Luka 10
10
Yesu Akpɛ Banɔ Afɛtegene Nɛ̀ Tɛabha Kɛxwɛ
1Kɛlɛlɛ nɛede Apalete ebu banɔ afɛtegene nɛ tɛabha bhlatɔ klɛ akpɛ alɛ tɛabha tɛabha beputɔ kɔ yɛ, tɛ bavɛ ɔmanyɔma nɛ ɛzakɔ ɔkɛlɛ gɛ apɛ asɛ tɛ avɛ. 2Etsre alɛ asɛ, “Kɛdɔ bubu nɛ kpe, pɔ ba gɛ ba waxwɛ be dɛkpɛ. Kɛlɛso bisi kɛdɔ bubu Apalete, tɛ asɛsɛ ba gɛ bawɛxwɛ nɛ yɛ kɛdɔ bubu buya nɛ mɛ. 3Vɛ! Ɛkpɛ nɔ sɛsɛ anasɛ ibhoshieyi gɛ lɛ lɛ ayakpaɛmɛ bukudzyɔgɛ shi. 4Nɔ tɛ yɛkɔ kɛkpɛtɛ ɔdɔgɔsɛ ɔkpɛtɛ, ɔtsreklɔ, klɛ nɔ tɛ sɛnɛ anɔnyanɔ nɛ kidzo nɛabha.
5“Kɛbɛlɛmɛ sɛ nɔ tsoku bupa tuli mɛ, nɔ putɔ ɖɔ sɛ, ‘Ishuyuyɔ kɔ bupa nɛ.’ 6Onugɛ ishuyuyɔanɔ teli alɛ ɔkɛlɛ, wunɔ ishuyuyɔ nɛ ba za yɛ abha, onugɛ kɛmɛlɛmɛ, lɛba tsodzi ba wunɔ kɔ. 7Nɔ za bupa lɛlɛ nɛ mɛ, nɔ ŋa tɛ nɔ wɔɛ kɛdɔnɔ gɛ ba kɔ nɔ, alasɛ kɛlɛ kɔ agɛ awaɛxwɛ sɛ ayɛkɛ yɛ bhɛ. Nɔ tɛ dɔ ga nyɔ ganɔ bupa mɛ vɛ bupa mɛ.
8“Kɛbenɔ nɛ gɛ lɛ nɔ tsoku ɔma toli mɛ klɛ ba yɛkɛ nɔ, nɔ ŋa kɛdɔnɔ gɛ bɛ lu wunɔ otugba. 9Nɔ bu bunya nɛ̀ banyɛnya nɛ́ gɛ ba lɛ ɔkɛlɛ shuimɛ klɛ nɔ tsre alɛ ɔse, ‘Kpaya bukusiɔŋakɔ nɛ tsobunɔ nɔ.’ 10Pɔ kɛbenɔ nɛ gɛ nɔ tsoku ɔma toli mɛ klɛ ba dɛ yɛkɛ nɔ, nɔ vɛ ɔlɛ dzo nɛabha tɛ nɔ ɖɔ sɛ, 11‘Wunɔ ɔma nɛ mɛ ɔya kuratsyɛ gɛ lɔ lɛ bulɔ tsrukpɔ nɛ, bu tsru ɔlɛ lu kɔ kɛtitilɛlɔ kɔ nɔ. Pɔ nɔ ti sɛ: Kpaya bukusiɔŋakɔ nɛ tsobunɔ nɔ.’ 12Itsre nɔ sɛ, kɛ baza bubɔɛ nɛ́ kiwui lɛlɛ nɛabha kɔ Sodom dɛ ɔma lɛlɛ.
13“Butɔ kɔ wɔ, Korazin! Butɔ kɔ wɔ, Betsyaida! Alasɛ onugɛ ebuiyinɔanɔ nɛ gɛ babhɛtɛ nɛ wunɔɛ mɛ, alɛ ba bhɛtɛ nɛ́ Tayi nɛ̀ Sidon, be ti tsyinɛtem kukuku, gɛ ba ta za adzyawula pɔtɛ klɛ ba ta sra butɔ nɛ shu. 14Pɔ kɛlɛmɛ ba yɔdɛ kɔ Tiro nɛ̀ Sidon nɛ́ kɛbhuikuklu mɛ dɛ wɔnɔ. 15Klɛ ɛnɔ, Kapɛnum, ba befeke nɔ akpɛ kabha dza? Ao, nɔ bɔ vɛ kesi faã.
16“Anɔ nɛ gɛ ata nɔ atɔ ata mɛ atɔ, anɔ́ nɛ gɛ adɛ̀ yɛkɛ nɔ adɛ yɛkɛ mɛ; pɔ anɔ gɛ adɛ yɛkɛ mɛ adɛ yɛkɛ agɛ akpɛ mɛ.”
17Banɔ afɛtegene nɛ tiabha be tsodzi aba nɛ̀ same klɛ baɖɔ sɛ, “Apalete, ɛfufɔɛ zizi nɛ kuratsyɛ bakɔɛ tɔkpu nɛ wɔɛ nyimɛ.”
18Yesu ebulɛnu sɛ, “Emɔ Satan gɛ awɔlɛ anasɛ sɛbhaɛfu denɔ owũsise. 19Ɛkɔ nɔ bupu sɛ tɛ nɔɔ gaa beblidzya anɛ butabuadzɔ tɛ nɔŋa bupu petee gɛ bu lɔɛ titi nɛ wɔnɔ shu niabha, kizizinyɛzizi tɛ babhɛtɛ nɔ. 20Pɔ, nɔ tɛ mɔ same sɛ ɛfufɔɛ nɛ kɔ nɔɛ tɔkpu, pɔ nɔ mɔ same sɛ ba ŋlɔmmɛ wunɔ enyi nɛ owũsise.”
21Nɛ kɛbelɛlɛ mɛ Yesu eyuku nɛ same ganɔ Ɔfufɔɛ Dzyɔgo nɛabha, aɖɔ sɛ, “Ɛkpɛ nɔ nɛabha, owũsise anɛ kesukpa Aka, Apalete, alasɛ wɔ kpu ebuia petee nɛ̀ bagɛ be nu bebuiti anɛ buplukpa lete klɛ obukasɛ bunuvɔɛ bhli. Ee, Aka, alasɛ kɛnɛ kɛlɛ dzi wɔ tɛpɛpɛ dzyɔgo.
22“Maka ayɛkɔ kɛdɔ nɛ petee akpɛ mɛ ahwɛ. Anɔnyanɔ eti nyi anɔ nɛ gɛ Eyi nɛ enu ɔdɛ̀ sɛ Aka, klɛ anɔnyanɔ eti nyi anɔ nɛ gɛ Aka nɛ enu ɔdɛ̀sɛ Eyi nɛ̀ ba gɛ Eyi eklu sɛ tɛ be bu yɛ akasɛ.”
23Kɛlɛ etsyinatɔ yɛ badɔkpasɛ klɛ eklu alɛ eyinɔɛ nɛ de aɖɔ tsre alɛ, “Bayula awɔ̃hu gɛ lamɔɛ dɔ nɛ gɛ nɔ mɔ. 24Alasɛ itsre nɔ sɛ batɔnu nɛ̀ bekusi gelee bapɛ asɛ tɛ bamɔ kɛdɔ nɛ gɛ nɔ mɔ pɔ ba dɛ mɔɛ lɛ, klɛ bapɛ asɛ tɛ benu kɛ gɛ nɔ nu pɔ bedi nuɛ lɛ.”
Kɛkpalɛ Nɛ Samaria Eyi Dzyɔgo Shu
25Kiwui tili abha ɔshã lete teli alɔ sɛ tɛ efeke Yesu edi. Ebisi asɛ, “Adɔkasɛ, kide alasɛ ɛbhɛtɛ tɛ ɛmɔ ɛkpã mabeke mabeke?”
26Yesu ebisi yɛ asɛ, “Kide ba ŋlɔmɛ kpɛ Ɔshã nɛ mɛ?” “Kɛlɛ wɔ kla ɔlɛ?”
27Ebulɛnu: “ ‘Dɛmɛnɔ Apalete wɔ Kpaya anɛ̀ wɔ dzyi petee anɛ wɔ ɔfufɔɛ petee anɛ wɔ tɛgɛganɛ petee anɛ wɔ tɔkpuimɛ petee,’ klɛ, ‘Dɛmɛnɔ wɔ adzya anasɛ gɛ ɔdɛmɛnɔ ishu.’ ”
28Yesu ɛtsre yɛ asɛ “Obui lɛ nu mɔmɔ. Bhɛtɛ kɛnɛ klɛ ɔbɔ za nɛ ɛkpã.”
29Pɔ apɛɛ asɛ tɛ ebushu tsya, kɛlɛ so ebisi Yesu asɛ “Klɛ ane yɛ enu mɛ eshopo?”
30Nɛ kɛlɛesi bubu Yesu aɖɔ sɛ: “Anyɛ teli ezhi denɔ Yerusalɛm avɛ Yeriko, ɔkɛlɛ ada dɔku bezi ahwɛ mɛ. Be bu yɛ dɔ kpɛkpɛ nɛ yɛ shu, be tu yɛ klɛ ba shɛ alɔ yɛ etsi abhɛbhɛ. 31Kpayanɔ teli tsyɛ ezhi aga kidzoe lɛlɛ, klɛ gɛ amɔ anɔ nɛ, aga kɛwã bhlatɔ afla. 32Kana ke Lewi eyi teli tsyɛ, gɛ ebe ku ɔkɛlɛ klɛ amɔ yɛ, aga kɛwã bhlatɔ afla. 33Pɔ gɛ Samaria eyi teli tsyɛ gɛ aga kidzo nɛ, ebe ku ɔkɛlɛ gɛ anɔ na aza, klɛ gɛ amɔ yɛ, eku yɛ eshutukubui. 34Aga tɔnɔ anɔ klɛ akpɛ bubɔ anɛ̀ bulu nɛ apɔ nɛ mɛ, klɛ anya alɛ akɔ yɛ. Kɛlɛede efeke anyɛ nɛ atrɔ yɛ etukuaga nɛabha gɛ aza klɛ agbanɔ yɛ avɛnɔ befuɔtsɛkɔ klɛ edi yɛ abha. 35Kelizɛza ayɛkɔ kɔba frɛrɛ tɛabha akɔ agɛ edi ɔtsɛkɔ nɛabha sɛ, ‘Yɛ kɔ edi yɛ abha, tɛ onu gɛ itsodzi ɛba nɛ, ɛba buya kɛdɔnyɛdɔɛ bhɛ gɛ ɔzɔ zi nɛ yɛ shu kɔ wɔ.’
36“Banɔ tɛata nɛ mɛ ane yɛ ɔmɔ sɛ yɛ nu anyɛ nɛ gɛ adɔ ku bezi nɛ awhɛ mɛ yɛ shopo?”
37Ɔshã lete nɛ ebui lɛ nu asɛ, “Anɔ nɛ gɛ edi anyɛ nɛ eshutukubui.”
Yesu etsre yɛ asɛ, “Vɛ tɛ ɔdɔ bhɛtɛ anasɛ gɛ abhɛtɛ.”
Nɛ Mata Nɛ Maria Ɔma Nɛ Mɛ
38Gɛ Yesu nɛ̀ yɛ badɔkpasɛ be tsri balɛ dzogɛga nɛabha avɛ, eku kɔxɔɛ teli mɛ ɔklɛ adzɛ teli gɛ yɛ nyi kɛlɛ nu Mata ayɛkɛ yɛ akpɛ yɛ bupa nɛ mɛ. 39Ada teli aza yɛ ahwɛ gɛ be klu asɛ Maria, gɛ avɛ ada za Apalete nɛ butsrukpɔ nɛ ɔbha gɛ enu yɛ ebui. 40Pɔ Mata yɛ tɛbɛbala buinyɛbui ba trɔ yɛabha. Avɛ Yesu ɔbha klɛ ebisi asɛ, “Apalete ɔdɛ yɛkɔ kebuinyɛbui nɛlɛ mɛ sɛ mada ashɛ̃lɔ mɛ sɛ tɛ mɛ terikpo ɛwa axwɛnyaxwɛ? Tsre yɛ tɛ aba plɛnɔ mɛ!”
41Apalete ebuilɛnu asɛ, “Mata, Mata, otsishu klɛ ɔkpɛ shu tɔ nɛ kɛdɔ bhɛbhɛtɛ gelee shu, 42pɔ kɛdɔ trikpo ko lɔ pɛɛ. Maria ebu kɛ gɛ pɛ̃ dɛ, klɛ ba tɛ bayɛkɛ lɛ ashɛ̃nɔ nɛ yɛ ahwɛ.”
© Ghana Institute of Linguistics, Literacy and Bible Translation
