JON 1
1
Swwg Agamv
1Kol gvda gvtam pwma daai yikho Agamv doonum; Agamv Pwnbov lvgab doonum, hoo Agamv Pwnbov. 2Kol galoqkv Agamv Pwnbog lvgab doonum. 3Hog mwlwngam Pwnbog Agamv pwnum. Pwnam hoqgv mwwg pwmanam akam dooma. 4Ho hoq agamv swwgam mwv atv doogsunum, soq swwg si nyia koam huto kaakinum. 5Hutongv kan uraho huul hvraqb doonum, hutongam kanv pulub nyomab dooknum.
6Pwnbov kanamnam nyi ak Jon nvk hvl haanum. 7Mwv nyi tulungam hutog puiyam bekin taab haanum. Mwv hutog pagoqkam bekin taab, hoggab nyi tulungv mwwg puiyam mwlwngv tatwl mwwjw mvdwb mwwnum. 8Mwv atv hutongv maasu, hvbmabde mwv hutog puiyam bekin taab haanum. 9Nyi mwlwngam huto jinbov hutongv gvda gvtwb hoodul doonum, hoq hutohv jvqtw hutongv.
10Agamv gvda gvtsi doonum Pwnbov gvda gvtam mwwg Agamv pwnum, hvbsujaqkam gvda gvtv mwam kaacin kamanum. 11Mwv mwwg atwg gvdab haanum, hvbmabde mwwg nyi tulungv mwam svgagvrwq maanum. 12Hvbmabde hiyv nyiv mwam svgagvrwql mwwjwbo nyi tulungam Pwnbog koob nyil swwm dvb mwv bibwql ator jipa kun. 13Bulv Pwnbog koob nyidkun hvgdvn si soodin galoqkvma nyia koob nyigam gab kama, hvbmabde bulug Abv Pwnbo mwv atv su.
14Agamv nyia koob nyiknv ngulug pengko si doobanum, ngulv mwwg Abwg yuunam mam kaatkun, mwv anya ngvla jvqtw rooxonum; hoq nyi aksi mwv mwwg Abwg Ko Tuupv.
15Jon mwwg atwg puiyam bekinnum. Mwv benum, “Soq nyi ak siilak ngoqg nulam bekinam akv, ‘Mwv ngoqg kokwb haady bo akv hvbmabde mwv ngam koi yaadwn, hoggab mwv ngam ko bwwma daab otuq hoqgv doonum.
16Mwv ngulam anya mwwpal anya aoho anya yaada go lvqc yaada go lvqc cipakun. 17Pwnbov pvvbam Mojesnvn jinum, hvbmabde anyangam la jvqtwngam ngulv Jisu Kristo galoqkv kaapa pakun. 18Hiyvkam nywywngam Pwnboam lokam kaaka ma. hvbmabde mwwg haabo toloq doonbo Pwnbo hvbkalam nyinbo Abwg Ko Tuup akam ngulam mwam cengdwb jinum.
Jon Baptistg Pui
(Mt 3:1-12; Mk 1:1-8; Lk 3:1-18)
19Hoo Juhudi nyi tulungv nyub la Lebi nyi tulungam Jonwg dookub Jerusalem kanam tvl Jonnvn, “No hiyv” hvl tox mvnum.
20Jon mvvs maab bidil birwqnv bekinnum, “Ngo Ywwnbo ak hvvma.”
21Hoo bulv mwam toxnum, “No hiyv “No Ilija yv” Mwv birwqnum. “Ma ngo ma” “No nyiqry kaanbo hvvi yv” Hoo mwv birwqnum, “Ngo ma.”
22Ho bulv mwam toxnum, “No hiyv jaq ngulam bekin tvb, hoggab ngulam kanam boam ngulv wkur gvdkul nyi tulungam puiyam bekin tayin. No atam hog hvla besdvn?”
23Jon birwqnum soq siilak ngo atam hog besdvn ham nyiqry kaanbo Aijayag benamv,
“Ngo deexa-raraho sogoql benbo nyi akv:
At Swg wdyko lamtangam paxaql dinda dvb padin yaato!’”
24Soq pui tanbo nyi tulu sam Parisi tulungv kanamnum. 25Bulv Jonnvn toxnum, “Tanamv no Kristo kamanyi, Ilija kamanyi, ho nyiqry kaanbo kamanyi, no hoggub baptijum jikar yvdwn?”
26Jon bulam birwqnum, “Ngo iss lvgab baptijum jidwn, hvbmabde nulug pengko ho nulv cengmanam nyi ak daqnbo, 27mwv ngoqg kokwb haamin gvdwn, mwv ngoqg haama daab doonum, ngo mwwg luxuqngam kam pisuq dvb simp yaama dvn.”
28Soq nyinam wnam mwlw si Jonwg baptijum jidul dook Jordon pobu lvqbwq taqc kvtinwg Betani nampam ho nyinum.
Pwnbog Sviya Ko
29Loogwn so Jon mwwg dookub Jisun haanam mam kaatwl benum, “Kaato, siilak gvda gvtwg nyic nyiangam baqxiabo Pwnbog sviya kov, 30Soq ak sam lak ngoqg kokwb nyi ak haatayin hvl ngoqg benamv, mwv ngam koi yaadwn, mwv ngam ko bwwma daab otuq hoqgv doonum.’ 31Ngo atv mwam cengmanum, hvbmabde soq pagoq gab ngo iss lvgab baptijum jitab haanum, ho mwam Israel nyi tulungam cengpor mvnum.”
32Hoo Jon soq pui sam bekinnum: “Ngo Yalam pwk yobur dorgub nyitwl ao gvda toloqgv jarpoql mwwg aoho hopwl doodwb kaapanum. 33Hvbsujaqkam ngo atv mwam cengmanum, hvbmabde hiyv ngam iss lvgab baptijum jitwk hvl kanambo Pwnbov bekin namgob mwam kaacinum, ‘No hiyvg aoho Yalv ipoql layil doodwb kaapa tayin, mwv lak Dvrwqbo Yal lvgab baptijum jitayin.’ 34Hoo ngo mwam kaatwn hvl Jon benum, “Hoqgab ngo nulam bedwn, mwv Pwnbog Ko Tuupv.”
Jisug Buu Otuqcob Goqnam
35Loogwn so Jon mwwg buu vnyi gonwg lvgab doqdul yvnam, 36hoo mwv Jisun gaql yvnam mam, kaapa tvl mwv benum, “Soq siilak Pwnbog sviya kov!” 37Buu vnyiv mwwg benam mam tatwl bulv Jisug kokwb wmin gvnum. 38Jisu kookur banv bulam mwwg kokwb wmin gvnam mam kaapa tvl toxnum, “Nulv hognvkam meekar dvn?” bulv birwqnum, “Tomswrbo no hogloq ho doodwn” “Rabbi?” (hvgdvn hv Tomswrbo), 39Mwv bulam benum, “Haag dvl nulv kaato.” Ho bulv mwwg lvgab wmin gvbnv dookam kaanum, hoo bulv mwwg lvgab hoq aalho doomin gvnum. Hoo doonyiv ariyum mood vpy kunum. 40Jonwg benam mam tapel Jisug kokwb wmin gvnbo buu vnyig pengko ho akwnv Simon Pitorg bor Andriyo. 41Otuqcob Andriyo mwwg bor Simonnvn kaapa banv mwam betamnum, “Ngulv Ywwnbo akam kaapa peekun.” 42Kokw so mwv Simonnvn Jisug dookub boanum. Jisu mwam kaagabnv benum, no Jonwg ko tuup Simon yv.” Noqg eminam sipas hvl goqtayin.” (Hvgdvn si Pitor).
Jisu Pilip nvla Natanaelnvn Goqnum
43Loogwn so Jisu Galili gvdab wdwb mwwnum. Mwv Pilipnvn kaapa tvl mwam benum, “Ngoqg kokwb wmin gvto.” 44Pilip kam Andriyo la Pitor bunyig nampam Betsaida hoqgv haanum. 45Ho Pilip Natanaelnvn kaapa tvl mwam bekinnum, “Ngulv Dvrwq potalo Mojesg xeqnam akam kaapa pakun. Mwv nyiqry benbo tulug hvdwg xeqnam akv, Mwv Najaretwg Josap ko akv.” 46Natanael toxnum. “Najaret aloqkv hvvtw xinamv lengtayin?” Pilip birwqnum, “Haag dvl hoo kaato.” 47Kokw so Natanaelnvn Jisu mwwg dookub hoodul doonam mam kaatwl mwam benum, “Kaato, jvqtw jaqn bo Israel nyi akwg lvgab xaalyonamv dooma dvn!” 48Natanael mwam benum, “No ngam hoggub cengnam, “Soq siilak lootw Israel nyi jaqkv, Mwv vm xaalyo bo nyiib nyima dvn. “Natanael mwam toxnum, “No hoggub ngam cengdwn?” Jisu mwam birwqnum, “Pilib nam goqma daab ngo nam svvn lwkw gol doodwb kaapa coonum.” 49Natanael birwqnum, “Tomswrbo no Pwnbog Ko Tuup gojaq kunyi. No Israel hvdwg Lvpw at gojaq kunyi!” 50Jisu benum, “Ngo nam svvn lwkw ho doodwb kaapa tvnwk hvgam gab ngam no mwwjw dvn.” No sam koi yaanbo nyinam pagoqkam vigo kaapa tayin!” 51Hoo mwv bulam benum, “Ngo nulam jvqtw jaqb bedwn, nulv ao gvdangam mvko tvl Pwnbog gumtwngam Nyia Kog aoho caad bvla ipoq dvb kaapa tayin.”
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.
