yuwana 9
9
asa 9
yecu mauɽi gwiji jei ganu gwun gwilɩŋino gwɩrimə gi jei
1gi gwune dəru nuaŋu gwiji gwun gwɩrimə gi jei gi gwune lɩŋinune. 2na calɩmis juŋun uməḏɩjo naleicɩno, mualɩm gwəri, əḏi gwiro gwapo ŋuɽuna ŋun ŋɩki, gəko nulɩŋino ŋɩrimə gi jei? gwiji gwiro kweno a? i nana gwuŋun i baba gwuŋun gwiro a? 3nal yecu wɩrlijo ŋuɽuna nuleicɩno, gwiji kweno gwate gwapo ŋuɽuna ŋɩki i babaŋa nana gwe gwuŋun no, namɩni gwilɩŋinu gwɩrimə gi jei kani a ŋɩru ŋeḏi elo aŋini lugwun. 4arram nyi gwape ŋɩru ŋuŋun gwun gwuwəjɩŋi ḏa galo gɩmajɩre giro anyine. na galo gaje garo gilio, na gwatɩn gwetɩdo gwun gwəṯi ŋɩma gwape ŋɩru no. 5gi gwune ji kɩḏilio, na nyi gwiro bure gweḏi gɩḏilio. 6gwune nuar dino, nukwoinya ga kwɩnyəm nuɽigaḏa gwɩnyəmə ŋwoiny ŋwe; numəije gi jei jeḏi gwiji. 7nueicɩno, wiḏi ŋawona gi jei gi lɩroiny lun lan siluam, —jiri ceno jarno, ḏuwəja. nuwele nuwona, nuaɽuwa mauɽe jei ganu.
8na dino liji luŋun lun laṯilijaḏe ga na liji lun laṯaŋu gwerre gwune gwaṯugegɩlejo liji di nalarno, gwədu gwun gwaṯɩjiga nugegilejo liji di a? 9na liji kworo larno, ŋu gwiro; na liro kaja arno, awe, namɩni lidaḏo, namɩni gwijiŋu nuarno, nyi gwiro. 10naleicɩno, ŋa muɽe jei juŋa ganu galakwe? 11nulwɩrlijo ŋuɽuna nuarno, gwiji gwun ŋwaṯɩleico yecu gwumaɽigaḏa gwɩnyəmə gi jei jinyi ki nuŋwieicɩno, wiḏi gi lɩroiny lun lan siluam ŋawona. niwele niwona na nyi muɽe jei ganu. 12naleicɩno, ŋu gwaḏa? nuleicɩno, gwate gwilɩŋiḏi gwe gala no. 13nalgwuloḏa gwiji gwun gwɩrimə gi jei gi lɩbarɩsi. 14na lamon le sabiṯ liro lun lɩɽigəḏɩle yecu gwɩnyəmə nuuɽi jei ganu juŋun.
15na lɩbarɩsi nalaɽu nalɽoṯəḏɩjo ŋu muɽe jei ganu galakwe. nuleicɩno, ŋu gwɩmaijo gwɩnyəmə gi jei jinyi nilwona niuɽe jei ganu. 16na lɩbarɩsi ar kworo no, gwiji kweno gwədu gweḏi elo no, gi gwune gwate gwidɩmiḏi lamon le sabɩṯ no. namɩni liro kaja arno, galakwe gwiji gwun gwɩki gwəṯi ŋɩma gwape ŋɩru ŋun ŋɩbuḏo ŋun ŋiro dino a? na luŋa nalkenyɩḏiḏi ganu. 17nalaɽu nalɽoṯəḏɩjo gwiji gwun gwɩrimə gi jei mɩna, naleicɩno, ɽa gwarau ɽan ɽu gi gwune nuɽi jei ganu juŋa? nuarno, ŋu gwiro nebi. 18nate nan liju əmɩnyi nalarno ŋu gwɩrimə gi jei gwerre no na gwimuɽe jei ganu gwunnɩno, kəbe nalorniḏe babaŋaije nana gwe gweḏi gwun gwimuɽe jei ganu. 19nalɽoṯəḏɩjo naleicɩno, ŋaɽe ŋalo ŋiro ŋe ŋun ŋaṯanyaŋarno ŋilɩŋinu ŋɩrimə gi jei a? namɩni galakwe ŋɩmuɽe jei ganu gwunnɩno? 20na babaŋa nana gwe gwuŋun naliwɩrlijo ŋuɽuna naleicɩno, anilɩŋiḏi ŋaɽe ŋeno ŋəri ŋiro na ŋu ŋilɩŋinu ŋɩrimə gi jei; 21namɩni anate nilɩŋiḏi galakwe nuuɽe jei ganu gwunnɩno, i nanalɩŋe əḏi gwiro gwuɽi jei ganu jɩɩŋun no. ŋu ŋuɽun wɽi, ɽoṯəḏijil na ŋu gwajuməḏɩjo kaja guŋun. 22babaŋa nana gwe luməḏɩjilo dino gi gwune lɩḏonyo liju; gi gwune liju luməḏəṯi nalarno, ḏa gwiji gwete məteije ga yecu gwiro kɩrisṯo gwaldi kwu dunu gweḏi elo. 23na ŋiro dino na babaŋa nana gwe gwuŋun nalarno, ŋu ŋuɽun wɽi, ɽoṯəḏijil. 24nalaɽu nalorniḏe gwun gwɩrimə gi jei gwerre naleicɩno, buḏi eloŋu, anaŋa lilɩŋiḏi gwiji kweno gwiro gwiji gwɩki. 25nulwɩrlijo ŋuɽuna nuleicɩno, nyi gwate gwilɩŋiḏi ḏa maro gwiji gwɩki no; namɩni nyi gwilɩŋiḏi ŋuɽuna ŋetɩdo, nyi gwɩrimə gi jei gwerre namɩni gwunnɩno nyi muɽe jei ganu. 26nalaɽu naluməḏɩjo mɩna, ŋɩdi ŋɩrṯa ŋiro ŋikədəŋaŋe? ŋu gwuɽi jei ganu juŋa galakwe? 27nulwɩrlijo ŋuɽuna nuleicɩno, nyi gwuməḏɩjaje namɩni nya late lɩdiŋɩnu no. gwudaro gəko nanyaɽu nanyarno nyaladiŋɩni mɩna? nyaŋa lar laro calɩmis juŋun dino a? 28nalmɩni ḏene naleicɩno, ŋa gwiro ṯalɩmis ḏuŋun; namɩni anaŋa andro calɩmis jeḏi musa. 29anaŋa lilɩŋiḏi elo gwuməḏɩjo musaŋ; namɩni gwiji kweno, anate nilɩŋiḏi gweḏi negwegwe gwiro no. 30nal gwəmɩnyo wɩrlijo ŋuɽuna nuleicɩno, kwɩye, ŋuɽun ŋeno ŋiro ŋun ŋijiobejega ṯuṯ ŋun ŋarno, nya late lilɩŋiḏi ŋu wiḏi ne no, namɩni ŋu nuuɽi jei ganu jinyi. 31ililɩŋiḏi elo gwate gwadeŋɩnejo liji lun lɩki no, namɩni ḏa gwiji gwete gwimaṯorṯeḏa eloŋu naṯuape ŋuɽuna ŋun ŋɩbunyulo na gwa elo deŋɩnejo. 32uro gwerre gwune gelɩnu gɩḏilio kəbe gwunnɩno, liji late lɩmandiŋɩni gwiji manuɽi jei ganu jeḏi gwiji gwun gwilɩŋinu gwɩrimə gi jei no. 33ḏa gwiji kweno gwate gweḏi elo gwiro no, gwate gwaŋəṯi ŋɩma gwaŋanape ŋɩdio ŋədi no. 34nalwɩrlijo ŋuɽuna naleicɩno, ŋa gwilɩŋinu ŋuɽun ganu ŋun ŋɩki wei, na ŋa gwar gwijialɩmi a? naldu kɩluḏo.
35na yecu diŋɩnno naldeijo kɩluḏo, na gwune nubuje nueicɩno, ŋa gwəmɩnyu ŋaɽe ŋeḏi elo a? 36na gwiji wɩrlijo ŋuɽuna nueicɩno, əḏi gwiro, gwele gwi, kani nyiəmɩnyi? 37na yecu eicɩno, gwaŋəḏaŋa, na gwiji gwun gwuməḏanyagwe ŋu gwiro. 38nueicɩno, nyi gwəmɩnyu, gwele gwi; nuorṯeḏa. 39na yecu eicɩno, nyi gwuwiḏi kɩḏilio keno kani nyiakɩmiḏe, kəbe na lun late laṯɩḏaŋa ga no laje ladaŋa ga, na lun lɩdaŋəḏi ga larimi gi jei. 40naldiŋɩni ŋuɽuna ŋeno lun lijille lun liro lɩbarɩsi naleicɩno, anaŋa dino anrimə gi jei dino a? 41nal yecu eicɩno, ḏa nyaŋa lɩrimə gi jei nya late laŋəṯi ŋɩdio ŋɩki no, namɩni gwunnɩno nanyarno, anaṯɩdaŋa ga; na ŋuɽun ŋalo ŋun ŋɩki ŋajaḏaṯa.
נבחרו כעת:
yuwana 9: OTR1966
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Nuba, Otoro New Testament
© British and Foreign Bible Society, 1966.
