Kîam 22
22
Mûrungu kwîra Abrahamu amûritîre Isaaka arî kîgongwana
1 #
Ahi 11.17-19
Îgiita rîmwe, Mûrungu nî aagererie Abrahamu. Nî aamwîtîre, “Abrahamu!” Nawe aramûcokeria aramwîra atîrî, “Ndî aja.” 2#2Ma 3.1 Mûrungu aramwîra atîrî, “Jûkia mûtaana waaku wa mûûmwe Isaaka ûrîa wendeete, na wîte nawe mwanka nthîgûrû ya Moria ûmûrite arî kîgongwana gîa gwakîîria kîrîmeene kîmwe kîa birîa ngakwonia.” 3Tontû bûû Abrahamu ararooka gûûkîîra rûkîîrî, arauna nkû, arataandîka ntigiri yaawe, na arajûkia nthûûmba ciaawe ijîîrî na mûtaana waawe Isaaka. Nabo baraambîrîria rûgendo rwa gwîta gûntû kûrîa Mûrungu aamwîrîrîte. 4Ntukû ya ithatû, Abrahamu nî aaciûkîrie meetho aroona gûntû kûu eerîîri kûrî antû atî araaja mono kuuma arîa baarî. 5Rîu Abrahamu areera nthûûmba ciaawe atîrî, “Tigweni aja na ntigiri, naani na mwana ûûjû twitie naarîa tûkathaathayie Mûrungu, rîu tûcoke kîrî buî.” 6Abrahamu arajûkia nkû cia gwakîîria kîgongwana, na arakamatithia mûtaana waawe Isaaka. Ningî arajûkia mwanki na gachiû, bareetania bobaîrî. 7Isaaka areeta îthe Abrahamu arauga, “Baaba!” Abrahamu areetika arauga, “Ûîî mûtaana waakwa.” Isaaka aramwîra, “Tûrî na mwanki na nkû; îndî karîkû kang'ondu ga kûrita kîgongwana?” 8Abrahamu aramwîra, “Mûtaana waakwa Mûrungu nîwe ûgaatwaa kang'ondu karîa tûkaarita karî kîgongwana.” Tontû bûû, bareeta na mbere na rûgendo rwaao.
9 #
Jak 2.21
Rîrîa baakinyîre antû arîa Mûrungu aamwîrîrîte, Abrahamu nî aakîre kîritîro kîa igongwana, na arabangania nkû bwega. Aracoka aratheeka mûtaana waawe Isaaka, aramûmamia kîritîroone îgûrû rîa nkû. 10Rîu Abrahamu araikia njara arajûkia gachiû nîkenda ang'eera mûtaana waawe. 11Îndî mûraîka wa MWATHANI aramwîta kuuma îgûrû akiugaga atîrî, “Abrahamu! Abrahamu!” Nawe areetîka arauga, “Îîî ndî aja.” 12Mûraîka aramwîra, “Menya ûûraga mwana waaku kana ûmwîkîra rûgûma. Nîkwîthîrwa nandî nkûmenya atî nî ûkîrîte Mûrungu nîûntû ûtîramwata mûtaana waaku wa mûûmwe.” 13Abrahamu araciûkia meetho, na agîtega aroona ntûrûme nyuma yaawe, îgwati ngoji gîkambene îkaremwa nî kwirita o. Tontû bûû, Abrahamu areeta aragwata ntûrûme îîu, aramîrita îrî kîgongwana gîa gwakîîria antû a mûtaana waawe.
14Tontû bûû, Abrahamu areeta antû au riîtwa aragwîta, “MWATHANI nî aeejanaga.” Nîkîo gîtûmi antû batwîre bakiugaga mwanka nandî atî, “Kîrîmeene kîa MWATHANI gûkaeejanagwa.”
15Mûraîka wa MWATHANI nî eetîre Abrahamu kuuma îgûrû, 16#Ahi 6.13-14 aramwîra MWATHANI ariuga atîrî, “Ndîgûciîtia na riîtwa rîaakwa ningwa; tontû gwe ûgwîtîkîîria kûthithia ûntû bûbû, na ûtîrarega kûnditîra mûtaana waaku wa mûûmwe. 17#Ahi 11.12 Nî mma ûûni ngaakûtharima, na nthegeyie nchiarwa ciaaku ciingîe ta njota kana ta mûthanga. Ningî nchiarwa ciaaku igaataa nthîgûrû cia anthû baao. 18#Maj 3.25 Nayo mîgongo yonthe ya nthî îkaatharimagwa nîûntû bwa nchiarwa ciaaku nîkwîthîrwa gwe ûkwathîkîra kajû gaakwa.” 19Rîu Abrahamu aracoka kîrî nthûûmba ciaawe, baragwata rûgendo baracokania Beerisheba kûrîa aatûûrîre.
Ataana ba Nahori
20Nyuma ya mantû jau, Abrahamu nî eerîrwe atîrî, “Milika kinya we nî aciarîrîte mûtaana wa nyakwe Nahori ataana. 21Uzi nîwe wa kîranga, nawe Buzi aarî mûtaana wa ng'ina. Kemueli aarî îthe wa Aramu, 22na Kesedi na Hazo, na Pilidashi na Jidilafu, na Bethueli.” 23Bethueli nîwe waarî îthe wa Rebeka. Milika nîwe waaciarîre ataana bau banaana, na mûkûrû waawe Nahori aarî mûtaana wa ng'ina wa Abrahamu. 24Ningî mûka wa gwîka wa Nahori ûrîa weetagwa Reuma kinya we nî aaciarîre Teba, na Gahamu, na Tahashi, na Maaka.
נבחרו כעת:
Kîam 22: KIMERUBIBLE
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
KIMERU BIBLE WITH DC
©Bible Society of Kenya, 2009, 218