တမၢၼ်ႇၸဝ်ႈ 4

1ၼႂ်းမိူဝ်ႈဢၼ် ၶဝ်ႁေႃးလၢတ်ႈတီႈၵူၼ်းတင်းလၢႆၸိူဝ်ႉၼင်ႇၼၼ်ယူႇၼၼ်ႉၸိုင်၊ ၸႃႉၸဵမ်ၵႄႇပိၵ်ႈမၢၼ်ႇလႄႈ ယိတ်ႈပရေႃးႁဵၵ်ႈ ဢိၵ်ႇတင်းၸတ်ႉတူႉၵႄးတင်းလၢႆမႃးလႄႈ၊- 2ယၢပ်ႇၸႂ်မႆႈၸႂ် ၵွပ်ႈပိူဝ်ႈဢၼ်ၶဝ်သင်ႇသွၼ်သုင်းမႃႉပၼ် တီႈၵူၼ်းတင်းလၢႆလႄႈ ဢဝ်လွင်ႈယေႇသူႉႁေႃးလၢတ်ႈတြႃးတၢင်းဢၼ်လုၵ်ႉၵႃႈတၢင်းတၢႆၶိုၼ်းလိပ်းၼၼ်ႉယူႇၼၼ်ႉလႄႈ၊- 3တီႉဢဝ်ၶဝ်သေယဝ်ႉ၊ ပိူဝ်ႈဢၼ်ပဵၼ်ၶိင်ႇၵၢင်ၶိုၼ်းလႄႈ ၶင်ဝႆႉၵႃႈၼႂ်းထွင်ႇတေႃႇထိုင်ႁွတ်ႈဝၼ်းမိူဝ်ႈၽုၵ်ႈဢေႃႈ။

4ၼႂ်းၶဝ်ၸိူဝ်းဢၼ်ထွမ်ႇဢၼ်ငိၼ်းတြႃးၼၼ်ႉ ၵူၼ်းၼမ်ၼႃႇႁွတ်ႈထိုင်တၢင်းဢၼ်ယုမ်ႇမၢတ်ႈလႄႈ ၼပ်ႉဢၢၼ်ႇမီးၵူၼ်းသေႁႃႈႁဵင်ၼိုင်ႈၸမ်ၸမ်ဢေႃႈ။- 5မိူဝ်ႈဢၼ်ႁွတ်ႈထိုင်ဝၼ်းမိူဝ်ႈၽုၵ်ႈၼၼ်ႉၸိုင်၊ ၶုၼ်ဢရႃႇသီႉဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်၊ ၵူၼ်းထုတ်ႇၵျၢမ်းတင်းလၢႆ၊- 6ၸႃႉၸဵမ်ၶုၼ်ယိတ်ႈပရေႃးႁဵၵ်ႈ ဢၼ်ႇၼၢတ်ႉလႄႈၵႃႇယၽႃႉ၊ ယူဝ်းႁၢၼ်ႇ၊ ဢႃႇလေႇၸၼ်ႇတရူႉ ဢိၵ်ႇတင်း ၸိူဝ်ႉၶိူဝ်းၶုၼ်ယိတ်ႈပရေႃးႁဵၵ်ႈၵႃႈမီးၼၼ်ႉ ၸူႉၵၼ်တုမ်ၵၼ်ၵႃႈတီႈဝဵင်းယေႇရူႉသလႅမ်ႇသေယဝ်ႉ၊- 7ဢဝ်ၶဝ်ၼၼ်ႉဝႆႉၵႃႈတီႈၼႂ်းၵၢင်သေလႄႈထၢမ်ဝႃႈ၊ သူၼႆႉဢဝ်တင်းတၼ်းၶူဝ်းၸိူဝ်ႉၼင်ႇႁိုဝ်။ ဢဝ်တင်းၼႃႇမႃႉၸိုဝ်ႈသဵင်ၽူႈလႂ်သေလႄႈႁဵတ်းလွင်ႈတၢင်းၼႆႉ၊ ဝႃႈၼင်ႇၼႆဢေႃႈ။

8မိူဝ်ႈၼၼ်ႉ ပေႇတရူႉတဵမ်ဝႆႉတင်းဝီႉၺိၺ်ႇဢၼ်မူတ်းၸၢင်ႇၸဝ်ႈယူႇသေလႄႈ လၢတ်ႈတီႈၶဝ်ၼၼ်ႉလႄႈဝႃႈ၊ ၶုၼ်ဢၼ်ဢုပ်ႉပိူင်ႇၵူၼ်းတင်းလၢႆ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၶဝ်ဢိူၺ်း၊- 9ပေႃးႁဝ်းၶႃႈလႆႈၶၢမ်ႇတၢင်းဢၼ်ၸႅတ်ႈထၢမ်ၸႅတ်ႈတူၺ်း လူၺ်ႈလွင်ႈဢၼ်ႁဵတ်းၵျေးၸူး တီႈၵေႃႉဢၼ်လၢၵ်ႈၶၼႃႇဢၢင်ႇၵႃႇလူႉလႄႈ မၼ်းၼၼ်ႉၵၢင်းလွတ်ႈတင်းတၢင်းၶႆႈတၢင်းပဵၼ်ၸိူဝ်ႉၼင်ႇႁိုဝ်ၼၼ်ႉ ဝၼ်းမိူဝ်ႈၼႆႉၸိုင်၊- 10ႁႂ်ႈၸႃႉၸဵမ်သူလႄႈ ၵူၼ်းဢီႉသရေႇလႃႉတင်းသဵင်ႈတင်းလူင် မၢတ်ႈတွင်းဝႆႉလွင်ႈဢၼ်ဢိင်ၼႃႇမႃႉၸိုဝ်ႈသဵင်ယေႇသူႉၶရိၸ်ႈ ၵူၼ်းဝဵင်းၼႃႇၸရႅတ်ႈ ဢၼ်သူဢဝ်တွၵ်ႇဝႆႉၵႃႈၼိူဝ်သဝ်လၵ်းဝႃးၵၢပ်ႈ ဢၼ်ၽြႃးပဵၼ်ၸဝ်ႈႁႂ်ႈလုၵ်ႉၵႃႈတၢင်းတၢႆၶိုၼ်းလိပ်းၼၼ်ႉလႄႈ ၵူၼ်းၵေႃႉၼႆႉၸင်ႇၶႅၼ်းမႃးသိုဝ်ႈၼႃႈတႂ်ႈတႃသူၼႆႉၼၼ်ႉသေၵမ်းတႃႉ။- 11ၸဝ်ႈၼၼ်ႉၸမ်ႉ၊ ပဵၼ်မၢၵ်ႇႁိၼ်ဢၼ်သူၸိူဝ်းဢၼ်ႁဵတ်းတိူၵ်ႈပႅတ်ႈဝႆႉလႄႈ ၵမ်းလိုၼ်းပဵၼ်ႁူဝ်ၸဵင်ႇတိူၵ်ႈဢေႃႈ။- 12လိူဝ်သေၸဝ်ႈၼၼ်ႉ ၽူႈလႂ်ဢမ်ႇတၢတ်ႈၼိူင်ႇတၢင်းဢၼ်ၵႄႇၶျွတ်ႈဢဝ်လႆႈ။ လိူဝ်သေၼႃႇမႃႉၸိုဝ်ႈသဵင်ၸဝ်ႈၼၼ်ႉ၊ ဢမ်ႇမီးၼႃႇမႃႉၸိုဝ်ႈသဵင်သေၸိူဝ်ႉသေပိူင်ဢၼ်ၵႄႇၶျွတ်ႈဢဝ်ႁဝ်းလႆႈ ဢၼ်ပေႃႇမႃးၵႃႈၼႂ်းၵူၼ်းတင်းလၢႆတႂ်ႈလုမ်ႈၽႃႉၵၢင်ႁၢဝ်ၼႆႉ၊ ဝႃႈၼင်ႇၼႆဢေႃႈ။

13ၶဝ်ၼၼ်ႉ မိူဝ်ႈဢၼ်ႁၼ်တၢင်းဢၼ်ႁတ်းဢၼ်ႁၢၼ်ပေႇတရူႉ တင်းယူဝ်းႁၢၼ်ႇလႄႈ ႁူႉလွင်ႈဢၼ်ပဵၼ်ၵူၼ်းဢမ်ႇပေႃးမေႃလိၵ်ႈတႄႉတႄႉဝႃႈဝႃႈ၊ ပဵၼ်ၵူၼ်းပၢၼ်ၵၢင်ၵူၺ်းၼၼ်ႉၸိုင်၊ ဢၢမ်းယူႇသေလႄႈၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ်သွင်ၶႃၼၼ်ႉ ယၢမ်ႈလႆႈမီးယူႇလူၺ်ႈၵၼ်တင်းယေႇသူႉယဝ်ႉၼၼ်ႉဢေႃႈ။- 14မိူဝ်ႈဢၼ်ၶဝ်ႁၼ် ၵေႃႉဢၼ်ၵၢင်းလွတ်ႈတင်းတၢင်းၶႆႈတၢင်းပဵၼ်ၼၼ်ႉ ၸုၵ်းယူႇလူၺ်ႈၵၼ်တင်းသွင်ၶႃၼၼ်ႉၸိုင်၊ တီႈဢၼ်တၵ်းတွပ်ႇထဵင်လၢတ်ႈဝႃႈ ဢမ်ႇထူပ်းဢမ်ႇမီး။- 15ၶဝ်ႁႂ်ႈသွင်ၶႃၼၼ်ႉဢွၵ်ႇသေၵႃႈၼႂ်းလုမ်းလူင်ၵႂႃႇသေယဝ်ႉ၊ ၵေႃႉၼိုင်ႈလႄႈၵေႃႉၼိုင်ႈ တိူင်ႇပၢင်ႇလၢတ်ႈၸႃၵၼ်လႄႈဝႃႈ၊- 16ႁဝ်းတၵ်းလႆႈႁဵတ်းတီႈၶဝ်ၼၼ်ႉၸိူဝ်ႉၼင်ႇႁိုဝ်။ လွင်ႈဢၼ်ၶဝ်လႆႈႁဵတ်းၼီႉမိၵ်ႈလၢၵ်ႈၶၼႃႇဢၼ်ႁူင်ႁၢင်းၼၼ်ႉၸိုင် ထၢင်ႇသႃးၵႃႈတီႈၵူၼ်းဢၼ်ယူႇၵႃႈၼႂ်းဝဵင်းယေႇရူႉသလႅမ်ႇ တင်းသဵင်ႈတင်းလူင်ယဝ်ႉဢေႃႈ၊ ႁဝ်းၵေႃႈဢမ်ႇတွပ်ႇဢမ်ႇထဵင်လႆႈ။- 17ၼႂ်းဝႃႈၼၼ်သေၵေႃႈ လွင်ႈၼင်ႇႁိုဝ်တၵ်းဢမ်ႇလႆႈယဵင်ႈၶႅၼ်းၸွတ်ႇတူဝ်ႈၵႂႃႇၵႃႈၼႂ်းၵူၼ်းတင်းလၢႆၸိုင်၊ လွၵ်ႇဝႃႈတီႈၶဝ်ၼႃႇၼႃႇ ၵမ်းလိုၼ်းယႃႇပေႁႂ်ႈၶဝ်လႆႈဢိင်ပိုင်ႈၼႃႇမႃႉၸိုဝ်ႈသဵင်ၼၼ်ႉသေလႄႈ ႁေႃးလၢတ်ႈတီႈၽူႈလႂ်တႃႉႁဝ်း၊ ဝႃႈၼင်ႇၼႆယဝ်ႉ၊- 18ၸင်ႇႁွင်ႉၶဝ်မႃးလႄႈမီးဢမိင်ႉဝႃႈ၊ သူဢမ်ႇလႆႈဢိင်ပိုင်ႈၼႃႇမႃႉၸိုဝ်ႈသဵင်ယေႇသူႉၼၼ်ႉသေလႄႈ သင်ႇသွၼ်ႁေႃးလၢတ်ႈသေဢိတ်း၊ ဝႃႈၼင်ႇၼႆဢေႃႈ။

19 ပေႇတရူႉတင်းယူဝ်းႁၢၼ်ႇၼၼ်ႉၵေႃႈ ၶိုၼ်းလၢတ်ႈတီႈၶဝ်ၼၼ်ႉလႄႈဝႃႈ၊ လွင်ႈဢၼ်တၵ်းလႆႈထွမ်ႇဢဝ်ၵႂၢမ်းသူၼႃႇသေ ၵႂၢမ်းၽြႃးပဵၼ်ၸဝ်ႈၼၼ်ႉ တၵ်းလီဢမ်ႇလီ ၵႃႈတီႈၽၢႆႇၼႃႈၽြႃးပဵၼ်ၸဝ်ႈၸိုင်၊ ၶႆႈၸႂ်ဝူၼ်ႉၸႂ်လႄႈၸီႇယၢင်ႇသေၵမ်း။- 20လွင်ႈတၢင်းဢၼ်ႁဝ်းၶႃႈ လႆႈႁၼ်လႆႈငိၼ်းၸိူဝ်းၼၼ်ႉၸိုင်၊ ႁဝ်းၶႃႈယင်းဢမ်ႇႁေႃးဢမ်ႇလၢတ်ႈလႄႈဢမ်ႇယူႇလႆႈၶႃႈ၊ ဝႃႈၼင်ႇၼႆဢေႃႈ။

21မိူဝ်ႈၼၼ်ႉ ပိူဝ်ႈဢၼ်ၶဝ်ဢမ်ႇထူပ်းလွင်ႈတၢင်းဢၼ်တၵ်းပၼ်တၢမ်ႇတီႈသွင်ၶႃၼၼ်ႉ ၵွပ်ႈပိူဝ်ႈၵူၼ်းတင်းလၢႆလႄႈ သမ်ႉလွၵ်ႇထႅင်ႈသေလႄႈ ပွႆႇလွတ်ႈသေဢေႃႈ။- 22လွင်ႈမၼ်းၸမ်ႉ ၵွပ်ႈပိူဝ်ႈလွင်ႈတၢင်းဢၼ်ပဵၼ်မႃးၼၼ်ႉ ဢိၵ်ႇတင်း ၵွပ်ႈပိူဝ်ႈဢၼ်ၵေႃႉဢၼ်လႆႈၶၢမ်ႇဢဝ်ၼီႉမိၵ်ႈလၢၵ်ႈၶၼႃႇ တၢင်းဢၼ်ၵၢင်းလွတ်ႈတင်းတၢင်းၶႆႈတၢင်းပဵၼ်ၼၼ်ႉ ဢသၢၵ်ႈလႆႈသီႇသိပ်းပီႊလိူဝ်ယဝ်ႉၼၼ်ႉလႄႈ၊ ၵူၼ်းတင်းသဵင်ႈတင်းလူင်ယွင်ႈယေႃးၽြႃးပဵၼ်ၸဝ်ႈယူႇဢေႃႈ။

23သွင်ၶႃၼၼ်ႉမိူဝ်ႈဢၼ်လွတ်ႈယဝ်ႉၼၼ်ႉၸိုင်၊ ၵႂႃႇၸူးၵႃႈတီႈဢၼ်ၵေႃႉသေႈတူဝ်ၸဝ်ႈၵဝ်ႇမီးၼၼ်ႉလႄႈမွၵ်ႇလၢတ်ႈၵႃႈဢၼ်ၶုၼ်ယိတ်ႈပရေႃးႁဵၵ်ႈ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၸိူဝ်းၼၼ်ႉဝႃႈတီႈၶဝ်ၼၼ်ႉဢေႃႈ။- 24ၶဝ်ၼၼ်ႉလႆႈငိၼ်းသေယဝ်ႉ၊ ၽွမ်ႉၵၼ်ႁွင်ႉသႅၼ်ႇသဵင်ၶဝ်ၵႃႈတီႈၽြႃးပဵၼ်ၸဝ်ႈလႄႈ သူးတွင်းဝႃႈ၊ ၸဝ်ႈဢၼ်ဢုပ်ႉပိူင်ႇတီႈၶႃႈဢိူၺ်း၊ ၸဝ်ႈႁဝ်းပဵၼ်ၸဝ်ႈဢၼ်ၽၢၼ်ႇသၢင်းႁဵတ်းပဵၼ် ၸႃႉၸဵမ်ၵၢင်ႁၢဝ်လိၼ်မိူင်း၊သမ်ႇမုၵ်ႉတြႃႇ တင်းၵႃႈဢၼ်မီးၵႃႈၼႂ်းတီႈၸိူဝ်းၼၼ်ႉတင်းသဵင်ႈတင်းလူင်တီႈၶႃႈဢေႃႈ။- 25ၸဝ်ႈႁဝ်းဢဝ်သူပ်းၶႃႈၸဝ်ႈႁဝ်းတႃႇဝိတ်ႈၼၼ်ႉ ဝႆႉပျႃႇတိၵ်ႈလႄႈဝႃႈ၊ ၵူၼ်းမဵဝ်းတင်းလၢႆတူင်ႉတိုၼ်ႇႁူၼ်ႈမေႃးၵွပ်ႈပိူဝ်ႈလွင်ႈၸိူဝ်ႉၼင်ႇႁိုဝ်။ မုၵ်ႉၵူၼ်းၸိူဝ်းၵူၼ်းတင်းလၢႆၵျၢမ်ႇပွင် ဢၼ်လၢႆလၢႆဢမ်ႇပွင်ႇလွင်ႈၵႃႈသင် ၵွပ်ႈပိူဝ်ႈလွင်ႈၸိူဝ်ႉၼင်ႇႁိုဝ်။- 26ၶုၼ်ႁေႃၶမ်းလေႃးၵီႇတင်းလၢႆ လုၵ်ႉၸုၵ်းသေလႄႈ မူးမၢတ်ႈၽွင်းမိူင်းတင်းလၢႆၽွမ်ႉၵၼ် ႁဵတ်းၶတ်းၶႅင်ႁႅင်းတႃႉထႃႇဝရႃႉၽြႃး တင်းၸဝ်ႈၶရိၸ်ႈဢေႃႈ၊ ဝႃႈၼႆ၊ ၵႃႈၼင်ႇဢၼ်ဝႃႈၼၼ်ႉ၊- 27ၸႃႉၸဵမ်ၶုၼ်ႁေႇရူတ်ႈလႄႈ ၶုၼ်ပွၼ်ႇတီႉပီႉလတ်ႉ ၵူၼ်းမဵဝ်းဢီႉသရေႇလႃႉ ဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉ၊- 28ၸူႉၵၼ်တုမ်ၵၼ်ၵႃႈၼႂ်းဝဵင်းၼႆႉ ႁႂ်ႈလႆႈႁဵတ်းၸွမ်းၼင်ႇၵႃႈဢၼ်ဢလူဝ်ႇၸဝ်ႈႁဝ်း ဢိၵ်ႇတင်းမိုဝ်းၸဝ်ႈႁဝ်းမၵ်းၶၢၼ်းၽႄဝႆႉဢွၼ်တၢင်းပုၼ်ႉဢၼ်တၵ်းပဵၼ်မႃးတင်းသဵင်ႈတင်းလူင်ၸိူဝ်းၼၼ်ႉသေယဝ်ႉ၊ ႁဵတ်းရၢၼ်ႇသူႇ တီႈယေႇသူႉ လုၵ်ႈၸဝ်ႈႁဝ်းဢၼ်ၸဝ်ႈႁဝ်းပၼ်ၽိၵ်ႈသိၵ်ႈၼၼ်ႉတီႈၶႃႈယဝ်ႉ၊ ပဵၼ်ဢၼ်မၢၼ်ႇဢၼ်မႅၼ်ႈတီႈၶႃႈဢေႃႈ။- 29ဢူဝ်းထႃႇဝရႃႉၽြႃးတီႈၶႃႈ၊ တေႃႈလဵဝ်ၼႆႉၶႅၼ်းတေႃႈလူတူၺ်း တၢင်းဢၼ်ၶဝ်လွၵ်ႇၶဝ်ငိုတ်ႈၸိူဝ်းၼၼ်ႉသေၵမ်းတီႈၶႃႈ။ လွင်ႈၼင်ႇႁိုဝ်ၶႃႈၸဝ်ႈႁဝ်းၸိူဝ်းၼႆႉ တၵ်းလႆႈႁေႃးလၢတ်ႈၼုၵ်ႈၵပၢတ်ႈတြႃးၸဝ်ႈႁဝ်းႁတ်းႁတ်းႁၢၼ်ႁၢၼ်၊- 30ၼႂ်းမိူဝ်ႈဢၼ်ၸဝ်ႈႁဝ်းတၵ်းယိုၼ်ႈမိုဝ်းၸဝ်ႈႁဝ်းႁႂ်ႈတၢင်းၶႆႈတၢင်းပဵၼ်ႁၢႆၼၼ်ႉ ဢိၵ်ႇတင်းလွင်ႈၼင်ႇႁိုဝ်ၸဝ်ႈႁဝ်းတၵ်းႁႂ်ႈၼီႉမိၵ်ႈလၢၵ်ႈၶၼႃႇ ဢိၵ်ႇတင်းလွင်ႈတၢင်းဢၼ်လီဢၢမ်းတင်းလၢႆ ပဵၼ်ၵွပ်ႈပိူဝ်ႈၼႃႇမႃႉၸိုဝ်ႈသဵင် ယေႇသူႉလုၵ်ႈၸဝ်ႈႁဝ်းဢၼ်မူတ်းၸၢင်ႇၼၼ်ႉၸိုင်၊ ၶႅၼ်းတေႃႈပၼ်ဢၶႂၢင်ႉသေၵမ်းတီႈၶႃႈ၊ ဝႃႈၼင်ႇၼႆဢေႃႈ။

31ၶဝ်သူးတွင်းၸိူဝ်ႉၼင်ႇၼၼ်သေယဝ်ႉ၊ တီႈဢၼ်ၶဝ်ၸူႉၵၼ်တုမ်ၵၼ်ၼၼ်ႉသၼ်ႇၶွၼ်းဝႆလႄႈ ၵူၼ်းၵႃႈမီးတင်းသဵင်ႈတင်းလူင်ၸိူဝ်းၼၼ်ႉ တဵမ်ဝႆႉတင်းဝီႉၺိၺ်ႇဢၼ်မူတ်းၸၢင်ႇၸဝ်ႈသေလႄႈ ႁေႃးလၢတ်ႈၼုၵ်ႈၵပၢတ်ႈတြႃးၸဝ်ႈႁတ်းႁတ်းႁၢၼ်ႁၢၼ်ယူႇဢေႃႈ။

32ၵူၼ်းဢၼ်ယုမ်ႇမၢတ်ႈတင်းသဵင်ႈတင်းလူင်ၸိူဝ်းၼၼ်ႉ မီးၸႂ်ဢၼ်မိူၼ်မိူၼ်ၵၼ်လႄႈ ၽူႈလႂ်ဢမ်ႇဝႃႈဢုၵ်ႉၸႃႇၶူဝ်းလဵင်းမၼ်းသေၸိူဝ်ႉသေပိူင် ပဵၼ်ဢုၵ်ႉၸႃႇၶူဝ်းလဵင်းမၼ်း၊ ၶဝ်သိူၵ်ႈသမ်ႇႁူမ်ႈၵၼ်ၸၢႆႇၵိၼ်ဢုၵ်ႉၸႃႇၶူဝ်းလဵင်းၶဝ်ၵႃႈဢၼ်မီးၸိူဝ်းၼၼ်ႉဢေႃႈ။- 33တမၢၼ်ႇၸဝ်ႈၸိူဝ်းၼၼ်ႉ ဢဝ်တင်းတၼ်းၶူဝ်းဢၼ်ယႂ်ႇၼႃႇၶၢမ်ႇသၢၵ်ႈသေႇလွင်ႈဢၼ်ၸဝ်ႈယေႇသူႉ လုၵ်ႉၶိုၼ်းၼၼ်ႉလႄႈ ၶဝ်တင်းသဵင်ႈတင်းလူင်ၸိူဝ်းၼၼ်ႉ ပျေႉၸုမ်ႇဝႆႉတင်းၵျေးၸူးၸဝ်ႈယႂ်ႇၼမ်ၼႃႇလူင်လၢင်ဢေႃႈ။- 34ၼႂ်းၶဝ်ၼၼ်ႉၵူၼ်းဢၼ်ၸုတ်ႈဢၼ်လုတ်ႈဢမ်ႇမီးသေၵေႃႉသေၵူၼ်း။ လွင်ႈမၼ်းၸမ်ႉ ၶဝ်ၵႃႈဢၼ်ပိူင်ႇလိၼ်တင်းႁိူၼ်းၸိူဝ်းၼၼ်ႉၶၢႆသေယဝ်ႉ၊ ဢဝ်ၵႃႈမၼ်းၶၼ်မၼ်းဢၼ်လႆႈၼၼ်ႉမႃး၊- 35ဝႆႉၵႃႈတီႈႁိမ်းတိၼ်တမၢၼ်ႇၸဝ်ႈတင်းလၢႆလႄႈ မႅင်ႇပၼ်ၸွမ်းၵႃႈၼင်ႇဢၼ်ၶဝ်မီးဢလူဝ်ႇ ႁင်းၽႂ်ႁင်းမၼ်းၼၼ်ႉဢေႃႈ။

36 ယူဝ်းသႅပ်ႈ ဢၼ်တမၢၼ်ႇၸဝ်ႈတင်းလၢႆ ႁွင်ႉႁဵၵ်ႈၸိုဝ်ႈဢၼ်မႂ်ႇလႄႈဝႃႈ ပႃႇၼပႃႉ ဢၼ်ဝႃႈလုၵ်ႈၸၢႆးတၢင်းဢၼ်ႁႂ်ႈငိမ်းၸႂ် ဝႃႈၼႆ ဢၼ်ပဵၼ်ၵူၼ်းမိူင်း ၵူႉပရူႉ၊ ၵူၼ်းလေႇဝီႉ ၵေႃႉၼိုင်ႈၼၼ်ႉ၊- 37ၶၢႆလိၼ်ဢၼ်မၼ်းပိူင်ႇၼၼ်ႉသေယဝ်ႉ၊ ဢဝ်ငိုၼ်းဢၼ်လႆႈၼၼ်ႉမႃးဝႆႉၵႃႈတီႈႁိမ်းတိၼ်တမၢၼ်ႇၸဝ်ႈၸိူဝ်းၼၼ်ႉဢေႃႈ။

פסוקים פופולריים מ-
တမၢၼ်ႇၸဝ်ႈ 4

כתבי הקודש:

Shan

גרסה: သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး - CBMS