Ubutukilo 5
5
Vungu lia Samutu
(Tala nawa 1 San 1:1-4)
1Wano e majina ja vungu lia Samutu#5:1 SAMUTU tala 3:20. . (Muze Zambi atangile atu, yaatanga ni kulifwa nenyi. 2Yaatanga lunga ni pwo, yaawahisa, yaaluka ngwenyi, Atu.) 3Muze Samutu habwa ni miaka 130, yasema mwana wa lunga yoze te alifwa nenyi, yamuluka ngwenyi, Sete. 4Samutu yatwama miaka yikwo 800, yasema nawa ana a malunga ni a mapwo. 5Mba muze habwa ni miaka 930 yafwa kwenyi.
6Muze Sete habwa ni miaka 105 yasema mwana wa lunga, Enoshe. 7Sete yatwama miaka yikwo 807, yasema nawa ana a malunga ni a mapwo. 8Mba muze habwa ni miaka 912, yafwa kwenyi.
9Muze Enoshe habwa ni miaka 90, yasema mwana wa lunga Kenane. 10Enoshe yatwama miaka yikwo 815, yasema nawa ana a malunga ni a mapwo. 11Mba muze habwa ni miaka 905, yafwa kwenyi.
12Muze Kenane habwa ni miaka 70, yasema mwana wa lunga, Mahalale. 13Kenane yatwama miaka yikwo 840, yasema nawa ana a malunga ni a mapwo. 14Mba muze habwa ni miaka 910, yafwa kwenyi.
15Mba muze Mahalale habwa ni miaka 65, yasema mwana wa lunga, Jarede. 16Mahalale yatwama miaka yikwo 830, yasema nawa ana a malunga ni a mapwo. 17Mba muze habwa ni miaka 895, yafwa kwenyi.
18Muze Jarede habwa ni miaka 162, yasema mwana wa lunga, Enoke. 19Jarede yatwama miaka yikwo 800, yasema nawa ana a malunga ni a mapwo. 20Mba muze habwa ni miaka 962, yafwa kwenyi.
21Muze Enoke habwa ni miaka 65, yasema mwana wa lunga Matusela. 22Enoke te kakuliendela ni Zambi. Yatwama ni mwono miaka yikwo 300, yasema nawa ana a malunga ni a mapwo, 23ndoo ni muze abwile ni miaka 365. 24Enoke, ha matangwa eswe a mwono wenyi te kakulivwa ni Zambi. Mba limwe tangwa Zambi yamuchiza hashi, atu hikaamumwene ko nawa.
25Muze Matusela habwa ni miaka 187, yasema mwana wa lunga, Lameke. 26Matusela yatwama ni mwono miaka yikwo 782, yasema nawa ana a malunga ni a mapwo. 27Mba muze habwa ni miaka 969, yafwa kwenyi.
28Muze Lameke habwa ni miaka 182, yasema mwana wa lunga. 29Yamba ngwenyi: “Mwana yono makatuchiza lamba ku milimo yize twakuhondangana hano hashi haze ashingile Mwene Zambi.” Kashika yamuluka jina ngwenyi, Noa#5:29 NOA ha kulivuluka mu hebreu linalifu ni “hachiza lamba”.. 30Lameke yatwama miaka yikwo 595, yasema nawa ana a malunga ni a mapwo. 31Mba muze habwa ni miaka 777, yafwa kwenyi.
32Muze te Noa habwa ni miaka 500, yasema ana atatu: Sheme, ni Hame, ni Jafete.
Kuvulumuna cha atu
נבחרו כעת:
Ubutukilo 5: CHK1970
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.