Ubwandilo 11
11
Ikisōnge kya mụ Babelị
1Ikị̄su kyosa kyali ni njobelo jimojēne na masyu gamogēne. 2Bo abāndu bịkwenda kulubafụ lwa kubusōkelo ilịsuba balinkugwaga untebēla nkị̄su kya Sịnala balinkwenda nu kujēnga mụmo. 3Balinkujobesanịa balinkuti: Oko, tubūmbe amapāmba tukosye gapye fị̄jo. Po papo balinkuja na mapāmba mbujo bwa mabwe, kangi ni lāmị mbujo bwa kujēngela iswakala. 4Balinkuti: Oko tujēnge akāja akakulūmba nikisōnge kyake kikafịkege kumwanya kyo kijege kya kutufụmụsya īngamụ syitu, kangi kyo kijege kya kutupịnyānịa pamopēne ukuti pakị̄su kyosa ikya pāsi tungịsakubalanịlaga.
5Po papo Umwene UNTWA alinkusụlụka pāsi ukuti akakēte akāja akakulūmba kala ni kisōnge, ifị abāndu bankị̄su bājēngịle. 6Umwene alinkuti: Kēta abāndu aba bali kikolo kimo, kangi bali njobelo jimo, po lelo apa bāndịle ukubōmba isị, kūnyụma katịsakujako akakubagomola isị linga batụmwịle ukubōmba. 7Oko, tusụlụke pakị̄su tukajiloganịe injobelo jābo ko kuti bangapilikisanịaga, 8buno buno ukufụma nkabalilo kalakala UNTWA alinkubabalanịa pakị̄su kya pāsi; balinkuleka nukujēnga akāja akakulūmba kala. 9Jo nōngwa iji akāja akakulūmba kala kapēgị̄gwe īngamụ ja Babelị; namanga pala pala po apa UNTWA ālyandịle ukujiloganịa injobelo ja kị̄su kyosa; kangi nkāja kalakala momụno UNTWA ālyandịle ukubabalanịa abāndu pakị̄su kyosa.
Abāndu abā nkikolo kya Syemụ
10Aba bo bāndu ba nndujụ̄ngụ lwa Syemụ. Bo Syemụ ali nifyinja imịa jimo (100), alinkumpāpa Alipakisatị, bo fịkīndịle ifyinja fịbili ukufụma pa mwēlēsyo. 11Umwene Syemụ alinkugona ifyinja bāmịa bahāno (500), bo ampāpịle Alipakisatị; āpāpịle na bāna abāngi abanyambala na bakị̄kulu.
12Bo Alipakisatị āgonịle ifyinja amalōngo matatu ni fyinja fịhāno (35), alinkumpāpa Syela. 13Umwene Alipakisatị alinkugona ifyinja bamịa bana nifyinja fịtatu (403) bo ampāpịle Syela; āli nabo na bāna abāngi abanyambala na bakị̄kulu.
14Bo Syela agonịle ifyinja amalōngo matatu (30) alinkumpāpa Ebelị. 15Ukufụma nkupāpịgwa kwa Ebelị, Syela alinkugona ifyinja bāmịa bana ni fyinja fịtatu (403); āpāpịle abāna abāngi abanyambala na bakị̄kulu.
16Bo Ebelị agonịle ifyinja amalōngo matatu nifyinja fịna (34), alinkumpāpa Pelegị. 17Kūnyụma kuli sịsịsị Ebelị alinkugona ifyinja bāmịa bana, nifyinja amalōngo matatu, (430); āpāpịle abāna abāngi abanyambala na na bakị̄kulu.
18Bo Pelegị agonịle ifyinja amalōngo matatu (30), alinkumpāpa Leu. 19Umwene Pelegị alinkugona ifyinja bāmịa babili ni fyinja fịhāno na fịna (209), bo ampāpịle Leu; āli nabo abāna abāngi abanyambala na bakị̄kulu.
20Bo Leu agonịle ifyinja amalōngo matatu nifyinja fịbili (32), alinkumpāpa Selugi. 21Umwene Leu alinkugona ifyinja bamịa babili nifyinja fịhāno na fịbili (207), ukufụma nkumpāpa Selugi; kangi āli na bāna abāngi abanyambala na bakị̄kulu.
22Bo Selugi agonịle ifyinja amalōngo matatu (30), alinkumpāpa Naholị. 23Umwene Selugi alinkugona ifyinja bāmịa babili (200) ukufụma nkupāpịgwa Naholị: āli nabo abāna abāngi abanyambala na bakị̄kulu.
24Bo Naholị āgonịle ifyinja amalōngo mabili nifyinja fịhāno na fịna (29) alinkumpāpa Tela. 25Umwene Naholị alinkugona ifyinja imịa jimo nifyinja kalōngo na fịhāno na fịna (119), bo ampāpịle Tela; āli nabo abāna abāngi abanyambala na bakị̄kulu.
26Bo Tela agonịle ifyinja amalōngo mahāno na mabili (70) alinkumpāpa Abụlamụ Naholị na Halanị.
Abāndu abankikolo kya Tela
27Aba bo banndujụ̄ngụ lwa Tela. Umwene Tela alinkumpāpa Abụlamụ, Naholị na Halanị. Halanị jo alinkumpāpa Lotị. 28Umwene Halanị jo alinkufwila nkị̄su iki āpāpilị̄gwemo, bo nu gwịse Tela akāli nu kufwa nkāja akakulūmba aka Ulu, nkị̄su kya ba Kalịtaị. 29Abụlamụ na Naholị balinkwega abakị̄kulu; unkasị gwa Abụlamụ āli jo Salai ingamụ, umwene unkasị gwa Naholị āli jo Mịlịka umwana gwa Halanị umpāpa Mịlịka na Ịsịka. 30Salai akāli nu mwana najumo pāpo āli nngūmba.
31Po papo Tela alinkummwega umwanạke Abụlamụ kangi nu mwịsukulu Lotị; umwana gwa Halanị, pamopēne na Salaị unkamwana, unkasị gwa Abụlamụ, alinkusụmụka nabo bōsa ukufụma nkāja akakulūmba ka Ulu nkị̄su kya ba Kalịtai, alinkubūka nabo kukị̄su kya Kanānị; balinkwakufịka mụ Halanị mo balinkwakujēnga. 32Po papo Tela alinkufwila mụla mụla nkị̄su kya Halanị, bo ali nifyinja bāmịa babili ni fyinja fịhāno (205).
נבחרו כעת:
Ubwandilo 11: NYB96
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Nyakyusa Bible © Bible Society of Tanzania, 1996.