Matiu 1
1
Pemuleꞌáraꞌ toioruna Iesu
(Luk. 3:23-38)
1Deꞌe miꞌi daritakáná Iesu, pemuleꞌána Datu Daudiꞌ, pemuleꞌána Burahima. Mantepuꞌu hangko i Burahima haweꞌ i Datu Daudiꞌ, hangaꞌraꞌ toioruna Iesu, deꞌemoheꞌe:
2Burahima momuleáka Isakiꞌ;
Isakiꞌ momuleáka Iako;
Iako momuleáka Iudá hai halalunaheꞌ;#1:2 Iudá hai halalunaheꞌ: Hira hampuloꞌheꞌ hai rodua to mewaliꞌheꞌ toioruraꞌ toSáráeliꞌ.
3Iudá momuleáka Peresi hai Sera (ináraꞌ rahangaꞌ Tama);#1:3 Tama: Tama tiꞌara toIahudiꞌ, ia toKánáꞌá to mewaliꞌ mániána Iudá, tiꞌara toinána. Básá Pewaliꞌána gáláꞌna ka-38.
Peresi momuleáka Hesero;
Hesero momuleáka Rama;
4Rama momuleáka Aminadaꞌ;
Aminadaꞌ momuleáka Nahaso;
Nahaso momuleáka Salomo;
5Salomo momuleáka Boasi (inána rahangaꞌ Raha);#1:5 Raha: Ia toKánáꞌá. Básá Iosuá gáláꞌna ka-6.
Boasi momuleáka Obeꞌ (inána rahangaꞌ Ruti);#1:5 Ruti: Ia toMoabiꞌ. Básá Ruti 1:4.
Obeꞌ momuleáka Isai;
6hai Isai momuleáka Datu Daudiꞌ.
Mantepuꞌu hangko i Datu Daudiꞌ haweꞌ i karatawaniáraꞌ toIahudiꞌ lao i kótá Bábeli, hangaꞌraꞌ to toioruraꞌ Iesu, deꞌemoheꞌe:
Daudiꞌ momuleáka Salomo (inána Salomo rahangaꞌ Batseba, bembaꞌna Uria);#1:6 Batseba bembaꞌna Uria: Básá 2 Semueli gáláꞌna ka-11.
7Salomo momuleáka Rehabea;#1:7-11 Rehabea haweꞌ i Iekonia, hiramoheꞌ datu i tampoꞌ Iudá. Básá 1 Datu-datu gáláꞌna ka-12 haweꞌ 2 Datu-datu gáláꞌna ka-24.
Rehabea momuleáka Abia;
Abia momuleáka Asa;
8Asa momuleáka Iosapaꞌ;
Iosapaꞌ momuleáka Iora;
Iora momuleáka Usia;
9Usia momuleáka Iota;
Iota momuleáka Ahasi;
Ahasi momuleáka Sikia;
10Sikia momuleáka Manase;
Manase momuleáka Amo;
Amo momuleáka Iosia;
11Iosia momuleáka Iekonia hai halalunaheꞌ.
I tempó iti toIahudiꞌ ratawani raꞌánti lao i tampoꞌ Bábeli.#1:11 ToIahudiꞌ ratawani i Bábeli rekeꞌ-rekeꞌna pitu puloꞌna parena kamaruena, hangko i pare lima átuna hahioꞌ puloꞌna hai pitu haweꞌ pare lima átuna tálu puloꞌna hai ini hangko tiꞌara mani Iesu rapoánáka (597-536sM). Mewaliꞌ Sealtie ánáꞌna Iekonia mesupaꞌ i tampoꞌ Bábeli. Básá 2 Datu-datu 24:8-16.
12Mantepuꞌu hangko i karatáwániraꞌ toIahudiꞌ i Bábeli haweꞌ i karapoánákana Iesu, hangaꞌraꞌ toioruna Iesu, deꞌemoheꞌe:
Iekonia momuleáka Sealatie;
Sealatie momuleáka Serubabe;
13Serubabe momuleáka Abihuꞌ;
Abihuꞌ momuleáka Eliaki;
Eliaki momuleáka Asó;
14Asó momuleáka Sadoꞌ;
Sadoꞌ momuleáka Akimi;
Akimi momuleáka Eliuꞌ;
15Eliuꞌ momuleáka Eleásá;
Eleásá momuleáka Mata;
Mata momuleáka Iako;
16hai Iako momuleáka Iusupu to mewaliꞌ toámána Maria.
Maria iti to moánáka Iesu to rauliꞌ Kerisitu.#1:16 Kerisitu - I lalu básá Iunani lempóna: “Datu to rabubuhi lana hai ralántiꞌ”, ba “to nahuoꞌ Pueꞌ Ala”. Hibali lempóna hai toMásehi i lalu básá Iberani. I lalu básá Behóá ralimbá Datu Topehómpóꞌ.
17Mewaliꞌ, mantepuꞌu hangko i Burahima haweꞌ i Daudiꞌ, kahandaꞌraꞌ to momuleáka Iesu hampuloꞌ hai iba lápina. Mantepuꞌu hangko i Daudiꞌ haweꞌ i karatáwániraꞌ toIahudiꞌ lao i tampoꞌ Bábeli, hampuloꞌ woꞌo hai iba lápina, haneꞌi mantepuꞌu hangko i karatáwániraꞌ toIahudiꞌ i Bábeli haweꞌ i karapoánákana Kerisitu, hampuloꞌ woꞌo hai iba lápina.
Karapoánákana Iesu
(Luk. 2:1-7)
18Deꞌe miꞌi daritakáná karapoánákana Iesu Kerisitu, Datu Topehómpóꞌ.
Tempóna Maria ináNa nakaróhói ngkóráꞌ hai hadua tobaleilo to rahangaꞌ Iusupu, agáiáná hangko tiꞌara maniheꞌ mohamboko, ambiꞌna miꞌi Maria káláꞌeá, hai kakáláꞌeána iti ánti kuasaꞌna Inao to Magasaꞌ. 19Iusupu iti tauna to manótó laluna, onoꞌ miꞌi haneꞌi nauliꞌ i laluna, “Ina kupogááka ngkániiꞌ-niiꞌ Maria,” láwiꞌ tiꞌara naundeꞌ mopakahiliá Maria. 20Tangaꞌna Iusupu mampepekiri, ia letaꞌ. I kaletaꞌna iti, mampaturuá. Ia moita hadua malaꞌekana Pueꞌ to mohángáꞌá, “Iusupu, pemuleꞌána Datu Daudiꞌ! Ineeꞌkoꞌ malááꞌ moala Maria mewaliꞌ toinámu, láwiꞌ Ánángkóiꞌ iti nakákáláꞌeánga ánti kuasaꞌna Inao to Magasaꞌ. 21Maria ina moánáka hadua ánángkóiꞌ tobaleilo, hai Ánángkóiꞌ iti ina nuhangaꞌ ‘Iesu’,#1:21 Iesu - mouláꞌ básá Iunani. I lalu básá Iberani: Iosuá. Lempóna: “Pueꞌ mehómpóki.” láwiꞌ Ia to ina mohómpóki taunáNa hangko i huku dósáraꞌ.”
22Upu-upuna iti mewaliꞌ bona tebukeki Ngkóráꞌna Pueꞌ to naukiꞌ nabiꞌ Iesaia hangkoia:#1:22 Iesaia mantepuꞌu mopahaweꞌ laluitana Pueꞌ Ala rekeꞌ-rekeꞌna pitu átuna iba puloꞌna parena hangko tiꞌara mani Iesu rapoánáka (740sM).
23“Hadua ánáꞌntawine ina káláꞌeá
hai moánáka hadua ánángkóiꞌ tobaleilo.
Ánángkóiꞌ iti ina rahangaꞌ Imanueꞌ.” (Iesaia 7:14)
Lempóna, “Pueꞌ Ala mamporángákeꞌ.”
24Mearó miꞌi Iusupu hai mampeuláꞌi upu-upu to nahángáꞌá malaꞌekana Pueꞌ Ala iti. Mewaliꞌ napohambokoá mpuꞌu miꞌi iti Maria, 25agáiáná tiꞌara maniheꞌ moiluhi duuꞌna Maria moánáꞌ. I kapesupaꞌna Ánángkóiꞌ iti, Iusupu mohangaꞌ “Iesu”.#1:25 Katoꞌuána Iesu rapoánáka rekeꞌ-rekeꞌna pare 5 ba 6sM.
Bahasa Behoa Shorter Bible © Indonesian Bible Society, 2015.
