MATTHAI 3
3
Baptistu John leh a thuhilh
1Hu hun laiin Baptistu John chu Judia gamdai ah thu soi in a hung a, 2Kisiih un; ajiahchu vaan lalgam a naita hi, chia soi in. 3Amah chu ahi, zawlnei Isaiah in, Gamdaai a mi kikou aw in, 'Lalpa lamlian sial unla, a lampite hihtang un,' a chi hi, chia ana soi chu. 4Huleh hu John in chu sangawngsaau mul puan a silh a, a kawng savun kawnggaah in a gaah a; huleh a an chu khaukhup leh gam khuaizu ahi. 5Huin Jerusalem leh Judia gam pumpi leh Jordan kiimvela umte zousiah a kawmah a chiah va, 6A sualte uh thupha tawi in Jordan lui ah amah baptisma tansah in a umta uhi. 7Hizongleh ama’n Pharisaite leh Sadukaite tampi a kawma baptisma tang diing a hung a muh tahin, a kawm vah, Guul suante aw, lungthahna hung tung diing taisan diingin kua’n ahung thuhilh ei? 8Hujiahin kisiihna min putaahin gah suang un; 9Huleh Abraham ka pu uh ahi chi'n kingaihtuah sih un; ajiahchu Pathian in hi suang te haw Abraham tate in a dingsah thei hi, chih ka hung hilh ahi. 10Huleh tuin zong singbul chinah heita koih ahita hi; hujiahin sing chin gah hoiha gah lou photmah chu kiphuuha mei a kipaailuut veu ahi. 11Ke'n chu kisiihna diingin tui in ka hung baptis ngei a; hizongleh ka nunga hungpa chu kei sangin a loupizaw a, A keengtophah tawi taah zong ka hi sih hi; Ama’n chu Hagau Siangthou leh mei in nanguh ahung baptis diing hi. 12A khut in a pasiseep a tawi a, a phual chu a japsiang tinten diing; huleh a buhte chu a pangah a koihkhawm diing a; hizongleh a sii chu mei mitthei lou in a haaltum diing hi, a chi hi.
Jesu baptisma tanna
13Huin Jesu chu John kawma baptisma tang diingin Galili gam a kipanin Jordan lui ah a kawmah a hung a; 14Hizongleh John in, "Kei na hung baptis kiphamohzaw hi’ng a, nang kei kawma hung na hi maw?" chi'n ana khaam hi. 15Huleh Jesu’n a dawng a, a kawmah, Tuin chu huchih diing lemsa haam in; ajiahchu huchibanga dihtatna zousiah bawl bukim chu ei diing a kilawm ahi, a chi a. Huin lem a sata hi. 16Huleh Jesu chu baptisma a tan zohin tui a kipanin a pawtdohpah a; huleh, ngai in, vaan amah diingin ahung kihong a, Pathian Hagau chu vakhu banga hung kumsuh in a tunga hungtu chu a mu a; 17Huleh ngai in, vaan a kipanin aw in, "Hi ka Tapa deihtah, ka kipaahna mahmah ahi, a chi hi.
נבחרו כעת:
MATTHAI 3: SIMTBSI
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
