Embandizo 12
12
Ruhanga nayeta Aburamu
1Omukama agambira Aburamu ati, “Ruga omu nsi yanyu, n'omu ruganda rwanyu, n'omwanyu, ogye omu nsi eyo ndakwoleka. 2Ndakuhindura ihanga lihango, nkuhe omugisha nkuhindure kiranganwa, obone kuba mugisha. 3Abalikuha omugisha ndibaha omugisha, n'alikuraama ndimuraama. Kandi amahanga gona omu nsi galiherwa omugisha omuli iwe.”
4Aho Aburamu agenda nk'okwo Omukama yabaire amugambiire; na Loti agenda nawe. Aburamu akaba aina emyaka nshanju n'etanu orwo yarugire Harani. 5Aimukya na mukaziwe Sarai na Loti omutabani ow'omurumuna, n'eitunga lyabo lyona elyo babaire bainalyo, n'abairu bona abo babaire batungiire Harani, baimukya kugya omu nsi ya Kanaani. Kababaire bagobire Kanaani, 6Aburamu arambura ensi egyo kuhika Shekemu, aha mwaloni gwa More. Omu makiro ago ensi egyo ekaba neturwamu Abakanaani. 7Aho Omukama abonekera Aburamu amugambira ati, “Baijukuru bawe ndibaha ensi egi.” Honene aho nikwo Aburamu kwombekeraho Omukama ealutare. 8Arugayo agya omu mabanga g'oburugaizoba bwa Beteli, aterayo eihemalye. Beteli eli oburugaizoba bwa Ai, na Ai eli oburugaizoba. Honene halinya ayombekeraho Omukama ayabaire amubonekeire, ealutare amutakira. 9Agendera kimoi agiire Negebu.
Aburamu omuli Misiri
10Omu nsi ya Kanaani hakaba halimu eifa. Aho Aburamu agya Misiri aba niyo afurukira, kuba eifa likaba lili lingi omuli Kanaani. 11Kayabaire ali haihi kutaha Misiri, agambira mukaziwe Sarai ati, “Nimanya okwo oli mukazi murungi aha maisho. 12Abamisiri kabarakubona nibaija kugamba bati, ‘Ogu ni mukaziwe,’ aho banyite. Kyonkai iwe barakuleka, tibalikwija kukwita. 13Ogambe okwo oli munyanyazi, aho baraba batakinkora kubi kuntura iwe; baraba batakinyita.” 14Aburamu kutaha Misiri, Abamisiri babona okwo muka Aburamu ali murungi muno. 15Abaramata ba Farao kabamuboine, bamutenda ahali Farao. Nikwo kumumutwalira. 16Aha rwa Sarai ogwo Farao akolerage Aburamu. Amuha entaama, ente, endogobe, engamia, abairu n'abazana.
17Kyonkai Omukama ateza Farao n'ekaye ebibundo by'amani nabatura Sarai muka Aburamu. 18Ahanyuma Farao ayeta Aburamu amubaza ati, “Kiki eki eky'onkoleire? Kubaki otangambiire okwo ogu ali mukazi wawe? 19Nshongaki kugamba oti, ‘Ni munyanyazi,’ inye nkamushwera? Mbwenu mukazi wawe ngugwo, omutware, mara ogende.” 20Farao aragira abashaija okwo baramugilira. Batyo baba nikwo bamushendekeleza namukaziwe na byona ebyo yabaire ainabyo.
נבחרו כעת:
Embandizo 12: RHAY01
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Ruhaya DC Bible © Bible Society of Tanzania, 2001.