JOHAN 1
1
Ghinnak ah Ng’thu
1Khomdek kä a ng’tüi pha ung Thu cu om ci. Thu cu Khanpughi awn a täng ah om ci.
Thu cu Khanpughi ah phi kya ci. 2Akhtük bäih ung Thu cu Khanpughi awn a täng ah om ci. 3Khanpughi naw Thu awn ang tüi avan tüisho ci. 4Ani ah kä tüisho a i phi kä om ci. Thu ung ghinnak om ci. Ghinnak cu chang gui ah akdei ah kya ci. 5Akdei cu akhmüp ung khang sei, akhmüp naw kä dou hlük ci.
6Johan ming nak cicu Khanpughi naw ng’shä ah tüi lawk ci. 7Chang gui naw akdei ami yum hmat tu vai ah, akdei ah mawng pyein khai lawk ci. 8Ani cu akdei ah kä kya ci. Akdei ah mawng pyein khai ah lawk ci. 9Akcang ah akdei cu khomdek khan ah gawk law ne chang van ah khan ah khang ci.
10Thu cu khomdek khan ah om pyi ci. Khanpughi naw ani awn khomdek phi tüisho pyi ci. 11Cun ung phi khomdek naw ani kä yum hmat ci. Ani cu amät ah kho ng’lei ung law sei phi ak chang gui naw kä dou ci gui. 12Ani dou ne yum ciah chang gui-am Khanpughi ah hta ah kyak nak pe gui ci. 13Cun ah hta gui cu amät ng’tüi lawk ci la chang pa nah ne ng’tüi lawk ci gui ah kä kya ci. Khanpughi ung ng’tüi lawk ci gui ah kyak ci.
14Thu cu chang ah yung tüi law pyi ci. Abäkhäk nak la thutak awn be ne mikmi ung om pyi ci. Abämang nak phi mi hmu pyi ci. Cun ah bämang nak cu Khanpughi ah Htapa ah a kyak nak awn agah ah kyak ci.
15Johan naw ani ah mawng ng’shä ne a pyein cu, “Kei naw ka pyein man ah chang cu ani nei, ani cu kei ah hnu ah lawk ci, cun ung phi kei ah hlüngtai pi ci, a i ah kyasei ci ung ani cu kei kä ka ng’tüi pha ung ng’tüi pyi ci.
16Ani cu m’geinsei nak awn kümbe ne, chang van tumat täi-am m’shumphyuk nak na pe gui ci. 17Khanpughi naw Thukhän cu Moses ung na pe gui ci, cun ung phi geinsei nak la düng nak cu Jesuh Chrit ung na pe gui ci. 18Khanpughi cu a u naw kä hmu man ci, cun ung phi Khanpughi awn täng ne ani ah coi ung om ciah A Htapa naw Khanpughi cu m’dang pyi ci.
Tuihnim Johan ah Thu Pyein
(Mt 3:1-12; Mk 1:1-8; Lk 3:1-18)
19Jerusalem kho ah Judah ng’vai gui naw, taigü gui la Levit gui cu Johan ah tüi law u netah, “Nang cu a u ang?” ciah ng’shi sak gui ci gui.
20Johan naw, “Kei cu Messiah ah kä ka kyak ci nei” cine akdei angdang ah m’thein gui ci.
21Ngami naw, “Cun ung nang a u ang? Nang Eliah ma?” cine ng’shi ba ci gui. Johan naw, “Kei cu Eliah ah kä ka kya ci nei” ci ba ci. Cun ung nang profet ma cine ng’shi ba mä u sei phi, “Ka nei” ci ba ci.
22Ngami naw cun ung nang a u ah na kyak cu nam thein gui ä, nang shi sak gui ci-am kami m’thein ba gui vai” cik ci gui.
23Johan naw, “Kei cu profet Isaiah ah pyein ah mäih ah, Bawipa ah lam ng’düng sak vä cine, bungpuk ah ng’khü ciah chang ah ka kyak ci” cik ci.
24Pharise gui ah tüih law chang gui naw, “Nang cu Messiah ah phi kä na kyak ung, 25Elijah ah phi kä na kyak ung, profet ah phi kä na kyak ung, a i vai tuihnim nak na peit ang?” cik ci gui. 26Johan naw, “Kei naw tuihnim nak ka ning pe gui ci, cun ung phi nami ng’lung ah kä nami hmat tumat om ci, ani cu kei ah hnu ah lawk ci, 27Cun ung phi kei cu ani ah phahnat gui k’phian khai ah phi kä ka khin ci” cik ci.
28Shin ah bi nak gui avan cu Johan naw tuihnim nak apeit nak Jordan tuinu hei gaa Bethani kho ungka ah kyak ci.
Khanpughi ah Htome Hta
29A ngawi ung Bawipa Jesuh a law Johan naw hmu netah, “Teng vä! Ani cu, khomdek khan ah hmakat nak hteh püi ciah Khanpughi ah Htome hta nei.”
30Kei ah hnu ah lawk ci cu, kei kä kang tüi pha ung ng’tüi ne kei ah hlüngtai pi ci nei, cine ka pyein man cu ani ah kyak ci nei. 31Ayan ani kä hmat man ci, cun ung phi Israel chang gui naw, ami hmat vai ah tuihnim nak ka peit nei” cik ci.
32Cun kawn ah Johan naw, “Müüm bawk ah mäih lawk ciah Mumcha Theing cu, khankho ah kaa kyum law ne, alu khan ah ngo law sei ka hmuk ci. 33Ayan ung ani kä ka hmat man ci, cun ung phi tuihnim nak ka pek khai ah na tüi lawk ciah Khanpughi naw,” Khankho ah kaa Mumcha Theing kyum law ne, alu khan ah ngo law sei, na hmuh ah chang cu Mumcha Theing awn hnim nak pek khai ah chang nei,” cine ana m’thein pyi ah kya ci. 34Cun ah chang cu kei naw ka hmu pyi ci kyasei, “Ani cu Khanpughi ah Htapa ah kyak ci nei, cine ka ning m’thein gui nei” cik ci.
Bawipa Jesuh ah Ng’düihpüi Htük Gui
35A ngawi ung Johan la ang khahpüi goi ami ng’düih yah ung, Bawipa Jesuh a law hmu u netah, Johan naw, 36“Teng tu vä, Khanpughi ah Htome hta cu ani nei” cik ci.
37Cun a ci ng’ya u netah, ang khahpüi goi cu, Bawipa Jesuh ah a hnu ah läk tuk ci goi. 38Bawipa Jesuh naw ani läk law hmu goi netah, “A i na ni shui ci ang?” cine ng’shi goi ci. Ngani naw, “Rabbi, a hawi na om ci ang?” cine ng’shik ci goi.
39 Bawipa Jesuh naw, “Law ne teng law niä,” ci sei, a hnu ah hteit tu ne, a om nak ah gawk tu ni netah, mü ne om tuk ci goi.
40 Bawipa Jesuh ah hnu läk ci goi ungka, tumat cu, Andrew, Simon Peter ah a phäi ah kyak ci. 41Andrew naw anau Simon hmu netah, “Messiah ni hmu pyi ci nei” cik ci. (Messiah cu Chrit ah kyak ci.)
42Cun kawn ah Simon cu Bawipa Jesuh ah om nak ah hteh püi ci. Bawipa Jesuh naw, Simon cu hmu law netah, “Nang cu Johan ah hta Simon ah na kyak ci, Cun ung phi tuhbäi ung tün ne, Cephasa (cun cu Peter, ci la lungnu ciah kyak ci) na ming nak khai” cik ci.
Bawipa Jesuh naw Philip la Nahtanelah Khü Goi ci
43A ngawi ung Bawipa Jesuh cu Kalile kho ah a hteh nak ba ah, Philip cu hmu netah, “Na läk ä” cik ci. 44(Philip cu Andrew la Peter ah om nak Bethsaida kho ah kaa ah kyak ci.)
45Philip naw Nahtanelah hmu netah, “Moses naw thukhän ung a guk la, Profet gui naw ami guk ah mäih ah, Nazaret kho ah kaa Josef ah hta Jesuh cu, ni hmu pyi ci nei” cik ci.
46Nahtanelah naw, “Nazaret ungka akni ng’tüisho hning khai ma?” ci khätah, Philip naw, “Law ne teng lawä” cik ci.
47 Bawipa Jesuh naw Nahtanelah a law hmu netah, “Ani cu, Israel chang akcang ah kyak ci nei, ani ung hleeihlak nak kä om ci nei” cik ci.
48Nahtanelah naw, “A i hawkcha ah kei na na hmat ang?” cine ng’shik ci. Bawipa Jesuh naw, “Philip naw kä a ning khü pha ung, kthei ghing kaa ah om ci sei, ka ning hmuk ci nei” cik ci. 49Nahtanelah naw, “Rabbi, nang cu Khanpughi ah Htapa ah na kyak ci, Israel ah Khanpughi ah na kyak ci” cik ci.
50 Bawipa Jesuh naw, Ani-am, “Thei ghing kaa ah om ci sei, ka ning hmuk ci, ka ciah hmawk ah na na yum ci ma? Cun ah tah cäicat pi gui vai na hmu lawk khai nei” cik ci. 51Bawipa Jesuh naw, “Kei naw akcang ka pyein cu, Khankho m’kawt hmawng law khätah chang ah Htapa ah khan ah khankho chang gui kyum kai u sei nami hmu lawk khai nei” ci na gui ci.
Cho Bible Common Language © Bible Society of Myanmar, 2016.
