Kucangtsi 22
22
Rimam Myae Uwae Kinjo Ibrahim
1Isim yine, Rimam myae Ibrahim kumyae. Awu kunn wu baa, “Ibrahim.” Ibrahim cwe baa, “Eén.”
2Ama Rimam ri baa, “Sa umbae-fu, ti urom ti si kum awu kinjo-wu amam, awu Ishaku, ti afu site ure te wu timambe. Ru yi uten Moriya, u ka sa wu twen ikentitwen atang na m, utaen rikwen ti ame u tso fu.”
3Ucwe fam kiskinn, Ibrahim yam ituku baen ikyinnsu-wu, u pu Ishaku ti apyi-wu ifaen, aba ye ikyin ku ru yi uwog ti Rimam ri te wu, ti a u ka twen ikentitwen atang na wu. 4Usir ti ita, Ibrahim pu ayib tso u sae ye uwog wu ti fengo ti rwen. 5Awu ri te apyi-wu baa, “Ni ti ikyinnsu wune ā tsi ti ike. Ame ti Ishaku u ru yi uwe akwen. Ati kaa fen Rimam ti ti kafe ba.”
6Ibrahim ye ituku na iken ti twen yi su Ishaku, ama u ye su ana wu urwa ti kisim. Ti meme ifaen-ba kyang ku ru, 7Ishaku kunn itse-wu Ibrahim baa, “Itse.” Ibrahim cwe baa, “Umbae-m.” Ishaku rang baa, “Nung urwa, ti ituku ta re, amaa iwen ikyaen ikentitwen yi ta-wu aka?”
8Ibrahim ri baa, “Umbae-m, Rimam ti risu-wu ti u nda ti iwen ikentitwen yi ti ajwo-wu.” Ama meme ifaen-ba ru yi uwe ti ikyin ti kyang.
9Ti aba ka sang pu ba uwog ti Rimam ri te wu, Ibrahim mbye kuta, u kyae ituku cwutsa atang. Ama u cwong umbae-wu Ishaku, u ye wu naetsa risu ituku yi. 10Awu nwaen kisim tso ti wu u yer wen umbae-wu. 11Ama atom Yaweh kunn ira apupwen baa, “Ibrahim! Ibrahim!” Awu cwe baa, “Eén.”
12Atom wu ri baa, “Ya ajwo ta ijwe mbae wune. Nde-fu awu iken iki be. Tine ame nung pu m baa, afu na site ikyenricwu Rimam, ikyaen ti, afu byang-fu ame umbae-fu ti si kum awu amam be.”
13Ibrahim pu ayib tso, u sae iwentam ti ishin-wu faesang ajinn uwae kutur kuka atang. Awu ka ye iwen wu, u twen ikentitwen atang na Rimam kutunn unju Ishaku. 14Ikyaen yine, Ibrahim kunn rinyi uwog wu baa, “Yaweh u sa ba.” Ba sang ti yaka, aba ku ri baa, “Yi Rikwen Yaweh, a u sa ba.” 15Atom Yaweh kunn kyi Ibrahim ira ti apu-ifaen yi apupwen, 16u ri te wu baa, “Ame Yaweh ben uben yi rinyi-m baa, ikyaen iken ti afu nde ne, ti afu byang-fu ame umbae-fu ti si kum awu amam be, 17ame u nde kang fu itinyang. Rishi-fu u jwunn pangma aswer ti ta apupwen ti isa riben. Utso-fu u ci mbe ra uten ande rika-ba. 18Ikyaen risu ti nae riben-fu, meme mbukwen ande ti utense u tu itinyang ru ye utso-fu.” 19Ibrahim kafe ka tu apyi-wu, ama aba ye ikyin ru yi Beyersheba, uwog ti Ibrahim som atang.
Rishi Nahor
20Kiye iki tiri, Ibrahim fxen baa, Milika uwa inja-wu Nahor na mbae pu wu anyisu ti arom. 21Umbae kucang-wu si Uzi, ti ifaen-wu si Buzi, ti ita-wu si Kemuwel ti si itse Aram. 22Aba ti tsítsí ama si Kesedi, ti Hazor ti Pildash ti Jidilafi ti Betuwel. 23Betuwel si itse Rebeka. Anyisu itsongta bane ti Milika mbae na Nahor, inja Ibrahim. 24Nahor mbe unda iki tsi ise ti rinyi-wu baa, Rewuma. Unda wu mbae na wu anyisu ti arom ba ne, Teba, ti Gaham, ti Tahashi, ti Maka.
נבחרו כעת:
Kucangtsi 22: kubNT
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© Wycliffe Bible Translators, Inc. and
© The Nigeria Bible Translation Trust 1995, 2017