ယူဝ်းႁၢၼ်ႇ 17
17
ၸဝ်ႈယေႇသူႉသူးတွင်းႁႂ်ႈမုၼ်ၽုင်းၸဝ်ႈထၢင်ႇသႃး
1 ယေႇသူႉဝႃႈၸိူဝ်ႉၼင်ႇၼၼ်ယဝ်ႉၸင်ႇ ႁႅၼ်တူၺ်းၵႃႈၼိူဝ်ၵၢင်ႁၢဝ်သေလႄႈဝႃႈ၊ ဢူဝ်းပေႃႈတီႈၶႃႈ၊ ၶိင်ႇၵႃႇလႃႉႁွတ်ႈမႃးတီႈၶႃႈယဝ်ႉ။- 2ၼင်ႇႁိုဝ်လုၵ်ႈၸဝ်ႈတၵ်းႁႂ်ႈမုၼ်ၽုင်းၸဝ်ႈႁဝ်းထၢင်ႇသႃးမႃး ၵႃႈၼင်ႇဢၼ်ၸဝ်ႈႁဝ်းပၼ်ဢၶႂၢင်ႉတၼ်းၶူဝ်း ဢၼ်လႆႈဢုပ်ႉပိူင်ႇၵူၼ်းမဵဝ်းတင်းသဵင်ႈတင်းလူင်တီႈလုၵ်ႈၸဝ်ႈ ႁႂ်ႈလုၵ်ႈၸဝ်ႈလႆႈပၼ်ဢသၢၵ်ႈထႃႇဝရႃႉ တီႈၶဝ်ၸိူဝ်းဢၼ်ၸဝ်ႈႁဝ်းဢၢပ်ႈပၼ်ၼႂ်းမိုဝ်းလုၵ်ႈၸဝ်ႈၵႃႈမီးၸိူဝ်းၼၼ်ႉၸိုင်၊ ႁႂ်ႈမုၼ်ၽုင်းလုၵ်ႈၸဝ်ႈထၢင်ႇသႃးမႃးသေၵမ်းတီႈၶႃႈ။- 3ထႃႇဝရႃႉဢသၢၵ်ႈဢၼ်ဝႃႈၸမ်ႉ၊ ပဵၼ်တၢင်းဢၼ်ႁူႉၸၵ်းၸဝ်ႈႁဝ်း ဢၼ်ပဵၼ်ၽြႃးပဵၼ်ၸဝ်ႈဢၼ်ၸိုဝ်ႈဢၼ်ၸႂ်ႈသူႇလဵဝ်ၵူၺ်း ဢိၵ်ႇတင်း ယေႇသူႉၶရိၸ်ႈ ဢၼ်ၸဝ်ႈႁဝ်းပွႆႇၸႂ်ႉမႃးၼၼ်ႉတီႈၶႃႈဢေႃႈ။- 4ၵဝ်ၶႃႈႁႂ်ႈမုၼ်ၽုင်းၸဝ်ႈႁဝ်းထၢင်ႇသႃးမႃးၵႃႈၼိူဝ်လိၼ်မိူင်းတီႈၶႃႈယဝ်ႉ။ ၵဝ်ၶႃႈႁဵတ်းလွင်ႈတၢင်းဢၼ်ၸဝ်ႈႁဝ်းဢၢပ်ႈဝႆႉတီႈၵဝ်ၶႃႈ ပုၼ်ႈဢၼ်ၵဝ်ၶႃႈတၵ်းလႆႈႁဵတ်းၼၼ်ႉလႄႈ ယဝ်ႉတူဝ်ႈတီႈၶႃႈယဝ်ႉ။- 5ဢူဝ်းပေႃႈတီႈၶႃႈ၊ တေႃႈလဵဝ်ၼႆႉၵေႃႈ၊ ၶႅၼ်းတေႃႈဢဝ်တင်း မုၼ်ၽုင်းသရေႇဢၼ်ၵဝ်ၶႃႈ ၸၢမ်ႇၸႃးယူႇၵႃႈတီႈၸဝ်ႈႁဝ်း ၸူဝ်ႈဢၼ်ၵမ်ႇၽႃႇၼႆႉဢမ်ႇပႆႇတႄႇၼၼ်ႉ ယုၵ်ႉယွင်ႈၵဝ်ၶႃႈဝႆႉ လူၺ်ႈၵၼ်တင်းၸဝ်ႈႁဝ်းသေၵမ်းတီႈၶႃႈ။
ၸဝ်ႈယေႇသူႉသူးတွင်းပုၼ်ႈတပႄးၸဝ်ႈတင်းလၢႆ
6ၵဝ်ၶႃႈၼႄပျႃး ၼႃႇမႃႉၸိုဝ်ႈသဵင်ၸဝ်ႈႁဝ်းတီႈၶဝ်ၸိူဝ်းဢၼ်ၸဝ်ႈႁဝ်း ဢဝ်ၵႃႈၼႂ်းလေႃးၵႃႉၼႆႉလႄႈ ဢၢပ်ႈပၼ်တီႈၵဝ်ၶႃႈၸိူဝ်းၼၼ်ႉတီႈၶႃႈယဝ်ႉ။ ၸဝ်ႈႁဝ်းဢုပ်ႉပိူင်ႇၶဝ်လႄႈ ဢဝ်ၶဝ်ဢၢပ်ႈပၼ်တီႈၵဝ်ၶႃႈတီႈၶႃႈဢေႃႈ။ ၶဝ်ၼၼ်ႉပႂ်ႉၸွမ်းၵႂၢမ်းၼုၵ်ႈၵပၢတ်ႈတြႃးၸဝ်ႈႁဝ်းတီႈၶႃႈဢေႃႈ။- 7တေႃႈလဵဝ်ၼႆႉၶဝ်ႁူႉလွင်ႈ ၵႃႈဢၼ်ၸဝ်ႈႁဝ်း ပၼ်တီႈၵဝ်ၶႃႈတင်းသဵင်ႈတင်းလူင်ၼၼ်ႉ ပဵၼ်မႃးၵႃႈတီႈၸဝ်ႈႁဝ်းၼၼ်ႉတီႈၶႃႈဢေႃႈ။- 8လွင်ႈမၼ်းၸမ်ႉ ပိူဝ်ႈဢၼ်ၵဝ်ၶႃႈဢဝ်ၵႂၢမ်းၵႃႈဢၼ်ၸဝ်ႈႁဝ်း ပၼ်တီႈၵဝ်ၶႃႈတင်းသဵင်ႈတင်းလူင်ၼၼ်ႉပၼ်တီႈၶဝ်လႄႈ ၶဝ်ၶၢမ်ႇဢဝ်ၼၼ်ႉလႄႈ ၶဝ်ႁူႉလွင်ႈဢၼ်ၵဝ်ၶႃႈလုၵ်ႉသေၵႃႈတီႈၸဝ်ႈႁဝ်းပုၼ်ႉမႃးၼၼ်ႉ ဢမၢၼ်ႇၶၼ်ပဵၼ်လႄႈ ယုမ်ႇလွင်ႈဢၼ်ၸဝ်ႈႁဝ်းပွႆႇၸႂ်ႉၵဝ်ၶႃႈမႃးၼၼ်ႉတီႈၶႃႈဢေႃႈ။- 9ၵဝ်ၶႃႈသူးတွင်းပုၼ်ႈၶဝ်ယူႇတီႈၶႃႈဢေႃႈ။ ၵဝ်ၶႃႈသူးတွင်းပုၼ်ႈလေႃးၵႃႉၼႆႉဢမ်ႇၸႂ်ႈတီႈၶႃႈ။ ၵွပ်ႈပိူဝ်ႈဢၼ် ၶဝ်ၸိူဝ်းဢၼ်ၸဝ်ႈႁဝ်းပၼ်တီႈၵဝ်ၶႃႈၼၼ်ႉ ပဵၼ်ၵူၼ်းၸဝ်ႈႁဝ်းလႄႈ ၵဝ်ၶႃႈသူးတွင်းပုၼ်ႈၶဝ်ၼၼ်ႉယူႇတီႈၶႃႈဢေႃႈ။- 10လွင်ႈတၢင်းဢၼ် ၸၢပ်ႈသႅင်ႇၵၼ်တင်းၵဝ်ၶႃႈ ၵႃႈမီးတင်းသဵင်ႈတင်းလူင်ၸိူဝ်းၼၼ်ႉ ၸၢပ်ႈသႅင်ႇၵၼ်တင်းၸဝ်ႈႁဝ်းတီႈၶႃႈဢေႃႈ။ လွင်ႈတၢင်းဢၼ် ၸၢပ်ႈသႅင်ႇၵၼ်တင်းၸဝ်ႈႁဝ်း ၵႃႈမီးတင်းသဵင်ႈတင်းလူင်ၸိူဝ်းၼၼ်ႉၵေႃႈ၊ ၸၢပ်ႈသႅင်ႇၵၼ်တင်းၵဝ်ၶႃႈလႄႈ မုၼ်ၽုင်းၵဝ်ၶႃႈထၢင်ႇသႃးမႃးၵွပ်ႈပိူဝ်ႈလွင်ႈတၢင်းၸိူဝ်းၼၼ်ႉတီႈၶႃႈဢေႃႈ။
11ၸႃႉၸဵမ်တေႃႈလဵဝ်ၼႆႉၵႂႃႇလႄႈ ၵဝ်ၶႃႈဢမ်ႇမီးၼႂ်းလေႃးၵႃႉၼႆႉတီႈၶႃႈ။ ၶဝ်ၸမ်ႉ၊ မီးယူႇၼႂ်းလေႃးၵႃႉၼႆႉလူးၵွၼ်ႇတီႈၶႃႈဢေႃႈ။ ၵဝ်ၶႃႈတၵ်းလႆႈၵႂႃႇၵႃႈတီႈၸဝ်ႈႁဝ်းပုၼ်ႉတီႈၶႃႈဢေႃႈ။ ဢူဝ်းပေႃႈဢၼ်မူတ်းၸၢင်ႇတီႈၶႃႈ၊ ၼင်ႇႁိုဝ်ၶဝ်ၸိူဝ်းဢၼ်ၸဝ်ႈႁဝ်းပၼ်တီႈၵဝ်ၶႃႈတင်းလၢႆၼၼ်ႉ တၵ်းပဵၼ်ဢၼ်လဵဝ်ၵၼ် ၸိူဝ်ႉၼင်ႇဢၼ် ၸဝ်ႈႁဝ်းတင်းၵဝ်ၶႃႈပဵၼ်ၼၼ်ႉၸိုင် ႁႂ်ႈၶဝ်တႄႇယူႇၼႂ်းၼႃႇမႃႉၸိုဝ်ႈသဵင်ၸဝ်ႈႁဝ်းသေၵမ်းတီႈၶႃႈ။- 12မိူဝ်ႈဢၼ်ၵဝ်ၶႃႈယင်းမီးယူႇလူၺ်ႈၵၼ်တင်းၶဝ်ၼႂ်းလေႃးၵႃႉၼႆႉၼၼ်ႉၸိုင်ၵဝ်ၶႃႈႁႂ်ႈၶဝ်တႄႇယူႇၼႂ်း ၼႃႇမႃႉၸိုဝ်ႈသဵင်ၸဝ်ႈႁဝ်းတီႈၶႃႈယဝ်ႉ။ ၵဝ်ၶႃႈပႂ်ႉတူၺ်းၶဝ်ၸိူဝ်းဢၼ်ၸဝ်ႈႁဝ်းဢၢပ်ႈပၼ်တီႈၵဝ်ၶႃႈတင်းလၢႆၼၼ်ႉတီႈၶႃႈယဝ်ႉ။ ၼႂ်းၶဝ်ၼၼ်ႉၸိုင် လိူဝ်သေၵေႃႉဢၼ်ပဵၼ် လုၵ်ႈတၢင်းလူႉတၢင်းလႅဝ် ၵေႃႉလဵဝ်ၵူၺ်းၼၼ်ႉ ၽူႈလႂ်သေၵေႃႉသေၵူၼ်း ဢမ်ႇႁွတ်ႈထိုင် တၢင်းလူႉတၢင်းလႅဝ်တီႈၶႃႈ၊ လွင်ႈဢၼ်ၵေႃႉၼၼ်ႉ ႁွတ်ႈထိုင်တၢင်းလူႉတၢင်းလႅဝ်ၸမ်ႉ၊ ၼင်ႇႁိုဝ်ၵျၢမ်းလိၵ်ႈတၵ်းပျေႉၸုမ်ႇၸိုင်ၸင်ႇပဵၼ်တီႈၶႃႈဢေႃႈ။
13တေႃႈလဵဝ်ၼႆႉ ၵဝ်ၶႃႈတၵ်းလႆႈၵႂႃႇၵႃႈတီႈၸဝ်ႈႁဝ်းပုၼ်ႉလႄႈ ၼင်ႇႁိုဝ်ၶဝ်ၼႆႉ တၵ်းမီးတၢင်းဢၼ် ႁႂ်ႈတၢင်းသိူဝ်းပျေႃႇၵဝ်ၶႃႈ ပျေႉၸုမ်ႇဝႆႉၼႂ်းၶဝ်ၸိုင်၊ ၵဝ်ၶႃႈလၢတ်ႈၵႂၢမ်းၼႆႉ ၼႂ်းလေႃးၵႃႉၼႆႉတီႈၶႃႈဢေႃႈ။- 14ၵဝ်ၶႃႈပၼ်ၼုၵ်ႈၵပၢတ်ႈတြႃးၸဝ်ႈႁဝ်း တီႈၶဝ်တီႈၶႃႈယဝ်ႉ။ ပိူဝ်ႈဢၼ်ၶဝ်ဢမ်ႇသိူၵ်ႈသမ်ႇၵၼ်တင်းလေႃးၵႃႉၼႆႉ မိူၼ်ၸိူဝ်ႉၼင်ႇဢၼ် ၵဝ်ၶႃႈဢမ်ႇသိူၵ်ႈသမ်ႇၵၼ်တင်းလေႃးၵႃႉၼႆႉၼၼ်ႉလႄႈ လေႃးၵႃႉၼႆႉၸင်းၶဝ်တီႈၶႃႈဢေႃႈ။- 15လွင်ႈၼင်ႇႁိုဝ်ၸဝ်ႈႁဝ်းတၵ်း ၼုၵ်ႈဢဝ်ၶဝ် ဢွၵ်ႇသေၵႃႈၼႂ်းလေႃးၵႃႉၼႆႉၸိုင်၊ ၵဝ်ၶႃႈယွၼ်းဢမ်ႇၸႂ်ႈတီႈၶႃႈ။ လွင်ႈၼင်ႇႁိုဝ်ၸဝ်ႈႁဝ်းတၵ်းပႂ်ႉတူၺ်းလႄႈ ႁႂ်ႈၶဝ်ၵၢင်းလွတ်ႈတင်း လွင်ႈတၢင်းဢၼ်ဢမ်ႇလီဢမ်ႇငၢမ်းၼၼ်ႉၵူၺ်းၸိုင်ၵဝ်ၶႃႈၸင်ႇယွၼ်းတီႈၶႃႈဢေႃႈ။- 16ၶဝ်ဢမ်ႇသိူၵ်ႈသမ်ႇၵၼ်တင်းလေႃးၵႃႉၼႆႉ မိူၼ်ၸိူဝ်ႉၼင်ႇဢၼ်ၵဝ်ၶႃႈဢမ်ႇသိူၵ်ႈသမ်ႇၵၼ်တင်းလေႃးၵႃႉၼႆႉၼၼ်ႉတီႈၶႃႈ။- 17ႁႂ်ႈၶဝ်မူတ်းၸၢင်ႇၼႂ်းသမ်ႇမႃႇတြႃးၸဝ်ႈႁဝ်းၼၼ်ႉသေၵမ်းတီႈၶႃႈ။ ၼုၵ်ႈၵပၢတ်ႈၸဝ်ႈႁဝ်းၼၼ်ႉ ပဵၼ်သမ်ႇမႃႇတြႃးတီႈၶႃႈဢေႃႈ။- 18ၸိူဝ်ႉၼင်ႇဢၼ် ၸဝ်ႈႁဝ်းပွႆႇၸႂ်ႉၵဝ်ၶႃႈမႃးၼႂ်းလေႃးၵႃႉၼႆႉၼၼ်ႉ၊ ၵဝ်ၶႃႈပွႆႇၸႂ်ႉၶဝ် ၵႂႃႇၼႂ်းလေႃးၵႃႉတီႈၶႃႈဢေႃႈ။- 19ၼင်ႇႁိုဝ်ၶဝ်တၵ်းမူတ်းၸၢင်ႇၼႂ်းသမ်ႇမႃႇတြႃးၸိုင်ၵဝ်ၶႃႈၼႆႉ ႁႂ်ႈတူဝ်ၸဝ်ႈၵဝ်ႇမူတ်းၸၢင်ႇပုၼ်ႈၶဝ်ၼၼ်ႉ တီႈၶႃႈဢေႃႈ။
ၸဝ်ႈယေႇသူႉသူးတွင်းပုၼ်ႈၸိူဝ်းၸဝ်ႈ
20ၵဝ်ၶႃႈသူးတွင်းပုၼ်ႈၶဝ်ၵူၺ်းဢမ်ႇၸႂ်ႈတီႈၶႃႈ။ ပုၼ်ႈၶဝ်ၸိူဝ်းဢၼ်ယုမ်ႇမၢတ်ႈၵဝ်ၶႃႈ ၵွပ်ႈပိူဝ်ႈၵႂၢမ်းဢၼ်ၶဝ်ႁေႃးလၢတ်ႈၼၼ်ႉၵေႃႈ ၵဝ်ၶႃႈသူးတွင်းတီႈၶႃႈဢေႃႈ။- 21လွင်ႈၼင်ႇႁိုဝ် ၶဝ်တင်းသဵင်ႈတင်းလူင်ၸိူဝ်းၼၼ်ႉ တၵ်းလႆႈပဵၼ်ဢၼ်လဵဝ်ၵၼ်ယူႇသေလႄႈ မီးယူႇၵႃႈၼႂ်းႁဝ်းမိူၼ်ၸိူဝ်ႉၼင်ႇဢၼ် ဢူဝ်းပေႃႈတီႈၶႃႈ ၸဝ်ႈႁဝ်းမီးယူႇၼႂ်းၵဝ်ၶႃႈလႄႈ ၵဝ်ၶႃႈၵေႃႈမီးယူႇၼႂ်းၸဝ်ႈႁဝ်းၼၼ်ႉ၊ လွင်ႈၼင်ႇႁိုဝ်လေႃးၵႃႉၼႆႉတၵ်းလႆႈယုမ်ႇ လွင်ႈဢၼ်ၸဝ်ႈႁဝ်းပွႆႇၸႂ်ႉၵဝ်ၶႃႈမႃးၼၼ်ႉၸိုင်ၵဝ်ၶႃႈသူးတွင်းတီႈၶႃႈဢေႃႈ။
22လွင်ႈၼင်ႇႁိုဝ် ၶဝ်တၵ်းပဵၼ်ဢၼ်လဵဝ်ၵၼ် မိူၼ်ၸိူဝ်ႉၼင်ႇဢၼ် ႁဝ်းပဵၼ်ဢၼ်လဵဝ်ၵၼ်ၼၼ်ႉလႄႈ 23ၵဝ်ၶႃႈတၵ်းမီးယူႇၼႂ်းၶဝ်လႄႈ ၸဝ်ႈႁဝ်းၵေႃႈ တၵ်းမီးယူႇၼႂ်းၵဝ်ၶႃႈ ႁႂ်ႈၶဝ်လႆႈၸေးၸုမ်ႇပဵၼ်ဢၼ်လဵဝ်ၵၼ်၊ လွင်ႈၼင်ႇႁိုဝ် လေႃးၵႃႉၼႆႉတၵ်းႁူႉလွင်ႈဢၼ်ၸဝ်ႈႁဝ်း ပွႆႇၸႂ်ႉၵဝ်ၶႃႈမႃးဢိၵ်ႇတင်း လွင်ႈဢၼ်ၸဝ်ႈႁဝ်းႁၵ်ႉၶဝ်ၼၼ်ႉ မိူၼ်ၸိူဝ်ႉၼင်ႇဢၼ် ၸဝ်ႈႁဝ်းႁၵ်ႉၵဝ်ၶႃႈၼႆႉၼၼ်ႉၸိုင်၊ ၵဝ်ၶႃႈဢဝ်မုၼ်ၽုင်းသရေႇ ဢၼ်ၸဝ်ႈႁဝ်းပၼ်တီႈၵဝ်ၶႃႈၼၼ်ႉ ပၼ်တီႈၶဝ်တီႈၶႃႈယဝ်ႉ။
24ဢူဝ်းပေႃႈတီႈၶႃႈ၊ ပိူဝ်ႈဢၼ်ၸဝ်ႈႁဝ်း ႁၵ်ႉၵဝ်ၶႃႈၸႃႉၸဵမ်မိူဝ်ႈ ၸူဝ်ႈဢၼ်ၵမ်ႇၽႃႇၼႆႉဢမ်ႇပႆႇတႄႇၼၼ်ႉလႄႈ လွင်ႈၼင်ႇႁိုဝ် ၶဝ်ၸိူဝ်းဢၼ် ၸဝ်ႈႁဝ်းပၼ်တီႈၵဝ်ၶႃႈၼၼ်ႉ တၵ်းလႆႈႁၼ်မုၼ်ၽုင်း ဢၼ်ၸဝ်ႈႁဝ်းပၼ်တီႈၵဝ်ၶႃႈၼၼ်ႉၸိုင်၊ ၵဝ်ၶႃႈမီးဢလူဝ်ႇ ၶႂ်ႈႁႂ်ႈၶဝ်မီးလူၺ်ႈၵၼ်တင်းၵဝ်ၶႃႈ ၵႃႈၼႂ်းတီႈဢၼ်ၵဝ်ၶႃႈတၵ်းမီးၼၼ်ႉတီႈၶႃႈဢေႃႈ။- 25ဢူဝ်းပေႃႈဢၼ်သိုဝ်ႈတေႃႇတီႈၶႃႈ၊ ပိၵ်ႉသမ်ႉလေႃးၵႃႉၼႆႉ ဢမ်ႇႁူႉၸဝ်ႈႁဝ်းသေၵေႃႈ၊ ၵဝ်ၶႃႈႁူႉတီႈၶႃႈဢေႃႈ။ ၶဝ်ၼၼ်ႉၵေႃႈ ႁူႉလွင်ႈဢၼ်ၸဝ်ႈႁဝ်းပွႆႇၸႂ်ႉၵဝ်ၶႃႈမႃးၼၼ်ႉတီႈၶႃႈဢေႃႈ။- 26လွင်ႈၼင်ႇႁိုဝ်မႅတ်ႈတႃႇဢၼ်ၸဝ်ႈႁဝ်းႁၵ်ႉၵဝ်ၶႃႈၼၼ်ႉ၊ တၵ်းမီးယူႇၼႂ်းၶဝ်လႄႈ ၵဝ်ၶႃႈၼႆႉ တၵ်းမီးယူႇၼႂ်းၶဝ်ၼၼ်ႉၸိုင်ၵဝ်ၶႃႈၸီႉမွၵ်ႇၼႄပျႃးၼႃႇမႃႉၸိုဝ်ႈသဵင်ၸဝ်ႈႁဝ်း တီႈၶဝ်ယဝ်ႉတီႈၶႃႈလႄႈ တၵ်းၸီႉမွၵ်ႇၼႄပျႃးလူးၵွၼ်ႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။
נבחרו כעת:
ယူဝ်းႁၢၼ်ႇ 17: CBMS
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Copyright © 2021 by OMF International, Shan Baptist Churches Fellowship
