LUKA 21
21
Hmeinu ah Peitnak
(Mk 12:41-44)
1 Bawipa Jesuh naw mang shüi netah, pum im ah peit nak ung bühmang ci gui naw, ami khawh ami peit cu hmuk ci. 2Ghawipyam ciah hmeinu tumat naw, kyei tangka hnih hta apeit tu cun phi hmuk ci. 3Bawipa Jesuh naw, “Kei naw akcang ka pyein cu, shin ah ghawipyam ciah hmeinu naw avan ah däm pi sei pek ci nei. 4Chang a hei gui cu ami khawh akpawih law ung vah Khanpughi-am pek ci gui. Shin ah heminu läi cu a ghawipyam pang ung phi ani ung om ciah a khawh avan pe pyi ci nei” cine pyein ci.
Pum Im A Shet Vai ah Mawng Bawipa Jesuh ah Ng’thu Pyein
(Mt 24:1-2; Mk 13:1-2)
5Ang düihpüi gui amshah naw, Taigüim ami cawh nak ah lung gui a kyom ah mawng la Khanpughi ami peit tah khawhchaam gui abäkhäk ah mawng cu pyein ne ng’thu ci gui. 6Bawipa Jesuh naw, “Shin ah nami hmuh gui cu avan she ne maih khai nei. Lung k’pei tumat phi a hnün ung kä ng’taih ba shüt sei she ne a maih nak ah a khin gawk lawk khai nei,” cik ci.
Zaica nak La Dukdeiu Nak
(Mt 24:3-14; Mk 13:3-13)
7Ngami naw, “Sayapa, a i a khin ung cun gui cu kya lawk khai ang? Acun ah a kyak law gui vai hmat nak vai ah a i gui dang law ma khai ang?” cine ng’shik ci gui.
8 Bawipa Jesuh naw, “Chang naw kä a ning m’hleei-en gui vai ah geing na ne om vä. Chang akda cu kei ah mäih ah ng’hlawk ne ‘Kei cu Messiah nei’ cik ci om lawk khai nei, acun ah khin cu gawk law pyi ci nei, cine ning m’hleei gui ci phi om lawk khai nei. 9Acun gui ah hnu ah kä nami läk-en vai nei. Ng’tuk-ah ah mawng la ng’küükneet nak ah mawng nami ng’yak ung kä nami kyihkyawk en vai. Acun gui cu akhtük ung gawk law ma khai, cun ung phi kho ang pyi nak vai ah a khin kä gawk law phak ci nei” cik ci.
10Cun kawn ah Bawipa Jesuh naw, “Chang pakhui tumat la tumat, kho ahei la a hei ng’tuk nak om khai. 11A kho päng ung ak nuipai ah shihpi ah thüng nak, ei awk ah maih nak, gawpyam ah ng’peeih nak gawk lawk khai. Kyihkyawk cäicat gui vai khankho ah dang lawk khai. 12Cun gui kä a gawk law pha ung chang gui naw ning pha gui ne, ning dukdeiu na gui khai gui. Pum im ah m’khoichaa vai ah ning ap gui u ne, thawng ung ning chum gui khai gui. Nangmi cu kei ah hmawk ah ghangpughang ah ma, bawi ah ma ah nami gawk khai. 13Cun gui cu nangmi naw Thu Ni nami pyein nak vai ah akhin k’ni ah kiak khai. 14Cun ah kyasei a i ah nami thu tuba vai kä ng’ä-en u ne, nami m’lung ung nami k’üüp vai. 15A i ah kyasei ci ung nami gaa naw kä a ning m’khüt gui vai ah hmuhmat nak la ng’thu m’gawng thei nak cu ka ning pe gui khai. 16Nami nupa, phäi nau, mätyah gui naw gaa ah kut ung ning ap gui khai gui. Nangmi ungka amshah cu ngawn khai gui. 17Kei ah hmawk ah chang gui naw ning gen gui khai gui. 18Cun ung phi nami lu ung lusam ng’ma ät phi kä di düt khai. 19Akhäng htek ah nami ng’düih vai, cun ung hun phiawn nak nami gah khai.
Jerusalem ah Dimaih Vai ah Mawng A Pyein Nak
(Mt 24:15-21; Mk 13:14-19)
20Jerusalem cu gakap gui naw ngäng u sei nami hmuh ung adi law nak vai ng’et lawk ciah nami hmat vai. 21Cun yah ung Judea kho ung om ci gui khomhtung lam ah dawng u sä, pigaw kyong ah om ci gui, pigaw k’pung ah hteit u sä, pigaw pei ah om ci gui pigaw kyong ah kä hteit-en u sä. 22Cun cu “Hmakat m’kyuk nak ah hnüüp” ah kyak ci, ciah cacim ung kaa ang dang law nak ah kyak ci. 23Cun yah ung käu mah ci la a hta yüt ciah hnumi gui cu ang htei ah yaica khai gui. Judea kho cu yaica nak ung gawk khai, chang gui ah khan ah hma m’kyuk nak om khai. 24Chang amshah cu chim awn sik khai gui, amshah cu pha ne, khlei htein nah ne, a kho päng ung hteh püi khai gui. Chang khui hei gui naw ami uknak kä ang pyi pha ah chuih Jerusalem cu ami kho awn kai nak khai gui.
Chang ah Htapa Akyum Law Vai ah Mawng
(Mt 24:29-31; Mk 13:24-27)
25“Hni cha aisi gui ung cäicat vai gui dang lawk khai. Khomdek khan ah chang gui cu tuinu ah ng’hnawk ng’ya ne cäicat khai gui. 26Khomdek khan ah kho ah shet nak a gawk law vai hmat ciah chang gui cu, cäi ng’ä aih khai gui. Kho k’häu ung kumkü aisi gui cu thüng ne yong yawp khai gui. 27Cun kawn ah küikyang ciah hlüngtai nak la bämang nak awn be ne, ng’mei bawk ung ng’cum ne lawk ciah chang ah Htapa cu nami hmuk khai. 28Acun gui tün ne agawk law ung, Khanpughi naw a ning hun nak gui vai ng’et lawk ci kyasei, täu law ne, ng’düi law ne nami na dan vai” cine m’cäi gui ci.
K’thei Ghing awn Amtumtäng Nak
(Mt 24:32-35; Mk 13:28-31)
29Cun kawn ah Bawipa Jesuh naw, m’tumtäng ah am thein gui cu; “Thei ghing la a hei sing ghing gui cä teng vä, 30Sing gui ami lim law ba ung kho chaa lawk khai ah nami hmat ci. 31Acun ah mäih ah ka pyein gui cu dang law sei nami hmu ung, ‘Khanpughi ah uknak kho ng’et law ci’ ciah nami hmat vai.
32“Kei naw akcang ka pyein cu, tuhbäi ghing ciah chang gui kä ami sih phaa yawp ung ka pyein gui cu ng’dang yawp khai nei. 33Khankho la khomdek ang pyi ung phi, kei ah ng’thu cu kä ng’pyi khai.
Geing Nak Vai Hlü Ci
34“Nangmi cu ei awk yeikyai nak düt la khomdek pumsa ah phäh düt ah kä mü thai u ne, geing na ne nami om vai nei. 35M’khoichaa nak ah hnüüp cu thau ah ng’chawi ah mäih ah nami khan ah akten ah gawk lawk khai nei. Cun ah hnüüp cu khomdek khan chang avan ah khan ah gawk khai nei. 36Tholet ne nami om vai, gawk lawk khai ah kho ah shet nak cu m’khüt ne, chang ah Htapa ah ma ah ng’düi ne m’khoichaa nak nami awt hning vai ah angtäi sei taigü ne nami om vai nei” ci ne m’cäi gui ci.
37 Bawipa Jesuh cu kho hnüüp yah ung pum im ah m’theithang gui ne, khomü lam ah Olive khomhtung ah kai ci ci. 38Chang gui cu ang thu ngai tuk khai gui ah kho ngawi ah ng’dawt ne pum im ah law ci ci gui.
Cho Bible Common Language © Bible Society of Myanmar, 2016.
