ମାତିସ୍ 12
12
ଯୀଶୁସ୍ ପାବିତାର୍ ଉଲ୍ଲାଘି ପ୍ରାଭୁସ୍
(ମାର୍କୁସ୍ ୨:୨୩-୨୮; ଲୁକାସ୍ ୬:୧-୫)
1ହୁ ସାମାୟନୁ ଯୀଶୁସ୍ ଆରୁ ତାଙ୍ଘା ଚେଲାର୍ ପାବିତାର୍ ଉଲ୍ଲାନୁ ଗହମ୍ ବାଟ୍କି ଚିଇକିରି କାଲିୟାର୍, ଆରୁ ଚେଲାଜାମାର୍ଗେ କିଡ଼ା ଲାଗ୍ଗିୟାତା ଆବ୍ଡ଼ାର୍ ଗହମ୍ ଚାନ୍ନୁନ୍ ହାଚ୍ଚିକିରି ମହାଁ ଲାଗ୍ଗିୟାର୍। 2ଇବନ୍ ଏରିକିରି ଫାରିସୀଜାମାର୍ ଯୀଶୁସିନ୍ ତେଙ୍ଗିୟାର୍, “ଏରା, ପାବିତାର୍ ଉଲ୍ଲାନୁ ଏକା ନାଲ୍ଖୁ କାମ୍ନା ଉଚିତ୍ ମାଲ୍ଲିଦ୍, ଆବନ୍ ନିହ୍ମା ଚେଲାଜାମାର୍ କାମାଲ୍ନାଏ।” 3ଯୀଶୁସ୍ ଫାରିସୀ ଜାମାରିନ୍ ତେଙ୍ଗିୟାସ୍, “ନିମ୍ କାଁଏ ମାଲ୍ଲା ପାଢ଼ୁର୍ କା, ଯେତ୍କବାକେନ୍ ଦାଉଦ୍ସ୍ଗେ ଆରୁ ତାଙ୍ଘା ସାଙ୍ଗେର୍ଗେ କିଡ଼ା ଲାଗ୍ଗାଲିୟାଦ୍ ତା ଏନ୍ଦେର୍ କାମ୍ଚ୍କାଚାସ୍? 4ଏସ୍କେ ଆସ୍ ପାର୍ମେଶ୍ଵାର୍ସ୍କି ମନ୍ଦିର୍ନୁ କରିକିରି ଏକା ଚାଢ଼ାବାଚ୍କା ଆସ୍ମାନ୍ ଖାଲି ପୁରୋହିତ୍ ଜାମାର୍ଗେ ମଁହାଗେ ଉଚିତ୍ ରାଚା, ଲେକିନ୍ ତାଙ୍ଗା ଆରୁ ତାଙ୍ଘା ସାଙ୍ଗେର୍ଗେ ମହଁନା ଉଚିତ୍ ମାଲ୍ଲା ରୁ, ଆବନ୍ ଆବ୍ଡ଼ାର୍ ମଖ୍ଖାର୍? 5ନିମ୍ କାଁଏ ମୁଶାସ୍କି ନିୟମ୍ନୁ ଏନ୍ନେ ମାଲ୍ଲା ପାଢ଼ୁର୍ କା ପୁରୋହିତ୍ ଜାମାର୍ହି ପାବିତାର୍ ଉଲ୍ଲାନ୍ତା ନିୟମ୍ବନ୍ ତୋଡ଼୍ନାଏ ହାଲେହି ନେଦ୍ହି ଆବ୍ଡ଼ାରିନ୍ ଦୋଷୀ ମା ଠାହ୍ରାନାଏ? 6ଲେକିନ୍ ଏନ୍ ନିମାନ୍ ତେଙ୍ଗାଲ୍ଦାନ୍ କା ଇସାନ୍ ଏକାଦ୍ ରାଇ ଆଦ୍ ମନ୍ଦିର୍ତି ହି ବାଡ଼୍କା ରାଇ। 7ପାବିତାର୍ ଶାସ୍ତ୍ରନୁ ଏନ୍ନେ ଲେଖ୍ଚ୍କା ରାଇ ପାର୍ମେଶ୍ୱାର୍ସ୍ ତେଙ୍ଗ୍ଦାସ୍, ‘ଏନ୍ ଆଲାର୍ଘି ମାଝାନୁ ଦାୟା ଚାହଁଦାନ୍ ବଲୀଦାନ୍ ମା ଚାହଁଦାନ୍’ ଯଦି ନିମ୍ ଇଦ୍ଘି ମତ୍ଲବ୍ ଆହର୍ନେତା, ନିମ୍ ଆବ୍ଡ଼ାରିନ୍ ଦୋଷୀ ମା ଠାହ୍ରର୍ନେ ଏକାର୍ କା ନିର୍ଦ୍ଦୋଷ୍ ରାନାଏ। 8ମୁନୁଷ୍ ହାଦ୍ଦୁସ୍ ତା ପାବିତାର୍ ଉଲ୍ଲାନ୍ତାହି ପ୍ରାଭୁସ୍।”
ହାଏକା ହେଖ୍ଖାବାଲା ଅଣ୍ଟା ଆଲାସିନ୍ ଯୀଶୁସ୍ ବାନେ କାମାଲ୍ଦାସ୍
(ମାର୍କୁସ୍ ୩:୧-୬; ଲୁକାସ୍ ୬:୬-୧୧)
9ଯୀଶୁସ୍ ଆସ୍ତି ବୁଙ୍ଗିକିରି ଆବ୍ଡ଼ାର୍ଘି ସାଭା ଆଡ଼୍ପାଗେ ବାର୍ଚାସ୍। 10ଆସାନ୍ ଅଣ୍ଟା ଆଲାସ୍ ରାଚାସ୍, ଏକାସ୍କି କା ଅଣ୍ଟା ହେଖ୍ଖା ହାଇୟା କେର୍କିଚା। ଆବ୍ଡ଼ାର୍ ଯୀଶୁସ୍କି ମିଆଁ ଦୋଷ୍ ଚିୟାଗେ ଆସିନ୍ ମେନ୍ଚାର୍, “ପାବିତାର୍ ଉଲ୍ଲାନୁ ବାନେ କାମ୍ନା ଉଚିତ୍ କାଁଏ?” 11ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ମନେ କାମା ନିହ୍ମା ଭିତର୍ନୁ ନେଖିନ୍ ଅଣ୍ଟିଟା ଭେଡ଼ି ରଦ୍, ଆରୁ ଆଦ୍ ପାବିତାର୍ ଉଲ୍ଲାନୁ ଗାଡ୍ଡିନୁ ଖାତ୍ରକ ତା ଆସ୍ ଆବନ୍ ଧାରିକିରି ମା ଅଥ୍ରସ୍? 12ଲେକିନ୍ ଭେଡ଼ିସ୍ତି ଆଲାର୍ କେତ୍କ ବାଡ଼୍କାର୍! ଇଦ୍ଘିଲାଗାନ୍ ପାବିତାର୍ ଉଲ୍ଲାନୁ ବାନେ କାମ୍ନାଦ୍ ଉଚିତ୍ ରାଇଦ୍।” 13ଆନ୍ତିନ୍ ଯୀଶୁସ୍ ଆ ଆଲାସିନ୍ ତେଙ୍ଗିୟାସ୍, “ନିଙ୍ଘା ହେଖ୍ଖା ଲାମ୍ବାବା।” ଆଙ୍ଗେନ୍ ଆସ୍ ତାଙ୍ଘା ହେଖ୍ଖା ଲାମ୍ବାବାଚାସ୍, ଆରୁ ଆ ହେଖ୍ଖାଦ୍ ଆରୁ ଅଣ୍ଟା ହେଖ୍ଖା ଲେଖା ବାନେ ମାନ୍ଚାକେରା। 14ଆଙ୍ଗେନ୍ ଫାରିସୀଜାମାର୍ ବାହ୍ରି ଉର୍ଖିକିରି, ଯୀଶୁସିନ୍ ଏସ୍କେ ପିଟର୍ ଆଦ୍ଘି ଲାଗାନ୍ ଉପାୟ କାମ୍ଚାର୍।
ପାର୍ମେଶ୍ଵାର୍ସ୍କି ଚାଜ୍ଜକା ସେବକ୍
15ଇବନ୍ ଆହିକିରି ଯୀଶୁସ୍ ଆସ୍ତି ବୁଙ୍ଗିୟାସ୍ କେରାସ୍, ଆରୁ ଢେର୍ ଆଲାର୍ ତାଙ୍ଘା ପାଛ୍ଲି-ପାଛ୍ଲି କେରାର୍, ଆରୁ ଯୀଶୁସ୍ ଆବ୍ଡ଼ା ଜାମାରିନ୍ ବାନେ କାମ୍ଚାସ୍। 16ଆରୁ ଯୀଶୁସ୍ ଆବ୍ଡ଼ାରିନ୍ ଶକତ୍ ଚେତାବାନୀ ଚିଇକିରି ତେଙ୍ଗିୟାସ୍, ନେକାନ୍ହି ଏଙ୍ଘା ବାରେନୁ ଆମ୍କେ ତେଙ୍ଗା, 17ଇଦ୍ଘି ଲେଖା ଇଶାୟାହ୍ସ୍ ନାବୀସ୍କି ଇ ତେଙ୍କା କାତ୍ଥା ପୁରା ମାନ୍ଚା:
18“ଏରା, ପାର୍ମେଶ୍ୱାର୍ସ୍ ତେଙ୍ଗ୍ଦାସ୍, ‘ଇସ୍ ଏଙ୍ଘାଏ ସେବକ୍ସ୍, ଏକାସିନ୍ କା ଏନ୍ ଚାଜ୍ଜକାଦାନ୍; ଏନ୍ ଇସିନ୍ ଜାମାର୍ଘିନ୍ତି ବାଗ୍ଗେ ବାନେ ହାଖ୍ଖଦାନ୍, ଇସ୍କି ମିଆଁ ଏନ୍ ମୁରୁକ୍ ଖୁସ୍ ରାଦାନ୍: ଆରୁ ଏନ୍ ଏଙ୍ଘା ଆତ୍ମାନ୍ ତାଙ୍ଘାଏନୁ ଚିଅନ୍, ଆରୁ ଆସ୍ ଦୁସ୍ରା ଜାତିୟାରିନ୍ ନ୍ୟାୟଘି ସାମାଚାର୍ ପ୍ରଚାର୍ କାମସ୍।’”
19“‘ଆରୁ ଆସ୍ ନା ଝାଗ୍ଡ଼ାଝାଟି କାମସ୍, ନା ଚିର୍ରାବର୍ରା କାମସ୍ ଆରୁ ନା ହାଟ୍ଟେଗୁଠିନୁ ନେଦ୍ହି ଇସ୍କି କାତ୍ଥାନ୍ ମେନର୍।’”
20“‘ଏସ୍ର୍କା ମାସୁଁ ଲେଖା କମ୍ଜୋର୍ ଆଲାର୍ଘି ମିଆଁ ଏଙ୍ଘା ସେବକସ୍ ଦାୟା କାମସ୍, ଆରୁ ତେବ୍ର୍ନା ବିଲ୍ଲୀ ଲେଖା କମ୍ଜୋର୍ ଆଲାରିନ୍ ଏଙ୍ଘା ସେବକସ୍ ମଦେତ୍ କାମସ୍। ପାର୍ମେଶ୍ୱାର୍ସ୍ ଏକାନ୍ ତେଙ୍ଗ୍ଦାସ୍ ଆଦ୍ ସତ୍ତୁଦ୍। ଯେତ୍କତକ୍ ଜାମା ଆଲାର୍ ଇବନ୍ ଆହର୍କର୍ ହତ୍କତକ୍ ଏଙ୍ଘା ସେବକସ୍ ଏନ୍ନେ କାମସ୍।’”
21“‘ଇ ଦୁନିଆଁନ୍ତା ବିନାୟାହୁଦୀ ଆଲାର୍ ଏଙ୍ଘା ସେବକ୍ସ୍କି ମିଆଁ ଭାର୍ଷା ଉଇୟର୍।’”
ଯୀଶୁସ୍ ଆରୁ ବେଲ୍ଜେବୁଲ୍
(ମାର୍କୁସ୍ ୩:୩୦; ଲୁକାସ୍ ୧୧:୧୪-୨୩)
22ଆନ୍ତିନ୍ ଆଲାର୍ ଅଣ୍ଟା ଭୁତ୍ତୁଲାକ୍କା କାଁଣା ଆରୁ କନ୍ଦା ଆଲାସିନ୍ ଯୀଶୁସ୍କି ଚାହାଗେ ଅନ୍ଦ୍ରାର୍; ଆରୁ ଯୀଶୁସ୍ ଆସିନ୍ ବାନେ କାମ୍ଚାସ୍, ଆଙ୍ଗେନ୍ ଆସ୍ କାଚ୍ନେଖ୍ରା ଅଙ୍ଗିୟାସ୍ ଆରୁ ଏରାଗେ ଲାଗ୍ଗିୟାସ୍। 23ଜାମା ଆଲାର୍ ଆଚ୍ମିତ୍ ମାନିକିରି ତେଙ୍ଗା ଲାଗ୍ଗିୟାର୍, “ଇସ୍ ଦାଉଦ୍ସ୍କି ହାଦ୍ଦୁସ୍ ତା ମାଲ୍ଦାସ୍?” 24ଲେକିନ୍ ଫାରିସୀଜାମାର୍ ଇବନ୍ ମେନିକିରି ତେଙ୍ଗିୟାର୍, “ଇ ଆଲାସ୍ତା ଭୁତ୍ତୁର୍ଘି ମୁଖିଆ ବେଲ୍ଜେବୁଲ୍ଘି ମଦେତ୍ତି ଭୁତ୍ତୁଗୁଠିନ୍ ଅଥ୍ର୍ଦାସ୍।” 25ଆବ୍ଡ଼ାର୍ଘି ସୋଚ୍ବନ୍ ଆହିକିରି ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏକା ରାଜୀଦ୍ ଭାଗ୍ ମାନିକିରି ନିଜର୍ନିଜର୍ ଭିତ୍ରେ ଝାଗ୍ଡ଼ା ମାନିଦ୍, ଆଦ୍ ମା ଟିକ୍ରିଦ୍; ଆରୁ ଏକା ସହର୍ ଚାହେ ଆଡ଼୍ପାନୁ ଝାଗ୍ଡ଼ା ମାନିଦ୍, ଆଦ୍ ଟିକ୍ରା ପଲ୍ଲୀ। 26ଆରୁ ଯଦି ଶାଏତାନ୍ଦ୍ ଶାଏତାନ୍ବନ୍ନିନ୍ ଅଥ୍ରୋତା ଆଦ୍ ତାଙ୍ଘା ବିରୁଦ୍ଧନୁ କେରା; ହାଲେ ଆଦ୍ଘି ରାଜୀଦ୍ ଏସ୍କେ ଟିକ୍ରା ଅଙ୍ଗଦ୍? 27ଆରୁ ଯଦି ଏନ୍ ବେଲ୍ଜେବୁଲ୍ ଭୁତ୍ତୁଘି ମଦେତ୍ତି ଭୁତ୍ତୁଗୁଠିନ୍ ଅଥ୍ର୍ଦାନ୍ ତା, ନିହ୍ମା ବାଉଁଶାର୍ ନେଖା ମଦେତ୍ତି ଅଥ୍ର୍ନାଏ? ହୁଦ୍ଘିଲାଗାନ୍ ଆବ୍ଡ଼ାରିନ୍ ନିହ୍ମା ନ୍ୟାୟ କାମର୍। 28ଆରୁ ଯଦି ଏନ୍ ପାର୍ମେଶ୍ଵାର୍ସ୍କି ଆତ୍ମାଘି ମଦେତ୍ତି ଭୁତ୍ତୁଗୁଠିନ୍ ଅଥ୍ର୍ଦାନ୍ ତା, ପାର୍ମେଶ୍ଵାର୍ସ୍କି ରାଜୀଦ୍ ନିହ୍ମା ମାଝାନୁ ବାର୍ଚା କେର୍କିଚି। 29ଏକିନ୍ ଆଲାସ୍ ଏକିନ୍ ତାକତ୍ବାଲା ଆଲାସ୍କି ଆଡ଼୍ପା କରିକିରି ଆସ୍କି ସମ୍ପତ୍ତି ହାଡ଼ା ବେଦ୍ଦସ୍ ତା ପହ୍ଲେ ଆ ତାକତ୍ବାଲା ଆଲାସିନ୍ ହିଁଆ ଖାତ୍ରୋ ତା ଆସ୍ ତାକତ୍ ବାଲାସ୍କି ଆଡ଼୍ପାନ୍ ଲୁଟା ଅଙ୍ଗସ୍ 30ଏକାର୍ ଏଙ୍ଘାଗାନେ ମାଲ୍କାରିନ୍ ଆବ୍ଡ଼ାର୍ ଏଙ୍ଘା ବିରୁଦ୍ଧ୍ନୁ ରାନାଏ ଆରୁ ଏକାର୍ ଏଙ୍ଘାଗାନେ ମା ଠୁଡ଼୍ୟାନାଏ ଆବ୍ଡ଼ାର୍ ଛିଛିର୍ଛାନ୍ଦ୍ କାମ୍ନାଏ। 31ଇଦ୍ଘିଲାଗାନ୍ ଏନ୍ ତେଙ୍ଗାଲ୍ଦାନ୍ କା, ଆଲାର୍ଘି ଆରୁ ପାର୍ମେଶ୍ୱାର୍ସ୍କି ବିରୁଦ୍ଧତା ଜାମା ଲେଖା ପାପ୍ ଆରୁ ନିନ୍ଦା ଛେମା କାମାକୋ, ଲେକିନ୍ ପାବିତାର୍ ଆତ୍ମାଘି ବିରୁଦ୍ଧ ନିନ୍ଦା ଛେମା କାମା ମା କାଇ। 32ନେଦିନ୍ ମୁନୁଷ୍ ହାଦ୍ଦୁସ୍କି ବିରୁଦ୍ଧ୍ନୁ ଏନ୍ଦ୍ରିନ୍ ତେଙ୍ଗର୍, ଆସ୍କି ପାପ୍ବନ୍ ଛେମା କାମାକଦ୍, ଲେକିନ୍ ନେଦ୍ ପାବିତାର୍ ଆତ୍ମାଘି ବିରୁଦ୍ଧ୍ନୁ ଏନ୍ଦ୍ରିନ୍ ତେଙ୍ଗର୍, ଆସ୍କି ପାପ୍ବନ୍ ଇ ଦୁନିଆଁନୁ ଚାହେ ସେପୁର୍ନୁ ଛେମା କାମା ମା କାଇ।”
ମାନ୍ନୁ ବାନେ ରାଇ ତା ଫାଡ଼ୁହି ବାନେ ରାଇ
(ଲୁକାସ୍ ୬:୪୩-୪୫)
33“ଯଦି ଅଣ୍ଟା ମାନ୍ନୁନ୍ ବାନେ ବର୍ତା, ଆଦ୍ଘି ଫାଡ଼ୁନ୍ହି ବାନେ ବର୍, ଆରୁ ମାନ୍ନୁନ୍ ଖାରାପ୍ ବର୍ତା, ତାଙ୍ଘା ଫାଡ଼ୁନ୍ହି ଖାରାପ୍ ବର୍; ଏନ୍ଦେର୍ଗେକା ମାନ୍ନୁ ତାଙ୍ଘା ଫାଡ଼ୁତିନିନ୍ ଚିହ୍ନରିଦ୍। 34ହେ ନେର୍ରୁଘି ହାଦ୍ଦୁରୋ, ନିମ୍ ଖାରାପ୍ ରାଇକିରି ଏସ୍କେ ବାନେ କାତ୍ଥା ତେଙ୍ଗା ଅଙ୍ଗର୍? ଏନ୍ଦେର୍ଗେକା ଏକାଦ୍ ମନ୍ନୁ ନିନ୍ଦ୍କିରାଇଦ୍, ଆଦିନ୍ ଥୁମ୍ଣାନୁ ବାରିଦ୍। 35ବାନେ ଆଲାସ୍ ତାଙ୍ଘାଏ ମନ୍ଘି ଭାଣ୍ଡାର୍ତି ବାନେ ସୋଚ୍ବିଚାର୍ କାତ୍ଥା ଅଥ୍ର୍ଦାସ୍, ଆରୁ ଖାରାପ୍ ଆଲାସ୍ ଖାରାପ୍ ଭାଣ୍ଡାର୍ତି ଖାରାପ୍ ସୋଚ୍ବିଚାର୍ କାତ୍ଥା ଅଥ୍ର୍ଦାସ୍। 36ଏନ୍ ନିମାନ୍ ତେଙ୍ଗାଲ୍ଦାନ୍ କା ପାର୍ମେଶ୍ୱାର୍ସ୍ ଆଲାର୍ଘି ନ୍ୟାୟ କାମ୍ନାଘି ଉଲ୍ଲାନୁ ଜାମା ଆଲାର୍ଗେ ନିଜର୍ ଜାମା ବେକାର୍ ତେଙ୍କା କାତ୍ଥାଘି ହିସାବ୍ ଚିଆ ଖାତ୍ରୋ। 37ଏନ୍ଦେର୍ଗେକା ନିମ୍ ନିହ୍ମା କାତ୍ଥାତିନିନ୍ ଦୋଷୀ ଠାହ୍ରାରର୍, ଆରୁ ନିହ୍ମା କାତ୍ଥାତିନିନ୍ ନିର୍ଦ୍ଦୋଷ୍ ଠାହ୍ରାରର୍।”
ଯୀଶୁସିନ୍ ସରଗ୍ତା ଚିହ୍ନା ନିନା
(ମାର୍କୁସ୍ ୮:୧୧,୧୨; ଲୁକାସ୍ ୧୧:୨୯-୩୨)
38ହତ୍କବାକେନ୍ କେତ୍କ ଲୋକ୍ ପଣ୍ତିତ୍ ଆରୁ ଫାରିସୀଜାମାର୍ ଯୀଶୁସିନ୍ ତେଙ୍ଗିୟାର୍, “ହେ ଗୁରୁ, ଏମ୍ ନିହ୍ମାସ୍ତି ଅଣ୍ଟା ଚିହ୍ନା ଏରା ବେଦ୍ଦାଲ୍ଦାମ୍।” 39ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ଇ ଯୁଗ୍ତା ବଦ୍ମାସ୍ ଆରୁ ପାର୍ମେଶ୍ୱାର୍ସ୍କି ବଚନ୍ ମା ମାନ୍ନାବାଲା ଆଲାର୍ ଚିହ୍ନା ବେଦ୍ଦନାଏ, ଲେକିନ୍ ଯୁନାସ୍ ନାବୀସ୍କି ଚିହ୍ନାବନ୍ ଆମ୍ବିକିରି ଦୁସ୍ରା ଆରୁ ଏନ୍ଦେର୍ହି ଚିହ୍ନା ଆବ୍ଡ଼ାର୍ଗେ ମା ଚିଆକାଇ। 40ଏନ୍ଦେର୍ଗେକା ଯୁନାସ୍ ଏସ୍କେ ତିନ୍ ଦିନ୍ ଆରୁ ତିନ୍ ମାଁହା ଅଣ୍ଟା ବାଡ଼୍କା ଇଞ୍ଜୋଘି କୁଲୁନୁ ରାଚାସ୍, ଆନ୍ନେନ୍ ମୁନୁଷ୍ ହାଦ୍ଦୁସ୍ ତିନ୍ ଦିନ୍ ଆରୁ ତିନ୍ ମାଁହା ଧାନ୍ତାରୀ କିୟାଁ ରସ୍। 41ନ୍ୟାୟ ଉଲ୍ଲାନୁ ନୀନିବୀ ସହର୍ତା ଆଲାର୍ ଇ ଯୁଗ୍ତା ଆଲାର୍ ଗାନେ ଉସ୍କାରିକିରି ଆବ୍ଡ଼ାରିନ୍ ଦୋଷୀ ଠାହ୍ରାବର୍, ଏନ୍ଦେର୍ଗେକା ଆବ୍ଡ଼ାର୍ ଯୁନାସ୍କି ଉପ୍ଦେଶ୍ ମେନିକିରି ତାହ୍ମା ପାପ୍ ଆମ୍ବିକିରି ପାର୍ମେଶ୍ୱାର୍ସ୍କି ଚାହାଗେ ବାର୍ଚ୍କାଚାର୍; ଆରୁ ଏରା, ଇସାନ୍ ଆସ୍ ରାଦାସ୍ ଏକାସ୍ କା ଯୁନାସ୍ତିହି ବାଡ଼୍କାସ୍। 42ଆରୁ ଦକ୍ଷିଣ୍ ରାଜୀନ୍ତା ରାନୀ ନ୍ୟାୟଘି ଉଲ୍ଲା ଇ ଯୁଗ୍ତା ଆଲାର୍ ଗାନେ ଉସ୍କାରିକିରି ଆବ୍ଡ଼ାରିନ୍ ଦୋଷୀ ଠାହ୍ରାବଦ୍, ଏନ୍ଦେର୍ଗେକା ଆଦ୍ ଶୁଲେମାନ୍ସ୍କି ବୁଦ୍ଧିଘି କାତ୍ଥା ମେନାଗେ ଦୁନିଆଁନ୍ତା ଖାଁଣିସ୍ତି ବାର୍ଚ୍କିଚା; ଆରୁ ଏରା, ଇସାନ୍ ଆସ୍ ରାଦାସ୍ ଏକାସ୍ କା ଶୁଲେମାନ୍ସ୍ତିହି ବାଡ଼୍କାସ୍।”
ଖାରାପ୍ ଆତ୍ମାଘି ପହେଲା ଆଡ୍ଡାନୁ କିର୍ର୍ନା
(ଲୁକାସ୍ ୧୧:୨୪-୨୬)
43“ଯେତ୍କବାକେନ୍ ଭୁତ୍ତୁଦ୍ ଅଣ୍ଟା ଆଲାସ୍ସ୍ତି ଉର୍ଖି ତା, ଆଦ୍ ଆରାମ୍ ଆଡ୍ଡାଗୁଠିନ୍ ବେଦ୍ଦାଲାଗ୍ଗି, ଲେକିନ୍ ଆଦ୍ ମା ହାଖ୍ଖୀ। 44ଆଙ୍ଗେନ୍ ଆଦ୍ ତେଙ୍ଗି, ‘ଏନ୍ ଏକା ଆଡ଼୍ପାନ୍ତି ଉର୍କିଚାନ୍, ଆ ଆଡ଼୍ପାଗେ କିର୍ରନ୍କନ୍।’ ଆରୁ କିର୍କାନ୍ତି ଆଦ୍ ଆ ଆଡ଼୍ପାବନ୍ ସାଫା ସୁତ୍ରା ଆରୁ ସାଜାବାଚ୍କା ହାଖ୍ଖୀଦ୍। 45ଆଙ୍ଗେନ୍ ଆଦ୍ ତାଙ୍ଘାଗାନେ ଆରୁ ସାତ୍ତେଟା ଭୁତ୍ତୁବନ୍ ଅନ୍ଦ୍ରି, ଆରୁ ଆବ୍ଡ଼ାର୍ ଆସାନ୍ କର୍ନାଏ ଆରୁ ଆସାନିନ୍ ରାନାଏ କାନାଏ ଆରୁ ଆ ଆଲାସ୍କି ଆଘ୍ଲିନ୍ତା ଦାଶାନ୍ତି ପାଛ୍ଲିନ୍ତା ଦାଶା ବାଗ୍ଗେ ଖାରାପ୍ ମାନିଦ୍। ଇ ଯୁଗ୍ତା ଖାରାପ୍ ଆଲାର୍ଘି ଦାଶା ଏନ୍ନେନ୍ ମାନଦ୍।”
ଯୀଶୁସ୍କି ଅନୁସରଣ୍ କାମୁ ଆଲାରିନ୍ ତାଙ୍ଘା ଆଡ଼୍ପାନ୍ତାର୍
(ମାର୍କୁସ୍ ୩:୩୧-୩୫; ଲୁକାସ୍ ୮:୧୯-୨୧)
46ଯେତ୍କବାକେନ୍ ଯୀଶୁସ୍ ଆଲାର୍ଘି ମାଝାନୁ କାଚ୍ନେଖ୍ରାଲିୟାସ୍, ହତ୍କବାକେନ୍ ତାଙ୍ଘା ଆୟାଙ୍ଗ୍ ଆରୁ ଭାଇଜାମାର୍ ବାହ୍ରି ଇଜ୍ଜକାଚାର୍ ଆରୁ ଆସ୍ଗାନେ କାଚ୍ନେଖ୍ରା ବେଦ୍ଦାଲିୟାର୍। 47ଆଙ୍ଗେନ୍ ଅଣ୍ଟା ଆଲାସ୍ ଯୀଶୁସିନ୍ ତେଙ୍ଗିୟାସ୍, “ଏରା, ନିହ୍ମା ଆୟାଙ୍ଗ୍ ଆରୁ ଭାଇଜାମାର୍ ବାହ୍ରି ଇଜ୍ଜକାନାଏ, ଆରୁ ଆବ୍ଡ଼ାର୍ ନିହ୍ମାଗାନେ କାଚ୍ନେଖ୍ରା ବେଦ୍ଦାଲ୍ନାଏ।” 48ଇବନ୍ ମେନିକିରି ଆସ୍ ତେଙ୍ଗୁ ଆଲାସିନ୍ ଯାବାବ୍ ଚିଚ୍ଚାସ୍, “ନେଦ୍ ଏଙ୍ଘା ଆୟାଙ୍ଗ୍? ଆରୁ ନେଦ୍ ଏଙ୍ଘା ଭାଇଜାମାର୍?” 49ଆରୁ ନିଜର୍ ଚେଲାର୍ତାରା ହେଖ୍ଖା ଲାମ୍ବାବାଇକିରି ତେଙ୍ଗିୟାସ୍, “ଏରା, ଇବ୍ଡ଼ାର୍ ଏଙ୍ଘା ଆୟାଙ୍ଗ୍ ଆରୁ ଭାଇର୍। 50ଏନ୍ଦେର୍ଗେକା ନେଦ୍ ଏଙ୍ଘା ସରଗ୍ତା ବାଙ୍ଗ୍ସ୍କି ଇଚ୍ଛା ଲେଖା ଚାଲ୍ର୍ନାଏ, ଆବ୍ଡ଼ାର୍ ଏଙ୍ଘା ଆୟାଙ୍ଗ୍ ଆରୁ ଭାଇ ବୁହୁଣୀର୍।”
© (Active) Wycliffe Bible Translators, Inc. All rights reserved.
