मत्ती 8
8
कोढ़ लागल मनैया चोखैलक
(मर्कू. १:४०-४५; लूक. ५:१२-१६)
1येशू पहाड़मेसे उतरके सेक्लाँ ते बरवार भीड़ हुँकार पाछे लागगिल। 2एकथो कोढ़ रोग लागल मनैया येशूक थेन आइल। और हुँकार आघे ठेहुनी टेकके बिन्ती करे लागल, “हे प्रभु, यदि अप्नि चहबी कलेसे महिन्हे कोढ़ रोगसे चोख्वाई सेक्बी।” 3येशू अपन हाँथ पसारके उहिहे छुलाँ और कलाँ, “मै चहथुँ कि, तुँ चोखाजाऊ।” जुरतेहेँ ओकर कोढ़ चोखागिलिस। 4तब् येशू उहिहे कलाँ, “यकर बारेम किहु नै बतैहो। पर जाऊ और अपनहे पुजारीक थेन देखाऊ कि तुँ चोखागिलो। तब् जसिके परमेश्वरके अगमवक्ता मोशा आज्ञा देहल बा, ओस्तेके मन्दिरमे दान चह्राऊ। तब् सक्कु जाने जन्हीँ कि तुँ कोढ़ रोगसे चोखागिल बतो।”
रोम देशके एकथो हाकिमके विश्वास
(लूक. ७:१-१०)
5येशू कफर्नहुम नगरमे जाइबेर रोम देशके एकथो हाकिम, जे सौथो सिपाहिनके कमान्डर रहे। ऊ येशूक थेन आके बिन्ती करे लागल, 6और ऊ कहल “हे प्रभु, मोरिक नोकर कुँज रोगसे गजब दुःख पाके घरे पठरीमे ठल्हा परल बा।” 7येशू उहिहे कलाँ, “मै तोरिक घरे जाके उहिहे चोख्वादेहम।” 8पर कमान्डर कहल, “हे प्रभु, अप्निहे मोरिक घरेम स्वागत करना लायक#8:8 लायक यहूदिनके रोमी सरकारके काम करुइयन और दोसुर जातिक मनैनहे घृणा करिँत। ऊ कप्तान फेन दोसुर जातिक मनैया रहे, तबे ऊ येशूहे कहल कि मै स्वागत करना लायकके नै हुइतुँ। के मै नै हुइतुँ। पर अप्नि कही किल दि और मोरिक नोकर चोखाजाई। 9मै यी बुझ्थुँ कि काकरेकी मै फेन अधिकारीनके अधिनमे बतुँ, और मोरिक अधिनमे सिपाहिन बताँ। मै एकथोहे ‘जा’ कथुँ, तब् ऊ जाइत, और दोसुरहे ‘आजा’ कथुँ, तब् ऊ आइत। मोरिक नोकरहे ‘असिक कर’ कथुँ, तब् उ करत।” 10ओकर बात सुनके येशू अचम्म मन्लाँ, और अपन पाछे अउइयनहे कलाँ, “जात्तिके, मै तुहुरिन्हे कहतुँ, पूरा इजरायल देशमे एकथो फेन असिन मनैया मै नै भेटैनु, जे यी दोसुर जातिक मनैयक हस मोरिकमे विश्वास करत। 11मै तुहुरिन्हे कहतुँ, पूरुव और पश्छिउँ ओहोँरसे यहूदी और बहुत्ते गैर-यहूदी मनै अइहीँ। और अब्राहाम, इसहाक और याकूबके संग स्वर्गक राजके खाना खाई बैठिहीँ। 12पर परमेश्वरके राजके सन्तान जेने इजरायलके मनै हुइँत, ओइने अंधारमे फेँकाजिहीँ। वहाँ मनै रुइहीँ और कष्टमे दाँत किचकिचैहीँ।” 13तब् येशू कमान्डरहे कलाँ, “घरे जाऊ, जसिन विश्वास तुँ करल बतो, ओस्तेहेँ तुहिन्हे होए!” तब् ओकर नोकर तब्बेहेँ चोखागिलिस।
रोगाइल मनै चोखैलक
(मर्कू. १:२९-३४; लूक. ४:३८-४१)
14येशू पत्रुसके घरेम अइलाँ ते ओकर माउ बेमार रहिस, और पठरीमे सुतल रहिस। काकरेकी उहिहे जुरी आइल रहिस। 15येशू ओकर हाँथ छुलाँ। ते जुरतेहेँ ओकरमेसे जुरी चोखागिलिस। तब् ऊ ओइन्हे खाना खाई देहल। 16उ साहिँजुन बहुत्ते बेमार मनै और असिन मनै जेन्हे भूत्वा लागल रहिन। ओइन्हे मनै येशूक थेन नन्लाँ। येशू वचनेलेके भूत्वनहे निकरलाँ। और जत्थुक जाने बेमार मनै रहिँत, उ सक्कुहुनहे चोख्वादेलाँ। 17परमेश्वरके अगमवक्ता यशैयक बोलल अगमवाणी पूरा हुइक लग यी हुइल रहे, “ऊ अप्निहीँ हमार कमजोरीनहे लेलाँ। और हमार रोगहुँक्रिहिनहे उठालैगिलाँ।”
येशूक पाछे लग्लेसे तिरे परना मूल्य
(लूक. ९:५७-६२)
18जब येशू अपन आँजर-पाँजर बरवार भीड़ देख्लाँ। तब ऊ अपन चेलनहे गालील समुन्दरके उपार जैना आज्ञा देलाँ। 19जस्तेके ओइने जैना तयारीमे रहिँत। एकथो यहूदी कानुनके गुरु हुँकार थेन आइल, और हुँकिन्हे कहल, “गुरुजी, मै अप्निक चेला बनक लग अप्नि जहाँ जैबी मै वहैँ जैम।” 20येशू उहिहे कलाँ, “गिदारिनके रना दोँदर और आकाशके चिरैँचुरुंगीनके रहक लग ठाँट रथिन। पर मै, मनैयक छावक लग ते एकथो अपन घर फेन नै हो, जहाँ मै सुते सेकुँ।” 21भीड़मेसे हुँकार एकथो चेला जे बाह्रथो चेलनमेसे नै रहे। येशूहे ऊ कहल, “प्रभु, पहिले महिन्हे घरे फिर्ता जाइदी। जब मोरिक बाबा मुई, तब मै उहिहे दफ्नैम और आके मै अप्निक चेला बनम।” 22पर येशू उहिहे कलाँ, “मोरिक चेला बनक लग मोरिक पाछे लागो। जोन मनै आत्मिक रुपमे मुअल बताँ, ओइन्हे अपन मुर्दाहे दफ्नाई देऊ।”
येशू आँधीहे शान्त पर्लक
(मर्कू. ४:३५-४१; लूक. ८:२२-२५)
23येशू लाउमे चहुँरलाँ ते, हुँकार चेलनके हुँकार पाछे लागगिलाँ। 24एकफाले समुन्दरमे बरवार आँधी आइल, लाउमे उप्पर उप्परसम पानीक छल्का मारे लागल। लाउ पानीलेके भरे लागल रहे। येशू भर निदाइल रहिँत। 25चेलनके आके असिक कती जगैलाँ, “बँचाई प्रभु! हम्रे डुबे लग्ली।” 26येशू ओइन्हे कलाँ, “अल्पविश्वासी मनै, तुहुरे काकरे डरैथो?” तब् उठ्के ऊ आँधी और समुन्दरहे घघोट्लाँ। और आँधी बिरकुल शान्त होगिल। 27तब चेलनके अचम्ममे परगिलाँ। और कलाँ, “यी कसिन सिन मनैया हुइँत। काकरेकी आँधी और समुन्दर फेन हिँकार आज्ञा मन्थाँ।”
भूत्वा लागल दुईथो मनै
(मर्कू. ५:१-२०; लूक. ८:२६-३९)
28जब येशू उपार गदरिनीनके मुलुकमे गैलाँ। तब् भूत्वा लागल दुईथो मनै चिहानमेसे आइबेर हुँकिन्हे भेटैलाँ। ओइने अतरा डर लग्ना मेरके रहिँत, कि केऊ फेन वहाँसे आई-जाई नै सेके। 29ओइने असिक कती चिल्लैलाँ, “हे परमेश्वरके छावा, अप्निक हम्रिहिन्से का सरोकार? हमार समय बिना पुग्ले हम्रिहिन्हे दुःख देहे अप्नि यहाँ आइल बती?” 30ओइन्से थोरिक दूर बहुत्ते सुरिनके एकथो बरवार बगाल चह्रतेहे। 31भूत हुँकिन्हे असिक कहिके बिन्ती करलाँ, “यदि अप्नि हम्रिहिन्हे निकारती कलेसे हम्रिहिन्हे सुरिनके बगालमे पठादी।” 32तब् ऊ ओइन्हे कलाँ, “जाऊ।” तब् ओइने उ मनैयकमेसे बाहेर निकरलाँ और सुरिनकेमे पैँठगिलाँ। और सुरिनके पूरा बगाल हरबरैती पख्वामेसे समुन्दरके पानीमे गिरलाँ, और डुबके मुगिलाँ। 33जोन मनै उ सुरिनहे चह्राइतिहिँत, ओइने वहाँसे भागगिलाँ। और नगरमे जाके सक्कु बात और उ भूत लागल मनैनहे का हुइलिन कहिके फेन सुनादेलाँ। 34तब् नगरके बहुत्ते मनै येशूहे भेँटा करक लग निकरके आगिलाँ। और हुँकिन्हे देख्के ओइन्के प्रदेशमेसे चलजाई कहिके मनै हुँकिन्हे बिन्ती करे लग्लाँ।
Deukhuri (देउखरिया थारु) Bible by The Love Fellowship is licensed under Creative Commons Attribution-ShareAlike 4.0 License.
