လံာ်ယိၤဟၣ် 16
16
1ယစံးဘၣ်တဲဘၣ်တ့ၢ်သုတၢ်ခဲလၢာ်အံၤ, ဒ်သိးသုသုတညိကွံာ်သုတၢ်စူၢ်တၢ်နာ်တဂ့ၤအဂီၢ်န့ၣ်လီၤ. 2သုကဘၣ်တၢ်ဟီထီၣ်ကွံာ်သုလၢဘူၣ်ဘျီၣ်လၢအမ့ၢ် တၢ်ဘါလီၢ်တဖၣ်အပူၤ, ဒီးတၢ်ဆၢကတီၢ်ကတုၤဝဲဖဲ ပှၤတဂၤလၢ်လၢ်လၢအမၤသံသုန့ၣ်, ကဆိကမိၣ်ဝဲလၢအမၤတၢ်ဒ်အံၤအဃိဒီး မ့ၢ်အမၤကစၢ်ယွၤအတၢ်မၤန့ၣ်လီၤ. 3ပှၤကမၤသုဒ်သိးအံၤမ့ၢ်လၢအဝဲသ့ၣ်တသ့ၣ်ညါတ့ၢ်ပၢ်မ့ၢ်ဂ့ၤ, ယၤမ့ၢ်ဂ့ၤအဃိန့ၣ်လီၤ. 4ဘၣ်ဆၣ်ယစံးဘၣ်တဲဘၣ်သုတၢ်တဖၣ်အံၤ, ဒ်သိးဖဲတၢ်ဆၢကတီၢ်တုၤဝဲလၢအဝဲသ့ၣ်မၤတၢ်သ့ၣ်တဖၣ် အံၤဒီး, သုကသ့ၣ်နီၣ်ထီၣ်က့ၤတၢ်လၢယစံးဘၣ်တ့ၢ်သု အဂီၢ်န့ၣ်လီၤ.
သးစီဆှံအတၢ်မၤ
လၢအခီၣ်ထံးန့ၣ်မ့ၢ်လၢယအိၣ်ဒံးဒီးသုအဃိ, ယတစံးဘၣ်တဲဘၣ်တ့ၢ်သုတၢ်သ့ၣ်တဖၣ်အံၤဘၣ်. 5ဘၣ်ဆၣ်ဒီးခဲအံၤယကလဲၤဆူပှၤလၢအမၢလီၤတ့ၢ်ယၤတဂၤ အအိၣ်လီၤ. သနာ်က့သုတသံကွၢ်ယၤလၢမ့ၢ်ယကလဲၤဆူလဲၣ်, နီတဂၤဒံးဘၣ်. 6ခဲအံၤမ့ၢ်လၢယစံးဘၣ်တဲဘၣ်လံသုတၢ်သ့ၣ်တဖၣ်အံၤအဃိ, သုသးပူၤပှဲၤဒီးတၢ်သူၣ်အုးသးအုးန့ၣ်လီၤ. 7နာ်သက့ယစံးဘၣ်တဲဘၣ်သုတၢ်မ့ၢ်တၢ်တီ, ယလဲၤတၢ်အဝဲအံၤန့ၣ်မ့ၢ်တၢ်ဂ့ၤဒၣ်တၢ်တက့ၢ်လၢသုဂီၢ်န့ၣ်လီၤ. အဂ့ၢ်ဒ်အံၤ, ယမ့ၢ်တလဲၤဘၣ်ဒီးပှၤမၤစၢၤတၢ်တဂၤတဟဲ ဆူသုအိၣ်ဘၣ်. ဘၣ်ဆၣ်ယမ့ၢ်လဲၤဒီး, ယကမၢလီၤအီၤဆူ သုအိၣ်န့ၣ်လီၤ. 8ဒီးတုၤအဟဲဝဲဒီး, အဝဲကဒုးနဲၣ်ဖျါထီၣ်န့ၢ်ပှၤဟီၣ်ခိၣ်ဖိတဖၣ် လၢအဝဲသ့ၣ်အတၢ်ဆိကမိၣ်ကမၣ်တၢ်ဘၣ်ဃးတၢ်ဒဲးဘး အဂ့ၢ်, တၢ်လၢအမ့ၢ်အတီအဂ့ၢ်, ဒီးကစၢ်ယွၤအတၢ်စံၣ်ညီၣ် အဂ့ၢ်တဖၣ်န့ၣ်လီၤ. 9လၢတၢ်ဒဲးဘးအဂ့ၢ်, မ့ၢ်လၢအဝဲသ့ၣ်တစူၢ်က့ၤနာ်က့ၤယၤ အဃိလီၤ. 10လၢတၢ်အမ့ၢ်အတီအဂ့ၢ်, မ့ၢ်လၢယလဲၤဆူပၢ်အအိၣ်ဒီး သုတထံၣ်ဘၣ်လၢၤယၤဘၣ်အဃိန့ၣ်လီၤ. 11လၢကစၢ်ယွၤအတၢ်စံၣ်ညီၣ်အဂ့ၢ်, မ့ၢ်လၢပှၤလၢအပၢဟီၣ်ခိၣ် အံၤဘၣ်တၢ်စံၣ်ညီၣ်တ့ၢ်လံအီၤအဃိန့ၣ်လီၤ.
12ယအိၣ်ဒံးဒီးတၢ်ဂ့ၢ်အါမးလၢယကစံးဘၣ်တဲဘၣ်သု, ဘၣ်ဆၣ်ဒီးခဲအံၤကမ့ၢ်တၢ်အါကဲၣ်ဆိးလၢသုကတူၢ်လိာ်အီၤ အဂီၢ်န့ၣ်လီၤ. 13မ့မ့ၢ်, ဖဲယွၤအသးလၢအလီၣ်ဖျါထီၣ်တၢ်မ့ၢ်တၢ်တီ ဘၣ်ဃးဒီးကစၢ်ယွၤန့ၣ်ဟဲဝဲဒီး, အဝဲကဒုးထံၣ်သ့ၣ်ညါသုလၢတၢ်မ့ၢ်တၢ်တီခဲလၢာ်န့ၣ်လီၤ. အဝဲတကတိၤတၢ်ဖဲအသးဒၣ်ဝဲဘၣ်. မ့မ့ၢ် အဝဲကစံးဘၣ်တဲဘၣ်သုတၢ်လၢအဝဲနၢ်ဟူဝဲဒီး ကစံးဘၣ်တဲဘၣ်သုတၢ်လၢအကမၤအသးတဖၣ်န့ၣ်လီၤ. 14အဝဲကဟ့ၣ်ယၤတၢ်လၤကပီၤ, မ့ၢ်လၢအဝဲကဟံးန့ၢ်တၢ်လၢယအိၣ် ဒီးကစံးဘၣ်တဲဘၣ်သုအဃိန့ၣ်လီၤ. 15တၢ်လၢအအိၣ်ဒီးပၢ်ခဲလၢာ်န့ၣ်, မ့ၢ်ယတၢ်လီၤ. လၢတၢ်န့ၣ်အဃိ, ယစံးတ့ၢ်လၢယွၤအသးကဟံးန့ၢ်တၢ်လၢယဟ့ၣ်လီၤအီၤ ဒီးစံးဘၣ်တဲဘၣ်သုန့ၣ်လီၤ.
တၢ်သူၣ်အုးသးအုးဒီး တၢ်သူၣ်ခုသးခု
16တစိၢ်ဖိဒီး, သုတထံၣ်ဘၣ်လၢၤယၤဘၣ်. ဒီးမၤကဒီးလၢခံတစိၢ်ဖိဒီး သုကထံၣ်ဘၣ်ယၤလီၤ.”
17အပျဲၢ်အဘီၣ်တနီၤသံကွၢ်လိာ်အသး, “တၢ်အံၤအခီပညီမ့ၢ်မနုၤလဲၣ်.” အဝဲစံးဘၣ်တဲဘၣ်ပှၤလၢတစိၢ် ဖိဒီးပတထံၣ်ဘၣ်လၢၤအီၤဘၣ်. ဒီးမၤကဒီးလၢခံတစိၢ်ဖိဒီးပကထံၣ် ဘၣ်အီၤလီၤ. ဒီးအဝဲစံးစ့ၢ်ကီးဝဲ, ‘အဂ့ၢ်ဒ်အံၤမ့ၢ်လၢယလဲၤဆူပၢ်အအိၣ်အဃိန့ၣ်လီၤ.’ 18တၢ်ကတိၤ ‘တစိၢ်ဖိ’ စံးတၢ်အံၤအခီပညီမ့ၢ်တၢ်မနုၤလဲၣ်. အဝဲအဲၣ်ဒိးစံးတၢ်မနုၤလဲၣ်န့ၣ်ပတသ့ၣ်ညါဘၣ်.”
19ယ့ၣ်ၡူးသ့ၣ်ညါဝဲလၢအဝဲသ့ၣ်သးအိၣ်သံကွၢ်အီၤတၢ်အံၤ သတးဒီးအဝဲဒၣ်စံးဘၣ်တဲဘၣ်အဝဲသ့ၣ်, “မ့ၢ်သုသံကွၢ်လိာ်သုသးဘၣ်ဃးတၢ်လၢယစံးတ့ၢ်, ‘တစိၢ်ဖိဒီးသုတထံၣ်ဘၣ်လၢၤယၤဘၣ်. မၤကဒီးလၢခံတစိၢ်ဖိဒီးသုကထံၣ်ဘၣ်ယၤလီၤ’ အဂ့ၢ်န့ၣ်ဧါ. 20ယစံးဘၣ်တဲဘၣ်သုတၢ်မ့ၢ်တၢ်တီ, သုကဟီၣ်သုကယၢၤဘၣ်ဆၣ်ဒီး ဟီၣ်ခိၣ်ကသးခုလီၤ. သုကသူၣ်အုးသးအုးဘၣ်ဆၣ်ဒီး သုတၢ်သူၣ်အုးသးအုးန့ၣ်, ကကဲထီၣ်ကဒါက့ၤလၢ တၢ်သူၣ်ခုသးခု န့ၣ်လီၤ. 21ဖဲပိာ်မုၣ်တဂၤကဆံးစၢ်အဖိန့ၣ်, အဝဲသူၣ်အုးသးအုးဝဲမ့ၢ်လၢ အနၣ်ရံၣ်လၢကဘၣ်တူၢ်တၢ်ဆူးတၢ်ဆါတုၤဃီၤဝဲလံအဃိ လီၤ. ဘၣ်ဆၣ်ဒီးတုၤဖိသၣ်အိၣ်ဖျဲၣ်ထီၣ်ဝဲဒီး, အဝဲသးပ့ၤနီၣ်ကွံာ်အတၢ်ဆူးတၢ်ဆါခဲလၢာ်မ့ၢ်လၢအဝဲသးခုဝဲလၢ ဖိသၣ်တဂၤအိၣ်ဖျဲၣ်ထီၣ်လံဝဲလၢဟီၣ်ခိၣ်ချၢအံၤအဃိန့ၣ်လီၤ. 22သုတၢ်လဲၤခီဖျိမ့ၢ်တၢ်ဒ်သိးအံၤစ့ၢ်ကီးန့ၣ်လီၤ. အခဲအံၤသုသူၣ် အုးသးအုး, ဘၣ်ဆၣ်ယကထံၣ်ကဒီးသု, ဒီးသုသးတဖၣ်ကပှဲၤဒီးတၢ်သူၣ်ခုသးခု, တၢ်သူၣ်ခုသးခု တကလုာ်လၢပှၤဟံးထီၣ်ကွံာ်လၢသုအိၣ်တသ့နီတဂၤဘၣ် န့ၣ်လီၤ.
23တုၤမုၢ်နံၤအဝဲန့ၣ်ဟဲတုၤဒီး, သုတသံကွၢ်ယၤလၢတၢ်နီတမံၤ လၢၤဘၣ်. ယစံးဘၣ်တဲဘၣ်သုတၢ်မ့ၢ်တၢ်တီ, ပၢ်ကဟ့ၣ်လီၤသုတၢ်တမံၤဂ့ၤတမံၤဂ့ၤလၢသုဃ့အီၤလၢ ယမံၤန့ၣ်လီၤ. 24တုၤအခဲအံၤန့ၣ်, သုတဃ့တၢ်နီတမံၤလၢယမံၤဒံးဘၣ်. ဃ့တၢ်တက့ၢ်. ဒီးသုကန့ၢ်ဘၣ်တၢ်, ဒ်သိးသုတၢ်သူၣ်ခုသးခုကလၢထီၣ်ပှဲၤထီၣ်ဝဲအဂီၢ်န့ၣ်လီၤ.
တၢ်မၤနၢၤဟီၣ်ခိၣ်
25ယစံးဘၣ်တဲဘၣ်သုတၢ်သ့ၣ်တဖၣ်အံၤလၢတၢ်ကတိၤ အဒိန့ၣ်လီၤ. ဘၣ်ဆၣ်ဒီးတၢ်ဆၢကတီၢ်ကတုၤဝဲဖဲ ယတသူလၢၤတၢ်ကတိၤအဒိဘၣ်. မ့မ့ၢ်ယကကတိၤတၢ်ဒီး သုဖျါဖျါဘၣ်ဃးဒီးပၢ်အဂ့ၢ်န့ၣ်လီၤ. 26ဖဲမုၢ်နံၤအဝဲန့ၣ်တုၤဃီၤဝဲဒီး, သုကဃ့တၢ်လၢယမံၤ, ဒီးယတစံးဘၣ်တဲဘၣ်သုလၢယကဃ့န့ၢ်တၢ်လၢ သုဂီၢ်လၢပၢ်န့ၣ်ဘၣ်. 27အဂ့ၢ်ဒ်လဲၣ်န့ၣ်, ပၢ်အကစၢ်ဒၣ်ဝဲအဲၣ်သုလီၤ. အဝဲဒၣ်အဲၣ် သုမ့ၢ်လၢသုအဲၣ်ယၤဒီးနာ်တ့ၢ်လၢယဟဲလၢပၢ်ကစၢ်ယွၤ အအိၣ်အဃိန့ၣ်လီၤ. 28ယဟဲတ့ၢ်လၢပၢ်အအိၣ်, ဒီးယဟဲနုာ်လီၤဆူဟီၣ်ခိၣ်ချၢအံၤ လီၤ. ဒီးခဲအံၤယကဟးထီၣ်ကွံာ်လၢဟီၣ်ခိၣ်အံၤဒီးလဲၤ ဆူပၢ်အအိၣ်န့ၣ်လီၤ.”
29ထဲန့ၣ်ဒီး, အပျဲၢ်အဘီၣ်တဖၣ်စံးဘၣ်အီၤ, “ခဲအံၤနကတိၤလံ တၢ်ဖျါဖျါ, ဒီးတသူတၢ်ကတိၤအဒိတဖၣ်န့ၣ်ဘၣ်. 30ခဲကနံၣ်အံၤ, ပသ့ၣ်ညါလၢနသ့ၣ်ညါတၢ်ခဲလၢာ် ဒီးပှၤကသံကွၢ်နၤတၢ်သံကွၢ်တဖၣ်အလီၢ်တအိၣ်လၢၤနီ တဂၤဘၣ်န့ၣ်လီၤ. တၢ်အဝဲအံၤဒုးနာ်ပှၤလၢနဟဲလၢပၢ် အအိၣ်န့ၣ်လီၤ.”
31ယ့ၣ်ၡူးစံးဆၢအဝဲသ့ၣ်, “အခဲအံၤသုနာ်တၢ်လံဧါ.
32တၢ်ဆၢကတီၢ်ဟဲဝဲဒီးဟဲတုၤလံ, ဖဲသုဝဲခဲလၢာ်သုကလီၤပြံလီၤပြါတဂၤဆူအဟံၣ်ဒၣ်ဝဲ, ဒီးယကဘၣ်တၢ်ပာ်တီၢ်ယၤထဲတဂၤဧိၤန့ၣ်လီၤ. ဘၣ်ဆၣ်ဒီးနီၢ်နီၢ်န့ၣ်ယတအိၣ်ထဲတဂၤဧိၤဘၣ်. အဂ့ၢ်မ့ၢ်လၢပၢ်အိၣ်ဒီးယၤအဃိလီၤ. 33ယစံးဘၣ်တ့ၢ်သုတၢ်အံၤဒ်သိးသုကအိၣ်ဒီးတၢ်ဃူတၢ်ဖိးလၢ ယပူၤအဂီၢ်လီၤ. ဟီၣ်ခိၣ်ကမၤနးမၤဖှီၣ်သုလီၤ. ဘၣ်ဆၣ်ဒီး, ပာ်သုသးဒူဒူတက့ၢ်. ယမၤနၢၤလံဟီၣ်ခိၣ်လံ.
נבחרו כעת:
လံာ်ယိၤဟၣ် 16: KSWC
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Sgaw Karen Common Bible © Bible Society of Myanmar, 1992.
