Yohana 5
5
Yesu botho ji i kidiwa
1Rumacen, kalima pa Joyuda manyadini obedo to Yesu kidho Yerusalem. 2I Yerusalem, dho waŋkac m'ilwoŋo ni Ma Rombo, ma i Dhohiburu ilwoŋo ni Bethzatha, nitie dago moro man gi kadonjo abic. 3Aka kidhur ji ma two oyido jonitie dho kadonjo no je. Joma waŋ gin otho, jom'oŋol, kodi joma two nyaŋinya. [Jono onwaŋo jokuro pi woicere; 4rupiri dicel dicel malaika pa Rwoth oyido bin loro piny i dago no to ico pi. Aka jatwo m'open donjo i dago no ka otiek ico pi, ama two pere ma nger je both woko]. 5Kenyo onwaŋo nitie nyatoro m'onwaŋo otieko two oro piero adek g'aboro. 6Munyo Yesu oneno go opiele piny kenyo, to ŋeyo nike ŋato oyido otieko two hongo malac; ameno openjo go ni, “Imito bedo maber?” 7Jatwo no odwoko ni, “Jadwoŋ, angoye gimoro manyalo kethan i dago ka pi oicere; ka nyaka ni atem donjo i pi, ŋatiman ama telo donjo ran.” 8Yesu owaco rigo ni, “Ay malo, kwany par perin, iwothi.” 9Piyo piyo no, ŋato obedo maber, okwanyo par pere, to wotho kadho.
Ndelo no oyido obedo Sabato pa Joyuda, 10#Nehe 13:19; Yer 17:21am'omiyo jowaco ri ŋat'owok both no ni, “Kole konon Sabato, aka Cik kiyeyin tiŋo par perin.” 11Go odwoko ni, “Ŋat'obothan owaco ni, tiŋi par perin iwothi.” 12Aka jopenjo go ni, “Manago ŋa no m'owaco rin ni itiŋ par perin iwothi?” 13To jalo k'oŋeyo ŋata go, rupiri Yesu oyido otieko rwenyo i dier ji mathoth m'oyido jonitie kenyo.
14Rumacen, Yesu onwaŋo go i Ot pa Were to waco rigo ni, “Neni, pama onyo itieko bedo maber! Onyo ikiri doko igiki timo reco, kosa giman nyalo timin marac maloyo meno.” 15Gikenyo ŋato okadho to waco ri Joyuda ni Yesu ama obotho go. 16Ro wac me, Joyuda jocako lweny gi Yesu, rupiri omaro timo gima pameno i Sabato.
17To Yesu odwoko jo ni, “Kole Baba tiyo noknok, aka abende onyo atiyo.” 18Wac me omiyo Joyuda jomedo ridho paro ma neko go; rupiri go oyido k'oturo nyaka cik ma Sabato kende, to oyido waco bende ni Were meno Bamere won, aka ameno go won kethere i kabedo marom g'apa Were.
Meni pa Wod Were
19Gikenyo Yesu odwoko ni, “Adieri awaco riwin, Wod Were kitim gimoro gi meni pere won; to go timo gim'oneno Bamere timo. Gima Bamere timo ama Wode bende timo. 20Kole Were Baba omaro Wode aka nyutho go gimoro je ma go won timo. Go bino nyutho Wode kiri gigipiny maloyo me, aka wibino uro 21rupiri paka Bamere cerino jom'otho aka miyo jo kwo, apaka Wode bende miyo joma go oyenyo kwo. 22Baba won kithum banja ri nyatoro, to omiyo Wode meni je ma thumo banja 23aka ŋey dhano je wowori Wod Were paka joworo Bamere. Ŋata kiwor Wod Were meno bende kiwor Bamere m'ooro go.”
24“Adieri awaco riwin, nyatoro je ma winjo wac paran, to yeyo ŋat'ooran, nitie gi kwo makirum. Aka k'othumi rigo banja rupiri go otieko wok i tho odonjo i kwo. 25Adieri awaco riwin, ndir bino tundo aka otieko kiri tundo ma jom'otho jobino winj'iye dwondi Wod Were, aka dhano je ma winjo dwonde bino kwo. 26Ato paka Baba nigi kwo kwoŋe, apaka otieko miyo Wode bende bedo gi kwo kwoŋe. 27Aka go otieko miyo Wode meni ma thumo banja, rupiri go obedo Wod Dhano. 28Wikiri widhier kwoŋ gime; kole ndir bino ma jom'otho je ma jonitie i kaliel jobino winj'iye dwonde, 29#Dan 12:2aka jobino wok kenyo: Joma timo gima beyo jobino cerino to jokwo, aka joma timo reco ibino cerino jo to ithumo banja loyo jo.”
Yesu jakony ma ridho wac
30“Akinyali timo gimoro awon kendan; athumo banja paka Were waco ran, am'omiyo thumo banja paran otire, rupiri akitem timo gim'awon amito, to gima ŋat'ooran ama mito. 31Bedi awon aluwo gima mako kwoŋan, d'onyo wac paran kibedi m'otire; 32to nitie ŋatiman ma cungo aka luwo kaparan, aka aŋeyo nike gima go waco kwoŋan otire.”
33 #
Yoh 1:19-27; 3:27-30 “Wioro jomikwenda bongi Yohana aka kole go otieko luwo ma ridho adieri no. 34K'obedo nike a thenere kwoŋ wac pa dhano, t'awaco ama aka ŋey wilimi both ayin. 35Yohana oyido obedo paka tala maliel ka miyo lero, aka wiyeyo kiri kisangala i lero pere nyaka hongo macek. 36To wac ma an awodh'iye kony dwoŋ loyo kiri ma Yohana omiyo: Ato tic ma an atimo obedo ma Baba am'omiyan timo, aka tic no nyutho kamaler ni Baba ama ooran. 37Aka Baba m'ooran, bende otieko luwo kwoŋan. Fodi wikiwinjo dwonde, odoko fodi wikineno cal pere, 38aka wingoye gi wac pere i win; rupiri wikiyeyo ŋata go ooro. 39Wifonjere Ndiko Maleŋ rupiri wiparo ni wibino nwaŋ'iye kwo makirum; aka kole Ndiko no ama luwo kwoŋan! 40To je fodi wikiyey bino bongan limo kwo.”
41“Akiyeny pak pa ji, 42to aŋeyo win maber, nike wingoye kodi mar pa Were i cuny win. 43E abino i meni pa Baba to wikijolan; to ka moro obin gi meni pere won, ama wibino jolo. 44Onyo winyalo yeyo nedi ka wimito pak ma wok bongi wiwegi, aka wikitem limo pak ma wok bongi Were won. 45Wikiri wipar nike abino kiosa win bongi Baba. Musa ma wigeno kwoŋe no won ama bino kelo kwoŋ win wac. 46Bedi wiyeyo Musa, d'onyo wiyeyan bende, rupiri go ondiko gima mako kwoŋan. 47To ka wikiyey gima go ondiko, winonyali nedi yeyo gim'awaco?”
נבחרו כעת:
Yohana 5: DHOPE
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Dhopadhola DC Bible © Bible Society of Uganda, 2018.
