Luka 9
9
Yesu Akpɛ Kɛfɔnɛtɛabha Nɛ Asɛsɛ
1Gɛ Yesu eklu Banɔ Lɔfɔnɛtɛabha nɛ exogo, akɔ alɛ kemi anɛ kabhaŋɛŋa sɛ tɛ ba kɛka ɛfufɔɛ kpã petee bu klɛ tɛ be bu banya nɛ balɛ shu mɛ, 2klɛ akpɛ alɛ sɛ tɛ ba da ɖɔaɖɔ denɔ Kpaya bukusi nɛ shu klɛ tɛ ba kɔ banyɛnya nɛ alɔ. 3Etsre alɛ asɛ: “Nɔ tɛyɛkɔ kɛdɔnyɛdɔ ovunɔ kɔ wunɔɛ dzogɛga— nɔtɛyɛkɔ osivuvu, ɔkpɛtɛ, gbɛgbɛ̃vu, kɔba, apɔtɛ bhlatɔ ɔplɛnɔ shu. 4Bupa nɔ nɛ mɛ gɛ nɔ tsoku, nɔ za ɔkɛlɛ ɔdɔtɔnɔ kibenɔ nɛ gɛ nɔ shɛ̃ nɛ ɔma nɛ mɛ. 5Onugɛ banɔ ba dɛ yɛkɛ nɔ, nɔ xule ɔya nɛ wunɔ katsrɛkpɔ nɛ shu olu ɔma nɛ mɛ kɔ alɛ flogo tɛ nɔ shɛ̃, anasɛ kibuimɔɖɔ olu kɔ alɛ.” 6Kɛlɛ batɔnɛ dzo klɛ bavɛ denɔ kɔxoe ɔvɛnɔ kɔxoe, baɖɔ kibui dzyɔgo klɛ bakɔ banɔ shu bhui nɛ ɔkɔnyɔkɔ.
7Ɔtsɔnɛ ekusi Heroɖesɛ enu ebui nɛ petee gɛ lavɛ́ abha. Klɛ efutsu, alasɛ banɔ teli ba ɖɔ sɛ Yohanɛsɛ gɛ etsi ya la nyɛmɛ denɔ bekpui mɛ, 8bahlatɔ asɛ Eliya yɛ aba bushuakasɛ, klɛ babhlatɔ teli tsyɛ aɖɔ sɛ atɔnu kuku teli ye tsodzi aba ɛkpã mɛ. 9Pɔ Heroɖesɛ aɖɔ sɛ, “Mɛ bhui Yohanɛsɛ tɔkpu. Kɛlɛalɛ Ane, ɔtsɔnɛ, ye nu agɛ yɛ shue bui di mɛ nu?” Klɛ awlãkɛ sɛ tɛ amɔ yɛ.
Yesu Akɔ Banɔ Akpã Teti Kɛdɔŋɛŋa
10Gɛ banɔkpɛkpɛ nɛ de ba, be tsre Yesu ebui nɛ petee gɛ ba bhɛtɛ. Kɛlɛede Yesu agbanɛ alɛ ata shu klɛ balɛnahwɛ tsodzi avɛ ɔmanɛ gɛ be klu asɛ Betasiada, 11pɔ banɔɛza ne nu bui denɔ kɛlɛ shu klɛ ba tɔnɛ yɛ. Ayɛkɛ alɛ klɛ aɖɔaɖɔ kɔ alɛ denɔ Kpaya bukusi nɛ shu, klɛ akɔ ba lɛ shubhui ba gɛ ba lɛ sɛ tɛ ba lɛ shubhui.
12Gɛ ɔwulago nɔ na, banɔ Lɔfɔnɛtɛabha ba ba yɛ ɔbha klɛ ba ɖɔ sɛ, “Kɔ banɔɛza nashɛ̃ sɛ tɛ bavɛ bakɔxoe anɛ̀ ɛma gɛ lɛ kana nɛ mɛ, tɛ ba da pɛɛ kɛdɔŋɛŋa nɛ̀ ɔwũsɔkɔ, alasɛ bu lɛ odzidzekɔ nɛ ɔkɛnɛ.”
13Etsre alɛ sɛ, “Nɔ kɔ alɛ dɔ tili tɛ ba ŋa.” Be builɛnu asɛ, “Gbɛ̃gbɛvu teti nɛ kenimɛdzya tɛbha ko kɛlɛ lɛ bulɔ ahwɛ—ɔdɛsɛ buda dzi kɛŋɛŋa kɔ banɔɛza petee.” 14(Banɔ anasɛ akpa teti balɛ aza ɔkɛlɛ.)
Pɔ aɖɔ tsre yɛ badɔkpasɛ nɛ asɛ, “Nɔ kɔ alɛ za kesi nɛ tɛxuxogo mɛ kɛtsunyɛtsu afeti.” 15Badɔkpasɛ nɛ abhɛtɛ atrɔ kɛlɛabha, klɛ anɔnyanɔ azae si. 16Gɛ ayɛkɔ ɛgba titi anɛ kɛnimɛdzya tɛbha klɛ ebu amɛ ewunɔ edi owũsise, ehu ahwɛ klɛ ayɛ lɛ mɛ. Ɔkɛlɛ ayɛkɔɛ lɛ akɔ yɛ badɔkpasɛ sɛ tɛ ba yɛ kɔɛ lɛ kɔ banɔ. 17Balɛ petee baŋaɛ dɔ klɛ bexui, klɛ badɔkpasɛ nɛ atɔkɛ ewliwli gɛ lagɔ bushɔɛ lɔfɔnɛtɛabha.
Petro Ebuiɖɛɖɔ Nɛ Yesu Shu
18Kiwui tili gɛ Yesu èklukpaya nɛ okpukpukɔ klɛ yɛ badɔkpasɛ nɛ aza yɛ ɔbha, ebisi alɛ sɛ, “Ane banɔɛza nɛ aɖɔ sɛ yɛ mɛ ɛnu?”
19Be bui lɛ nu asɛ, “Banɔ teli asɛ Yohanɛsɛ Ɛnikpɛ, babhlatɔ asɛ Eliya, klɛ babhlatɔ teli tsyɛ asɛ, atɔnu kuku teli yɛ tsodzi aba kanɔɛ mɛ.”
20Ebisi asɛ, “Pɔ wunɔ xɔ̃?” “Anɛ nɔ ɖɔ sɛ yɛ mɛ nu?”
Petro ebuaɖɔ sɛ, “Kpaya Kristo.”
21Yesu akpɛ ɔshã kɔ alɛ gɛganɛ sɛ ba tɛɖɔ kibuinɛ etsre anɔnyanɔ. 22Klɛ aɖɔ sɛ, “Anɔdzyrame Yi alasɛ tɛ amɔ butɔ gɛlɛɛ klɛ beshishe, bekusi, kpayaɔzakɔanɔ ekusi anɛ̀ ɛshã badɔkasɛ ba tɛ bayɛkɛyɛ yɛ klɛ alasɛ tɛ beyi yɛ klɛ kiwui kɛtramɛ nɛabha ba ba nyɛmɛ yɛ amɛna kanɔɛmɛ.”
23Ɔkɛlɛ aɖɔ etsre alɛ petee sɛ: “Onugɛ anɔ teli aba baza mɛede, alasɛ tɛ ashɛnahwɛ shu elu, tɛ ayɛkɔ yɛ butsiosi kiwuinyɛwui tɛ aza mɛede. 24Alasɛ anɔ nɛ gɛ apɛɛ asɛ tɛ ebui yɛ ekpã, lɛ ba lɛla, pɔ anɔ nɛ gɛ alɛla yɛ kpã nɛ mɛ tɔkpu ebe bui lɛ. 25Kibui dzyɔgo ɖuweɖu lɛ́ nu kɔ anɔ tɛ kanɔ petee dzi yɛa yɛ, tɛ alɛla yɛ nahwɛ shu? 26Onugɛ anɔ teli kɛwɔɛ̃ ku yɛ nɛ mɛ nɛ̀ mɛ ebui, Anɔdzyrame yɛ Eyi ebe si yɛ wɔɛ̃ kibe lɛ gɛ aba nɛ yɛ kabhakpɛkpɛ anɛ Aka nɛ̀ kabhakpɛkpɛ anɛ baxwɛdɛnɛ gɛ balɛ shu bhui. 27Ɛtsre nɔ gbɛagba, bɛ teli gɛ ba lɔɛtiti nɛ ɔkɛnɛ, ba tɛ betsi flogo gɛ ba bamɔ Kpaya kusi.”
Yesu Shu Tɛtsyitsyina
28Aba za anasɛ ewui tasuɔɛ gɛ Yesu aɖɔ ebuia nɛ beke, agbanɛ Petro, Yohanɛsɛ anɛ̀ Yakobo ata shu klɛ ba vɛ butu tuli abha sɛ tɛ be de klukpaya. 29Kɛbe lɛlɛ gɛ èklukpaya nɛ, yɛ amɛ tɛzɛza tsyina, klɛ yɛ dɔ nɛ gɛ akpɛ nɛ tã moniamonia anasɛ subha yɛ buifu. 30Banɔ tɛabha, Mose anɛ̀ Eliya, 31be bushuakasɛ nɛ́ ishu bhubhui mɛ, gɛ ba ɖɔaɖɔ nɛ Yesu. Ba ɖɔaɖɔ denɔ yɛ tɛshɛ̃shɛ̃, gɛ aba amɛna tɛ kɛbɛlɛ mɛ nɛ Yerusalɛm. 32Tra gɛganɛ ku Petro anɛ̀ yɛɔhaɛalɛ, pɔ gɛ ba nyɛmɛ, ba mɔ Yesu shubhubhui klɛ banɔ tiabha nɛ alɔɛ titi nɛ Yesu ɔbha. 33Gɛ banɔ na shɛ nɛ yesu ɔbha, Petro etsre Yesu asɛ, “Apalete kɛpɛ̃ kɔ lɔ sɛ tɛ buza ɔkɛnɛ. Kɔ lɔ dzu bugba tuta— tierikpo kɔ wɔ, tierikpo kɔ Mose nɛ tierikpo kɔ Eliya.” (Eti nyi kibui nɔ nɛ gɛ aɖɔ.)
34Kɛlɛbɛ gɛ Petro aɖɔaɖɔ, ɔmunɔ toli koeyi klɛ lɔ kana lɛ klɛ kifu ku alɛ gɛ betsoku ɔmunɔ nɛ mɛ. 35Kaɖɔ tieli yi denɔ ɔmunɔ nɛ mɛ, sɛ, “Ya nɛ yɛ enu mɛ Yi, agɛ ɛklu, nɔ ta yɛatɔ,” 36Kɛbelɛlɛ gɛ kaɖɔ nɛ bhui, ba mɔ sɛ Yesu terikpo ko yɛ alɛ ɔkɛlɛ. Badɔkpasɛ na da onugbu akpɛ kibui akɔ shu, klɛ ba dɛ ɖɔɛ bui nɛ etsre anɔnyanɔ nɛ kibelɛ kɛdɔ nɛ gɛ ba mɔ nɛ shu.
Ɔfufɔɛ Kpã Tɛbubu Nɛ Anyɛnuvɔɛ Tɛli Mɛ
37Kiwui bhla, gɛ be zhi de butu nɛabha ba, banɔɛza gbɛgbla ba ba tsyanɛ yɛ. 38Anɔ teli nɛ banɔ nɛ shi akpɛ ogugu asɛ, “Adɔkasɛ, ɛkpɛtɔkpuesi kɔ wɔ sɛ tɛ odi mɛ yi nɛ ɔkɔ mɛ, alasɛ yɛ ko ye nu me yi. 39Ɔfufɔɛ nɛ lɔvu yɛ klɛ etenɔ ogugu kpɛ; lo hu yɛesi kpɛ tɛnunɔmɛ gɛ kɛkɔ sɛ onugbu nɛm obui fɔ. Ɔfufɔɛ nɔ tɔ shɛnahwɛ yɛ shu nɛ bɔɛɛ klɛ lo zi yɛ. 40Ɛkpɛ kɛtɔkpuesi kɔ wɔ badɔkpasɛ sɛ tɛ bakɛka lɔ koeyi nɛ yɛ shui mɛ, pɔ ba dɛ na.”
41Yesu aɖɔ sɛ, “O kabha mayɛkɛ mayɛkɛŋa anɛ tɛmumɔ tsutsɔmɔɛ nɛ mɛ banɔ, ewui tashɛ̃ ɛba za wunɔ bha klɛ ɛba za kplɛnɔ nɔ? Gbanɔ wɔ eyi nɛ mɛna ɔkɛ̃.”
42Gɛ anyɛnuvɔɛ aba tsyɛ, ɔfufɔɛ kpã nɛ lɔ zo vui ehuesi nɛ tɛnununɔ mɛ. Pɔ Yesu akpɛ ogugu nɛ ɔfufɔɛ kpã nɛabha, akɔ anyɛnuvɔɛ nɛ shu bhui klɛ etsodzi ayɛkɔ yɛ akɔ yɛ aka. 43Klɛ kɛbhɛtɛ balɛ petee bi nɛ Kpaya bui gbɛgbla nɛ shu.
Kɛbelɛlɛ gɛ kɛbhɛtɛ anɔnyanɔ bi nɛ ebui petee gɛ Yessu abhɛtɛ, aɖɔ tsre yɛ badɔkpasɛ nɛ asɛ, 44“Nɔtatɔ mɔmɔ nɛ kibui gɛ ɛba tsre nɔ nɛ shu: Ba ba yɛkɔ Anɔdzyrame yɛ Eyi akpɛ ahwɛ kɔ banɔ.” 45Pɔ be di nu lɛesi kɛdɔnɔ gɛ kibuinɛ kasɛ. Kɛ kpu kɔ alɛ, sɛ tɛ ba tɛ ba tɛ nyɛna lɛ evunɔ, klɛ kɛfu ku alɛ sɛ tɛ bebisi kɛlɛesi nu.
Anɛ Yɛ Ebedzi Agbɛgbladɛ
46Kibui wɔ̃wlãkɛ baku badɔkpasɛ nɛ́ shi sɛ ane yɛ be dzi agbɛgbladɛ. 47Yesu, etii balɛ kɛtɔkpui mɛ bui so, ayɛkɔ anuvɔ bhliyi klɛ akɔ yɛ alɔɛtiti nɛ yɛ wã. 48Kɛlɛ aɖɔ etsre alɛ sɛ, “Anɔ nɛ gɛ ayɛkɛ anuvɔ bhliyia nɛ mɛ nyi mɛ ayɛkɛ mɛ, klɛ anɔ nɛ gɛ ayɛkɛ mɛ, ayɛkɛ anɔ nɛ gɛ akpɛ mɛ. Alasɛ agɛ enu ebhliyidɛ nɛ wunɔ petee shi—ye nu agbɛgbladɛ.”
49Yohanɛsɛ aɖɔ sɛ, “Apalete, bu mɔ anɔteli gɛ akɛka ɛfufɔɛ zizi nɛ wɔɛ nyi mɛ klɛ bu pɛɛ sɛ tɛ budzrɔ nɛ yɛ, alasɛ edɛ nu blɔ mayɛ teli.”
50Yesu aɖɔsɛ, “Nɔ tɛ dzrɔ nɛ yɛ, alasɛ anɔ nɛ gɛ adɛ lɔɛtiti nɛ wunɔ shu alɛ kɔ nɔ.”
Samarianɛ Kɛtitilɛlɔ
51Gɛ kibe na kɔ yɛ sɛ tɛ ba yɛkɔ yɛ ewunɔ avɛnɔ owũsise, Yesu ayɛkɔ atrɔ shu klɛ atɔnɔ Yerusalɛm dzo. 52Klɛ akpɛ baxwɛdɛ nɛ putɔ, gɛ ba vɛ Samaria kɔxoe teli mɛ sɛ tɛ ba da bala dɔ nɛ ɔkɛlɛ olu kɔɛ yɛ, 53pɔ banɔ nɛ gɛ balɛ ɔkɛlɛ ba dɛ yɛkɛ yɛ, alasɛ Yerusalɛm kidzo yɛ atɔnɔ. 54Gɛ badɔkpasɛ Yakobo anɛ Yohanɛsɛ ba mɔ ana, be bisi asɛ, “Apalete, ɔpɛɛ sɛ buklu kifu denɔ owũsise tɛ kɛtã lɛ?” 55Pɔ Yesu etsyina klɛ aka balɛ amɛ, 56klɛ ba shɛ avɛ kɔxoe bhlatɔ mɛ.
Kɛbhɛ Nɛ Yesu Kɛdezɛza Shu
57Gɛ ba gà kidzo nɛabha avɛ, anɔ teli etsre yɛ asɛ, “Ɛba tɔnɛ wɔ vɛ ɔkɔnɔ gɛ ɔvɛ.”
58Yesu ebui lɛ nu asɛ, “Ɛzi lɛ ayakpɛakudzogɛ ahwɛ klɛ buzhuɔɛ nɛ kɛlɛɛ mɛ evu alɛ bulɛ ahwɛ, pɔ Anɔdzyrame Yi ɔzakɔ ma yɛ ahwɛ gɛ aba yikɔ yɛ tɔkpu elu.”
59Ɛtsre anɔ bhlatɔ sɛ, “Za mɛede.”
Pɔ anɔ nɛ aɖɔ asɛ, “Apalete, putɔnɔ kɔ mɛ vɛ tɛ ɛda vubɔ mɛ aka.”
60Yesu etsre ya sɛ, “Kɔ be tsitsi ba vubɔ balɛ nahwɛ be tsitsi, pɔ wɔ vɛ tɛ ɔdɔ ɖɔ Kpaya Kusi nɛ bui.”
61Anɔ bhlatɔ tsyɛ ke aɖɔ sɛ, “Ɛba za wɔɛ de, Apalete, pɔ putɔnɔ kɔ mɛ tsodzi vɛ tɛ ɛda tsre mɛ beshopo sɛ ɛvɛ tɛ ɛba.”
62Yesu ebuilɛnu sɛ, “Anɔ nɛ gɛ anyɛna kapa asɔɛdɔ klɛ ediede adɛpɛ̃ kɔ kɛxwɛwɛwa nɛ Kpaya kusi mɛ.”
© Ghana Institute of Linguistics, Literacy and Bible Translation
