Matyo 26
26
Ghə kad tsəm ni wey Yeso
(Mak 14.1-2; Luk 22.1-2; Jɔn 11.45-53)
1Ambə Yeso ghɔɔmə may tsunə ghəə ghən, tə n dza ndòw tə̀ ngəd tə wi tə nə̀, 2“Ghaa khənu nə̀ a nya doʼo səə kə ntsuʼu nbəghə ni zə̂ Zə̂ kə taa zaʼa kə, ghə i ney fuu tsəghə ndòw Waa Weynum nə̀ ghə baa wi n zat kə fəkaʼ.”
3Ghə fɔɔngili a nii ghə nsə ngəd tə inaʼ tə n dzəŋi bə n bii kə Kayfas tə â loʼnə fɔɔngili u nii nii wə. 4Ghə n saalə nghee ghə loʼnə ni tsìilə kwu Yeso tii tə̀ ghə wey wi. 5Ghə n dza, “Saa kee way ni kwu wi n nəŋə zey zə̂ kə loʼnə tii n təŋkey, ghə̂ ghə i sənnə, ghə kaʼ kɔʼ kəngəd.”
Ghə tsoʼlə Yeso n Betani
(Mak 14.3-9; Jɔn 12.1-8)
6Nya Yeso n loʼ n Betani, n ndaw Shimun tə â loʼ tsənə wù ukə̀m. 7Nghee tə̀ Yeso zə̂ənə, weyzən u loʼ wə n ndòw bə n səə wi n sɔʼ fə alabasta#26.7 Alabasta loʼ fə key ghə â faalənə sɔʼ tə a tii fə, n mbvə n ləmmə mə a tii n kwɔɔnə wən i taw zə. Tə n feeli tsu mbvə mey n tow kə Yeso. 8Ngəd tə Yeso tə n fəələ nay ndòw n fə̀ŋ tii nghee ghə koʼ tsunə sey, ghə n dza nə̀, “Tə sey saŋŋə maʼa mbvə n tii mə nə̀ à loʼ kee? 9Ghə mə loʼ ni fìi mbvə mən n ndəmə ukhəə, ghə fu ndòw khəə u tii wə tə̀ ghə̂ a laa ghə.” 10Yeso n khə moʼlə tə ghə, sey, tə n dza tə̀ ghə nə̀, “À loʼ kee ghaa fəmmənə weyzən wən ə? Tə n ghəŋə ghə i dzuŋu zə n kow mə. 11Ghaa nə laʼ koʼ way ghə̂ a laa ghə n fəŋŋə kə ghaa, abə mə, mə i kee way dzə ghi ghaa nəŋə tədzəm. 12Mbvə mən tə feeli tsunə n kow mə, loʼ ni faalə naŋa tən tsu vən fə uwû fuŋ, sey nə̀, abə n kpuu tsunə, ghə i maŋ tsəllə ndow mə. 13N kuum dza bə tə̀ ghaa nə̀, luʼu kə ghaa kə ghə î naʼlənə tûm i dzuŋu zə tii fa n mbi, ghə i tiilə dza soʼo ghəə zən weyzən wən ghəŋənə ni moʼlə wi.”
Judas bəghəm kɔʼ ni fìi fuu Yeso
(Mak 14.10-11; Luk 22.3-6)
14Wù umɔʼ n ngəd tə Yeso tey ighəm n ghii tə təbəghə, tə wey ghə â tɔŋŋənə nə̀ a loʼ Judas Iskaliɔt, n ndòw koʼ ndòw ghə fɔɔngili a nii ghə, 15bəb tə̀ ghə nə̀, “Ghaa i fuu mə n kee abə n fìi fuu bənə Yeso tə̀ ghaa a?” Ghə n taŋ shi bə nghəm ntəghə n ngɔʼ mə itsàa fuu ndòw tə̀ wi. 16Ni ney nuu tsu n nəŋə i tii zə, Judas n kaʼ ni kəŋ jìi ni fuu tsəghə ndòw Yeso tə̀ ghə.
Yeso zə̂ Zə̂ kə taa zaʼa kə ghi ngəd tə wi
(Mak 14.12-21; Luk 22.7-13, 21-23; Jɔn 13.21-30)
17N tsuʼ fə sə̂ i sə fə zə̂ kə Baa kə nkala key ghə kuu way mbvùŋ tii, ngəd tə Yeso tə n bəb tə̀ wi nə̀, “Wə ləghə nə̀ ghey bayyə naŋa tsu ghee Zə̂ kə taa zaʼa kə tə̀ wɔ ə?” 18Yeso n dza ndòw tə̀ ghə nə̀, “Nyi ndòw na fey inaʼ, ghaa i koʼ tsu wù loʼ, ghaa dza ndòw tə̀ wi nə̀ ‘Wù dii dza nə̀ nəŋə zuŋ zə kpii, mə ghi ngəd tuŋ tə î zə̂ə Zə̂ kə taa zaʼa kə n ndaw zə.’”
19Ngəd tə wi tə n bɔɔmə ndòw ghəŋə ndòw tə̀ tə mə dzanə tə̀ ghə, ghə n ndòw bayyə naŋa tsu fəzəə u Zə̂ kə taa zaʼa kə.
20Ambə n nəŋə i fənə tə, Yeso n doʼ nə kəbaŋŋə, zə̂ə ghi ngəd tə wi tey ighəm n ghii tə təbəghə.
21Nghee tə̀ ghə zə̂ənə, Yeso n dza tə̀ ghə nə̀, “N kuum dza bə tə̀ ghaa nə̀ wù umɔʼ n fəŋŋə kə ghaa î fìillə fuu shiə mə.”
22Ghə i tii zə n fəmmə nay ndòw ghə nghee ghə zow tsunə sey, ghə n kaʼ ndòw ni bəb tə̀ wi fəmɔʼ fəmɔʼ nə̀, “À loʼ mə a Mûkəbii?”
23Yeso n dza ndòw tə̀ ghə nə̀, “Wù wey tə dzəŋi kuu nyiə tsu ndòwnə wɔɔ kə ghi mə nə kəkaŋ à loʼ wi tə i fiilə fuunə mə. 24Waa Weynum khə ni kpu tə̀ màʼlə K-a-zə̀ kə dzanə, a kee loʼ nə̀ ngoʼ loʼ tə̀ wù wey tə î fiilə fuu shiənə wi. À mə khə ni loʼ ghə i dzuŋu zə abə ghə â ka buʼ ji koʼ tsə wù tii.”
25Judas, wù wey tə â fìinə Yeso n bəb soʼo tə̀ wi nə̀, “À loʼ mə a wù dii?”
Yeso n beeli ndòw wi nə̀, “I loʼ tə̀ wə dzanə.”
Zə̂ kə Mûkəbii
(Mak 14.22-26; Luk 22.14-20; 1Kɔ 11.23-25)
26Nghee tə̀ Yeso ghi ngəd tə wi tə zə̂ənə, Yeso n ney kɔʼ baa kə nkala, gɔŋŋə tsu, bòʼ tsu, fuu ndòw tə ngəd tə wi tə, dza tə ghə nə̀, “Ney na, ghaa zə̂, a wən loʼ wû wuŋ.” 27Tə n ney kɔʼ soʼo wɔ̂ nlə, fuu ndòw zɔŋŋə K-a-zə̀, fuu ndòw tə̀ ghə, dza tə̀ ghə nə̀, “Mə̂ ndòw na, ghaa adzəm, 28a wən loʼ kaŋ tuŋ, kaŋ tə kaa mey Zə̀ kə zə̂nə ghi ghə̂ a wi ghə, tə fəələnə nə̀ Zə̀ kə neyzəə bəb i ndəmə aghə̂. 29N dza bə tə̀ ghaa nə̀ mə î kəm mə̂ way nlə mə ni ndòw kùum n tsuʼ fey mə î mə̂ənə nlə n fəghə mə ghi ghaa n fɔ̀ɔ u Bày wuŋ.” 30Ambə ghə zə̂ may kɔʼnə, ghə n zhim tsu ndzaŋ, daŋŋə nuu kɔʼ ndòw n kaʼ u Oliv.
Yeso dza zey nə̀ Pita î tuu maʼa wi
(Mak 14.27-31; Luk 22.31-34; Jɔn 13.36-38)
31Nghee Yeso ghi ngəd tə wi tə ndow kuum tsunə fu, Yeso n dza ndòw tə̀ ghə nə̀, “Na, n tsuʼu tə, ghaa adzəm, ghaa î tyi naŋŋə tsu taʼa tsuu mə n nəŋə mə, bòʼ nə̀, màʼlə K-a-zə̀ kə dza nə̀, ‘Zə̀ kə î wey tsu wù keyyə u tənjì wə, njì tə tii tə i tyi saŋŋə tsu.’ 32Abə Zə̀ kə î kee zhəm kɔʼnə mə nə ivə, mə i nuu ndòw isə n Galili, ghaa i sə bəghə ibam.”
33Pita n dza ndòw tə̀ wi nə̀, “Abə ghə̂ adzəm a tsəm zəghə tsu kə wɔ, mə î zəghə koʼ way wɔ.”
34Yeso n beeli ndòw wi, dza tə̀ nə̀, “N dza bə isəŋə tə̀ wɔ nə̀ na n tsuʼu tə, tə mwaʼ kə ni tɔŋ, a i loʼ nə̀ wə n tuu maʼa mə tənəŋə tətəghə.”
35Pita n dza, “Mə î tuu maʼa koʼ way wɔ, abə a loʼ kə nə̀ n khə ni kpu.”
Ngəd tə Yeso tə loʼ tey n dza tsu soʼo sey.
Yeso gɔŋŋə n Gesimeni
(Mak 14.32-42; Luk 22.39-46)
36Sey Yeso n nuu ndòw ghi ngəd tə wi tə n luʼu kə loʼ kə ghə â tɔŋŋənə nə̀ a loʼ Gesimeni, tə n dza tə̀ ghə nə̀, “Doʼo tsu na fa, n ndòw gɔŋŋə bə fey.” 37Ambə tə ndownə, tə n ney kɔʼ Pita nsə waa a Zebedi ghey abəghə. Tə n nuu muŋi doʼo tsu, kaʼ tsu ni bàŋŋə fə̀ŋ. 38Tə n dza ndòw tə̀ ghə nə̀, “N ngii khə imow n fə̀ŋ n jìi zey n loʼ ni buʼ kpu daŋŋə tii, doʼo tsu na fa ghi mə, saa i dzəŋi ney ghə̂mə zə.”
39Tə n dzə kəŋə kpiʼi ndòw isə, bwu fəə ndòw tûm usə̂ aghəd, kaʼ ndòw ni gɔŋŋə nə̀, “Bày wuŋ, abə jìi loʼnə, ney nuu ndòw wɔ̂ uchɔd zən n wɔ mə. A kee loʼ nə̀ kə i nə doʼlənə tə̀ n ləghə, i doʼo tə̀ wə ləghənə.”
40Tə n dzəŋŋə ndòw n səə ngəd tə wi tey tətəghə, bə koʼ bə nə̀ ghə bweelinu. Tə n bəb tə̀ Pita nə̀, “À loʼ kee ghaa ghən atəghə ghaa mə way ni doʼo tsuŋŋə tsu ghi mə nə̀ ghaa bweeli way ə? 41I ghə̂mə tsu na, ghaa i gɔŋŋə tsu nə̀ kə fə kə nə chimmənə ghaa nə̀ ghaa ghəŋə ghə i bəbə i loʼ zə n təŋkey fə̀ŋ tə ghaa tə ləghənu ni ghəŋə ghəə zey i loʼnə tsətsəghə, à kee loʼ kə nə̀, gow uwû ghaa khə way daʼa kə ni təmi taw.”
42Yeso n nuu kpiʼi ndòw ni ndòw gɔŋŋə, tə n gɔŋŋə nə̀, “Bày wuŋ abə jìi way ni ney nuu chɔd wən n wɔ mə, nə̀ n teeli khə ni fəghə, i doʼo kə tə̀ wə ləghənə.”
43Tə n ndow dzəŋŋə bə, bə koʼ nə̀ ngəd tə wi tə bweeli kpiʼinu, nə̀ ghə n ghad kìi ni doʼo idəŋ, n tənkey, mbweeli tə â ngii dzoʼo ghə.
44Tə n kəm nam nuu kpiʼi tsu kənu, ndow gɔŋŋə tsu ni kɔʼ shi tənəŋə tətəghə, dza ndòw kə ghə i mɔʼɔ zə. 45Tə n ndòw dzəŋŋə n səə ngəd tə wi tə, dza tə̀ ghə nə̀, “Ghaa sa nam bweeli kənu, ghaa zayyənə ghaa n wû zə ə? Koʼo na, nəŋə i tii zə n kpii, ghə n fuu tsəʼlə ndow Waa Weynum n wɔɔ kə ghə̂ a bəbə ghə. 46Nuu kɔʼ na tə̀ sa nuu. Koʼo na! Wù wey tə fìi fuunə mə n bə.”
Ghə kwu Yeso
(Mak 14.43-50; Luk 22.47-53; Jɔn 18.3-12)
47Nghee tə̀ Yeso nam ghɔɔmənə, Judas, ngəd umɔʼ n ngəd tə wi tən ighəm n ghii tə təbəghə, n bɔɔmə bəghə. Nɔɔ kə aghə̂ kə nii kə n loʼ n baa wi. Ghə n khə təkɔb nsə mbaŋ tə n wɔ nə̀ a ghə tûm bə ghə fɔɔngili a nii ghə nsə ngəd tə inaʼ tə. 48À n loʼ nə̀ wù wey tə fìi fuunə Yeso n fuu naŋa ghə n tsəə nə̀, “Wù wey mə i maŋŋə keelinə, à loʼ wi ghaa khə ni kwu.”
49Judas n kəŋə ndòw n səə Yeso, dza tə̀ wi nə̀, “N tɔŋŋə zow bə wɔ, a wù dii wə.” Tə n maŋŋə keeli nyi ndòw wi.
50Yeso n dza tə̀ wi nə̀, “N fə̂, zaŋŋə fwaʼa ndòw fwaʼ key wə̀ bənə fa ni bə fwaʼ.”
Ghə n daŋŋə bə kwu tsu Yeso, ney kɔʼ wi. 51Wù umɔʼ n ghə̂ ghey ghə â loʼnə ghi Yeso n sɔŋ shi kɔʼ kɔb ə wi n mbə kəkùm, tsɔɔ maʼa bə tuŋŋə kə wù kəfwaʼ a fɔɔngili u nii nii wə. 52Yeso n dza tə̀ wi nə̀, “Sɔʼ naŋa dzəŋŋə ndòw kɔb zə n mbə kəkùm, boʼnə ghə̂ ghey ghə weynə ghə̂ ghə n kɔb, kpuu soʼo nə̀ à loʼ kɔb i weynə ghə. 53Wə khə way nə̀ n loʼnu ni tɔŋɔ dza ndòw tə̀ Bày wuŋ, tə i tûm bə nɔɔ u tsətəndəghə tə wi ighəm n ghii tə təbəghə, ghə bə gaamə mə ə? 54A kee loʼ nə̀, abə n ghəŋə tsunə sey, ghə i way ni luulə ghəə ghey a tɔ̀ɔ doʼonə n màʼlə K-a-zə̀ nə̀ a khə ni teeli shi.”
55N nəŋə i tii zə, Yeso n ghɔɔmə ndòw tə̀ nɔɔ kə aghə̂ kə nə̀, “Ghaa fa shi bə n kɔb tə nsə mbaŋ tə ni bə kwu mə, tə̀ a i dza n loʼ wù tsɔŋɔ. Mə â loʼ tsə ghi ghaa n Ndaw Kəzə̀ i nii zə Yerosalem, ghaa n ka kwu mə fu. 56À kee loʼ nə̀, ghəə ghən a shi ni luulə ghəə ghey tûm tə Kəzə̀ tə â tɔ̀ɔ naŋanə n màʼlə K-a-zə̀.”
Sey, ngəd tə wi tədzəm n tyi naŋa taʼa tsu wi.
Yeso loʼ n tay i saʼ
(Mak 14.53-65; Luk 22.54-55, 63-71; Jɔn 18.13-14, 19-24)
57Ghə̂ ghey ghə â kwunə Yeso n ney ndòw wi n ndaw Kayfas, tɔŋŋə Fɔɔngili u nii nii wə. Ghə̂ a dii a kəlaŋ ghə nsə ngəd tə inaʼ tə n loʼ fu. 58Pita n dzûmə bə ibam n ghab kə, bə nyi bə fu n bii kə Fɔɔngili u nii nii wə. Tə n nyi ndòw fu nə kəbii, ndòw doʼo tsu ghi ghə̂ a keyyə ghə ni koʼ ghəə zey i dza i shi. 59Ghə fɔɔngili a nii ghə nsə ghə̂ a ndaw tsə̀ ghə adzəm n kəŋə ghəə zey ghə loʼ ni kuu n tow kə Yeso tə̀ ghə wey wi. 60Ghə n kəŋ, ka keeli ighəə ni kuu n tow kə wi. Ndəmə aghə̂ ghə n bə badla aghəə n tow kə wi, ghə n nam kwɔɔ way. Ghə̂ a loʼ ghə n kɔʼ bə, tow u ghə ubəghə, 61dza nə̀, “Wù wən â dza nə̀, ‘N loʼnu ni saʼ maʼa tsu Ndaw Kəzə̀ i nii zən n Yerosalem, n kəm bəghə dzəŋŋə kɔʼ nə ntsuʼu ntəghə.’”
62Fɔɔngili u nii nii wə n təmi kɔʼ idəŋ, dza tə̀ Yeso nə̀, “Wə̀ beeli way ghəə ghən adzəm ghə kwɔɔnə wɔ tii?” 63Yeso n zow kə mɔŋ. Fɔɔngili u nii nii wə n dza kpiʼi tsu tə̀ wi nə̀, “N bəbə bə tə wɔ n zəd i Zə̀ kən kə loʼnə utaw nə̀ wə̀ dza bə tə̀ ghey nə̀, wə̀ loʼ Klisto Waa Kəzə̀ ə?”
64Yeso n beeli ndòw wi nə̀, “I loʼ tə̀ wə dzanə. N kee dza bə tə̀ ghaa nə̀, ni nuu tsu nya ndòw isə, ghaa î koʼo Waa Weynum tə doʼnə n kpii u təmə u Kəzə̀ wə, Zə̀ kən kə khənə daʼa wə udzəm. Ghaa i koʼ soʼo tə shiə tsu bənə n bikighow nə təmbaʼ.” 65Ambə tə zow tsunə sey, Fɔɔngili u nii nii wey n baalə tsu ndzə tə wi nə uwû, dza nə̀, “Wù wən kpaalə Kəzə̀, a kəm ləmmə soʼo nə̀ wù loʼ bə tiilə dza bə nə ngee? Ghaa n zow nghee tə tsayyənə Zə̀ kə a tii. 66Ghaa moʼlə nə̀ a loʼ ni ji ngee ghi wù wən nya a?”
Ghə n beeli kɔʼ nə̀, “Tə kpii ni kpu.”
67Sey ghə n kaʼ ndòw ni tsə ntəghə n tum usə̂ u Yeso, bwɔd wi, a loʼ ghə n saa nyiə ndòw wi nə kəsali. 68Ghə̂ ghey ghə â saanə wi nə usali n bəbə tə wi nə̀, “A Klisto! Wə dza nə̀ wə loʼ wù tûm Kəzə̀, suŋ nə à wɔ bwɔd ndee?”
Pita tuu maʼa Yeso
(Mak 14.66-72; Luk 22.56-62; Jɔn 18.15-18, 25-27)
69Ghə n bwɔdlɔ Yeso sey nə̀ Pita doʼ a bii n bii kə isə̂ kə. Weyzən ə kəfwaʼ a Fɔɔngili u nii nii wə n bə n səə wi, dza tə̀ wi nə̀, “Wə â loʼ soʼo ghi Yeso wù Galili wən.”
70Tə n tuu maʼa tsu fu n sə kə aghə̂, dza nə̀, “N khə dzə way ghəə zey wə dzanə.”
71Tə nuu shi ndòw, təmi tsu n fuʼ u mbàa, weyzən u kəfwaʼ u loʼ wə n nam koʼ tsu wi dza ndòw tə̀ ghə̂ ghey fu nə̀, “Wù wən â loʼ ghi Yeso wù Nazaled.”
72Pita n tuu kpiʼi tsu dza nə̀, “N zəd i Kəzə̀, n khə dzə way wù wey.” 73Ghə n kəm tsuŋŋə tsu, ghə̂ ghey ghə â teynə fu n bə n səə Pita dza tə̀ wi nə̀, “À loʼ isəŋə, wə loʼ wù ghə umɔʼ, jìi zey wə̀ ghɔɔmənə tii, dii tənə bənu.”
74Pita n kaalə kaabə bə aghəə fu dza nə̀, “N dza bə isəŋə, n khə dzə way wù wey.” N nəŋə i tii zə, mwaʼ kə n tɔŋ i kɔʼ, 75Pita n daŋŋə taa moʼlə tsu ghəə zey Yeso â dzanə tə̀ wi nə̀, “Tə mwaʼ kə ni tɔŋ, a i loʼ nə̀ wə̀ n mə tuu maʼa tənəŋə tətəghə.” Tə n nuu tsu fu, shi ndow a bii, ndòw dey dzɔb i tsu.
© 2022 CABTAL
