Lk 20
20
Yesũ Aikũlw'a vala Wumĩtye Ũkũmũ wake
(Mat 21.23-27; Mk 11.27-33)
1Mũthenya ũmwe Yesũ e Ĩkalũnĩ akĩmanyĩsya andũ na kũtavany'a Ũvoo Mũseo, athembi anene na amanyĩsya ma Mĩao na atumĩa nĩmaendie vala ũĩ, 2na mamũkũlya atĩĩ, “Kwa tũtavye, wĩĩka maũndũ aa na ũkũmũ mwaũ, na nũũ ũkũnengete ũkũmũ ũsu wa kũmeka?”
3Yesũ amasũngĩa amea atĩĩ, “O nakwa nĩngũmũkũlya ĩkũlyo. Kwa ndavyei, 4Yoana anengetwe ũkũmũ wa kũvatisa nĩ andũ kana anengetwe nĩ Ngai?”
5Namo mambĩĩa kũoany'a maikũlany'a atĩĩ, “Twĩasya ata? Twasya, ‘Anengetwe nĩ Ngai,’ etũkũlya, ‘Nĩkĩ ĩndĩ mũtaaĩtĩkĩla ũvoo wa Yoana?’ 6Na tũkasya, ‘Anengetwe nĩ andũ,’ andũ aa onthe no matũkimange na mavia, nũndũ onthe nĩmesĩ nesa kana Yoana aĩ mwathani.” 7Kwoou nĩmasũngĩie Yesũ mamwĩa atĩĩ, “Tũyĩsĩ anengetwe ũkũmũ nũũ.”
8Nake Yesũ amea, “O nakwa ndimũtavya nĩĩka maũndũ aa na ũkũmũ mwaũ.”
Ngelekany'o ya Aĩmi Makomboete Mũũnda
(Mat 21.33-46; Mk 12.1-12)
9 #
Ĩsa 5.1
Nĩvo ĩndĩ Yesũ watavisye andũ na ngelekany'o amea: “Ve mũndũ ũmwe wavandie mũũndanĩ wake wa mĩsavivũ na aũkomboethya aĩmi, na ĩndĩ athi kyalo kĩasa nthĩ ĩngĩ. 10Yĩla ĩvinda ya kũketha nzavivũ yavikie, nĩwatũmie mũthũkũmi ũmwe wake akanengwe kĩlungu kĩla kyake nĩ aĩmi amũetee. Ĩndĩ aĩmi nĩmavũie mũthũkũmi ũsu na mamũlũngya athi ate na kĩndũ. 11Mwene mũũnda nĩwatũmie mũthũkũmi ũngĩ, namo aĩmi mamũvũa ũsu o nake, na mamũumanga na mamũlũngya athi ate na kĩndũ. 12Nĩwatũmie mũthũkũmi wa katatũ, nake ũsu aĩmi mamũũmĩsya mũno na mamwĩkya nza. 13Nĩvo ĩndĩ mwene mũũnda weekũlilye, ‘Yu nĩĩka ata? Nĩtũma mwana wakwa mwendwa; nĩvatonyeka makamũnenga ndaĩa!’ 14Ĩndĩ yĩla aĩmi moonie mwana ũsu meeana, ‘Ũũ nĩwe ũkanengwa mũũnda ũũ nĩ ĩthe; tũmũae na ũtiĩwa ũkatw'ĩka witũ.’ 15Kwoou mamũtwaa nza wa mũũnda ũsu na mamũaa.”
Nĩvo ĩndĩ Yesũ wakũlilye andũ atĩĩ, “Yuĩ, mwene mũũnda akeekana ata na aĩmi asu? 16Akooka amoae, na aikomboethya andũ angĩ mũũnda ũsu wake.”
Yĩla andũ meewie ũu masya atĩĩ, “Ai, ũndũ ta ũsu ndũkaaĩthĩwe!”
17 #
Sav 118.22
Yesũ nĩwamasyaisye na amakũlya atĩĩ, “Nayu maandĩko aa methĩawa mayasya ata?
‘Ĩvia yĩla yaleilwe nĩ aki ma myako,
nĩyĩtw'ĩkĩte ĩvia yĩla ya vata mũno mwakonĩ.’
18Mũndũ ũla wĩvalũka ĩũlũ wa ĩvia yĩu, akavevenzeka, na ethĩwa ĩvia yĩu yĩkavalũkĩla mũndũ, yĩkamũtumba anyaĩĩke vyũ.”
Ĩkũlyo ĩũlũ wa Kũĩva Koti
(Mat 22.15-22; Mk 12.13-17)
19Amanyĩsya ma Mĩao na athembi anene nĩmendie kũmũkwata Yesũ saanĩ ũsu, nũndũ nĩmamanyie kana etavanasya ngelekany'o ĩsu aimatina, ĩndĩ makĩa andũ. 20Kwoou nĩmambĩĩie kũmantha mwanya mũseo, na matũma andũ amwe mathi makeyĩkalye ta aseo, na maimũkũlya Yesũ makũlyo mamũteete aneene ũndũ ũtaĩlĩte, nĩ kana matonye kũmũsikata kwa ngavana. 21Andũ asu nĩmaendie vala ve Yesũ mamwĩa atĩĩ, “Mũmanyĩsya, nĩtwĩsĩ kana ũneenaa na kũmanyĩsya ũla w'o. Ndwĩkaa ũndũ wendeesye mũndũ, ĩndĩ ũmanyĩasya andũ kwenda kwa Ngai kwa nzĩa ĩla mbaĩlu. 22Kwa tũtavye, nĩ waĩlu kũĩva mũsumbĩ wa Loma koti? Tũmũĩvae kana tũlee?”
23Ĩndĩ Yesũ nĩwamanyie ũseleke woo na amea atĩĩ, 24“Kwa mbony'ei ndinalĩ ĩmwe. Visa ũsu na ĩsyĩtwa yĩu nĩ syaũ?”
Namo mamũsũngĩa, “Nĩ sya mũsumbĩ wa Loma.”
25Kwoou Yesũ amea atĩĩ, “Nengai ĩndĩ mũsumbĩ kĩla kya mũsumbĩ, na mũinenga Ngai kĩla kya Ngai.”
26Andũ asu mayaatonya kũmũkwatya Yesũ kwĩsĩla ndetonĩ ila waneeneie mbee wa andũ. Ĩndĩ nĩmaseng'ie mũno nĩ ũsũngĩo wake na mavindya.
Ĩkũlyo ĩũlũ wa Kũthayũũka kuma kwa Akw'ũ
(Mat 22.23-33; Mk 12.18-27)
27 #
Meko 23.8
Nĩvo ĩndĩ amwe ma Asatũkai, ala maasya kana andũ maikathayũũka kuma kwa akw'ũ, maendie vala ve Yesũ na mamũkũlya atĩĩ, 28#Kũt 25.5 “Mũmanyĩsya, Mwose nĩwatũandĩkĩie Mwĩao ũũ: ‘Ethĩwa mũndũ nĩwakw'a atia mũka ate kana, no nginya mwana-a-inyia ose mũndũ mũka ũsu ndiwa, nĩ kana asyaie mwana-a-inyia syana.’ 29Yuĩ, kwaĩ aũme mũonza ma inyia ũmwe. Ũla mũkũũ nĩwatwaanie na akw'a atia mũka ate kana. 30Ũla ũmũatĩĩe nĩwatwaie mũndũ mũka ũsu, 31o na wa katatũ eeka oou. Onthe me mũonza nĩmamũtwaie, na vai ũmwe waatia kana aikw'a. 32Ĩtina mũndũ mũka ũsu nĩwakwie o nake. 33Yu ĩndĩ, mũthenya ũla akw'ũ makathayũũka, mũndũ mũka ũsu akeethĩwa e mũka wa wĩva, na onthe me mũonza nĩmamũtwaĩte?”
34Yesũ amasũngĩa amea atĩĩ, “Andũ ĩvindanĩ yĩĩ nĩmatwaanaa na makatwawa, 35ĩndĩ andũ ala makoneka maĩlĩte kũthayũũka kuma kwa akw'ũ ĩvindanĩ yĩu, maikethĩwa maitwaana kana kũtwawa. 36Maikethĩwa matonya kũkw'a nũndũ makeethĩwa mailyĩ ta alaĩka, na nĩ syana sya Ngai kwa kũthayũũkw'a kuma kwa akw'ũ. 37#Kuma 3.6 Naw'o ũndũ wa kũthayũũka kuma kwa akw'ũ, o nake Mwose nũĩkĩĩthĩtye ũndũ ũsu Maandĩkonĩ Matheu, vala vawetete ĩũlũ wa kakuthu kakene. Vau nũmwĩtĩte Mwĩai, ‘Ngai wa Avalaamu, Ngai wa Isaka, na Ngai wa Yakovo.’ 38We ti Ngai wa ala akw'ũ, ĩndĩ nĩ Ngai wa ala me thayũ, nũndũ kwake andũ onthe me thayũ.”
39Nĩvo ĩndĩ amanyĩsya amwe ma Mĩao mamwĩie atĩĩ, “Mũmanyĩsya, wasũngĩa nesa.” 40Ĩtina wa ũu, vai mũndũ waatata kũmũkũlya ũndũ ĩngĩ.
Ĩkũlyo ĩũlũ wa Klĩsto
(Mat 22.41-46; Mk 12.35-37)
41Nĩvo ĩndĩ Yesũ wamakũlilye atĩĩ, “Andũ matonya ata kwasya kana Klĩsto nĩ nzyawa ya Ndeviti? 42#Sav 110.1 Ndeviti mwene nũneenete ĩvukunĩ ya Savulĩ akasya,
‘Ngai nĩwamwĩie Mwĩai wakwa:
43Ĩkala nthĩ ngalĩko ya kw'oko kwakwa kwa aũme,
kũvika yĩla nĩmaia amaitha maku ungu wa ũtonyi waku.’
44Ethĩwa ĩndĩ Ndeviti eetie Klĩsto, ‘Mwĩai,’ kũtonyeka ata Klĩsto ethĩwe e nzyawa yake?”
Yesũ Aikany'a Andũ Mesũvĩane na Amanyĩsya ma Mĩao na Avalisi
(Mat 23.1-36; Mk 12.38-40)
45Yesũ nĩwatavisye amanyĩw'a make andũ onthe methukĩĩsye amea atĩĩ, 46“Ĩsũvĩanei na amanyĩsya ma Mĩao; mendete kũthi mekĩĩte ngũa ndaasa, na kũkethaw'a na ndaĩa me ndũnyũ. O ta ũu mendete kwĩkala ivĩlanĩ sya mbee nyũmbanĩ sya Ayuti sya kũthaithĩa na kũmbanĩa, na kwĩkala kũndũ kwa ndaĩa me mbokanĩ. 47Nĩmavenaa aka ndiwa syĩndũ syoo, na kwĩseũvya kwa kũvoya mboya ndaasa. Ũsilĩlo woo ũkeethĩwa wĩ mũnene mũno.”
BIBLE SOCIETY OF KENYA © 2011
