Yoano 1
1
Liji yilialumuka mutu
1Ha Ubutukilo, muze te Zambi kanda achitanga yuma, Liji#1:1 LIJI: liji lize linalumbununa ndundo ja Zambi mana jenyi (tala Mia 33:6, 9; 107:19-20; Yis 8:22-31). Lie liji lialumukine mutu muli Yesu Kristu (1:14). liabwile kulu. Lie Liji liabwile hamwe ni Zambi, ni Liji liabwile Zambi. 2Ha Ubutukilo Liji liabwile kulu hamwe ni Zambi. 3Zambi yatanga yuma yeswe ku ndundo jalio. Katangile nichimwe Chuma shina ni Liji. 4Liji lize liabwile chishina cha mwono,#1:4 liji lize liabwile chishina cha MWONO: yuma yize yatangiwile te yili ni mwono mu kulinunga ni lie Liji. we mwono wapangulwishile atu. 5Pangu liapangukile mu milima,#1:5 milima: akwa ndundo abi. ni milima kuyalikumbile ko.#1:5 kuyalikumbile KO: hanji kuyalinyingikine ko.
6Zambi yatuma kanganda kenyi, jina lienyi te Yoano. 7Mwenawo wejile ngwe chela hanga ashindakenye hakutwala ku Pangu, yeza hanga eswe afuliele pangu mumu ha longeso lienyi. 8Yoano te hi Pangu ko, alioze yashindakenye hakutwala ku pangu. 9Mba yikwiza pangu liamwenemwene hano hashi mu kupangulwisa atu eswe.
10Lie Liji liabwile hano hashi, ni Zambi yatanga hashi ku ndundo jalio, hindu akwa hashi kaalinyingikine ko. 11Yiliza ku chifuchi chalio, alioze atu jalio#1:11 chifuchi chalio… atu JALIO: chifuchi cha Israele ni atu jacho. kaalitambwile ko. 12Alioze akwo yaalitambula, yaalifuliela. Kashika yiliaaha chiyulo cha kubwa ana ja Zambi. 13No kaabwile ko ana ja Zambi nikulita ni chisemewa cha hano hashi, alioze tato Zambi.
14Lie Liji yilialumuka mutu, yatwama mukachi ketu, mukwa utu ni umwenemwene. Yitumona uhenya#1:14 uhenya: Usolwelo wa ndundo ja Zambi ni kubwa chenyi. wenyi unji, uhenya uze mwe Mwana hanatambula kuli Tato. 15Yoano yashindakenya hakutwala kuli iye, yakololoka ngwenyi: “Yono mwe nambile ngwami: ‘Kaneza kunyima liami. Kananguhiana yami, mumu wabwile kulu kulutwe liami shimbu te kanda nguchisemuka.’ ”
16Nikulita ni kulumbama cha utu wenyi, hanatuwahisa ni yiwape yeka ni yeka. 17Zambi hanatwehe Shimbi ku kwoko lia Mose, alioze utu ni umwenemwene hiyineza muli Yesu Kristu. 18Mutu niumwe hanamono Zambi niumwe mwaka, alioze mwe Mwana, yoze uli ngwe chize abwa Zambi, yoze watwama hamwe ni Zambi Tata, mwenawo hanamusolola.
Longeso lia Yoano Chipapachisa
(Tala nawa Mat 3:1-12; Mar 1:1-8; Luk 3:1-18)
19Ayuda a mu Yerusaleme yaatuma mahako a Zambi ni Alevi ni kuhula Yoano ngwo: “Yena iya?” 20Neye kalitunyine ko ha kukumbulula, alioze yatayiza pundu ku meso ja atu ngwenyi: “Yami hi nguli ko Chilamwina yoze Zambi alakenyene.” 21Yaamuhula nawa ngwo: “Mba yena iya? Eliya, nyi?” Yoano ngwenyi: “Ka kwami.” Ayo ngwo: “Yena mwe mukwa munanyi wa Zambi, nyi?” Neye yaakumbulula ngwenyi: “Ka.” 22Kashika yaamuhula ngwo: “Yena iya mba? Hanga tukambulwile waze anakatutuma. Yena mwene, kuchi wakulivuluka?” 23Yoano ngwenyi:
“Yami nguli ‘mutambi wa mutu yoze wakukololoka mu puya, ngwami:
Lulikenu jila ya Mwene!’ ”
(Ngwe chize ambile Izaya, mukwa munanyi wa Zambi.)
24Atu waze atumiwine kuli Afariseu,#1:24 afariseu: yimwe mbunga ya Ayuda waze asele tachi kufunga Shimbi ja Mose ni shimbi jikwo jize Ayuda te haanawezela ku Shimbi jize. 25yaamuhula ngwo: “Nyi hi uli ko Chilamwina yoze Zambi alakenyene, chibwe Eliya, chibwe mwe mukwa munanyi wa Zambi, kuchi mba wakupapachisa atu?” 26Yoano ngwenyi: “Yami ngunapapachisa ni meya, alioze umuwika uli mukachi kenu yoze kunwanyingikine. 27Kaneza kunyima liami, alioze yami chatelele nichimwe kujitula sapato jenyi.”
28Yino yeswe yabwile ku chihunda cha Betania#1:28 betania: hi chihunda chize chili hehi ni Yerusaleme ko (11:18). musali lia lwiji Yordau, kuze te Yoano akupapachishila atu.
Yesu Mwana Panga wa Zambi
29Muze hikwacha, Yoano yamona Yesu kaneza kuli iye. Yamba ngwenyi: “Talenu mwe Mwana Panga wa Zambi yoze unachiza shili ya akwa hashi. 30Yono mwe nambile ngwami, mutu uneza kunyima liami, alioze kananguhiana yami, mumu wabwile kulu kulutwe liami shimbu kanda nguchisemuka. 31Yami te chamunyingikine, alioze nejile ni kupapachisa ni meya hanga ngumunyingikise kuli Aisraele.”
32Yoano yashindakenya nawa ngwenyi: “Namwene Mwiku wa Linanga nikuhulumuka ngwe liembe ni kutwama hali iye. 33Hatangu te chamunyingikine, alioze Zambi, yoze wangutumine kupapachisa ni meya, yangwamba ngwenyi: ‘Muumona Mwiku wa Linanga nikuhulumuka ni kutwama hali umwe mutu. Mwenawo makapapachisa atu ni Mwiku wa Linanga.’ ” 34Yoano ngwenyi: “Nachimwene, ni ngunashindakenya ngwami, kali mwe Mwana Zambi.”
Tumbaji atangu a Yesu
35Muze hikwacha, Yoano te kanamana nawa kuzekwene hamwe ni aali a kuli tumbaji twenyi. 36Yamona Yesu kanabalika, yamba ngwenyi: “Talenu mwe Mwana Panga wa Zambi!” 37Tumbaji aali a Yoano waze evwile liji lienyi, yaabutuka kukaula Yesu. 38Yesu yatewuluka, yaamona kaanamukaula, yaahula ngwenyi: “Yika nunafupu?” No yaakumbulula ngwo: “Kulihi watwama, Rabi?” (Liji lino linalumbunuka ngwo: “Longeshi.”) 39Yesu yaakumbulula ngwenyi: “Tweyenu nutale.” No yaaya, kashika yaamona kuze te atwama, yaabwa ko hamwe nenyi tangwa lize. (Yikubwa ngwe ola ya muchiwana ya chingoloshi.)
40Umuwika wa kuli tumbaji waze aali te Andre, mwanakwo wa Simone Petulu. 41Andre yawana hatangu yayo Simone, yamwamba ngwenyi: “Hitwamona Mesiya.” (Hanji Kristu, kulumbunuka ngwo, Chilamwina yoze Zambi alakenyene.) 42Mba yatwala Simone kuli Yesu. Yesu yamutala, yamwamba ngwenyi: “Yena uli Simone, mwana wa Yoano. Atu maakakuvuluka ngwo: Sefase.#1:42 sefase: mu liji lia Arame, Sefase; mu liji lia Agresia, Petulu. Alongeshi ja Mukanda wa Zambi kaakunyonga ngwo, Yesu walongesele mu liji lia arame; Yoano wasonekene mu liji lia greke.” (Hanji Petulu, kulumbunuka ngwo, Liwe.)
Yesu yatambika Filipe ni Natanele
43Muze hikwacha, Yesu yanyonga kuya ku chifuchi cha Galilea, yatakana ni Filipe, yamwamba ngwenyi: “Ngu kaule!” 44(Filipe te wa ku Betsaida,#1:44 Betsaida: ku mbumbulu ya chitende cha Galilea ku norde ku chivumbuko. lie limbo lia Andre ni Petulu.) 45Mba Filipe yawana Natanele, yamwamba ngwenyi: “Hitwamona mutu yoze asonekene Mose mu mukanda wa Shimbi, ni akwa munanyi ja Zambi mu mikanda yo ngwo, makeza. Kali Yesu, mwana wa Josefe wa ku Nazare.#1:45 NAZARE: limwe limbo kilometro 26 ku chitokelo cha songo lia ku sude ya chitende cha Galilea.” 46Natanele yamuhula ngwenyi: “Chuma chibema muchihasa kukatuka ku Nazare, nyi?” Filipe ngwenyi: “Tweya utale.”
47Muze te Yesu anamono Natanele himamukundama, yamba hakutwala kuli iye ngwenyi: “Talenu Kaisraele wamwenemwene, keshi kalimbalimba!” 48Natanele yamuhula ngwenyi: “Ngwe kuchi unangunyingika?” Yesu ngwenyi: “Nakumonanga muze wabwanga mushi lia mutondo mukuyu, shimbu te Filipe kanda achikutambika.” 49Mba Natanele yamwamba ngwenyi: “Longeshi, mwe Mwana Zambi yena! Mwe Mwanangana wa Israele!” 50Yesu yamuhula ngwenyi: “Unafuliela mumu hinakwamba ngwami, nakumonanga mushi lia mukuyu, nyi? Muukamona yuma yinene yahiana yino!” 51Yesu yawezaho ngwenyi: “Ngunanwambulwila ngwami, chamwenemwene, munukamona lilu linazuluka ni tunganda a Zambi kaanazezuka ni kuhulumuka hali Mwana Mutu#1:51 mwana mutu: jina lilemu, Ha Yesu wika mu Usendo Waha.!”
נבחרו כעת:
Yoano 1: CHK1970
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
