Lukas 24
24
Yesus bobali' hidup
(24:1-12)
(Mat. 28:1-10; Mrk. 16:1-8; Yoh. 20:1-10)
1Timpu ari Minggu, holapm sunsukng, boko botina' nantai botula' ko pasaran mombaba' boko rorompahan inyo udah sia' siap'an pakai' bangkai Yesus. 2Kali datakng ko pasaran, sia' moniant batu ponutupnyo udah togulikng. 3Sia' mansu' ko dalapm pasaran nantai, apo moniant co nyiant am bangkai Tuhatn Yesus di santai.
4Tongahan sia' bodiritn di santai bingung momikiran hal nantai, sopongirap ado duo urakng agatn pakai'an bocohayo bodiritn dampikng sia'. 5Sia' kotakng gola', lalu monyungkapan sampai ko tanah obai hormat. Apo koduo urakng nantai bopandir ko sia', “Padohan monggoyapi urakng inyo udah bobali' hidup di antaro urakng mati. 6Io conyiant di si'itn. Io udah bobali' hidup doi' komatian! Ingantcam la'apo inyo udah dipandiran-Nyo ko kaitn komai watu Io ija' di doerah Galilea. 7Watu nantai Yesus bopandir agatn kaitn, ‘Ana' Monsio gola' disorahan ko urakng bodosa, lalu dihukupm mati di kayu salib. Apo timpu ari inyo kotigo, Aku tajahan bobali' hidup.’ ” 8Lalu toingant'am boko botina' agatn boko pomandiran Yesus nantai. 9-10Boko botina' nantai: Maria Magdalena, Yohana ongko Maria indai Yakobus, huatan boko botina' bukainyo inyo sosamo agatn sia'.
Lopas doi' pasaran nantai, sia' pulakng ko Yerusalem. Sia' mongisahan somuo kojadian nantai ko sobolas murid huatan somuo murid inyo bukainyo. 11Apo, boko murid kinyo pocayo agatn pomandiran boko botina' nantai obai kodinga'annyo la'apo inyo sia' kisahan kinyo mansu' akal.
12Apo, Petrus bodiritn ongko bonggidi'an ko pasaran Yesus. Io monukau oca' moniant ko dalapm pasaran nantai, apo conyiant bangkai Yesus. Ongkah ado koitn mo, koitn inyo digunoan pakai' momutut bangkai-Nyo. Io hiratn bondar lalu botula' kapikng momikiran la'apo inyo udah tojadi.
Yesus moniant'an diri ko duo urakng murid-Nyo di jalatn ko laman Emaus
(24:13-35)
13Timpu ari nantai jam, ado duo urakng murid Yesus tongahan bojalatn ko laman Emaus, kurakng lobih sobolas pal doi' kota Yerusalem. 14Dalapm pojalatan, sia' duo bokisah mongonaꞌi somuo inyo udah tojadi. 15Timpu sia' duo tongahan botukar pondapat, Yesus datakng, bojalatn samoan agatn sia'. 16Apo ado suatu hal inyo bulah sia' co monyangko aman Sio nantai memang Yesus.
17Lalu Yesus botakutn ko sia', “La'apo inyo tongahan kaitn pongkisahan dalapm pojalatan ni'in?”
Lalu, sia' botongga'. Muho sia' kotiat'an salu' bondar. 18Lalu siku' urakng doi' sia', inyo bodamo Kleopas, bopandir, “Somuo urakng inyo datakng ko kota Yerusalem pakai' morayaan Paskah udah tohu apo inyo tojadi di su'utan watu ni'in. Pasti ongkah Duatam inyo kinyo tohu?”
19Yesus botakutn, “Poristiwa la'apo inyo tojadi?”
“Poristiwa inyo tojadi mongonaꞌi Yesus, urakng doi' laman Nazaret nantai,” kato sia'. “Sio nantai nabi inyo bokuaso doi' Allah. Sio bulah mujisat inyo luar biaso. Sio mongajar boko urakng agatn kotakng pintar-corodi'. Somuo urakng sonang agatn Sio. Apotolagi' Allah! 20Apo boko imam kopala' huatan boko pomimpitn inyo bukai doi' banso kito udah monyorahan Sio ko gubernur pomorintah Romawi oca' dihukupm mati. Sia' momakuan Sio di kayu salib. Sio udah mati. 21Padohal tontainyo koi kotakng boharap Sio inyo tajahan monyolamant'an banso Israel doi' kuaso musuh, apo balakngam. #24:21: Boko murid ni'in ija' bolupm mongoroti tujuan Yesus sobagai Rajo Inyo Dijanjian Allah. Sia' boharap Yesus paca'an monyolamant'an banso Israel doi' kuaso pomorintahan Romawi. Apo tujuan Sio pakai' monyolamant'an urakng doi' kuaso jahat (Titus 2:14, 1 Petrus 1:18). Apotolagi' watu ni'in co mungkitn obai ni'in udah ari inyo kotigo doi' Sio mati.
22Apo boboropo botina' doi' kolompok koi murid Yesus nantai, hoyu' mongisahan somuo hal inyo nongkonyant'i koi. Sia' botula' ko pasaran Sio holapm sunsukng nintai, 23apo bangkai-Nyo conyiant di dalapmnyo. Lalu sia' mongisahan mongonaꞌi boko molekat inyo moniant'an diri ko sia'. Boko molekat nantai bopandir Yesus udah bobali' hidup!
24Lopas nian, boboropo kawal koi#24:24: Lukas monulis obai Rasul Petrus botula' ko pasaran Yesus (ayat 12). Rasul Yohanes pan tuyut ko su'utn (Yohanes 20:2-10). Mungkitn pado watu nantai damo lopas jadi Petrus ongko Yohanes, ado boboropo murid inyo bukai jam botula' ko pasaran Yesus. botula' ko pasaran-Nyo. Ubonyo kisah boko botina' nantai bondar. Apo sia' pan co moniant Yesus.”
25Lalu Yesus bopandir ko sia' duo, “Oh, kaitn kotakng manah hoyu' mongoroti. Hati kaitn kotakng manah hoyu' pocayo somuo inyo udah dipandiran boko nabi komai mongonaꞌi Rajo Inyo Dijanjian Allah! 26Allah udah monontuan Sio gola' ajab sonsaro samaꞌan nantai holu'ai sobolupm Sio dimuliaan.” 27Lalu Yesus monjolasan ko sia' somuo inyo totulis mongonaꞌi Sio dalapm soluruh Buku Suci, mula'i doi' boko buku inyo ditulis Musa sampai somuo buku inyo ditulis boko nabi bukainyo.
28Timpu sia' udah dampikng ko tujuan sia', ia'an laman Emaus, ubonyo Yesus honda' monorusan pojalatan-Nyo. 29Apo sia' mombaba' Sio pakai' tinggal bosamo sia'. Kato sia', “Ari udah honda' malapam. Matoari hampikng tonggolapm. Bomalapm agatn koi di si'itn jam.” Jadi Sio mansu' ongko noluntukng samoan sia'.
30Watu Sio dudu' makatn sosamo agatn sia', Sio monguti' roti. Lopas jadi moucap'an doa sukur, Sio momingkai'-mingkai' roti nantai agatn jari-Nyo ongko moonju'nyo ko sia'. 31Watu nantai jam, tobuka'am pikiran sia', monjadi sadar Sio memang Yesus. Apo Sio lansukng hilakng. Sia' culih moniant Sio agi'. 32Sia' bopandir ko siku'-monyiku', “Niannam obainyo kito mooso kotakng bosomangant dipojalatan watu Sio monjolasan ko kito somuo inyo totulis mongonaꞌi Sio dalapm soluruh Buku Suci!”
33 Bolupm jadi sia' makatn, sia' duo lansukng pulakng ko kota Yerusalem. Di su'utn sia' botomu agatn sobolas murid ongko boko murid inyo bukainyo udah bokumpul. 34Somuo urakng inyo ado di santai bopandir ko sia' duo, “Tuhatn Yesus bondar-bondar udah bobali' hidup! Sio udah moniant'an diri ko Simon Petrus.”#24:34: Di 1 Korintus 15:5-8, ado daptar urakng inyo moniant Yesus lopas Sio bobali' hidup. 35Sia' duo mongisahan somuo inyo tojadi di pojalatan ko laman Emaus sampai watu sia' monjadi sadar Sio memang Yesus lopas jadi Sio momingkai'-mingkai' roti nantai.
Yesus moniant'an diri-Nyo ko boko murid-Nyo sampai sia' tohu obai Sio udah bobali' hidup
(24:36-49)
(Yoh. 20:19-23)
36Tongahan sia' duo ija' bokisah, sopongirap Yesus bodiritn di tongah-tongah sia' somuo ongko bopandir, “Salapm pakai' kaitn somuo!”
37Sia' tokonyant huatan kotakng gola', obai monyangko Sio hantu. 38Apo Yesus bopandir ko sia', “Jangan kaitn gola'. Jangan gangga'-gua'an! Aku bondar-bondar udah bobali' hidup. 39Tiat bokas boko luko di longan huatan kaki-Ku. Ni'in memang Aku siku'! Cama'! Porotian! Hantu kinyo boisi damo botulakng, kinyo samaꞌan inyo kaitn tiat di Aku.” 40Kapikng momandiran nantai, Sio monunju'an bokas boko luko di longan huatan kaki-Nyo.
41Apo sia' totap kinyo mudah pocayo obai sia' ija' kotakng hiratn. Nantai suatu borito inyo kotakng nontu inyo bulah sia' kotakng rindakng. Jadi, pakai' moyakit'an sia' Yesus bopandir, “Onji'i-Ku pomakatn kaitn di si'itan,” 42Sia' moonji'i ikatn panggakng ko Sio. 43Kapikng sia' somuo borotian, Sio momua'inyo.#24:43: Ni'in monjadi buti tambahan pakai' boko murid-Nyo. Aman Sio ulih makatn, pasti Sio ado bukakng-tubuhnyo, bukainyo hantu. Tiat contoh bukai di Lukas 8:55.
44Lopas nantai Sio bopandir ko sia', “Watu Aku ija' sosamo agatn kaitn komai, Aku udah momadahan ko kaitn obai somuo inyo totulis mongonaꞌi Aku gola' tojadi, doi' inyo totulis dalapm boko buku Musa, buku boko Nabi, sampai buku Mazmur.”
45Lopas nantai Yesus pan mombuka' pikiran sia' pakai' mongoroti masud Buku Suci. 46Sio bopandir, “Di dalapm Buku Suci udah ado totulis mongonaꞌi Rajo Inyo Dijanjian Allah. Io gola' ajab sonsaro sampai mati, ongko tigo ari lopas nian Io bobali' hidup. 47Lalu agatn kuaso-Nyo tajahan diboritoan kabar obai urakng gola' tongga' bulah dosa lalu monyonangan hati Allah, ongko dosa sia' tajahan diamputi. Borito ni'in gola' disampaian, mula'i doi' kota Yerusalem lalu ko somuo banso bukai di dunia.#24:47: Dalapm ayat 46-47, Yesus monyimpulan la'apo inyo dipandiran mongonaꞌi Rajo Inyo Dijanjian Allah dalapm [Buku Suci].
48Kaitn udah moniant somuonyo nantai. Jadi kaitn gola' momboritoan kabar nantai ko boko urakng bukai. 49Apo diapmcam di kota Yerusalem ni'in holu'ai obai Aku paca'an moutus Roh Allah ko kaitn, samaꞌan inyo udah dijanjian Bopai-Ku. Diapmcam holu'ai sampai Roh Allah datakng pakai' molongkapi kaitn agatn kuaso doi' Allah.”#24:49: Ayat 44-49 mungkitn monyimpulan pongajaran Yesus ko boko murid-Nyo pado ompat puluh ari (di antaro ari Sio bobali' hidup sampai Sio noi' ko sorugo) DAMO pado ari Sio noi' ko sorugo ja' (ayat 50-53; Kisah 1:4-9).
Yesus toangkat ko sorugo
(24:50-53)
50Lopas nantai Yesus mombaba' boko murid-Nyo doi' kota Yerusalem ko laman Betania. Di santai Sio moangkat longan-Nyo, lalu momborokati sia'. 51Tongahan Sio molabuhan nantai, Sio tosongkayo doi' sia', toangkat ko sorugo. 52Sia' tundu' monyombah Sio, lopas nantai sia' pulakng ko Yerusalem agatn hati kotakng rindakng bondar. 53Sia' hala momuji-muji Allah di tongahlamanan Rumah Allah sotiap ari.
