Ubutukilo 7
7
Zambi yatuma sanga lia meya hashi
1Mwene Zambi yambila Noa ngwenyi: “Yena ni akwa zuwo lie, yenu eswe nunjile mu ulungu, mumu hinamona ngwami, hashi heswe shina yena lume mwe mukwa ululi. 2Tushitu waze atela kulia ni kungulambula yami Mwene Zambi, wanda aali aali yisuho shimbiali, kuji ni chihwo. Alioze waze hi abema ko ni kulia wanda shina aali aali, kuji ni chihwo. 3Wanda nawa tujila a milali yeswe aali aali, yisuho shimbiali, kuji ni chihwo. Ulinga kanawa ha kufunga mwono wa tushitu ni tujila a milali yeswe hanga akoke hashi heswe. 4Kwasala matangwa shimbiali, mba mungunokesa vula hashi. Muyikanoka matangwa makumi awana ha kwonona eswe waze akwete mwono, waze natangile.” 5Mba Noa yalinga yeswe yize amwambile Mwene Zambi.
6Noa te habwa ni miaka 600 muze sanga lia meya liejile hashi. 7Chenacho Noa anjilile mu ulungu, ni pwo lienyi, ni ana jenyi a malunga ni mapwo jo, ha kuchina sanga lia meya. 8Tushitu ni tujila a milali yeswe anatela kulambula kuli Zambi ni kulia, ni waze hi abema ko ni kulia, anene anene ni akepe akepe, kuji ni chihwo, 9ayo eswe yaanjila mu ulungu hamwe ni Noa, ngwe chize amulwezele kuli Zambi. 10Ha kuhwa cha matangwa shimbiali sanga lia meya yiliza hashi.
11Muze te Noa habwa ni miaka 600, ha tangwa kumi ni lia muchishimbiali lia kakweji wa muchaali#7:11 KAKWEJI WA MUCHAALI Zive, wa Aisraele; Kuuvwa wa Tuchokwe., ha tangwa lizeliene mafuji eswe a njondo yabakuka, ni mwilu yimwazuluka, yikunoka vula munji. 12Vula yanoka hashi matangwa makumi awana. 13Ha tangwa lizeliene Noa, ni pwo lienyi, ni ana jenyi atatu, Sheme ni Hame ni Jafete, ni mapwo jo yaanjila mu ulungu. 14Mba milali yeswe ya tushitu a ha chihunda ni a mu yambu, anene anene ni akepe akepe, ni milali yeswe ya tujila, 15kuji ni chihwo, yaanjila mu ulungu hamwe ni Noa, 16ngwe chize amulwezele kuli Zambi. Mba Mwene Zambi yajila ulungu.
17Vula munji yanoka hashi matangwa makumi awana, hashi yihabwa meya anji, mba ulungu yiuzunduka. 18Meya yooka, mba ulungu yiubutuka kwendangana ha meya. 19Meya yooka ndoo milundu yisuku yeswe yiijimuka. 20Meya yooka kuhiana helu lia milundu ha kwalula metro shimbiali. 21-22Eswe waze te akwete mwono hano hashi: tujila, ni yimuna, ni tushitu a mu yambu, ni atu, ayo eswe yaafwa. 23Mwene Zambi yashiha eswe waze te akwete mwono hashi: atu ni tushitu, ni tujila; yikusala shina Noa ni ana jenyi ni tushitu waze abwile no mu ulungu. 24Sanga lia meya yilibwa hashi matangwa 150.
נבחרו כעת:
Ubutukilo 7: CHK1970
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.