Yohanɛsɛ 8
8
1Pɔ Yesu ashɛ̃ vɛ Olivɛ Butu nɛabha. 2Olizatɔ aza vɛ kpayavu buka nɛ mɛ, ɔkɛlɛ banɔ gelee akana yɛ klɛ azaesi gɛ akasɛ alɛ dɔ. 3Ɛshã badɔkasɛ anɛ Farisianɛ ba mɛna adzɛ teli gɛ be vu sɛ, adɛ ɔmamɛ. Ba kɔ yɛ alɔ kititi nɛ banɔ nɛ shitibha. 4Be tsre Yesu asɛ, “Adɔkasɛ, adzɛa be vu yɛ adɛ ɔmamɛ. 5Nɛ Mose Ɔshã nɛ nu ba kɔlɔ kidzo se bu hu adzɛa nɛɛ di aklãgbu. Ɔtsɔnɛ kɛde wɔ ɖɔ?” 6Ba yɛkɔ tɛbibisi anasɛ kɛgbatɛtɔ tɛ ba mɔɛ dzo ebu buzizi akɔ yɛ.
Pɔ Yesu ezhi akpla klɛ etenɛ kɛdɔ aŋlɔmɛ elu kesukpa nɛ yɛ wɔɛ. 7Gɛ ba vɛ lɛabha be bisi yɛ ebui nɛ, Yesu alɔɛtiti klɛ etsre alɛ sɛ, “Onugɛ anɔ teli alɛ wɔnɔɛ shi gɛ buizizi ma yɛ shu, klɛ edzi anɔ tɛtɔpu tɛ ata kɛklãgbu nɛ ehu adzɛ.” 8Azɛ zhi akpla klɛ aza ŋlɔmɛ kɛdɔ lu kesukpa.
9Nɛlɛmɛ, bagɛ nu bui betenɔ ashɛ̃ terikpo terikpo, be shishe nɛ putɔ, ɔvɛnɔ agɔ Yesu ko anɛ adzɛ gɛ aza lɔɛ titi nɛ ɔkɛlɛ. 10Yesu aza lɔewu klɛ ebisi yɛ asɛ, “Adzɛ, fakɔ banɔ nɛ alɛ? Anɔnyanɔ edi bu wɔ butsi pɔ?”
11Adzɛ aɖɔ sɛ, “Apalete oo anɔnyanɔ edi bu mɛ pɔ.”
Yesu ebuaɖɔ sɛ, “Kɛlɛalɛ mɛ tsye ɛtɛ ba bu wɔɛ pɔ.” “Shɛ̃ ɔtsɔlɛ tɛ ɔtɔ dɔ za nɛ kpã zizi.”
Yesu Ebuimɔɖɔ Nɛ Tɛnɛna
12Gɛ Yesu aza ɖɔaɖɔ etsre banɔ nɛ, aɖɔsɛ, “Mɛ nu kifu kɔ kanɔ. Anɔ gɛ aza mɛede atɛ ba ga otumui mɛ, pɔ kifu ɛkpã ba za yɛ ahwɛ.”
13Farisianɛ ba wlãkɛ nɛ yɛ asɛ, “Wɔ lɛ, ɔwɔɛ̃ anasɛ wɔnahwɛ kibuimɔɖɔ, wɔɛ buiɖɛɖɔ dɛ ŋa.”
14Yesu ebu ishu nu asɛ, “Onugɛ ɛɖɔaɖɔ nɛ mɛnahwɛ shu tsyɛ, mɛ ebuimɔɖɔ nɛ aŋa, alasɛ inyi ɔkɛlɛ gɛ ede nɛ ɔkɛlɛ gɛ ɛvɛ. Pɔ kɛma wunɔ tɔkpuimɛ ɔkɛlɛ gɛ ede nɛ ɔkɛlɛ gɛ ɛvɛ. 15Wunɔ nɔ klu kebhui nɛ Anɔdzyrame dɔ mumɔ shu, Mɛ ɛtɛ klu kebhui nɛ̀ anɔnyanɔ. 16Pɔ onugɛ ɛklu kebhui, mɛ buimumɔ nɛ na, alasɛ anɛ mɛ tite. Ɛlɛ nɛ Aka, agɛ ya kpɛ mɛ. 17Nɛ wunɔ nahwɛ ɔshã nɛ mɛ, ba ŋlɔmɛ akpɛ sɛ banɔ tɛabha kibuimumɔɖɔ kɛlɛ na. 18Mɛ terikpo gɛ ɛɖɔaɖɔ kɔ mɛnahwɛ tɔkpu, mɛ ɛbuimɔɖɔ bhla yɛ nu Aka gɛ akpɛ mɛ.”
19Klɛ Farisianɛ ne bisi yɛ asɛ, “Fakɔ wɔ aka alɛ?”
Yesu ebuilɛnu asɛ, “No ti nyi mɛ gɛ ma Aka no bo ti.” “Onugɛ no nyi mɛ, nɔ bɔ ti ma Aka tsyɛ.” 20Yesu aɖɔ ebuia nɛ kɛlɛbe gɛ akasɛdɔ nɛ kpayavu nɛ buka nɛ mɛ, gɛ ɔtsobunɔ ɔkɛlɛ gɛ ba kɔɛ dɔ. Pɔ anɔnyanɔ tsyɛ edi vu yɛ, alasɛ yɛ kibe ka na.
21Yesu ɛzɛ tsre alɛ buɖɔ tirikpo sɛ, “Ɛshɛ̃ lɔ nɔ, klɛ nɔ bɔ pɛɛ mɛ, klɛ nɔ bɔ tsi nɛ wunɔ ebuizizi mɛ. Ɔkɛlɛ gɛ ɛvɛ nɔ tɛ bɔ na ba.”
22Kɛ kɔ Yuɖanɛ be bisi asɛ, “Ebe ti yi yɛnahwɛ shu? Kɛlɛso gɛ aɖɔsɛ, ‘Ɔkɛlɛ gɛ ɛvɛ, nɔ tɛ ba na ba’?”
23Pɔ aza vɛ lɛabha, “Nɔ de kesi, mɛ ɛde kabha, Kanɔa nɛ lete no nu, mɛ anɛ kanɔa nɛ mɛ elete mɛ nu. 24Itsre nɔ sɛ nɔ bɔ tsi nɛ wunɔ ebuizizi mɛ, onugɛ nɔ dɛ yɛkɛŋa sɛ ɛnu agɛ ɛɖɔ sɛ ɛnu, nɔ bɔ tsi gbɛagba nɛ wunɔ ebuizizi mɛ.”
25Be bisi asɛ, “Ane wɔ onu?”
Yesu etsre alɛ sɛ, “Kɛgɛ ɛɖɔ tsre nɔ kibenyɛbe nɛ ko.” 26“Ebui gelee alɛ mɛ ahwɛ gɛ ɛba kɔ klu kebhui nɛ nɔ. Pɔ agɛ akpɛ mɛ enu anɔ gɛ ba be lu awɔ̃ nɛabha, klɛ agɛ inu denɔ yɛ kɔ alɛ mɛ tsre kanɔ.”
27Be dinu kibui gɛ Yesu ɛtsre alɛ denɔ yɛ Aka nɛ shu nɛesi. 28Kɛlɔso Yesu aɖɔ sɛ, “Kibenɔ gɛ nɔ feke Anɔdzyrame Yi ɔkpɛ abha, flogo gɛ nɔ bɔ ti sɛ mɛ nu yɛ gɛ ɛɖɔ sɛ inu klɛ ɛtɛ bhɛtɛ kɛdɔnyɛdɔ nɛ mɛ nahwɛshu ahwɛ pɔ ɛɖɔ kɛbui nɛ ko gɛ Aka nɛ akasɛ mɛ. 29Anɔ nɛ gɛ akpɛ mɛ alɛ mɛ ɔbha, aka ashɛ̃nahwɛ mɛ shu elu, alasɛ kibenyɛbe ɛbhɛtɛ trɔ yɛ ebui pɛpɛɛ nɛabha.” 30Anasɛ gɛ Yesu aɖɔaɖɔ tsyɛ, banɔ gelee ba yɛkɔ balɛ tɛyɛyɛkɛŋa akpɛ yɛ mɛ.
Abraham Yɛ Yialɛ
31Kɔ Yuɖanɛ gɛ ba yɛkɛ yɛabhaŋa, Yesu aɖɔ sɛ, “Onugɛ nɔ nyɛna mɛ kɛdɛkɛkasɛ nɛ mɛ ovunɔ, no nu mɛ badɔkpasɛ kɛgbɛagba. 32Ɔkɛlɛ nɔ bɔ ti gbɛagba, gɛ kibui gbɛagba ba bhui nɔ yɛkɛ.”
33Be bushunu akɔ yɛ asɛ, “Bunu Abraham yɛeshui alɛ, klɛ bu di nu banɔdzidzi kɔ anɔnyanɔ. Kɛdeso gɛ ɔbɔ ɖɔ sɛ ba be bhui lɔ ayɛkɛ?”
34Yesu ebuilɛnu asɛ, “Itsre nɔ kɛgbɛ, anɔnyanɔ gɛ abhɛtɛ kibuizizi enu anɔdzidzi kɔ buizizi. 35Ɔtsyɔnɛ anɔdzidzi ɔzakɔ ɔvɛnɔ faã ma yɛhwɛ nɛ kɛpatsu nɛ mɛ, pɔ eyianyɛ enu bupa mɛ eyi ɔvɛnɔ faã. 36Kɛlɛso onugɛ Eyi ashɛ̃nahwɛ wɔ shu, ba shɛnahwɛ wɔ shu gbɛagba. 37Inyi sɛ Abraham yɛ beshui nɔ nu. Pɔ nɔ bala sɛ tɛ no yi mɛ, alasɛ nɔ dɛ mɔ ɔzakɔ kɔ mɛ bui. 38Itsre nɔ kɛdɔ nɛ gɛ ɛmɔ denɔ ma Aka nɔ kɔ, klɛ nɔ bhɛtɛ kɛ dɔnɔ gɛ nɔ nu denɔ wunɔ aka kɔ.”
39Ba builɛnu asɛ, “Abraham yɛ nu bulɔ aka.”
Yesu etsre alɛ sɛ, “Onugɛ Abraham yɛ yialɛ nɔ nu, kɛlalɛ nɔ tɔ bhɛtɛ ebui gɛ Abraham abhɛtɛ. 40Anasɛ gɛ kɛlɛ, nɔ trɔ sɛ tɛ no yi mɛ, anɔ nɛ gɛ etsre nɔ ebui gbɛagba gɛ inu denɔ Kpaya kɔ. Abraham adɛ bhɛtɛ ebuianɛ di. 41Nɔ bhɛtɛ ebui nɛ gɛ wɔnɔ aka nahwɛ nɛ ábhɛtɛ.”
“Anɛ kɛglɔ mɛ beyi lɔ nu.” ba lɔɛtiti nɛ lɛ shu. “Aka Terikpo ko gɛ alɛ blɔ ahwɛ yɛ nu Kpaya nahwɛ.”
Abɔnsam Ye Yialɛ
42Yesu etsre alɛ sɛ, “Onugɛ Kpaya ebe dzi wunɔ Aka, nɔ tɔ dɛmɛnɔ nɛ mɛ alasɛ ɛde Kpaya ɔkɔ klɛ ɔtsɔnɛ ɛlɛ ɔkɛ nɛ. Ɛdɛ ba nɛ mɛ nahwɛ shui mɛ, pɔ ya kpɛ mɛ. 43Kɛdeso gɛ mɛ bunuhu nɛ mɛ dɛ bhui kɔ nɔ? Alasɛ nɔ dɛ pɛɛ sɛ tɛ nɔ nu ebui nɛ gɛ ɛɖɔ. 44Wunɔ aka, gɛ enu Abɔnsam, ye yialɛ nɔ nu klɛ nɔ pɛɛ sɛ tɛ nɔ bhɛtɛ ɔtrɔ wunɔ aka tɛpɛpɛɛ nɛabha. Enu akpɛnɛ denɔ kesikpɛkpɛ nɛ ke, kibui gbɛagba ma yɛ ahwɛ, alasɛ kibui gbɛagba ma yɛ mɛ. Kibenɔ nɛ gɛ ehu otro, ehu yɛ epi bunuhu, alasɛ enu otroelete klɛ yɛ enu itro lete petee aka. 45Pɔ mɛ gɛ ɛɖɔ kibui gbɛagba, nɔ tɔ yɛkɛ mɛ abhaŋa 46Wunɔ mayɛ̃ teli aba na mɛ kɛpɔ bu sɛ ɛbhɛtɛ ebuizizi? Onugɛ ɛɖɔ kibui gbɛagba, kideso gɛ nɔ tɔ yɛkɛ mɛ abhaŋa? 47Anɔ gɛ enu Kpaya ayɛ, yɛ enu kibui gɛ Kpaya aɖɔ. Kɛ dɔnɔ so gɛ nɔ tɔ nu bui kɛlɛ nu sɛ, nɔ dɛ nu Kpaya yɛ.”
Yesu Ebuiɖɛɖɔ Denɔ Yɛnahwɛ Shu
48Yuɖanɛ be bui lɛ nu kɔ yɛ asɛ, “Bulɔɛ yɛ dɛ ŋa sɛ buu ɖɔ sɛ onu Samaria eyi klɛ ɔfufɔɛ zizi otsri wɔa bha?”
49Yesu etsre alɛ sɛ, “Ɔfufɔɛzizi lɔ ma mɛ shui mɛ, pɔ ɛta mɛ aka batɔ klɛ wunɔ nɔ tɔ ta mɛ atɔ. 50Ɛtɛ pɛɛ kabhakpɛkpɛ kɔ shu, pɔ anɔ teli alɛ gɛ ebisi lɛ, klɛ yɛ nu ebhuiklu. 51Itsre nɔ kɛgba sɛ, onugɛ anɔ teli ayɛ kɛ mɛ bui, atɛ ba mɔ butsi.” 52Nɛ kibui nɛ shu Yuɖanɛ ba kpɛ ogugu sɛ, “Ɔtsyɔnɛ bu nyi sɛ ɔfufɔɛ zizi lɔ kpasɛ wɔɛ mɛ! Abraham etsi klɛ kanake so batɔnu na bhɛtɛ, pɔ ɔɖɔ sɛ anɔ gɛ ayɛkɛ wɔ ebui, atɛ be mini butsi di. 53Wɔ tridɛ bulɔ aka Abraham? Etsi, klɛ kanake so batɔnu tsyɛ babhɛtɛ. Anɔ ɖueɖu di wɔ onu?” 54Yesu ebushunu asɛ, “Onugɛ ɛkpɛ mɛshu nɛabha, mɛ ishukpɛkpɛ kabha kedi nu kɛdɛnyɛdɔ. Mɛ Aka, gɛ nɔ sɛ yɛ nu wunɔ Kpaya, yɛ nu agɛ akpɛ mɛ nɛabha. 55Kɛlɛlɛmɛ sɛ nɔ tinyi yɛ, mɛ inyi yɛ. Onugɛ ɛɖɔ sɛ ɛtɛ nyi yɛ, ɛba dzi otro lete anasɛ wunɔ. pɔ ɛnyi yɛ klɛ ɛbhɛtɛ trɔ yɛ ebui nɛabha. 56Wunɔ aka Abraham amɔ same sɛ tɛ amɔ mɛ tɛbɛba, amɔ kɛlɛ klɛ amɔ same.”
57Yuɖa baɖɔ sɛ, “Ɔkɔ she ɔyɛkɛ agɔ afeti, klɛ ɔsɛ ɔmɔ Abraham!”
58Yesu ebuilɛnu sɛ, “Ɛtsre nɔ kɛgba sɛ, ɛlɛ ɔkɛlɛ, flogo gɛ ba mɔ Abraham!” 59Nɛ ɔkɛlɛ ɔlɛ ba tɔkɛ aklãgbu sɛ tɛ be hu yɛ, pɔ Yesu alɛla, ekoeyi nɛ kpayavu kesukpa nɛabha.
נבחרו כעת:
Yohanɛsɛ 8: tcd
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© Ghana Institute of Linguistics, Literacy and Bible Translation
