Mataayo 10
10
Yeesu kaatuma abheeyigisibhwa bhaaye ekumi na bhabhiri
(Maariko 3:13‑19, 6:7‑13; Ruuka 6:12‑16, 9:1‑6)
1Neeya, Yeesu ˆnaabhirikira abheeyigisibhwa bhaaye ekumi na bhabhiri, ˆnaabhayaana obhuturo bhwa okusoosya‑ko amasambwa na obhwa okuwosya abhaanu abha amarwara ga bhuri mbaga. 2Amasiina ga jitumwa#10:2 Jitumwa. Ku‑meeresyo amaafu, ringira mu‑Meeresyo inguru ya Emisango Emikomeeye. ekumi na bhabhiri abho, nigo ganu,
Wa okwamba ni Simooni unu aatogwaga Peetero na Andereya owaabho, Yakobho na Yowana abhamura bha Jebhedaayo, 3Firipo, Bhatoromaayo, Tomaasi, Mataayo unu aariga ari mutobhesya wa rigooti, Yakobho omwana wa Arufwayo, Tadaayo, 4Simooni Omukananaayo#10:4 Simooni Omukananaayo. Aariga ari na amasiina gabhiri, erimwi ni Simooni Omukananaayo, erindi ni Simooni Omujeroote. Goone ago gari na obhugajuro bhumwi, omuunu unu aariga arwanire riremo rya obhwitaage okusooka mu‑bhutungi bhwa Echiruumi. Ringira Maariko 3:18; Ruuka 6:15. na Yuuda Isikariyooti unu ꞉aaromeeye Yeesu iniku.
5Mbe, Yeesu ˆnaatuma jitumwa ekumi na bhabhiri abho, ˆnaabharagirira, ˆnaabhabhwiraga ati, “Mwasiga okuja mu‑bhyaro bhya abhaanu bhanu bhatari Bhayawudi, ka wone, mwasiga okwingira mu‑musi gwonegwone gwa Abhasamaariya. 6Tari mugende ku‑Bhayisirayeeri, kwa okubha bhari rwa jinaama jinu jibhurire. 7Mu‑kugenda kwemwe, muraasyega, nimwayikaga ati, ‘Obhukama bhwa mu‑rwire bhuri yeeyi!’ 8Muwosyega abharwaye, musuururega abhafuuwe, mwesyega abhagenge na musoosyege‑ko amasambwa okusooka mu‑bhaanu. Muyaaywe obhuturo obhwo kutyo era, woori emwe wone, musakirega kutyo era. 9Mwasiga okugega inaaryo, amwi jipirya, amwi jiyera mu‑sagwa jeemwe. 10Ka wone, mwasiga okugega isagwa ya orugendo, amwi emingiro ebhiri, amwi ebhiraato, amwi isimbo. Okubha omukosi wa emirimu, eeyire ayaanwe ebhiinu bhinu kaakena.
11“Omusi gwonegwone amwi oruguuyo rwonerwone runu muringira‑mo, muyenjeresye omuunu unu emariiriiye okubhakuma iika ewaaye. Mbe, mwikare ewaaye awo, okukingira orusuku runu murisooka mu‑ruguuyo orwo. 12Omwanya gunu omwingira mu‑nju yaaye, mukeesye abhaanu bheende‑mo. 13Araabha mu‑nju omwo, bhari‑mo abhaanu bhanu abheenda omurembe, omurembe gwemwe gubhe omwo. Nawe araabha abhaanu abho, bhatakugwenda, mbe omurembe ogwo, gubhasubhire emwe abheene. 14Araabha mukeengira mu‑nju yooneyoone amwi mu‑musi gwonegwone na abhaanu bheende‑mo nibharema okubhakuma, na okubhategeresya, mukasooka mu‑nju eyo, amwi mu‑musi ogwo, mukuukumure oruteeri rwa ku‑maguru geemwe.#10:14 Mukuukumure oruteeri rwa ku‑maguru geemwe. Obhugajuro bhwajo ni ati, Nyamuwanga aarema abhaanu bha orubhaara rwo, kwa okubha abheene wone ꞉bhaaremere abhakosi bhanu ꞉aatumire ku‑bheene. 15Ni chimari enibhabhwira ati, orusuku rwa indamu, Nyamuwanga arisoosya indamu isito muno ku‑bhaanu bha omusi ogwo, okukira inu arisoosya ku‑bhaanu bha emisi ja Sodoma na Gomoora!#10:15 Ringira Obhwambiro 19:24‑29.
Ebhinyaasyo bhinu bhiriija
(Maariko 13:9‑13; Ruuka 21:12‑17)
16“Mutegeresye, enibhatuma rwa jinaama agati ya emisege. Mbe, mubhega na obhwenge rwa jinjoka, na mubhega abhoorooro rwa ebhiguuti. 17Mwikengega abhaanu, kwa okubha bharibhasira mu‑maramuriro, ka wone, bharibhasira mu‑nju ja ameekofyanyo geebhwe na okubhabhuma na jijaridi. 18Bharibhasira imbere ya abhatungi bha Echiruumi na abhakama bha Echiyawudi ku‑songa yaani. Murikenwa okubha abhabhambaasi bhaani imbere ya abhatungi na abhakama abho, na imbere ya abhaanu bhanu bhatari Bhayawudi. 19Bhaakabhasira, mw‑iramuriro eyo, mwasiga okuyaya ati, omuja okwayika ki. Nyamuwanga aribhayaana emisango ja okwayika ku‑mwanya ogwo. 20Okubha mutari emwe bhanu muribhaga nimwayika, tari ni Mwoyo wa Esomwana unu ari mu‑rwire, niwe aribhaga ˆnaayika okutura kw‑imwe.
21“Ku‑mwanya ogwo, omuunu wa inda imwi, ariromera iniku owaabho, korereki eetwe. Ka wone, omwibhusi wa echirume ariromera iniku omwana waaye, korereki eetwe. Abhaana wone bhatarigayuka abheebhusi bheebhwe na okureterera abheebhusi bheebhwe bheetwe. 22Abhaanu bhoone bharibhasoka ku‑songa yaani. Nawe, omuunu woonewoone unu ariigumiirisya okukingira ku‑bhuteero, niwe Nyamuwanga arichungura. 23Araabha bharibhanyaasya mu‑musi omurebhe, mbe mwirukire mu‑musi ogundi. Ni chimari enibhabhwira ati, mutarimara emirimu jeemwe mu‑misi joone ja Yisirayeeri, anye Omwana wa Omuunu nichaari kuuja.
24“Omwiyigisibhwa atakukira omwiyigisya waaye, na omugaya atakukira omwami waaye. 25Omwiyigisibhwa jiiyire abhe rwa omwiyigisya waaye, na omugaya wone kaakenwa abhe rwa omwami waaye. Anye niri mukuru weemwe, na abhambirikira ati, Bherijebhuuri.#10:25 Bherijebhuuri. Ni siina erindi rya Syetaani, omukuru wa amasambwa goone. Araabha, abhambirikira anye kutyo, angu, bhataribhabhirikira emwe amasiina amabhiibhi muno?
Muubhaye Nyamuwanga eenyere
(Ruuka 12:2‑9)
26“Mbe, musigega okuubhaya abhaanu abho. Okubha echiinu choonechoone chinu chibhisirwe, chiriswerurirwa, ka wone imbisike yooneyoone, irimenyekana. 27Emisango joone jinu enibhabhwira mu‑mbisike, mujiraasyega abhwerubhweru ku‑bhaanu bhoone, korereki bhajuungwe. Ka wone, joone jinu naabhabhwiraga kwa okubhobhootera, mujiraasyega kwa obhuraka bhunene. 28Mwasiga okuubhaya abhaanu bhanu abhatura okwita omubhiri era, nawe bhatakutura okwita omwoyo. Emwe muubhayega Nyamuwanga eenyere, kwa okubha omwene niwe kaatura okusingaarisya omubhiri na omwoyo mu‑muriro gwa akajaanende koone.
29“Jimakuyure ebhiri jitakugusibhwa yera nooto era? Aamwi na ejo, katari‑wo noorwo kamwi kanu akagwa aasi Esomwana ateendere. 30Nawe emwe, Nyamuwanga kaamenya obhukumi bhwa jifwiri ja ku‑mitwe jeemwe. 31Mbe, mwasiga okuubhaya, kwa okubha emwe muri na obhurambu obhunene okukira jimakuyure nyafu.
32“Omuunu woonewoone unu kaanyikirisya imbere ya abhaanu, anye wone nirimwikirisya imbere ya Raata waani unu ari mu‑rwire. 33Nawe, omuunu woonewoone unu kaanyigaana imbere ya abhaanu, anye wone nirimwigaana imbere ya Raata waani unu ari mu‑rwire.
Yeesu areetere obhusoko ku‑bhaanu
(Ruuka 12:51‑53, 14:26‑27)
34“Musige okwitogera ati, niijire ku‑chaaro anu okureeta omurembe. ꞉Niteejire okureeta omurembe wuri, tari niijire okureeta riremo. 35Niijire okukora omumura na esemwene, omuyarakaji na nyiramwene, omukamwana na nyaabhuko bhasokane. 36Abhasoko bha omuunu, bharibha abhaanu bha mu‑nju yaaye omwene.#10:36 Ringira Miika 7:6. 37Omuunu woonewoone unu keenda esemwene amwi nyiramwene okukira anye, oyo ateeyire okubha omwiyigisibhwa waani. Ka wone, omuunu woonewoone unu keenda omwana waaye amwi omuyaasya waaye okukira anye, oyo wone ateeyire okubha omwiyigisibhwa waani. 38Omuunu unu atakwenda okugega omusarabha gwaye#10:38 Okugega omusarabha gwaye. Obhugajuro bhwagwo ni kwikirisya jinyaako joonejoone jirya amwi noorwo okufwa ku‑songa ya okuruubha Yeesu. na okunduubha, oyo ateeyire okubha omwiyigisibhwa waani. 39Omuunu woonewoone unu keenda okwiwonʼya omwene, aribhusya obhuwanga bhwa akajaanende koone. Nawe omuunu woonewoone unu kaabhusya obhurame bhwaye inguru yaani, niwe aribhona obhuwanga bhwa akajaanende koone.
Echiyaanwa cha abhaanu bhanu bharikuma abheeyigisibhwa bha Yeesu
(Maariko 9:41)
40“Omuunu woonewoone unu kaabhakuma, kaabha aankumire. Ka wone, omuunu woonewoone unu kaankuma, kaabha akumire Nyamuwanga unu antumire. 41Omuunu woonewoone unu kaakuma omuragi kwa okubha ati, ni muragi wa echimari, Nyamuwanga ariyaana omuunu oyo, echiyaanwa rwa chinu ariyaana omuragi. Ka wone, omuunu woonewoone unu kaakuma omurengeresi kwa okubha ati, ni murengeresi, Nyamuwanga ariyaana omuunu oyo wone echiyaanwa rwa chinu ariyaana omurengeresi. 42Omuunu woonewoone unu kaayaana owumwi wa abheeyigisibhwa bhanu omutawo gwa amanji amanyiriiye ga okunywa, isonga iri ati, ni mwiyigisibhwa waani, ni chimari enibhabhwira ati, Nyamuwanga atarisiga okuyaana omuunu oyo, echiyaanwa chaaye.”
נבחרו כעת:
Mataayo 10: jit
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2023, Wycliffe Bible Translators, Inc. All rights reserved.
