Saŋ 4
4
Yéesú a ɓelaa dék Samari ra
1-2Waalli ƴaaha, fariseŋŋa keluute ban fi biti yee lah Yéesú taalibe, bëtíssé wë rë, luk ƴi Saŋ Batis. (Ɗeef nagajek ɗi fi Yéesú neh daa na húmú bëtís, taalibe yi daa na húmú pagu yaa tígë.) Yúhëꞌ Yéesú biti yii baa halte nuffi fariseŋŋa ra nék, 3ɗi kolohte Yúdée, na nimil Galile. 4Ɗi ƴahti saañ dín fë rëe, ɗi waɗtee ñee Samari. 5Ɗaaha, ɗi tílté níi ɗi leɓohte gini hínú Sikaar non Samari, di hëbís feey fa húmú on Yakop koohi Suseef ra. 6Yakop húmú hacce yéem daaha. Bi mok Yéesú waali, ɗi tookke ɓúk yéemë na hílsëh, ɗeef naꞌ lahte leelu af. 7-8Taalibe yi suute filiɓ ginin saam yii nay waa ñame.
Lahte ɓelii dék Samari acce neh wahtii baaha. Yéesú won ɗi tih : « On soꞌ muluɓ mi han yaa ow. » 9Ɓelaa won ɗi tih : « Mantee ɓal, fu ɗagaꞌ soꞌ muluɓ ɗíh te fu yëwúɗ, mi ɓëy Samari ? » (Ɗeef wa fi yëwúɗɗë nagajek, fahuuy bok a ɓëy Samari dara.) 10Yéesú won ɗi tih : « Fu yúh yii na onaꞌ Koo a soꞌ mi ɓëeꞌ na won a ɗo ra koon, daa fay soo ɗage muluɓ, mi on ɗo mulaa na onaꞌ pes ɗa. » 11Ɓelaa tahte won ɗi tih : « Ɓahaa, ɗo fu lahay hoc níi wocce, te yéemë nooɗte tíkké sun ! Fay ɗúhée mulaa na onaꞌ pes ɗa di kon ? 12Ciffi fun Yakop daa heliɗ fun yéemí beh. Ɗi hante na mulaa, koyyi hanute na, yuppi hanute na, fantee habaꞌ biti fu luk ɗii gaan a ? » 13Yéesú won ɗi tih : « Ɓëyí han na mulii yéemí bee ɓéeɓ, fay sifiraat ; 14ndaa ɓëyí han na mulaa nay mi rii one ra, ii sifiriil taꞌ : mulaa nay mi rii one ra kay, ay yíssée culi julli pesi na ɗúméh ɗii na. » 15Ɓelaa won ɗi tih : « Ɓahaa, on soꞌ na mulii ƴah, nda mi woc sifiroh te mi aylileh neh yéemí beh. »
16Yéesú won ɗi tih : « Kon paye fu kale ƴaalu fu ac. » 17Ɓelaa won ɗi tih : « Mi lahay ƴaal. » Yéesú won ɗi daaha tih : « Fu won kaah biti fu lahay ƴaal, 18ndah fu ñeete ƴaal iip, te ɓëeꞌ ɗoni na pesu leegi ra ƴaalu neh. Kon fu won kaah ! »
19Tígí daaha, ɓelaa won ɗi tih : « Ɓahaa mi ot na, fu yonente ! 20Caacci fun húmú jaamiyuu Koope sun fi daŋi beh, ndaa ɗon fi yëwúɗɗë, ɗon wonu ɗi waɗti jaamiyuun Yerusalem. » 21Yéesú won ɗi tih : « Yaa ow, gémé yee na won mi ro bee ra : ay tíl níi jaamiyohi ɓëewë Baap-Koo sun fi daŋi beh, mbée Yerusalem ii caak solo. 22Ɗon fi ɓëy Samari, ɗon na jaamiyuu, ndaa ɗon yíih Koope ; fun fi yëwúɗɗë nék, fun na jaamiyuu ri te fun yúhú rí, ndah ri ñeyaꞌ fun fi yëwúɗɗë në, múclí ëldúnë. 23Wahtaa hompe lah, te ri lahte, wahtaa nay jaamiyee ɓëewë na saamu Baap-Koo kah-kah ra, wa ñeyaꞌ ri Ruuh-Peseŋ a kaaf ka ra. Baap-Koo saam mani ɓëewí ƴah. 24Koope ɗi Ruuh, te ɓëyí na jaamiyoh ri waɗti ñeyaa Ruuhi a kaah. » 25Ɓelaa won ɗi tih : « Mi yúhté biti Buura Koo fal ri ra maanam Kiristaa, ac ayo. Ɗi ac ɗaa, ɗi ay fun teeɓ ɓéeɓ. » 26Yéesú won ɗi tih : « Daa mi, soꞌ fa na won ɗoo na ra. »
27Taalibe yi Yéesú lahuu tígí daaha. Oluu wa Yéesú na won a ɓeleɓ ra, wa éemúté níi éem, ndaa ow di waa na kaañay meel Yéesú yee na saam ɗi ra, a yee tah ɗi na won a ɓelaa ra. 28Tígí daaha, ɓelaa helte peni mulii, nimilte ginin won ɓëewë tih : 29« Ëyí ɗon ot ɓëeꞌ abee wonte soꞌ iña paŋ mi ra ɓéeɓ. Ɗi Buura Koo fal ri ra neh delem a ? » 30Ɓëewë koluute, suute ɗeefri Yéesú.
31Filiɓ fi baaha, taalibe ya gangalu Yéesú ñam wonu tih : « Ɓahaa, túmé yin lowu book ! » 32Ndaa ɗi won wa tih : « Mi lahte ñami ɗon yíih rí. » 33Tígí daaha, wa na meelantuu hanndal ki wa wonu tih : « Ow kompe ri ñam neh a ? » 34Yéesú won wa tih : « Paŋ yee fahaꞌ ɓëeꞌ wol soꞌ ra níi mit sëk, daa ñami soꞌ.
35« Ɗon wonu neh dee a lec tas céyín iniil a ? Soꞌ mi won ɗon tee : ëlí meeyya ! Iña nonte níi seh lec. 36Ɓëeꞌ në lec ɗa ee liil yínlí rë, na négírëꞌ peba na saañ pesa na ɗúméh rë. Hen ɗaaha raa, ɓëeꞌ soh ra a bee lec ɗa bok, lah sos-keeñ. 37Léehë won kaah bitih : “Ɓëeꞌ soh ra bokaay a bee lec ɗa.” 38Mi yeñce ron lec meeyi ɗon mësúy nëe paŋ dara. I ow kay daa légéyú rí, ɗon daa njiriñuu ri. »
39Kolaꞌte bee wonaꞌ wa ɓelaa biti Yéesú wonte ri iña paŋ ri ɓéeɓ rë, i ow caak di ɓëy Samari dékú gini baa ra gémúté Yéesú. 40Te ɗeefruu wa ri ra, wa ɗagute ri ɗi hom waa na daaha ; tígí daaha, ɗi hompe waal ana waa na. 41Iña na won ɗi ra tahte wa ɓaatuutee caak na haalu ngémë. 42Wa wonu ɓelaa tih : « Iña ɓílíɗ fu fun ɗa daa tah fun gém neh doŋ, ndaa biti fun kellirute affi fun ɗi na won, te fun yúhúté biti daa ri Sëmlëhí ëldúnë kaah. »
Koy daga paƴ Yéesú rë
43Filoon fi waalli ana ya hom Yéesú daaha ra, ɗi kolohte saañce Galile. 44Ɗi woniɗte afi bitih : « Yonente heefuu gina dék ɗí rë. » 45Lahaꞌ ri Galile ra, ɓëy gina teeriyuute ri daaha, ndah payuu wa feedi Paaga Yerusalem ra, wa olute iña paŋ ɗi filiɓ feeda ra ɓéeɓ.
46Ɗaaha, Yéesú ñeyaatte Kanaa di Galile, tígë húmú yíssëꞌ rí mulaa béeñ rë. Ɗeef ow di dakki buur dék Kafarnawum, koy ka keente jér. 47Kelaꞌ ri biti Yéesú kolohte Yúdée acce Galile ra, ɗi saañce ɗeefiɗte ri, ɗaŋke ri pay Kafarnawum paƴiɗ ɗi koy kee ke ri na maanndaꞌ húl rë. 48Yéesú won ɗi tih : « Ɗon oluy kimtaan a iñi éemílëꞌté rëe daal, won ti ɗon ii gém múk ë ! » 49Daga won ɗi tih : « Ɓahaa, yípée ac faam balaa koy soꞌ húl. » 50Yéesú won ɗi tih : « Nimile faam, koohu ɓéyíɗté af, yin ii rii kat. » Ɓëeꞌ gémpé yee won ɗi Yéesú rë, kolohte na saañ faam. 51Ɗi hom waali faam fa, súrgë yí téebílúuté rí wonu ri tih : « Ɓahaa, koohu kolohte ! » 52Ɗi meelte wa wahtaa koloh kúkëyë rë, wa wonute ri biti faan kúkëyë woc tama bee wotaꞌ naꞌ ƴutuuɗ leelu af aaꞌ fin ra. 53Boffi kúkëyë yíppée ot biti yaa wahtaa wonaꞌ ri Yéesú biti koohi ɓéyíɗté af ra. Kolaꞌte baaha, ɓani ɓëy faami ɓéeɓ gémúté Yéesú. 54Baa daa kimtaani ana fa paŋ Yéesú kolaꞌ ri Yúdée nimilte Galile ra.
© Wycliffe Bible Translators, Inc. All rights reserved.
