San Juan 15
15
Jesús anque attiba ttu ya besuli tsee
1Jesús re:
—Neti anca ttu ya besuli tsee. Tata quia nna anque Benni ruyúe na. 2Iyába ca xiqui ya besuli-na, ca nu bittu ribía guecani nna rigúabe cana. Iyába ca nu ribía guecani nna richúe locani lhe rigúe nu bisi guecani lhe qui cuia chietti guecani. 3Ca tisa chi utixxiꞌatia lenba chi benque acale benni nari lo Tata Do Iyyabaaha attiba ttu yaga ritúa nu bisi gueni. 4Attiba dua len lebiꞌi, anía gualtseꞌe len neti. Attiba ttu xiqui yaga, gansi bittuba yaxxu nua yagaha nna läga aca ute nua nu xixxi. Anáguaba lebiꞌi, gansi bittuba seꞌele len neti nna läga aca unle nu tsee.
5’Neti anca ya besuli, lebiꞌi nna ancale ca ná ya besuli. Nu gua duna len neti nna gua duguaba len lana, unnuha nna cuia juisia gueni. Tsa läga aca guele unle ttu bixa gansi bittuba dua len lebiꞌi. 6Ca nu bittuba seꞌecana len neti nna iríaba ca nua iruꞌunacana. Ancacana attiba ca xiqui yaga nu dequide chi ribiscana nna redígatteba benni cana qui tsiacana lo gui itecana.
7’Gansi gua seꞌele len neti lhe bittu ixulhinle nu rá ca tisa quia-ni lhe lania nna bixaba raca lele, gualnnaba nna guadíbale nua. 8Tata quia benie runle ruleꞌe lo anque Benni ra xxeni lee, ganna unle nu anca tsee, attiba ttu yaga ribiaxxatta gueni, anía liba nna uleꞌe lo lebiꞌi rguaba nna gualíga ancale benni rudheti ca tisa ruleꞌeha. 9Neti nna racatia guele attiba racani Tataha quia. Lebiꞌi nna gualusigui gualtseꞌe len neti, benni racatia guele. 10Gansi gudole tisa gue ca tisa benia le mandadu unle-na, lania nna guaseꞌele len neti, benni racatia guele, attiba neti rudoa tisa gue nu beni Tata quia neti mandadu unia, dua lanie lhe lee nna racanie quia.
11’Anába rpea le, qui ebe itta lele itupa lenle neti, anía liba nna edaca lele itú iqui itú lele. 12Unní anca ley quia: aquin gue loesle attiba ucatia guele. 13Tsa läga nu benni te racaruinna gue ca benni seꞌe tsee lenna atti ttu benni dhielhana uttican na qui lhá ca benni seꞌe tsee lenna. 14Lebiꞌi ancale ca benni seꞌe tsee lania gansi udole tisa unle nu chi rpea le unle. 15Lärgaga upea le benni ttoꞌo lo sina quia, cumu nu ttoꞌo lo sinaha nna läga yu nua gaxasná anca gue nu baninna na. Benni seꞌe tsee len netiba upea le nnanna de chi beleꞌetia le iyába nu bina rá Tata quia. 16Läga lebiꞌi becueele neti, neti liba becueea le. Chi boseꞌa le qui tsiale unle nu anca tsee, nu anca tsee unleha nna uchíana, Tata quia nna gutebe iyá nu innábale lenie udettile neti. 17Unní rodhaꞌana unle: Aquin gue loesle.
Ca benni bittu ria lecani Jesús bittu aca uyúcana ca benni ria lecani benniha
18Jesús re:
—Gansi ca benni bittu ria lecani neti seꞌe yies lo yu-ni bittu aca uyúcana le nna gualodhá lele primerla neti bittu uca uyú ca unná. 19Ttirca ancarle benni baba len lacana, lania nna guacabaquinna guele attiba racaquinna gue ca benni baba len lacana. Ttiaca lebiꞌi nna lärga ancale benni baba yies lo yu-ni. Neti nna chi becueea le lheꞌe ca benni baba yies lo yu-ni. Nuarca bittu raca uyúcana le. 20Gualorexxa lele gue nu chi rpea le: “Ni ttu benni ttoꞌo lo sina bittu ancana nu ra xxeniru leni atti Benni bananie na.” Gansi neti besía le ca unná, anáguaba lebiꞌi usiaguaba le ca unná le. Gansi bedo nagacani gue nu ria nna udoguaba nagacani guele. 21Iyá unní udhacacan le lo niꞌa quia de ria lele neti, cumu bittu anca biaquinna Benni udhelhe neti.
22’Ttirca bittuba bisíaya yies lo yu-ni lhe bittuguaba belisa cana lhe lania nna lägabi dia nitti ca unná, cumu läga yu ca unná gansi runcana nu lä anca tsee. Ttiaca nnanna nna tsa bittu te roꞌocani innácana: “Bittu yutu gansi runtu nu lä anca tsee.” 23Nu rutía di leni neti nna rutía diguaba le nua Tata quia. 24Ttirca bittuba benia ca milagru nu tsa nuttu nu chi beni aní locani nna tsa lägabi tulha te ttiaca nnanna nna chi biláquinna nu benia. Läquiga de unnuha nna lacana sa tica rutía diru lecani neti lhe Tata quia lhe. 25Anába chi gaꞌana aca, qui saxxína nu chi dia lo ca ley gue Tata Do Iyyabaaha seꞌe len lacana atta rá: “Locachirba bi lo niꞌa guee nna xalhatteba betia di lecani neti.”
26’Neti idhelha Benni aca lanie le, delába Espíritu Benni ruleꞌe nu anca gualí. Benniha nna atta do Tata Do Iyyabaaha li iríe dee. Lee quixxiꞌe nuxa anca. 27Anáguaba lebiꞌi lhe quixxiꞌaguabale quia, cumu atti udulolia beleꞌetia ca benni, lebiꞌi nna chi seꞌele len neti.
נבחרו כעת:
San Juan 15: zaq
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2021, Wycliffe Bible Translators, Inc. All rights reserved.
