LUKA 23
23
Bawipa Jesuh cu Pilat Bawi ah Hteh Püi Ci Gui
(Mt 27:1-2, 11-14; Mk 15:1-5; Jn 18:28-38)
1Phak ciah chang gui ami van ng’düi law u ne, Bawipa Jesuh cu Pilat bawi ah hteh püi ci gui. 2Ngami naw, “Shin ah chang kami pha ah mawng cu Khanpughi-am k’phlam kä pe ba vä, cine chang gui m’cäi gui ne, amät naw amät phi ‘Kei Messiah nei, Kei ghangpughang nei’ cine kya sei, kami hmuk ci nei” cine kyak ci gui.
3Pilat bawi naw, Bawipa Jesuh-am nang cu Jew Ghangpughang ah na kyak ci ma?” cine ng’shik ci.
Bawipa Jesuh naw, “Na pyein ah mäih ah kyak ci nei” cik ci.
4Cun kawn ah Pilat bawi naw, taigüpa gui la chang khli gui-am, “Shin ah chang hniim nak vai ah a mawng kä ka hmuk ci nei” cine kyak na gui ci.
5Cun ung phi ngami naw, “shin ah chang cu Kalile kho ung tün ne Judea kho, shin ung gawk lawk khai ah chang gui m’hleei gui ne thüngphyong sak gui ci nei” cine m’lau law pi ne pyein ci gui.
Bawipa Jesuh Cu Herod mang ah Hteh Püi ci gui
6Pilat naw cun ami ci ng’ya netah, “Ani cu Kalile chang maa?” cine ng’shi gui ci. 7Herod mang ah uknak Kalile ah kaa ah hmat netah, Bawipa Jesuh cu Herod ah hteh püi sak gui ci. Cu yah ung Herod cu Jerusalem ah om yah ci. 8Herod cu Bawipa Jesuh hmu law netah, ang htei ah yei ci. Ani cu Bawipa Jesuh ah mawng ng’ya pyi ci kya ne a hmuh nak hlü phi shou lawk ci. Ani cu cäi aih vai gui, Bawipa Jesuh naw abi ung teng tuk khai ah ngaih u ci. 9Herod naw Bawipa Jesuh cu akda ah ng’shi sei phi kä m’hlan tuba ci. 10Taigüpa gui la thukhän saya gui naw, Bawipa Jesuh cu akgai ah k’uum ne huut taap ci gui. 11Herod la agakap gui naw phi, Bawipa Jesuh cu, päipih ne shedam nak ci gui. Cun kawn ah aktung ah m’sui m’sak netah Pilat bawi ah tüi ba ci. 12Herod la Pilat cu a yan ani ng’gen tu man pang ung phi, cun ah hnüüp ung ng’khawt ba ci goi.
Bawipa Jesuh Cu Ngawn Vai ah K’bäi Ci Gui
(Mt 27:14-26; Mk 15:6-15; Jn 18:39—19:16)
13Pilat naw taigüpa gui Jew chang ng’vai gui la chang a hei gui khü gui netah; 14Shin ah chang cu, chang gui hleei hlak ne thüngphyong sak gui ci, cine nami law püi ci, cun ung phi na mi ma ah kami ng’yak vai ah ng’shi ngä sei, ani hniim nak vai, a i kä ng’dang ci. 15Herod mang naw phi a i kä hmu ne, kei ah tüi law ba ci. Shin ah chang ung sihnak vai katnak a i kä om ci. 16Cun ah kyasei ani cu, htung awn that netah, ka tüi ba khai nei” cik ci. 17Pilat cu Pasakha pawi päng ung chang gui ah hmawk ah thawng kyum ci tumat phiawn sak ci man ci.
18Chang khli ami van naw, “Shin ah chang cu ngawn ä, keimi ah hmawk ah Barabbas cu phiawn sak ä,” cine a täng ah m’lau ci gui. 19(Barabbas cu pigaw kyong ah a thüngphyong sak gui ah phäh la chang a ngawn ah phäh ah thawng kyum ci kyak ci.)
20Pilat naw Bawipa Jesuh cu phiawn sak hlü netah, chang gui ah ma ah pyein ba mä ci. 21Cun ung phi chang gui naw, “Shin ah chang cu kutlamtung ung tai ne ngawn vä, Kutlamtung ung tai ne ngawn vä” cine m’lau ci gui.
22Pilat naw, “Ani naw a i katnak ang a bi? Ani ngawn nak vai ah katnak tumat phi kä ka hmuk ci. Cun ah kyasei ani cu htung awn that ne m’cäi netah ka tüi ba khai” cine ak thum vei nak ah pyein ci.
23Cun ung phi chang gui naw, Bawipa Jesuh cu ktumlamtung ung tai ne ngawn vai ah m’lau laih laih u netah, akhnu ah näng ci gui. 24Pilat naw ngami ah pyein ah mäih ah m’khoichaa nak cu bik ci. 25Chang akthüng phyong sak nak la chang ah ngawn nak awn thawng kyum cicu ami pyein ah mäi ah phiawn sak ci. Bawipa Jesuh läi cu ami m’hni ah ami bi vai ah ap gui ci.
Bawipa Jesuh cu Kutlamtung ung Tai ne Ngawn Ci Gui
(Mt 27:32-44; Mk 15:21-32; Jn 19:17-27)
26Gakap gui naw Bawipa Jesuh ami hteh law püi yah ung Sairin pigaw ah kaa Simon ming nak ciah chang cu ana law sei, hmu u netah, pha u ne, ktulamtung cu kawh sak u ne, Bawipa Jesuh ah hnu ah läk sak ci gui.
27Chang gui akda naw a hnu ah läk lawk ci gui. Hnumi gui amshah gui cu ami ng’kyang k’beeih ne kyap ne läk law tuk ci gui. 28Bawipa Jesuh naw, cun ah hnumi gui lam ah ng’hlat netah, Jerusalem ah hnumi gui aw, kei ah hmawk ah kä kyap u ne, nami mät la nami hta gui ah hmawk ah nami kyah vai. 29A hta kä om ci, kä hta ci la tuui kä tu man ciah hnumi cu yeikyai nak om ci, ci nak ah akhin gawk lawk khai nei. 30Cun ah akhin ung chang gui naw, khomhtung gui-am, ‘Keimi ah khan ah piawn ne kya law vä’ ci u ne; khogui gui-am, ‘Keimi ng’min ne na lin law gui ä’ cine kyak khai gui. 31Chiing ne lim ciah a ghing hngaw shin hlawk ah ka yaica ung a ghing chawng ci a i hlawk ah yaica khai ang” cine kyak na gui ci.
32Katnak bik ciah changshe hnih cun phi Bawipa Jesuh awn a täng ah ami ngawn gui vai ah hteh püi ci gui. 33“Lu koihmun” ming nak ciah k’päng ah gawk u netah, Bawipa Jesuh cu kutlamtung ung tai ne ngawn ci gui. Changshe hnih cun phi tumat akpat lam, tumat ak-eng lam ah tai ne ngawn goi ci gui. 34Bawipa Jesuh naw, “Ngami cu a i ami bi ah ami mät naw kä hmat ci gui nei, m’gein gui ä” cine pyein ci.
Chang gui naw Bawipa Jesuh ah a suisak gui cu, m’shüih tawk ne ng’pai ci gui. 35Chang gui naw ng’düi ne ami dan yah ung Jew chang ng’vai gui naw, “Shin ah chang cu chang hei gui hun gui ciah, Khanpughi naw am düih ah Messiah ah a kyak ung amät naw, amät hun law shüm sä” cine päipih ci gui. 36Gakap gui cun phi yu aktai tu u netah, 37“Nang cu Jew Ghangpughang ah na kyak ung, na mät naw na mät hun law shüm ä” cine päipih ci gui.
38 Bawipa Jesuh ah alu khan ah phi, “Shin cu Jew chang gui ah Ghangpughang nei” cine ca gu ne tai ci gui.
39Kutlamtung ung ami tai goi ah changshe hnih ungka tumat naw, “Nang cu Messiah ah kä na kya ne ma? Na mät phi hun ne, keini phi na hun tu goi ä hawya!” cine päipih ne pyein ci.
40Ahei changshe tumat naw, “Nang Khanpughi cu kä na kyih ci ma? Nikni cu ani mäih ah m’kat nak ni gah ung phi; 41ni mät ah katnak awn ni mät ni hteit ciah kyak ci, cun ung phi a ni cu a i phi akat nak kä om ci nei” cine pyen nak ci. 42Cun kawn ah Bawipa Jesuh-am, “Ghangpughang ah kya ne na uk law hnüüp ung kei phi na shüm tu ba bäi” cine pyein ci. 43Bawipa Jesuh naw, “Kei naw thukhän ne ka pyein cu, atuh ngaw nang cu kei awn a täng ah paradise kho ah na om khai nei” cine pyen nak ci.
Bawipa Jesuh ah Sihnak
(Mt 27:45-56; Mk 15:33-41; Jn 19:28-30)
44Kho hnüüp ng’lung ung tün ne kho k’awinu a khin ung khüt khai ah khomdek khan avan ung khohni kä dei ba ne shitne hmüp yawp ci. 45Taigüim kyong ah ami yai ah yih phi hnih ah teek ne ng’chak ci. 46Bawipa Jesuh cu, “Aw Kapa, Na kut ung Ka Mumcha ka ning ap ci nei” cine m’lau netah kät lawk ci.
47Acun gui cu gakap bawi naw hmu netah, “Shin ah chang cu akcang ah, changni chang khän ah kyak ci, cine Khanpughi m’hlüngtai ci. 48Teng tuk khai ah lawk ciah chang gui naw, acun gui cu hmu u netah, ang htei ah ayä u ne hteit ba ci gui. 49Kalile ah kaa law tuk ci gui ah Bawipa läk lawk ci gui ah hnumi gui la Bawipa hmat ciah chang gui cu ang shawng ah ng’düi u netah, Bawipa Jesuh cu teng ci gui.
Bawipa Jesuh Ami M’cim Nak
(Mt 27:57-61; Mk 15:42-47; Jn 19:38-42)
50Judea kho Arimathea pigaw ungka Josef ming nak ciah chang ng’vai tumat om ci. 51Ani cu changni changdüng ah kya ne Khanpughi ah uknak kho a gawk law vai cu ging ciah chang ah kyak ci. Ani cu kongci ng’vai ah a kyak ung phi, ang vai gui ah k’bäi nak la bi nak cu kä yum tuk ciah kyak ci. 52Ani cu Pilat ah hteit ne Bawipa Jesuh ah a gook cu htüm khai ah va pyein ci. 53Cun kawn ah kutlamtung ungka Bawipa Jesuh ah a gook cu la ba ne, yih bawk awn hlawp netah, a u ah kä ng’phuh nak man lung ami shawk ah khui akthai ung k’phuh ne m’cim ci. 54Cun ah hnüüp cu akchuk hnüüp ah kya ne, a ngawi ung kyin nak hnüüp ah kya lawk khai kyak ci.
55Kalile ah kaa Bawipa läk lawk ciah hnumi gui cun phi hteit ne m’cim tu u ne, 56ng’cim hmun la a gook m’shän ne ami k’phuh cu ang hteing ah hmu tuk ci gui.
Kyin nak hnüüp ung thukhän läk u ne, a i kä bi ah adüm ah om ci gui.
Cho Bible Common Language © Bible Society of Myanmar, 2016.
