Kucangtsi 21
21
Saratu Mbae Ishaku
1Pangma ti Yaweh yer unju, awu nde Saratu itinyang. 2Saratu kyaen rishwu, u mbae umbae ti urom na Ibrahim kiye ti awu kyáen tag pu wu. Awu ba mbae wu kiye ti Rimam yer unju te wu. 3Ibrahim fa rinyi umbae wu ti Saratu mbae na wu baa, “Ishaku#21:3 Imbyi rinyi Ishaku si “Awu skaen ikyaen.”.” 4Ti Ishaku nde usir itsongta, Ibrahim tsen na wu kutxin pangma ti Rimam ri te wu. 5Ibrahim ta te asang mae itsong kiye ti a mbae Ishaku. 6Saratu ri baa, “Rimam nda pu wu ame utob ti tsen ti akyaen ti skaen. Ko aye ti a fxen, awu u skaen te m.” 7Cwucwo awu rang baa, “Kucang aye ti u ri te Ibrahim baa, Saratu na u mbae umbae? Amaa, ame mbae na pu m awu umbae ti urom kiye ti awu kyáen tag pu wu.”
8Ishaku ser ben, ama usir ti a ter wu kibyaen, Ibrahim nde ukwab tiyang.
Ibrahim Tē Hagar ti Umbae-wu Ishimayel Ru
9Usir iki, Saratu nung umbae wu ti Hagar, unda ti Ejib wu, mbae na Ibrahim. Umbae wu ku txir Ishaku itxir. 10Ama Saratu ri te Ibrahim baa, “Tē upyi wune ti umbae-wu ru. Umbae upyi wune u ci-wu rifunn ti uyin-m Ishaku be.” 11Ira yi caeb Ibrahim utob timambe, ikyaen Ishimayel, umbae-wu. 12Ama Rimam ri te Ibrahim baa, “Ndembeb-fu utob ikyaen umbae wune ti iya-wu Hagar be. Fxen ira ti Saratu ri te fu, ikyaen ti ayi si risu Ishaku ti rinyi-fu u kunn. 13Ame u nda umbae upyi-fu ti unda wune mbae jwunn, u kafe mbukwen ande. Ikyaen imi, awu si anying-fu.”
14Kiskinn fifae, Ibrahim pu wuci ti ambyi kukwer tswa Hagar ukwae, ama u tē wu ti umbae-wu ru. Unda wu nwunn ka yaen ku kyang uwae kutur kuka ti Beyersheba. 15Ti ambyi mamtag uwae kukwer, Hagar ye umbae wu nae sang imbyi kufub iki, 16ama u nwunn ka som uwog iki fer ti atang, ku jwub, ku kab baa, “Ame u sae-m umbae wune ti awu u cwu ayib-m be.”
17Rimam fxen ira ti jwub umbae wu, ama atom Rimam kunn Hagar ira, u rang wu baa, “Imi ti nde, Hagar? Kyen-fu ikyenricwu be. Rimam fxen pu wu ira ti jwub umbae-fu, uwog ti awu nae atang ne. 18Nwunn, ye umbae wu fa kujwo ti fu je wu. Ame u nda wu, awu u kafe mbukwen ande yang-yi.” 19Rimam mbubta wu ayib ti wu nung kukwae ambyi, ama awu ka txi ambyi munn kukwer-wu, u nda umbae wu ngwa. 20Rimam ta te umbae wu, awu ser ben. Awu ku som uwae kutur kuka ama u kafe tatu. 21Kiye ti awu ta uwae kutur kuka ti Paran, iya-wu pu unda Ejib ba baen wu.
Ibrahim ti Abimeleki Yer Unju Tetso
22Kiye wune, Abimeleki, ti Fikoli Ukwe itaenrika-wu, ru ba ri te Ibrahim baa, “Rimam te fu ta tetso uwae meme iken ti afu ku nde! 23Tine, yer unju te m ti uben ti ben uwe Rimam ike baa, afu na u nde-fu tikong te m, ti anyisu-m, ti meme rishi-m be. Pangma ti ame tso fu ure, nde kubenti te m, tí uten wune ti afu si rikyen atang ne.” 24Ibrahim ri baa, “Ame ben uben.” 25Isim yine, Ibrahim sa ira ti jwub ba tu Abimeleki risu ribung iki ti apyi Abimeleki wu rwae mbe ra. 26Abimeleki ri baa, “Ame nung-m unde ti nde iken yine be. Afu ri te-fu ame be, ayi si tine ti ame ku fxen ira yine.” 27Ama Ibrahim ye iwen ti indag ba na Abimeleki, ama aba meme ifaen-ba cwe unju tetso. 28Ibrahim tsab iwentam tiyae itsongfaen ruye uwae rukug-wu. 29Ama Abimeleki rang wu baa, “Imbyi ayine ba imi nee afu tsab iwentam tiyae itsongfaen tsi kum ayi?”
30Ibrahim ri baa, “Mbe iwen itsongfaen yine kujwo-m, ti ayi ā tso baa, ame ti na mum ribung wune.” 31Nee iken ti nde aba ku kunn uwog atang baa, Beyersheba, ikyaen ti, ayi si uwog wune ti ande ifaen bane yer unju ti uben ti ben.
32Isim ti aba yer mam pu ba unju yi Beyersheba, Abimeleki ti Fikoli, Ukwe itaenrika-wu, kafe ru ti uten ti Filisti. 33Ibrahim yen kutuku tamariski yi Beyersheba atang, u fen Yaweh, Rimam ti tsi kukunn. 34Ibrahim som rikyen yi uten Filisti ka asang yang-yi.
נבחרו כעת:
Kucangtsi 21: kubNT
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© Wycliffe Bible Translators, Inc. and
© The Nigeria Bible Translation Trust 1995, 2017