “Muyaasya waani, siiriika! Waawosibhwa ku‑songa ya eriikirisya ryawo!” Awoawo, omugasi oyo ˆnaawora.
23Mbe, Yeesu ejire aakinga mu‑nju ya omukuru wa inju ya eriikofyanyo urya, ˆnaasongʼana abhaanu bhaafu bheekumanyiisye mu‑nju omwo, keenu nibhariraga muno na okubhuma jikuri ja obhusurumbaaye. 24Yeesu ˆnaabhabhwira ati, “Muwuruke munu! Omuyarakaji unu achaari okufwa, tari awongeeye era.” Abhaanu abho bhejire bhoongwa kutyo, nibhaseka Yeesu kabhikabhi nibhamusiijaakaga. 25Ebhise bhya abhaanu bhyejire bhyawuruka‑mo, Yeesu ˆneengira mu‑chisago, ˆnaamugwata okubhoko, omuyarakaji oyo ˆneemereeguru! 26Emisango ejo, nijiswirana ku‑chaaro chirya choone.
Yeesu kaawosya abhawofu bhabhiri
27Yeesu ejire aasooka awo, abhawofu bhabhiri nibhamuruubha, nibhaamura obhuraka nibhaayikaga ati, “Omwana wa Dawudi,#9:27 Omwana wa Dawudi. Ku‑meeresyo amaafu, ringira mu‑Meeresyo inguru ya Emisango Emikomeeye. echisabhwa uchifwire echigongo!” 28Omwanya gunu Yeesu ꞉eengiiye mu‑nju indebhe, abhawofu abho, nibhamuruubha‑mo. Mbe, Yeesu ˆnaabhabhuusya ati, “Angu, omwikirisya ati, enitura okubhawosya?” Nibhamusubhya ati, “Yee, Raatabhugenyi!” 29Niwo Yeesu ˆnaakuunʼya ku‑meeso geebhwe, ˆnaabhabhwira ati, “Ku‑songa ya eriikirisya ryemwe, ejija okubha kutyo.” 30Awoawo, ameeso geebhwe nigeeguka, nibharora. Yeesu ˆnaabhakomeeresya muno, ˆnaabhabhwiraga ati, “Mwasiga okubhwira omuunu woonewoone omusango gunu!” 31Nawe nibhagenda, nibharaasyaga emisango jaaye mu‑chaaro chirya choone.
Yeesu kaawosya omujibhi
32Omwanya gunu abhawofu abho, bhaasookaga awo, ringira abhaanu abhandi nibhareetera Yeesu omuunu unu aariga awungirwe risambwa rinu ryariga rimukorere okubha omujibhi. 33Yeesu ˆnaamusoosya‑ko risambwa eryo, awoawo omuunu oyo, ˆnaamba okwayika. Abhaanu bhanu bhaariga bharya‑wo nibharuguura muno, nibhaayikaga ati, “Mu‑chaaro choone cha Yisirayeeri, guchaariga okukorekana omusango rwa gunu noorwo na akatyari!” 34Nawe Abhafarisaayo nibhaayika ati, “Omuunu unu kaasoosya‑ko amasambwa ku‑bhuturo bhwa Syetaani, omukuru wa amasambwa goone!”
Yeesu kaafwira echigongo abhaanu
35Mbe, Yeesu aaturaga enu na erya mu‑misi joone na mu‑nguuyo. Woonewoone anu aariga ˆnaatura, eengiraga mu‑nju ja ameekofyanyo geebhwe na okwiyigisya abhaanu. Ka wone, aaraasyaga Emisango ja Ekisi inguru ya obhukama bhwa mu‑rwire na okuwosya abhaanu abha amarwara ga bhuri mbaga. 36Yeesu ejire aarora ebhise bhya abhaanu, ˆnaabhafwira echigongo, kwa okubha bhaariga bhaayigirwe, na bhaariga bhatari na omuunu wa okubhasakira. Abhaanu abho, bhaariga bhari rwa jinaama jinu jitari na omureefi. 37Mbe ˆnaabhwira abheeyigisibhwa bhaaye ati, “Ebhigeswa ni bhyafu, nawe abhagesi ni bhatyari. 38Kurwa ejo, musabhwe Raatabhugenyi omwene esambu, korereki oongesye abhakosi abhandi mw‑isambu ryaye bhaje okugesa.”
© 2023, Wycliffe Bible Translators, Inc. All rights reserved.
