San Mateo 7
7
Ma' wei'k ba' ti' a boje'x wo taj o mo' taj ku metik
(Lc. 6.37-38,41-42)
1»Ma' wei'k ba' ti' a boje'x wo taj o mo' taj ku metik y bex K'uj muj bin u ya'e ti teche'x mo' taj ka metke'x, 2Ka wirik K'uj ku bin u ya'e ba' mo' taj ta mete'x teche'x a bex ka wei'ke'x ba' mo' taj tu meta a boje'x, a bex u p'is ka ts'ekti' a boje'x, bex ku bin u ts'ae tech K'uj. 3¿Y biken jai' ka chʌ'ntik u tsatsa a che' a yʌn tu wich a bojo' y maj wirik a tech yaj yʌn ta wich u yaj chun che'? 4Si maj wirik u yaj chun a che' a yʌn ta wich, ¿bij ka bin a wae tia bojo': “Cha'e in jarik tech u tsatsa a che a yʌn ta wich”? 5¡A tech ka metik a bʌj ne tsoy a tuku chen tusaka'! Yʌj jare ta wich u yaj chun a che' y bex ja' ki irik u tsatsa a che a yʌn ti' a bojo'.
6»Maj ts'ek ti' a pek'o' a ba' a toj k'uba' ti' K'uj, ma' wej wo jeu ka' tar ta wok'o u chi'ech, mix a ne tsoy a tunich u k'aba' perla ka bin a ts'ati' a kay k'ek'eno', ma' wej wo jeu laj ts'itiche'tik.
K'ate, kʌxte y t'ʌne yok'o u jor nʌj
(Lc. 11.9-13; 6.31)
7»K'ate'x y K'uj je' u ts'ek teche'x; kʌxte'x y je' a wike'x; t'ʌne'x yok'o u jor y jeu' jea' teche'x. 8Tu woro a mok ku k'atik, ku ts'abati'; y a mok ku kʌxtik, ku yirik; y a mok ku t'ʌn yok'o u jor, jeu' jea' ti'. 9»¿Ba' winki wa ku k'ata' pʌn ten u tia' ku ts'ekti' tunich? 10¿Wo ku k'ata' ti' kʌy ku ts'ek ti' kʌn ti' u ti'a? 11Wo a teche'x mo' pajtie'x, ka ts'ekti' tsoy ba' a ti'a ¿Maj tukrike'x teche'x jeu' jach ts'ek teche'x a Tete'x a tiʌ kʌ' tu woro tsoy ba' wa ka k'atke'x ti'?
12»Bein, bex a k'ate'x u meta' teche'x bex ka metik ti' a boje'x, toj bex ku ye'sik yok'o u t'ʌn K'uj.
A ts'ots' u jor
(Lc. 13.24)
13»Tia' woke'x yok'o u jor a nʌj a to'o ts'ots', ka wirik a to'o ne nuk y ne koch u jor lʌji' a to'o ku biskech ix k'ak' y ne pimo' tʌn u yoko' tita. 14Chen u jor a to'o mo' koch y a ne ts'u'ts' u beri lʌji' ku biskech tu ka bin a wire a kuxta y a lay mo' ne pim ku yirko'.
Yok'o u wich ka bin a k'o'ote'x
(Lc. 6.43-44)
15»Kʌnʌnte'x a bʌje'x ti mu' tuske'x a mok ku tus ei'ko' u bʌjo' lʌjio' profetas, chen a layo' tusukao'. A layo' tus ku metko' u bʌjo' p'is ne tsoy bex aj meo' chen jach u tuko' bex a bix u pek'i k'ax a ne ts'iko'. 16Yok'o a ba' ku metko' ti' ka bin a k'o'ote'x. Ka wirik a nukuch ts'us mo' ti ka t'akik yok'o u che'i k'i'x mix a wich a che u k'aba' higos ti ka t'akik yok'o a pʌk'a a yʌn u k'i'xi. 17Bex a to'o tsoy a che' ku ts'ek ne tsoy u wich chen a che' a mo' tsoy mo' tsoy u wich ku tsa'ya. 18A che tsoy muj wichʌnkʌ mo' tsoy, u ka sut mix a che' a mo' tsoy ku wichʌnkʌ ne tsoy. 19Tu woro a che' a muj ki ichʌnkʌj, ku ch'ʌka y ku pura ix kak. 20Bein ki wei'k te'x, yok'o a ba' ku metko' ti' ka bin a ki' k'o'ote'x.
Ti' a woke'x ix kʌ' a tuku wesintik K'uj
21»Mo' tu woro a ku yei'k ten: “In Ts'uri, in Ts'uri,” jeu' yoko ix kʌ' a tuku wesintik K'uj, toj jai' a mok ku jach metik a baij u k'at in Tet a tiʌ ix kʌ'. 22Ne pim ku biu ya'ten a lay u k'ini: “In Ts'uri in Ts'uri, a teno' tin tsikbʌta a t'ʌn tech yete a k'aba' y yete a k'aba' tin k'ʌno' ti' in jarik kisin ti' mok akʌ' ti' y bexi' yete a k'aba' tin k'ʌno' ti' in metik ne ya'p ne tsoy ba'.” 23Y ten kin bin in nuke tio': “Ki wei'k teche'x mi' wue tuba a tare'x, tu woro a teche'x k'uye a bʌje'x ti' ten, a teche'x ne mo' pajtie'x.”
A tuj ki meta' a nʌj y a tu' mo' ki meta'
24»A mok ku yui'k a je' a ba' a kin bin in kʌ'se y ku metik, lʌji' bex junturi' xi'ra a t'a'a, a tu meta u yatoch ix tunich. 25Ij tari ja', buru y bexi' ne k'ʌ'm ik' tsa'pʌ ti' a lay a nʌj, chen moj jubi a lay a nʌj, tuba u ki kukimʌ yok'o tunich. 26Chen a mok ku yui'k a je' a t'ʌn y muj metik, la' bex a xi'ra muj yui'k t'ʌn, lʌji' a tu meta u yatoch tu' woro sʌ'm. 27Ij tari ja', buru y ne k'ʌ'm ik tsa'pʌ ti' y a lay a nʌj laj jubi tu woro».
28Y kaj ts'ok u yei'k a Jesús tu woro a je' a ba', a winik ne bojtsoji tu yua u tsikba. 29Tuku yirko' u kʌ'sa a Jesús lʌji' jach yʌn u muk' y mo' bex a ku kʌ'sko' u t'ʌn K'uj a toj u ts'ibtamʌ a Moisés uchik.
נבחרו כעת:
San Mateo 7: PLacNaha
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Sociedad Biblica de México AC