मत्ती 14

डुब्कि देहुइया यूहन्नक मृत्यु

(मर्कू. ६:१४-२९; लूक. ९:७-९)

1उ समयमे गालील प्रदेशके शासक हेरोद रज्वा उ कामके बारेम सुनल, जोन येशू करतिहिँत। 2और उ रज्वा अपन अधिकारीनहे कहल, “ऊ डुब्कि देहुइया यूहन्ना हो। ऊ मुअलमेसे जित्ती होगिल बा। तबेकमारे ओकर थेन यी सक्कु चमत्कारके काम करे सेक्ना शक्ति बतिस।”

यूहन्नक हत्या

3-4हेरोद रज्वा बहुत आघे अपन भैया फिलिपके जन्नी हेरोदियाससे भोज कर्ले रहे। पर डुब्कि देहुइया यूहन्ना हेरोद रज्वाहे कहल रहे, “अपन भैया जित्ती रहतसम परमेश्वरके अगमवक्ता मोशक नियम कानुन अनुसार ओकर जन्नीसे भोज करना मजा नै हो!” तबेकमारे हेरोदियासहे खुशी बनाइक लग हेरोद रज्वा डुब्कि देहुइया यूहन्नाहे पकरवाके कारागारमे दारदेहल। 5तबेकमारे हेरोद रज्वा उहिहे मुवैना विचार कर्ले रहे। पर जनतनसे ऊ डराए। काकरेकी ओइने उहिहे परमेश्वरके अगमवक्ता मानिँत। 6पर जब हेरोदके जलमदिन अइलिस। तब् हेरोदियासके छाई ओइन्के बिच्चेम नाचके हेरोद रज्वाहे खुशी बनाइल। 7तबेकमारे ऊ उहिहे ज्या मंग्लेसे फेन देना कसम खाके वाचा करल। 8पर ओकर दाई उहिहे सिखैलक ओहोँरसे ऊ कहल, “महिन्हे डुब्कि देहुइया यूहन्नक मुन्टा अब्बेहेँ बरका तथ्यामे देऊ।” 9तब् रज्वा गजब दुखि होगिल। पर ऊ अपन सक्कु पहुननके आघे कसम खाइल रहे, ओकर कारण लौँदीहे ऊ मनाही करे नै सेकल। तबेकमारे ओस्तेहेँ करना हुकुम देहल। 10और हेरोद रज्वा कारागारमे यूहन्नक मुन्टा काटे लगाइल। 11तब् यूहन्नक मुन्टा बरका तथ्यामे नानगिलिस और उ लौँदीहे देगिलिस। उ लौँदी काटल मुन्टा धारल तथिया अपन दाईक थेन लैगिल। 12ओकरपाछे यूहन्नक चेलनके आके ओकर लाहाशहे लैजाके भँथारदेलाँ। तब् ओइने जाके येशूहे जनादेलाँ।

येशू पाँच हजार जहनहे खवैलाँ

(मर्कू. ६:३०-४४; लूक. ९:१०-१७; यूह. ६:१-१४)

13जब येशू यी सुन्लाँ ते ऊ लाउमे चहुँरके वहाँसे अल्गे एकथो सुनसान ठाउँमे गैलाँ। यी सुनके मनैनके भीड़ नगरमेसे नेंग्ती हुँकार पाछे लागगिल। 14समुन्दरके आँरितिर पुग्के सेक्लाँ, ते उ बरवार भीड़हे देख्के येशूहे सोग लग्लिन, और ओइन्के बेमर्हियनहे चोख्वादेलाँ। 15संझा हुइल ते येशूक चेलनके हुँकार थेन आके कलाँ, “यी ते सुनसान ठाउँ बा, और पैलेहेँ बहुत बेर होसेकल बा। मनैनहे फिर्ता पठादी ताकि ओइने आँजरपाँजरके बजार और गाउँमे जाँइत, और अपन लग खैनक बन्दोबस्त करे सेकिँत।” 16पर येशू ओइन्हे कलाँ, “ओइन्हे जैना जरुरी नै हो। तुहुरेहे यनहे खाई देऊ।” 17ओइने हुँकिन्हे कलाँ, “यहाँ हमार थेन पाँचथो रोटी और दुईथो मच्छी किल बताँ।” 18तब् येशू कलाँ, “उहिहे मोरिक थेन नानो।” 19ऊ भीड़हे घाँसमे बैठे कलाँ, और उ पाँचथो रोटी और दुईथो मच्छी लेलाँ। उप्पर स्वर्ग ओहोँर हेरलाँ, और परमेश्वरहे धन्यवाद देलाँ। ऊ रोटीहे खन्टैलाँ और मनैनहे बाँटक लग चेलनहे देलाँ। और चेलनके मनैनहे बँट्लाँ। 20ऊ सक्कु जाने जतरा मन रहिन, ओत्रा सक्कु जाने खैलाँ, और अघागिलाँ। जब सक्कु जाने खाना खासेक्लाँ और खन्टैलक उब्रल रोटी और मच्छी चेलनके जमा करलाँ ते उ बाह्र छिट्वा रहे। 21जन्नी मनै और लरकनहे छोरके खउइयन लगभग पाँच हजार थारु मनै रहिँत।

येशूक पानीमे नेंग्लक

(मर्कू. ६:४५-५६; यूह. ६:१५-२१)

22तुरुन्ते ओकरपाछे, येशू अपन चेलनहे लाउमे चहुँरे कलाँ, और ओइन्हे अपनसे आघे समुन्दरके उपार जाई कलाँ। पर जबसम ऊ भीड़के मनैनहे बिदा नै करलाँ, तबसम ऊ वहैँ रुकल पलिरलाँ। 23भीड़हे विदा करके सेकके ऊ एक्केली प्राथना करे पहाड़मे चहुँरलाँ। संझा हुइल ते ऊ वहाँ एक्केली रहिँत। 24पर लाउ तबसम आँरितिरसे समुन्दरमे बहुत दूर पुगसेकल रहे। और बयाल उल्टा बहलक कारणसे लाउ समुन्दरके लहरसे डगमगाइतेहे। 25भिन्सारके तीन बजे ओहोँर ऊ समुन्दरके उप्पर नेंग्ती ओइन्के थेन अइलाँ। 26जब चेलनके येशूहे समुन्दरमे नेगत देख्लाँ, तब् डराके ओइने कलाँ, “यी ते भूत्वा हो!” और ओइने डरकमारे चिल्लाई लग्लाँ। 27पर येशू झत्तेहेँ ओइन्से बात बत्वैलाँ, “सँस्सा करो, यी मै हुइतुँ, ना डराऊ।” 28पत्रुस हुँकिन्हे कहल, “हे प्रभु, अप्निए हुइती कलेसे, महिन्हे अप्निक थेन पानीक उप्पर आई कही।” 29येशू कलाँ, “आऊ।” पत्रुस लाउमेसे उतरके येशूक थेन जाइक लग पानीमे नेगे लागल। 30पर बयाल जोरसे चलत देख्के ऊ डरागिल, और जब डुबे लागल ते ऊ चिल्लाके कहल, “हे प्रभु, महिन्हे बँचाई।” 31तब् येशू झत्ते अपन हाँथ पसारके उहिहे पकरलेलाँ, और उहिहे कलाँ, “ए अल्पविश्वासी, काकरे शंखा करलो?” 32जब येशू और पत्रुस लाउमे पैँठ्लाँ ते बयाल थमगिल। 33लाउमे रहुइयन हुँकार आराधना करलाँ, और कलाँ, “जात्तिके अप्नि परमेश्वरके छावा हुइती।”

येशूसे गनेसरेतके ईलाकामे रोगीनहे चोख्वैलक

34उपार पुग्के ओइने गनेसरेतके ईलाकामे आपुग्लाँ। 35जब उ ठाउँक मनै हुँकिन्हे चिहिन्लाँ। तब् ओइने आँजर-पाँजरके ईलाकामे खबर पठैलाँ। और मनै सक्कु रोगीनहे हुँकार थेन नन्लाँ। 36ओइने हुँकार लुग्गक झल्लर किल हुइलेसे फेन छुए भेटाऊँ कहिके हुँकिन्हे अनुरोध करलाँ। और जतरा जाने छुलाँ ओइने चोखागिलाँ।

נבחרו כעת:

मत्ती 14: DVGNT

הדגשה

שתף

העתק