Jan 1
1
Dére kinin mi nya
(WGV 8:22–31; Kol 1:15–17; 1 Jn 1:1–3)
1A pélisiana Dére a, ’té Dére a Kazambale va, ’té Dére a Kazambale nya. 2A pélisiana ’té é ana Kazambale va. 3É fɛnu faa kɛlɛ, yé fɛofɛan wo ’bɛ kɛlɛ, ’té yee ’ka ’bɛ kɛlɛ lɛ lo, ’bɛ fɛ ’ka lo. 4A gi lé vole é yuɛma ke, yé yee vole é yuɛma a munu lé san nya. 5Yé yee san ’ko éé bié gunutinu va, yé gunutinu ’ka mini lɛ a ta lo.
6Kazambale mi do nwunvɔ, wa laama Jan. 7É da kɛlɛ lɛ wenayezan nya san lé we fele we gi, léé, munu faa bli é vo a lɛ ’é dére ta. 8É ’ka san nya lo, naa, é da san lé we fele we gi. 9San ’ko a san bozen nya; é da tɛrɛ la, yé é munu faa va kini. 10Dére a tɛrɛ la yé é tɛrɛ kɛlɛ, yé tɛrɛlamunu ’ka a dɔɔ lɛ lo. 11É da élé munu va, yé alé munu ’ka a si lɛ wozé nya lo. 12Naa, munu faa lé wa si ’wozé nya, ’té wo bli vo a tɔ lɛ bɛ, é a se kɛlɛ wo lɛ léé, ’wo kinin Kazambale lé nénu nya. 13Wo ’ka wo yaa lɛ tɛrɛla né yaabɛ nya lo, wo ’ka wo yaa lɛ blaminu lé sɔlɛwe nya lo, wo ’ka wo yaa lɛ mi lé blibɔmale nya lo, naa, wo wo yaa Kazambale lé blibɔmale nya.
14Yé Dére kinin mi nya, yé é nyana ko va; ’té zin valé webozen saa ɛ ke a gi; yé ko alé fuasan nagini, mi lé é ke é Ti Be wɔlɛ do kpen lé, a zoɛ bɛ ’ka lo, a nya, ’té é si é Ti va, yee ɛ lé fuasan lé ko a nagini. 15Jan alé we fe, yé é siaa léé: Mi lé maa alé we fe léé: Mi lé é dan an zuo, yee ɛ ke an ’lɛ, naa, é ana an ’lɛ é vinin, yee lé é ke bɛ. 16Fɛ lé é ke a gi saawo bɛ, é a ke nɔ ko faa lɛ blɛ nya, yé é zin kiɛre kɛlɛ ko lɛ. 17Moizi ɛ da bélidɔwe nya, naa, Jézu Krist ɛ da zin valé webozen nya. 18Mi do kpen ’ka tan Kazambale ye lɛ lo; a Be do kpen lé, a zoɛ bɛ ’ka lo, ’té yeebozen ke Bale nya, ’té é ke é Ti bɛ gi, yee ɛ a nagɔɔn.
Mi batizéwozan Jan lé wenayedére
(Mt 3:1–12; Mk 1:7–8; Lk 3:15–17)
19Juifinu lé wo ke Jérusalɛm, wo Balebanzannu valé Lévinu nwunvɔ we laale Jan lee we gi léé: De ɛ ke i nyaa? 20Yé Jan ébo mawe fe yé é ’ka a ta yɔɔ lɛ lo, yé é léé, yeebozen ’ka Krist nya lo.
21Yé wa laa a lee léé: I a de ɛ nyaa? Éli lé i nyaa? Yé é léé: Maa ’ka ’bɛ nya lo. Yé wo léé: Balelayezan‐o bɛ, bii ɛ ke a nyaa? Yé é léé: Gba. 22Yé wo lé a lɛ léé: ’A, de nya lé i kee? Ko a a va léé, munu lé wo ko pa zia, ko ilé we zuo fe wo lɛ. Mɛ we lé bé fé ibozen maa? 23É léé: Balelayezan Ézai a gyɛ élé sɛbɛ gi léé:
Mi lé é ke siaana bwi gi, a dére lé ke ’ko:
’Ka Mizan lé zi ta bɔ ékema.
Yee dére lé ke an nya. 24Munu lé, wo ’bɛnu nwunvɔ, wa Farizimunu nya. 25Yé ’bɛnu we laa a lee léé: Dé i ’ka Krist nya lo, dé i ’ka Éli nya lo, dé i ’ka balelayezan‐o ’bɛ nya lo, mɛmalé i munu batizéwoo? 26Jan lé wo lɛ léé: Maa munu batizéwoo ’yi nya, naa, mi do a ka méléna, ka ’ka ’bɛzan dɔɔa lo; 27’bɛzan é dan da lɛ an zuo; a yara ’ka an yara lé maa ’bɛlé sawala bale fuo lo.
Kazambale lé ’Blané lé ke ’ko
(Jn 3:28–36)
28Wo we ’konu kɛlɛ Bétani, Juudɛn yuu zi, fɛana lé Jan munu batizéwo, ana.
29’Bɛ é tu kini, Jan Jézu ye dana ’é va, yé é léé: Kazambale lé ’Blané lé éé munu lé wenyané sié wo lee, yee lé é dan bɛ. 30Mi lé maa alé we fe léé: Mi lé é ke an ’lɛ, é dan da lɛ an zuo, naa, é ana an ’lɛ é vinin, yee lé ke bɛ. 31Maa ’ka a dɔɔ lɛ lo, naa, a nagɔɔnle Izraɛl munu lɛ we gi léé, an da munu batizéwo lɛ ’yi nya. 32Jan wean na ye, é a fe, yé é léé: Maa Kazambale Léli ye sina la gi, ’té éé zunwo bélé plala zo, yé é dɔ a nwiin. 33Maa ’ka a dɔɔ lɛ lo, naa, mi lé é an pa zia léé, an munu batizéwo ’yi nya, yee ɛ fe an lɛ léé: Mi lé i dan Kazambale Léli ye lɛ zunna a ta, yé é dɔ a nwiin, yee ɛ ke mi lé é dan munu batizéwo lɛ Léli Sauun nya bɛ, a nya. 34Yé maa a ye, yé maa a mawe fe léé, é a Kazambale Be nya.
Jézu zuomunu vininzannu
(LvS 112:4; Mt 4:18–22)
35’Bɛ é tu kini, Jan ana mi ’é zuomi fié va é ziin, 36yé dé Jézu a giéna Jan a nagini, yé é léé: Kazambale lé ’Blané lé é ke bɛ. 37Dé a zuomunu fié dére ’ko ’ma a ta, wo go Jézu zuo. 38Jézu nɔla yé é a ye aan wo léé, wa dana ’yee ɛ zuo, é lé wo lɛ léé: Mɛ fɛ lé ka ke a gininaa? Yé wo lé a lɛ léé: Rabi, ’bɛ gi léé, ’wozan, i nyanaan kyɛɛn? 39É lé wo lɛ léé: ’Ka da, ka ana ye. Wo go, yé fɛana lé éé nyanaan, wo ana ye, yé ’bɛ yi la wo vo a va mi. Dé yiri tɛnla bléyi léé? a nya.
40Mi fié lé wo Jan dére ’ma yé wo go Jézu zuo, a do lé é ke Simɔn Piɛri zuané André nya. 41Dé é si Jézu va é go é bwe Simɔn va tegelee, yé é lé a lɛ léé: Ko Mɛsi ye, ’bɛ gi léé, Krist. 42Yé é go ’bɛ nya Jézu va. Jézu ’bɛ nagini yé é léé: Bii a Jonas be Simɔn nya; wo dan i laa lɛ Séfa, ’bɛ gi léé, Piɛri. A gi léé é ziin, gɔlɛ.
Jézu Filip valé Natanaɛl laa
43’Bɛ é tu kini, é sɔ Jézu lɛ léé, ’é go Galilé tɛrɛ la, yé wo kee Filip nya. Yé é lé ’bɛ lɛ léé: ’I da an zuo. 44Filip a Bɛtsaidazan nya, yé ’bɛ ɛ ke André valé Piɛri lé fla nya.
45Filip valé Natanaɛl kee, yé Filip lé a lɛ léé: Mi lé Moizi alé we gyɛ bélidɔwe gi yé balelayezannu a mawe fe, ko a ye, Nazarɛtzan Jézu, Jozɛfu be lé. 46Natanaɛl lé a lɛ léé: Fɛ zin é bɔa sile lɛ Nazarɛt? Filip lé a lɛ léé: ’I da, bé ye. 47Jézu Natanaɛl ye aan wo dana é va, é a mawe fe léé: Izraɛl mi do lé, dabli we do kpen ’ka a gi lo, yee lé é ke ’ko webozen nya. 48Natanaɛl lé a lɛ léé: I an dɔɔ fɛ kyɛnnaa? Jézu a zi pa a lɛ léé: Bléyian va lé Filip ’ka tan i laa lɛ lo, ’té i a é dɔle bɔrɔyili wuo, ’bɛna lé maa i ye. 49Natanaɛl lé a lɛ léé: Anzan, bii a Kazambale Be nya. Bii a Izraɛl munu nwiinzan blɛn nya. 50Jézu lé a lɛ léé: Maa a fe aan wo i lɛ léé, maa i ye bɔrɔyili wuo, bɛwemalé i pa an taa? Wenu lé wo blɛn mini we ’konu ta, i dan ’bɛnu ye lɛ. 51Yé é lé a lɛ léé: Ka dan la lɛ ye lɛ é sole, yé ka dan Kazambale lé lanjenu ye lɛ gona loru, ’té woo zunwo, maa blami Be ta. Maa fe ka lɛ.
Alliance Biblique de Cote d'Ivoire 1979
