M. Yohana 4
4
1TETI pechiziŵa Asikuru kuti Afarisayo aliumvwe kuti Yesu enzochisya nobatiza asambili anyinji kumpula Yohana 2(chukanga Yesu mwine ntenzobatiza, sembe asambili ŵake), 3efuma ku Yudaya echiya soti ku Galilaya. 4Lomba penze kuti apite pa Samariya. 5Teti echiza ku munzi wa mSamariya zina lake Sukari, pafupi na kacharo kala Yakobo kechipa mwana wake Yosefe: 6penze mchera wa Yakobo. Teti Yesu pechivupa nolwendo wake enkala pansi tyala pa mchera. Kwenze nga ni zuŵa pa mutu. 7Echiza mwanakazi wa ku Samariya echizotapa manzi: Yesu enena naye, Nipeko nimwe. 8Pakuti asambili ŵake echiya ku munzi kuyosita vilyo. 9Naye mwanakazi Msamariya enena naye, Nga mweo pamuli mwa Yuda musengeranji kumwa kuli neo, panili mwanakazi Msamariya? (Pakuti Ayuda soyenderana na Asamariya.) 10Yesu eyasuka emuuzya, Ungati uuziŵa mtulo wa Mlungu, na kuti wakuuzya nipe nimweko ni ŵani, sembe wamsenga, naye sembe wakupa manzi amoyo. 11Mwanakazi enena naye, Asikuru, muliye chotapirako, na mchera ni wonoka: nga ofuma kuni manzi aŵo amoyo amuli naŵo? 12Kansi nimwe akuru kupula ausu wasu Yakobo etipa uyu mchera, naye emwapo mwine, na ŵana ŵake na vitekwa vyake? 13Yesu eyasuka echiti kuli yeve, Ŵonse omwapo manzi aŵa azamvwe soti njota: 14sembe ali wonse omwapo manzi aŵo anti nimpe sati aŵekumvwa njota; lomba manzi aŵo anti nimpe azaŵe muli yeve mchera wa manzi ovwila ku moyo wosasila. 15Mwanakazi enena naye, Asikuru, nipekoni manzi aŵa, nisamvwa njota nosazako njira yonse kutapako. 16Yesu emuuzya, Nkoya kamuite mulume wako, uze naye. 17Mwanakazi eyasuka enena naye, Niliye mulume. Yesu emnenera, Wanena wino pawati niliye mulume: 18pakuti wenze naŵo analume asano; na uyo uuli naye lomba nte mulume wako: ichi wanena chendi. 19Mwanakazi echiti kuli yeve, Asikuru, naziŵa kuti nimwe muŵirizi. 20Amausu wasu enzolambila mlupiri ulu; namwe munena kuti pa Yerusalemi ni pa malo pati aŵolambila ŵantu. 21Yesu emuuzya, Mwanakazi, unimvwile, nsita ikuza imti mkanomlambila Ŵata kano mlupiri ulu kano mu Yerusalemi. 22Mulambila icho chimsaziŵa: seo tulambila chituziŵa: pakuti upuzumushi ufuma mwa Ayuda. 23Sembe nsita ikuza, inde ilipo lomba, apo pati achilambila ŵendi amlambile Ŵata pa mzimu na vyendi: pakuti ŵantu ŵoteti ni ŵakusaka Ŵata kuŵa ŵomlambila. 24Mlungu ni mzimu: naŵo omlambila aŵolambila pa mzimu na vyendi. 25Mwanakazi emnenera, Nuziŵa kuti Messiya akuza (wamene oitiwa Kristo): akaza yeve azatilululire vyonse. 26Yesu emuuzya, Neo nulaŵira nawe nne wamene.
27Pamene apo echiza asambili ŵake; naŵo ezizwa kuti enzolaŵira na mwanakazi; lomba penzeve muntu echiti, Musakanji? kano, Mulaŵira naye chinji? 28Teti mwanakazi esiya nongo yake, eimapo echiya ku munzi, eŵauzya analume, 29Tiyeni mkaŵone muntu waniuzya vyonse vunuchita: kansi wamene uyu ni Kristo? 30Ŵeve efuma mmunzi enzomzila. 31Nsita yamene ila asambili emtetelela echiti, Rabbi, ilyani. 32Lomba enena naŵo, Nili nacho chakulya chimsaziŵa mweo. 33Teti asambili elaŵizyana kuti, Kansi muntu wamuulilako kantu kakulya? 34Yesu eŵauzya, Chakulya changu ni kuchita vyakupangwa uyo enituma nosilizya mulimo wake. 35Kansi simunena kuti, Yasalako myezi ine, ninga kuze kuwezya? ŵonani, numuuzyani, Ŵinulani menso muŵone vya mminda kuti viliupye kowezya. 36Uyo osanja opoka chilambu nounjikira vyotwala ku moyo wosasila; kuti okomera na osanja aŵosangalala pamo. 37Pakuti pa ichi lizu ilo ni lendi lakuti, Umo okomera, muyake osanja. 38Nimtumani kuyosanja vimuliyokatilapo milimo: ayakene ekatilapo milimo, namwe muloŵa mmilimo yaŵo.
39Mmunzi mula Asamariya anyinji emmvwila chikomo cha malizu a mwanakazi uyo echita untoni wakuti, Eniuzya vyonse vunuchita. 40Teti akamzile Asamariya empapatira kuswako kwaŵo: naye eswako nsiku ziŵiri. 41Nipo ayakene anyinji ngako ezomera chikomo cha malizu ŵake; 42naŵo emuuzya mwanakazi, Lomba tuzomera nte chikomo chonena kwako, petichimvwa seka noziŵisya kuti uyu chendi ni Mpuzumushi wa charo chino.
43Lomba akapitepo masiku aŵo aŵiri eimapo palapa echiya ku Galilaya. 44Pakuti Yesu mwine echita untoni wakuti muŵirizi aliye mchinzi mcharo cha kokwaŵo. 45Teti akaze mGalilaya Agalilaya empokelera, pakuti eviŵona vyonse vyechichita mu Yerusalemi mmasiku akuru: pakuti ŵeve naŵo eyako ku masiku akuru.
46Teti echiza soti ku Kana wa mGalilaya, kwechichisya manzi kuŵa mvinyu. Enzepo katembwe ngana, mwana wake mwanalume enzelwele pa Kapernaumi. 47Apo akamvwe kuti Yesu efumila ku Yudaya nofwika ku Galilaya emuila emtetelela kuzompozya mwana wake; pakuti enze pafupi kufwa. 48Yesu naye emnenera, Kati mkakanoŵona viziŵikwilo na vyozizwisya simti mzomere peka patonto. 49Katembwe enena naye, Kalonga, izani pakaliyeufwe mwana wangu. 50Yesu emuuzya, Nkoya; mwana wako ali moyo. Muntu ula elimvwa lizu lyechinena naye Yesu, echiya. 51Lomba penzekuya akapolo ŵake emchinguzya echiti, Mwana wanu ali moyo. 52Teti eŵakonsha nsita yechiyambopola. Naŵo emnenera, Mailo pa nsita yakasano na kaŵiri chinyong'onyong'o chimleka. 53Teti awisi eziŵa kuti yenze nsita yamene ila yechimneneramo Yesu, Mwana wako ali moyo: naye ezomera mwine na a mchiŵanza chake chonse. 54Ichi ni chiziŵikwilo chakaŵiri soti chechichita Yesu, pechifumila ku Yudaya nofwika ku Galilaya.
נבחרו כעת:
M. Yohana 4: MA23
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Mapangano Alomba © Bible Society of Zambia, 1923.
