Matteyo 8
8
Itaŋida Yesu obo Latulo
(Mar 1:40-45; Luk 5:12-16)
1Ninyia isuru Yesu to doŋe ollo odiha 'to, ijifarai nyia eluluŋi hunne ettaha inyi. 2Attati obo atulo, linyia owon 'to iko aŋuai belelio, ittuna jihonyi, ette irigoŋo ihosiere honyi, ette jiaran, “Lettok, ta awahan ottonohoi, iremik iyye italibo ani.”#8:2 italibo ani : Ojiori nyia jio itihan aŋuai ania atulo ahebuatani tehiji waati 'daŋ iko to tua hasik imojiti.
3Attati Yesu ihalamana aani honyi, ette ittir inyi, ette jiaran, “Awak ni, toliboro!” Teya teya, ette aŋuai atulo lia iŋidari. 4#Ehumak 14:1-32Attati Yesu jiaran jihonyi, “Itayirie! Hèramak obo atulo, ati obotik jio ehumani, ijiara inyi ihum imi iyye, attati teya, isiarak ehumi jio Hollum ihuo ojiori efahita huno Mose, itahutaniere jio aati jio, ilibo iyye.”
Itaŋida Yesu Apit Jafit olo Oseŋer Roma
(Luk 7:1-10)
5To ninyia ojiŋaniere Yesu ibore gala Kapernaum, ottu nyia obo ajafit olo Roma, ette ittana inyi 6jiojio, “Lettok, apit hoŋ elle ififiata iko aŋuai itua haŋ; odiaha inyi bebe, ittallik ikoddaŋ idioto.”
7Buo Yesu ette jiaran jihonyi, “Alo adi ni itaŋida inyi.”
8Buo ajafit lia ette itarraŋ ojio, “Lettok, abeŋ ni asiru ifuotuniere iyye ihaŋ hoŋ. Ati ikianai te etuk ijiai, oŋida adi apit hoŋ. 9Orriama ihuo anna aniŋiere ni elettaha hoŋ, buo fe oseŋer hoŋ oniŋie ani. Aremik ni jiaran jio obo, ‘Ilo!’ buo inyi ette leten, buo fe jio olobo, ‘Waŋ!’ buo inyi ette ittuna; buo fe ajio jio apit hoŋ, ‘Ihana enyia!’ buo inyi ette ihan.”
10Ninyia itaniŋu Yesu eram ania, illilliha nyia inyi bebe, ette jiaran jio aati hunyia ijifatie 'to inyi jio, “Eramak ni itai jio, habeŋ ni anyurak obo eruk onno obolo 'to ihuo ana, ara duadi bu ifau Israele 'daŋ. 11#Luk 13:29Eramak ni itai jio, ofuonni adi aati arriai tetteduoŋi holoŋ iko tettedorroi holoŋ iŋiyere agari iko Abramo, buo Isako, ojio Yakobo, Ilobie ettedou. 12#Mat 22:13; 25:30; Luk 13:28Ati irruoŋoni adi idumele, hia, hullo oremehini 'to irahan a hulo olobie. Diya, ituruhoi adi isi buo fe irutai aala hosi.” 13Attati Yesu jiaran jio ajafit alia, “Ilo haŋ, ijiara hétera jihoi ihuo iruk iyye.”
Teya teya, ette apit lia iŋidari.
Itaŋida Yesu Aati Arriai
(Mar 1:29-34; Luk 4:38-41)
14Olo nyia Yesu ihaŋ Petro, ette irumana hamoni Petro ififiata iko anahan huan. 15Attati inyi ittir aani aŋotte ania, buo anahan huan nyia, ette iŋatana inyi, ette inyi idioto ahide, ette ihuhumana jio Yesu aŋiyo.
16Ninyia ara ollotoriai, iyaŋunie nyia aati jio Yesu, aati miniaŋa arriai. Buo te etuk ijiai, itattur nyia Yesu aminiaŋa, buo aati hunyia oŋuai 'to 'daŋ ette iŋidari. 17Ihan nyia inyi ihuo nyia, itasiruniere eram ninyia ikiana Isaya ekianani Hollum jio, “Iduha inyi addi eŋuati iko ediahiti hohoi.”
Aati Hulla Awahi 'to Rahan Ahejifak Yesu
(Luk 9:57-62)
18Ninyia igonyu Yesu eluluŋ waati okudani inyi, ette inyi ihum iramana jio lejifak honyi jio, “Hafatta afohor tafar enne ittokon tole.” 19Attati obo ettiyanani olo efahita ittuna jihonyi, ette jiaran, “Hettiyanani, ejifaru adi ni iyye jio amasik 'daŋ hunne ilari iyye.”
20Buo Yesu ette itarraŋ inyi jiojio, “Owoni obeyohi iko ewurio hosi, buo fe aheny owoni iko asik hosi; ati obeŋ obo amaji onno oferiere Lonyi tulo iyiriari.”
21Buo obo olo lejifak honyi ette jiaran, “Lettok, ijiara do nani alo inuhana monyoŋ.”
22Ati itarraŋ nyia Yesu inyi ojio, “Ijifunie ani. Idehi ayaak onuhani ayaak hosi.”
Itawoj Yesu Addiŋilla
(Mar 4:35-41; Luk 8:22-25)
23Ninyia ladak Yesu itogol, ijifarai nyia ejifak honyi inyi. 24Teya teya, ette addiŋilla idiotonio isi tehiji tafar enne ittokon many ojiari atogol nyia adiori ta apoŋia poŋia hari. Ati ojotoro nyia Yesu, 25attati ejifak ifuatan itaheny inyi, ette jiaran jiojio, “Lamonye! Eluak hohoi, attu naye!”
26Buo inyi ette jiaran jihosi, “Eii! Anyio baŋi attanatai ania? Itai aati hullo omuta eruk!” Attati inyi idioto, ette iŋerejanio jio addiŋilla iko apoŋia poŋia hari, ette ediofo 'daŋ idua jillili.
27Illillihai nyia isi 'daŋ bebe, ette jiaran, “Eii! Anyio tulo olo? Ara duadi bu addiŋilla iko apoŋia poŋia hari, oniŋie isi 'daŋ inyi!”
Itaŋida Yesu Aati Miniaŋa Arrihai
(Mar 5:1-20; Luk 8:26-39)
28Ninyia allaŋ Yesu atafar tole, ifau Gerasa, oruaŋanie nyia omuk aati miniaŋa arrihai ikonyi, hullo ofuonni tehiji ilumio, buo iŋereji bebe many abaŋarik aati adaha tolia. 29Teya, iwuwoŋitai nyia isi bebe, ette jiaran, “Lonyi Hollum, anyio enne iwak iyye jihohoi? Ittu iyye hohoi ittigemio hobeŋ asaa ottuba?”
30Oŋiye nyia abataha arriai alamarai kai teger hosi. 31Attati aminiaŋa hunia ittana Yesu jio, “Elle ijio iyye ifuha hohoi addi, ifuhak ati hohoi jio abataha hua.”
32Buo inyi ette jiaran jihosi, “Ifuatta.” Attati isi ifuatan ette ijiŋana jio abataha hua, buo eluluŋ bataha hunia 'daŋ ette isuoro attany olotifor hari jio hutu, hutu, hutu, ette ikuahino itua hari, ette ikoddaŋ iye diya.
33Ofuhoi nyia eyyahak bataha hunia, ette ijiŋana itua bore gala, ette iramana erre 'daŋ, hoduo iduoŋi 'to jio aati miniaŋa. 34Tania, ojiŋuni nyia aati 'daŋ to tua bore gala, ette ifuatan jio Yesu. Ninyia igonyuni isi inyi, ette isi ittana inyi hételo addi ta fau hosi.
נבחרו כעת:
Matteyo 8: EA2003
הדגשה
שתף
העתק
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fhe.png&w=128&q=75)
רוצים לשמור את ההדגשות שלכם בכל המכשירים שלכם? הירשמו או היכנסו
© The Bible Society in South Sudan 2003