मत्ती 19
19
छुट्पत्तर
(मर्कू. १०:१-१२)
1यी बात बोलके सेकके येशू गालील प्रदेशमेसे यर्दनके उपार यहूदक ईलाकामे गैलाँ। 2बर-बर भीड़ हुँकार पाछे लागगिल, और ऊ वहाँ मनैनहे चोख्वैलाँ। 3फरिसीनके हुँकार थेन आके हुँकिन्हे जाँच करक लग हुँकिन्हे पुँछ्लाँ, “का केऊ कौनो कारणसे थारु मनैया अपन जन्नीहे छुट्पत्तर देना उचित बा?” 4पर ऊ कलाँ, “का तुहुरे नै पह्रल हुइतो, कि सृष्टिकर्ता ओइन्हे शुरुएमे नर और नारी बनाके कहल, 5‘तबेकमारे मनैया अपन दाई और बाबाहे छोरके अपन जन्नीक संग पलिरहत, और उ दुई जाने एक्के शरीर हुइहीँ। 6ओइने आब दुईथो नै हुइँत, भोज करके ओइने दुई जाने नै रहिहीँ, पर एक्के शरीर होजिहीँ।’ यकर मतलब यी हो कि केऊ फेन थारु और ओकर जन्नीहे अलग ना करिँत्, जेनहे परमेश्वर जोरले बताँ।” 7फरिसीनके येशूहे पुँछ्लाँ, “मोशा काकरे विवाहविच्छेदके छुट्पत्तर कागज देके जन्नीहे छोरना आज्ञा देहल?” 8येशू ओइन्हे कलाँ, “काकरेकी तुहुरिन्के मन महा कठोर बा, तबेकमारे मोशा जन्नीहे छोरना अनुमति तुहुरिन्हे देहल। पर सुरुसे असिन नै रहे। 9मै तुहुरिन्हे कहतुँ, जे व्यभिचारके कारण बाहेक अपन जन्नीहे छुट्पत्तर देके दोसुर जहनसे भोज करत, उ व्यभिचार करत और जे छोरलसे भोज करत, उ फेन व्यभिचार करत।” 10चेलनके हुँकिन्हे कलाँ, “थरवा-जन्नीक अस्तेहेँ सम्बन्ध हो कलेसे ते, भोज नहिँए करल मजा रही।” 11येशू ओइन्हे जवाफ देलाँ, “सक्कु मनै यी वचन ग्रहण करे नै सेक्थाँ। ओइने किल असिके करे सेक्हीँ, जेनहे परमेश्वर उ तरिकासे जिना क्षमता देले बतिन। 12काकरेकी केऊ जल्मत्तिसे नपुंसक रथाँ, केऊ-केऊ भर मनैनके बनाइल नपुंसक रथाँ। केऊ-केऊ भर अप्निहीँ अपनहे स्वर्ग-राजके लग नपुंसक बनैथाँ। जेकर थेन यिहिहे बुझ्ना क्षमता बा, ओइने यी बुझजाँइत।”
येशू और छुटीछुटी लरका
(मर्कू. १०:१३-१६; लूक. १८:१५-१७)
13येशू लरकनके उप्पर हाँथ धारके प्राथना करदिँत कहिके मनै हुँकार थेन नन्लाँ। तब् चेलनके उ मनैनहे हप्कैलाँ। 14पर येशू कलाँ, “लरकनहे मोरिक थेन आई देऊ और ओइन्हे ना रोको। काकरेकी परमेश्वरके राज ओइन्के लग हो, जेने यी लरकनके हस विश्वासयोग्य और नम्र बताँ।” 15तब् लरकनके उप्पर अपन हाँथ धारके ऊ वहाँसे चलगिलाँ।
धनी युवक
(मर्कू. १०:१७-३१; लूक. १८:१८-३०)
16हुँकार थेन आके एकथो मनैया कहल, “हे गुरु, महिन्हे सदाकालके जीवन पाइक लग का मजा काम करे परी?” 17येशू उहिहे कलाँ, “मजा का हो कहिके ओकर बारेमे तुँ महिन्हे काकरे पुँछतो? मजा ते एक्केथो बताँ, ऊ परमेश्वर हुइँत। पर तुँ जीवनमे आइक लग इच्छा करतो कलेसे, आज्ञा पालन करो।” 18ऊ हुँकिन्हे कहल, “कोन-कोन आज्ञा?” येशू कलाँ, “तैँ हत्या ना करिस, तैँ व्यभिचार ना करिस, तैँ चोरी ना करिस, तैँ झूँटा गवाही ना दिस। 19अपन दाई-बाबनके आदर करिस और अपन परोसीहे अपन हस प्रेम करिस।” 20उ जवान मनैया येशूहे कहल, “यी सक्कु ते मै पालन कर्ले बतुँ। आब मोरिकमे का कमि बा?” 21येशू उहिहे कलाँ, “तुहिन्हे एकथो आकुर काम करना जरुरी बा। जाऊ और अपन सारा सम्पति बेँच्देऊ। और सम्पति बेँच्लक पैँसा गरीबन बाँटदेऊ। और तोहाँर लग स्वर्गमे सम्पति रही। तब् मोरिक पाछे लग्हो।” 22जब उ जवान मनैया यी बात सुनल, तब ऊ दुखि होके चलगिल। काकरेकी ओकर बहुत्ते धन-सम्पति रहिस। 23तब् येशू अपन चेलनहे कलाँ, “जात्तिके, मै तुहुरिन्हे कहतुँ, धनी मनैनहे परमेश्वरके राजमे पैँठ्ना महा कर्रा बा! 24फेनदोस्रे मै तुहुरिन्हे कहतुँ, ऊँटवाहे सुईक नाखा सोज निकरना कर्रा बा। पर एकथो धनी मनैयक लग परमेश्वरके राजमे जैना यिहिसे फेन धेउर कर्रा बा।” 25जब चेलनके यी सुन्लाँ, ते ओइने आकुर धेउर अचम्ममे परगिलाँ। और ओइने एकदोसर जहनसे कहे लग्लाँ, “यकर मतलब यी हो कि किहुहे फेन ओइन्के पापके लग सजाय हुइनासे केऊ नै बँचाई सेकी।” 26येशू ओइन्हे हेरके कलाँ, “मनैनके लग यी बात असम्भव बा। पर परमेश्वरके लग सक्कु बात सम्भव बा।” 27तब् पत्रुस हुँकिन्हे पुँछल, “हेरी, हम्रे ते सक्कु चिज छोरके अप्निक पाछे लागल बती। हम्रे भर का भेटैबी?” 28येशू ओइन्हे कलाँ, “जात्तिके, मै तुहुरिन्हे कहतुँ, तुहुरे जेने मोरिक पाछे लागल बतो। लावा सृष्टिमे जब मै, मनैयक छावा अपन महिमक सिंहासनमे बैठम। तब् तुहुरे फेन बाह्रथो सिंहासनमे बैठ्बो। और इजरायलके बाह्र कुलमे न्याय करबो। 29हरेक जे मोरिक लग अपन घर, दादू-भैया या दिदी-बाबु अथवा दाईबाबा, छाईछावा या जग्गाजमिन छोरल बा, उ सौ गुणा भेटाई। और सदाकालके जीवनके अधिकार भेटाई। 30पर बहुत्ते मनै जेने अब्बे भारी बताँ, ओइने छुटी कराजैहीँ। और जेने अब्बे विनम्र बताँ, ओइने भारी बनाजिहीँ।”
נבחרו כעת:
मत्ती 19: DVGNT
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Deukhuri (देउखरिया थारु) Bible by The Love Fellowship is licensed under Creative Commons Attribution-ShareAlike 4.0 License.
