KENESE, 20
20
O LE MATAUPU XX.
Ua ave Sara e Apimeleko.
1Ua alu atu Aperaamo ai lea mea i le nuu i le itu i toga, ona mau ai lea o ia i le va o Katesa ma Sura, ua āumau foi i Kira. 2Ua fai atu e Aperaamo, o lana avā o Sara o lona tuafafine ia; ona aami atu lea e Apimeleko le tupu o Kira ia Sara, ma au mai ai. 3A ua afio mai le Atua ia Apimeleko i le miti i le po, ua faapea mai ia te ia, Faauta, o le a e oti ona o le fafine ua e au mai, auā o le nofo tane lava ia. 4A o Apimeleko o lei alu ane ia ia te ia; ua faapea atu foi o ia, Le Alii e, pe te fasiotia foi le nuu amiotonu? 5E le ua fai mai ea o ia ia te au, O lo‘u tuafafine ia? O ia foi, ua fai mai lava o ia O lo‘u tuagane ia? O le manatu tonu o lo‘u loto ma o‘u lima mamā ua ou fai ai lenei mea. 6Ona fetalai mai lea o le Atua ia te ia i le miti, Ua ou iloa lava, o le manatu tonu o lou loto ua e fai ai lenei mea, ua ou taofia foi oe ne‘i e agasala mai ia te au; o le mea lea ua ou le tuuina atu ai ia te oe e tago atu ia te ia. 7O lenei foi, ia toe tuuina atu le avā a lela tagata, auā o le perofeta ia, e tatalo foi o ia mo oe, e te ola ai; a e afai e te le toe tuuina atu, ia e iloa o le a e oti lava, o oe, atoa ma i latou uma ua ia te oe. 8Ona ala tulai lea o Apimeleko i le taeao, ua valaau atu i ana auauna uma, ma ta‘u atu ia te i latou nei mea uma, ona matuā fefefe ai lea o ia tagata. 9Ona aami atu lea e Apimeleko ia Aperaamo, ua faapea atu ia te ia, O le a lenei mea ua e faia ia te i matou? Pe se a sa‘u amio leaga ia te oe, ua e faaee mai ai ia te au ma lo‘u malo le agasala tele? O mea e le tusa ona faia, ua e faia ia te au. 10Ua fai atu foi Apimeleko ia Aperaamo, Pe se a se mea ua e iloa na e fai ai lenei mea? 11Ona tali mai lea o Aperaamo, Auā na ou faapea ifo, Ai lava ua leai se mata‘u i le Atua i le nuu nei; latou te fasioti ia te au ona o la‘u avā. 12A e moni lava, o lo‘u tuafafine ia, o le afafine o lo‘u tamā, a e le se tama a lo‘u tinā; ua fai foi o ia ma‘u avā. 13Na faataasēina a‘u e le Atua nai le aiga o lo‘u tamā, ona ou fai atu lea ia te ia, O lenei lou alofa mai ia te au, o mea uma ta te o i ai ia e faapea atu, O lo‘u tuagane o ia. 14Ona ave lea e Apimeleko o mamoe ma povi, ma auauna tane ma auauna fafine, ma foaiinatua ia Aperaamo; ua ia toe tuuina atu foi ia te ia o lana avā o Sara. 15Ua fai atu foi Apimeleko, Faauta mai, o i ou luma lo‘u laueleele; faitalia lava oe se mea e te fia mau ai. 16Ua fai atu foi o ia ia Sara, Faauta, ua ou foaiiua atu i lou tuagane o tupe e afe; e fai ia mou ufiufi mata, ia i latou uma o ia te oe, atoa ma nisi uma; ua faapea ona aoaiina o ia. 17Ona tatalo lea o Aperaamo i le Atua; ona faamalolo ai lea o le Atua ia Apimeleko, ma lana avā, ma ana auauna fafine; ona latou fananau lea. 18Auā sa matuā faapapāina e Ieova o fafine uma o le aiga o Apimeleko, ona o Sara le avā a Aperaamo.
נבחרו כעת:
KENESE, 20: SOV
הדגשה
שתפו
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Samoan Edited Old Version © Bible Society of the South Pacific, 2017.