KENESE, 22
22
O LE MATAUPU XXII.
Ua ave Isaako e fai ma taulaga.
1Ua mavae ia mea, ona tofotofo lea o le Atua ia Aperaamo, ua faapea mai ia te ia, Aperaamo e; ona tali atu lea o ia, O a‘u lenei. 2Ona fetalai mai lea o ia, Ia e ave lou atalii, o lou atalii e toatasi, o le ua pele ia te oe, o Isaako lava, ma e alu i le nuu o Moria; ma avatu ia te ia e fai ma taulaga mu i lea mea i le tasi mauga ou te ta‘uina atu ai ia te oe. 3Ona ala tulai lea o Aperaamo i le taeao, ma faanofoa lana asini, ua ave foi e ia ni ona taulelea e toalua, ma Isaako lona atalii; ma ua taisi fafie e fai a‘i le taulaga mu, ona tulai lea o ia ma alu i le mea na ta‘uina mai ai e le Atua ia te ia. 4Ua oo i le aso tolu ona tepa ae lea o Aperaamo, ma ua iloa lea mea a e mamao. 5Ua fai atu foi Aperaamo i ona taulelea, Tali atu ia iinei ma le asini, a o a‘u ma le tama ma te o i o e tapuai ai, i lo ma toe foi mai ia te oulua. 6Ua ave foi e Aperaamo le fafie e fai a‘i le taulaga mu, ma faaee ai ia Isaako lona atalii, ua ave foi e ia i ona lima le afi ma le polo; ona o ai lea o i laua. 7Ona fai atu lea o Isaako i lona tamā o Aperaamo, ua faapea atu, Lo‘u tamā e; ona tali mai lea o ia, Lo‘u atalii e, o a‘u lenei. Ona fai atu lea o ia, Faauta, o le afi ma le fafie; a o ifea se tamai mamoe e fai a‘i le taulaga mu? 8Ona tali mai lea o Aperaamo, Lo‘u atalii e, e au mai e le Atua se tamai mamoe māna e fai a‘i le taulaga mu; ona o faatasi ai lea o i laua. 9Ua oo atu i laua i le mea na ta‘uina mai ai e le Atua ia te ia; ona faia lea e Aperaamo o le fata faitaulaga i lea mea, ma faaafu le fafie; ua na fusifusi foi lona atalii o Isaako, ma faaee ia te ia i le fata i luga o le fafie. 10Ona aapa atu lea o Aperaamo lona lima i le polo, o le a fasioti lona atalii. 11Ona valaau ifo lea o le agelu a Ieova ia te ia mai le lagi, ua faapea mai, Aperaamo, Aperaamo e; i le ua tali atu o ia, O a‘u lenei. 12Ona fetalai mai lea o ia, Soia le oo lou lima i le tama, aua foi e te fai se mea e tasi ia te ia; auā ua ou iloa nei ua e mata‘u i le Atua, ina ua e le taofia lou atalii, o lou atalii e toatasi, a ua e tuu mai ia te au. 13Ona tepa ae lea o Aperaamo, ua iloa atu, faauta, o le mamoe poa i ona tua ua lavelavea ona nifo i le laau filifili; ona alu lea o Aperaamo, ma au mai le mamoe poa, ua osi ai le taulaga mu e sui a‘i lona atalii. 14Ona faaigoa ai lea e Aperaamo o lea mea o Ieova-irae; e pei ona fai mai ai i nei ona po, E iloa Ieova i le mauga. 15Ua toe valaau ifo le agelu a Ieova ia Aperaamo mai le lagi, ua faapea mai, 16O loo faapea a Ieova, Ua ou tauto a‘u ia te au; ua e faia lava lenei mea, ua e le taofia lou atalii, o lou atalii e toatasi; 17o le mea lea ou te matuā faamanuia ai ia te oe, ma ou matuā faatoateleina lava lau fanau e pei o fetu o le lagi, e pei o le oneone foi i le matafaga; e maua foi e lau fanau faitotoa o e ita ia i latou; 18o lau fanau foi e manuia ai atu nuu uma lava o le lalolagi; auā ua e usiusitai i la‘u upu. 19Ua toe foi Aperaamo i ona taulelea; ona latou tulai lea, ma latou o faatasi i Peresepa; ua mau ai foi Aperaamo i Peresepa.
20Ua mavae foi ia mea, ona ta‘ua mai lea ia Aperaamo, ua faapea mai, Faauta mai, ua fanau foi e Meleka ana tama i lou uso o Nakori; 21o lana ulumatua o Usa, ma lona uso o Pusa, ma Kimueli le tamā o Arama, 22ma Kiseta, ma Haso, ma Pilitaso, ma Itelafo, ma Petueli. 23Ua fanaua foi e Petueli o Repeka; o i latou nei e toavalu na fanau mai e Meleka ia Nakori le uso o Aperaamo. 24O lana palake foi, o Reuma lona igoa, ua fanau mai foi e ia o Tepa, ma Kaamo, ma Taaso, ma Maaka.
נבחרו כעת:
KENESE, 22: SOV
הדגשה
שתפו
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Samoan Edited Old Version © Bible Society of the South Pacific, 2017.