Maake 7
7
Wo-digiru telo na chɔge nɔɔna to
Matiyu 15:1-20
1 Farisi tiina badaara de Wɛ nia zamesem tiina badaara déem ya nwoŋi Jerusalem ne, ye ba laam vo ba gilimi Yezu tei ne. 2Ba ma na o kwaga tɔgena badwonna na jei ba di wodiu ye ba wo sane ba jea se ko tɔge banto chullu tem chwoŋa. 3Ko na ye tei to, Juu tiina bam maama, ko fɔge ko dae Farisi tiina bam, yeini ba fɔge ba sane ba jea mo ye ba daare ba di wodiu. Ba tɔge chullu telo ba nabaara bam na pɛ-ba to mo konto. 4Ba ná yeigi wodiu yaga ne, ba wó sane ba jea mo ye ba laam daare ba di. Ba ta jege chullu dedɛ ba woli da ye ba tɔge-te. Ba yeini ba fɔge ba se ba zwe, de ba kɔɔra, de ba luu-kambi ye ba daare ba ke wodiu da.
5Ko ye konto ŋwaane mo Farisi tiina bam de Wɛ nia zamesem tiina bam déem bwei Yezu ba we, “Bɛ mo ye n tɔgena bam yeini ba di wodiu ye ba wo sane ba jea, ne dé nabaara bam na pɛ debam chullu telo to?” 6O ma leiri-ba o we, “Abam na ye pipiri-nyena to, Izaya déem jege chega de o na wuuri o ta abam taane faŋa faŋa tei to. Ko popone Wɛ tɔnɔ kom ne we:
‘Nɔɔna banto zuli amo de ba ni mo,
ye ba boboŋa tera amo tei ne.
7Ba na pae amo zula tei to maama ye kafɛ mo.
Ba bera yam tɔge nabiina boboŋa chullu mo,
ye ba pae se te ye amo nyem.’#Izaya 29:13
8Chega to, abam mo kwei Wɛ nia yam na bere tei to á yage, ye á daare á tɔge nabiina chullu.”
9O daa ta ma ta de-ba o we, “Abam yeini á ve Wɛ nia yam ye á daare á jege á tete boboŋa chullu mo á tɔga. Konto jege swa na? 10Faŋa faŋa to Moses déem bere Wɛ ni dem o we, nɔɔno jege se o taa zuli o kwo de o nu. O daa ta bere we, nɔɔno ná ŋɔɔne ta-balɔrɔ o pa o nu naa o kwo, konto tu jege se o te mo.#Nwoŋim 21:17 11Ko daare abam nam yeini á ja Wɛ taane dem á pipiri ye á we, nɔɔno ná jege woŋo kolo o ya na wó ma woli o kwo de o nu, ye o ná we, woŋo kom konto ye ‘Kɔban’ mo (ko kuri mo ko maŋe ko ye Wɛ nyem), 12ko bere we wonto daa ba jege se o kwei woŋo kom o ma zeini o kwo de o nu. 13Á na ke tei ye á bere nɔɔna se ba taa tɔge á tete chullu to pae se Wɛ ni dem daa ba jege kuri abam tei ne. Abam yeini á tɔge keim-balwaaro tento dwoŋi dedɛ.”
14Yezu daa ta ma bwoŋi nɔn-kɔgɔ kom pa se ba ba o tei, ye o ta de-ba o we, “Abam maama cheigi lanyerane se á ni amo taane dem kuri. 15Woŋo kolo maama nɔɔno na wó kwei o pa se ko zo o wo to bá wane ko pa o digiri o tete. Ko nam ye kolo na maŋe ko wo nɔɔno wone ye ko laam nwoŋi to mo wó pa o digiri. [16Á nam fɔge á cheigi a taane dem lanyerane.]”
17O laam ma vo o zo sɔŋɔ o daare nɔn-kɔgɔ kom pwooni ne. O kwaga tɔgena bam ma ba o tei ba bwei‑o taane dem kuri. 18O ma ta de-ba o we, “Abam de swa ta muri mo na? Á jege se á ta‑á yei we, woŋo kolo maama nɔɔno na wó kwei o pa se ko zo o wo to bá wane ko pa o digiri. 19Kolo ŋwaane ko bá wane ko chɔge o bochare. Ko nam wó tu o kana yerane mo, ye o laam daare o tɔ-ko o yage.” Yezu déem na tage chega kam konto to, o bere we wodiiru maama maŋe de dim.
20O daa ta ma ta o we, “Ko ye kolo na maŋe ko wo nɔɔno wone ye ko laam nwoŋi to mo wó pa o digiri o tete. 21Kolo ŋwaane ko ye nɔɔno bochare boboŋa mo pae se o lage wo-lwanno tɔgem. Ya maa wae ya pae o tɔge bwoŋa keim de ka-laga wo-zɔɔna maama. Ya maa wae ya pae o ŋɔna, naa o go nɔɔna. 22Ya maa wae ya pae o yi zoore wonnu dedɛ, naa o yaale nɔɔna, naa o gane nɔɔna. Ya ta maa wae ya pae o tɔge ka-laga wo-digiru kikia, naa o jege puseŋa, naa o ŋɔɔne o chɔge o dwoŋi yere, naa o bere o tete kamunim, naa o tɔge jworim kikia. 23Wo-balwaaro tento maama nwoŋi nɔɔno wone mo ye te pa o digiri.”
Kaane wodwoŋi ke o wo-dedoa de Yezu
Matiyu 15:21-28
24Yezu déem ma zaŋe o yage jei sem konto ye o daare o vo Tura nawuura yam seeni. O ma vo o zo sɔŋɔ kodwoŋi o maŋe da. O maa ba lage se nɔɔna lɔre o na wo mɛ to. O nam ware o seigi o tete nɔɔna tei ne. 25-26Kaane wodwoŋi maa wora, o na ye dwi-gɛ tu. Ba ya loge‑o Siria ne mo, jei selo ba na bwoi we Fonikia to. Chichira maa jege o bukɔ ka daana. Konto ŋwaane, o na tu o ni Yezu ŋwa to, o ma ke lela o vo o tei ye o tiiri tega ne o yiga ne. O ma lwoori‑o se o zeili setaane dem pa de yage o bukɔ wom yera. 27O na lwoori konto to, Yezu ma ta ded‑o o we, “Bia bam mo jege chwoŋa se ba da yiga ba di ba daare. Ko wo maŋe se nɔɔno jwoŋi o bia wodiu o dole o pa kukuri.”
28Kaane wom maa we, “Amo tu, n tage chega. Kukuri selo na tigi tabolo kuri ne to nam jege chwoŋa se se twɛ wodiu kolo bia bam na di ye ko siiri tega ne to mo se di.” 29O laam ma ta de kaane wom o we, “Nmo na leiri lanyerane konto to, amo sɛ n lworo kom. Jwoori n vo sɔŋɔ. Setaane dem maŋe de yage n bukɔ wom yera.”
30Kaane wom ma seene o vo sɔŋɔ. O ma na o bukɔ wom o tigi chemm, de setaane dem nwoŋi de daare‑o.
31Yezu laam ma zaŋe o yage Tura nawuura yam seeni ye o daare o da Sidon o kɛ. O laam ma tɔge jei selo ba na bwoi we ‘Teene Fuga’ to o vo o yi Galili naneo kom jei sem. 32Nɔɔno mo wora o na ye zɔ-kɔgɔ ye o wae o ŋɔɔne fenfee yerane. Nɔɔna ma ja‑o ba vo Yezu tei. Ba ma lwoori‑o se o kwei o jeŋa o daŋe nɔɔno wom baŋa ne se o yɔɔre‑o. 33Yezu ma ja‑o o vo dáa o yerane o daare kɔgɔ kom. O ma kwei o noa o turi nɔɔno wom zwa ne ye o daare o twe lileeru o ke o noa ne o ma dwei o dindeilimi. 34O ma kwoni o yuu wɛɛne o nii ye o suuri. O ma ta de nɔɔno wom o we, “Effata”, ko kuri mo “Pore!” 35O na tage konto to, o zwa yam seene ya pore ye o dindeilimi de wae de pipira. O maa wae o ŋɔɔne lanyerane.
36Yezu ma kaane nɔɔna bam maama se ba yé ta kolo na ke to ba bere nɔɔn-nɔɔno. O na tiini o kaane-ba o woli da to, ba ma tiini ba ŋɔɔne ko taane ko ja gaale. 37Balo maama na nigi to tiini ba ye yaau. Ba maa we, “Woŋo kolo maama o na ke to ye lanyerane. O maŋe o pae zɔ-kɔro jwoori te ni, ye memaaro de wae te ŋɔɔna.”
© 2020, Ghana Institute of Linguistics, Literacy and Bible Translation (GILLBT)
