Genesis 12
12
Dios tsi' yajca Abram
1Lac Yum tsi sube Abram: Loq'uen ti a lumal. Loq'uen ti' yotot a tat ba'an a pi'ʌlob. Cucu ya' ti jini lum mu' bʌ caj c pʌsbeñet. 2Mi caj cʌq'ueñet cabʌl a p'olbal ti ñuc bʌ lum. Mi caj cʌq'ueñet a wenlel. Mi caj cʌc' ti cʌjñel a c'aba'. Mi caj i tajob i wenlel winicob x'ixicob ti pejtelel pañimil cha'añet. 3Mi caj c wen pejcan jini mu' bʌ i wen pejcañet. Mi caj c ts'a'len jini mu' bʌ i ts'a'leñet. Cha'añet mi caj i tajob i wenlel winicob x'ixicob ti jujunmojt ti pañimil, che'en lac Yum.
4Jini cha'an tsa' majli Abram che' bajche' tsi' sube lac Yum. Tsa' majli Lot yic'ot. An jo'lujump'ejl i chʌnc'al (75) i jabilel Abram che' bʌ tsa' loq'ui ti Harán. 5Abram tsi' pʌyʌ majlel Sarai i yijñam yic'ot Lot, i yalobil i yʌscun yic'ot pejtelel i chubʌ'an tsa' bʌ i tempayob yic'ot pejtel jini winicob x'ixicob tsa' bʌ i yumayob ya' ti Harán. Tsa' cajiyob ti xʌmbal majlel. Tsa' c'ʌlʌl c'otiyob ti Canaán. 6Abram tsa' ñumi ti jini lum c'ʌlʌl ti Siquem ya' ba'an joctʌl i c'aba' More ba'an c'olol te'. Ya' chumulob i yalobilob Canaán.
7Tsa' tsictiyi lac Yum ti' wut Abram. Tsi' sube: Mi caj cʌq'uen a p'olbal ili lum, che'en. Abram tsi' wa'chocobe i pulʌntib i majtan lac Yum ya' ba' tsi' pʌsʌ i bʌ lac Yum ti' wut Abram. 8Tsa' loq'ui ya'i. Tsa' poj majli ti wits am bʌ ti' tojel Betel. Tsi' wa'choco jini pisil bʌ i yotot ti ojlil bij che' mi lac loq'uel ti Betel ya' ti' bʌjlibal q'uin cha'an mi lac majlel ti Hai ya' ti pasibal q'uin. Ya'i tsi' wa'chocobe i pulʌntib i majtan lac Yum. Tsi' ch'ujutesa i c'aba' lac Yum. 9Abram tsa' chʌn majli c'ʌlʌl ti jini lum am bʌ ti sur.
Abram an ti Egipto
10Ya' tsi' taja wi'ñal ti jini lum. Jini cha'an Abram tsa' jubi majlel ti Egipto cha'an mi' jalijel ya'i, come wocol jini wi'ñal ti' lumal. 11Che' bʌ lʌc'ʌlix yom c'otel ti Egipto, tsi' sube Sarai i yijñam: Cujil a t'ojol jax. 12Che' mi' q'ueletob jini año' bʌ ti Egipto mi caj i yʌlob: “Jiñʌch i yijñam”. Che' mi caj i yʌlob. Mi caj i tsʌnsañoñob. Pero mi caj i c'uxbiñetob. 13Yom ma' subeñob: “Jiñʌch cʌscun”, che'et. Che'ʌch yom cha'an uts'at mi cajñel a wic'ot, ame i tsʌñsañoñob cha'an mi' pʌyetob, che'en Abram. 14Che'ʌch tsa' ujti. Che' bʌ tsa' ochi Abram ti Egipto jini egiptojob tsi' q'ueleyob i t'ojol jax jini x'ixic. 15I winicob Faraón tsi' q'ueleyob jini x'ixic ja'el. Tsi' subeyob Faraón wen i t'ojol jax. Tsa' pʌjyi majlel jini x'ixic ti' yotot Faraón. 16Faraón tsi' yʌq'ue i majtan Abram che' bʌ tsi' q'uele jini x'ixic. An i cha'an Abram tiñʌme', yic'ot wacax, yic'ot tat burro, yic'ot mozojob, yic'ot criadajob, yic'ot i ña'al tac burro, yic'ot camello tac.
17Lac Yum tsa' caji i yʌq'uen i wocol Faraón yic'ot año' bʌ ti' yotot cha'an ya' an Sarai i yijñam Abram. 18Faraón tsi' pʌyʌ tilel Abram. Tsi' yʌlʌ: Mach uts'atic bajche' tsa' melbeyon. ¿Chucoch ma'anic tsa' subeyon mi a wijñam jini x'ixic? 19¿Chucoch tsa' wʌlʌ jiñʌch a wijts'in? Jini cha'an tsac pʌyʌ cha'an quijñam. Awilan, wʌ'an a wijñam. Pʌyʌ majlel. Cucu, che'en. 20Faraón tsi' yʌq'ueyob mandar i winicob cha'an mi' coltañob majlel Abram yic'ot i yijñam yic'ot pejtel i chubʌ'an.
נבחרו כעת:
Genesis 12: CTU77
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Chol de Tumbalá Bible © Bible Society of Mexico, 1977. Active Translation in Process