Yohanes 5
5
Watu ari Sabat, Yesus monyamani siku' urakng lumpuh di kolapm Betesda
(5:1-18)
1Lopas nantai, ado ari rayo urakng Yahudi. Jadi, Yesus botula' ko Yerusalem pakai' morayaan nantai. 2Di Yerusalem ado sobuah pintu gerbakng mansu' kota, damonyo Pintu Gerbakng Domba. Dampikng di siatn tai ado sobuah kolapm. Dalapm baso Ibrani kolapm nantai disobut ‘Betesda’. Kolapm nantai ado lima' polantaran. 3Banya' urakng sakit diulit'an di boko polantaran nantai: Ado boko urakng buto, boko urakng timpakng, boko urakng lumpuh. [Boko urakng sakit nantai monantian sampai ara'i di kolapm nantai bogolumbakng. 4Obai, sowatu-watu ado molekat Tuhatn inyo turutn lalu monggolumbakan ara'i di kolapm nantai. Sopo ja' inyo lobih holu mansu' ko dalapm ara'i nantai lopas jadi digolumbaki, lalu urakng nantai nyamanam doi' ponyakit la'apo pan.]
5Di santai ado siku' urakng inyo sakit udah tigo puluh dolapatn tohutn manahnyo, culihnyo bojalatn. 6Yesus moniant io moulit'an di santai, huatan tohu obai io nantai udah sakit manaham. Jadi Yesus botakutn ko io, “Kolai honda' nyaman?”
7Timbas urakng sakit nantai ko Sio, “Bopai, conyiant ado urakng inyo ulih monulukng mouluran ku ko dalapm kolapm nantai pas ara'inyo mula'i bogolumbakng. Watu ku bousaha monuju ko kolapm nantai, urakng bukai udah mansu' holuam.”
8Kato Yesus ko io, “Bodiritn cam, angkat tikar kolai nan, lalu bojalatncam!” 9Watu nian jam urakng nantai nyamanam. Io moangkat tikarnyo lalu bojalatn.
Apo ari nantai ia'an ari Sabat. 10Obai nianam, boko pomimpitn agama Yahudi bopandir ko urakng inyo hoyu' nyamanam nantai. Kato sia', “Sari ni'in ari Sabat. Jadi kolai culih mombaba' tikar kolai.”
11Apo io monimbasi sia', “Urakng inyo monyamanan aku, Sio momandiran ko aku: ‘Angkatcam tikar kolai, lalu bojalatncam.’ ”
12Sia' botakutn ko io, “Sopo inyo monyiuh kolai pakai' moangkat tikar kolai ongko bojalatn?”
13Apo io co tohu sopo inyo monyamaninyo. Obai, Yesus udah kinyo kotiat'an di antaro urakng banya' inyo ado di santai.
14Kohobu' kolusoannyo, Yesus botomu agatn urakng inyo dinyamani nantai di tongahlamanan Rumah Allah. Kato Yesus ko io, “Dinga'ancam! Ni'in kolai udah nyamanam. Jangan bulah dosa agi' oca' kolai co kona' la'apo pan inyo lobih buru'.”
15Urakng nantai borangkat ko boko pomimpitn agama Yahudi nantai, lalu momadahannyo ko sia' obai urakng inyo monyamaninyo ni'in Yesus. 16Jadi, boko pomimpitn agama Yahudi nantai bousaha honda' mondorako'i Yesus. Obai, Sio molabuhan boko hal ubo nantai watu ari Sabat.
17Apo Sio bopandir agatn sia', “Sampai watu ni'in, Bopai-Ku kinyo botongga' bokorojo. Sama'an nian jam, Aku pan bokorojo jam.” 18Obai pomandiran Yesus nantai, lalu boko pomimpitn agama Yahudi mongkitn bousaha pakai' mombunuh-Nyo. Bukainyo aja' obai Sio molanggar poraturan ari Sabat, apo obai Sio momandiran obai Allah nantai Bopai-Nyo. Agatn ubo nian, Sio monyamoan diri-Nyo agatn Allah.
Yesus bopandir obai Allah inyo moonji'i kuaso ko Io
(5:19-47)
19Ongko Yesus monimbas boko pomimpitn agama Yahudi nantai. Kato-Nyo, “Pondinga'ancam bobondar, inyo Ku pandiran ni'in: Ana' kinyo molabuhan boko la'apo doi' kohonda' diri-Nyo siku'. Ana' ongkah molabuhan la'apo inyo Io tiat doi' Bopai. Obai, la'apo inyo dilabuhan Allah Bopai, nantai jam inyo dilabuhan Ana'. 20Obai, Bopai mongasihi Ana'. Sio monunju'an la'apo pan inyo Sio labuhan ko Io. Malah, Sio paca'an monunju'an ko Ana'nyo boko porbuatan inyo lobih hebat agi', jadi nononyo kaitn paca'an hiratn. 21Bopai bulah boko urakng mati lalu bobali' hidup, huatan moonji'i sia' kohidupan inyo sobondarnyo. Ubo nian jam Ana' moonji'i kohidupan inyo sobondarnyo ko sopo ja' sosuai kohonda'-Nyo. 22Bopai co mohakipi sopo pan.#5:22: Dalapm ayat ni'in, kato ‘mohakipi’ boroti ‘ponghakipan nononyo’, ia'an nantai ‘kuaso pakai' monontuan sopo ulih hidup somanah-manahnyo di sorugo huatan sopo dibuakan ko noraka’. Apo somuo kuaso pakai' mohakipi udah dionju' ko Ana'. 23Bopai molabuhan nantai oca' somuo urakng mohormati Ana' samo sama'an sia' mohormati Sio. Sopo ja' inyo co mohormati Ana', boroti io kinyo mohormati Allah Bopai inyo moutus-Nyo.
24Pondinga'ancam bobondar inyo Ku pandiran ni'in: Somuo urakng inyo monuruti pomandiran-Ku huatan pocayo ko Allah inyo moutus Aku, sia' co dihukupm apo mondapat'an hidup somanah-manahnyo. Obai, sia' udah pindah doi' komatian somanah-manahnyo huatan mansu' ko dalapm kohidupan inyo bondar huatan somanah-manahnyo.#5:24: Dalapm boko ayat nononyo ni'in, kato ‘mati huatan hidup’ ulih boroti ‘hukupan kokal di noraka’ huatan ‘hidup kokal di sorugo’. Apo ulih jam boroti ‘mati hidup socaro rohani’ ia'an urakng inyo hidup jouh doi' Allah huatan boko urakng inyo hidup dampikng agatn Allah. Dalapm buku Yohanes ni'in, hidup inyo sobondarnyo di dunia ni'in huatan hidup kokal di sorugo, ado hubukan dampikng. 25Pondinga'ancam bobondar inyo Ku pandiran ni'in: Tajahan datakng watunyo malahan udah datakam watunyo boko urakng mati paca'an mondinga' saro Ana' Allah. Sia' inyo mondinga'annyo paca'an hidup. 26Obai, Bopai moonji'i kuaso ko Ana' pakai' moonji'i hidup, samo sama'an Sio ado kuaso pakai' moonji'i hidup. 27Sio udah moonji'i kuaso ko Io pakai' mohakipi, obai Io nam inyo disobut Ana' Monsio.
28Jangan kaitn hiratn agatn hal ni'in. Obai, paca'an datakng watunyo somuo urakng mati paca'an mondinga' saro-Nyo. 29Sia' paca'an koluar doi' pasaran. Urakng inyo bulah koboi'an paca'an mondapat'an hidup somanah-manahnyo di sorugo. Apo urakng inyo bulah kojahatan paca'an dihukupm di noraka.” 30“Aku culih-Ku bulah boko lapo doi' kohonda'-Ku siku'. Aku mohakipi sosuai agatn lapo inyo Aku dinga' doi' Bopai-Ku. Somuo koputusan-Ku adil, obai Aku co monuruti kohonda'-Ku siku', apo Aku monuruti kohonda' Sio inyo moutus Aku.
31Aman bayo Aku siku' momadahan mongona'i diri-Ku, urakng bukai bolupm tohu aman pomandiran-Ku bondar. 32Apo ado inyo bukai inyo momadahan mongona'i Aku. Aku tohu obai pomandiran-Nyo bondar.#5:32: Sio inyo momadahan mongona'i Yesus di si'itn rotinyo Yohanes Pombaptis DAMO Allah Bopai. 33Kaitn udah moutus rombokan ko Yohanes Pombaptis. Io momadahan mongona'i Aku agatn bondar.#5:33: Komai, pomimpitn urakng Yahudi moutus rombokan imam ko Yohanes Pombaptis. Yohanes mongatoan obai io bukainyo Rajo Inyo Dijanjian Allah Apo Rajo nantai paca'an oca'mo datakng. Tiat Yohanes 1:19-28. 34(Sobondarnyo Aku co momontikan monsio pakai' bosasi mongona'i Aku. Apo Aku moingant'an kaitn mongona'i kosasian Yohanes oca' kaitn dapat disolamant'an.) 35Yohanes samo sama'an pompolitoan inyo bonyalo huatan bocohayo.#5:35: Monorakan mongona'i la'apo inyo bondar. Kaitn sonang monorima' cohayonyo nantai apo bayo somontaro mo.#5:35: agatn pomandirannyo nantai apo bayo pakai' somontaro watu mo.
36Apo Aku ado buti inyo lobih kuat daripado pomandiran Yohanes. Allah Bopai udah moonji'i pokoroja'an ko aku. Aku molabuhan boko pokoroja'an nantai watu ni'in. Somuo porbuatan-Ku nantai mombutian obai Bopai udah moutus Aku. 37Bopai inyo moutus Aku, Sio siku' udah momadahan mongona'i Aku.#5:37: Allah udah momadahan mongona'i Yesus dalapm Buku Suci huatan watu Yesus dibaptis. Allah inyo bopandir di dalapm hati sotiap monsio inyo pocayo. Sio bulah sia' yakitn mongona'i Yesus. Apo kaitn co kalo mondinga' saro-Nyo huatan co kalo moniant rupo-Nyo. 38Kaitn co monyimpatn Pomandiran Allah dalapm hati kaitn obai kaitn co pocayo Aku inyo diutus-Nyo. 39Kaitn bolajar Buku Suci obai kaitn monyangko obai ado hidup somanah-manahnyo di dalapmnyo. Apo Buku Suci nantai momadahan mongona'i Aku. 40Biar pan ubo nian, kaitn co honda' datakng ko Aku pakai' mondapat'an hidup nantai.
41Aku co bogoyap pujian doi' monsio. 42Apo Aku mongonal kaitn. Kaitn co bobondar mongasihi Allah dalapm hati kaitn. 43Aku datakng dalapm damo Bopai-Ku, apo kaitn monula' Ku. Padohal, soandainyo ado urakng bukai inyo datakng bayo mowakili dirinyo siku', kaitn tajahan monorima' io. 44Nantai obai kaitn gala' hala bogoyap kohormatan doi' sosamo kaitn mo. Apo kaitn co kalo goyap pujian doi' Allah inyo satu-satunyo inyo bondar. Aman ubo nian, pasti kaitn co pocayo agatn Aku!
45Jangan kaitn bopikir obai Aku paca'an monyalahan kaitn di hadapan Bopai. Urakng inyo monyalahan kaitn nan Musa. Kaitn boharap kaitn paca'an disolamant'an obai kaitn monaati porintah Allah inyo ditulis Musa. Apo, justru Musanam inyo monyalahan kaitn. 46Obai, sobondarnyo kaitn co pocayo agatn io. Soandainyo kaitn bobondar pocayo ko Musa, lalu soharusnyo kaitn pan pocayo agatn Aku. Obai, io udah monulis mongona'i Aku. 47Apo nyatonyo kaitn co pocayo lapo inyo ditulisnyo. Jadi, co mungkitn kaitn paca'an pocayo lapo inyo Ku padahan?”
נבחרו כעת:
Yohanes 5: TBDS
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
