BINZEN 8
8
Zükemihen le A-kenithyü Kela
1Sunggigü le Noah lo a-zen-o run günyu kebin nyukhu dan aphu nmhin lamvu: a-le tsangkenbu thyü pe no nbu shü, tsontsin zü güle se tsüla. 2Kazü hensin ki zükepen dan lo tsangge zü dan khinla. Tsüsika tsangri mvula; 3jon tsio henpvün jaka zü le a-shvu thyü tsüla. 4Tson-o she tsenyü gü jonryüo tsenyü karun gü le ryüo Ararat kazüthun ge sunlo. 5Zü gü le sekenye tsügü she tseryü gü jonkeri nyü kazüthun ra dan hyuchwiryü.
6Jon henzi siki Noah le kafüphe nme khinshe shü, 7tson-o tegvü nme nishwi shü. Tsü le rani ryümvula, ai zü güle se lo kemvuthen nye nsin nshe bin. 8Tsüsiki a-le kazüso zü le rhola sele nmvuyo sha shü titseo nsu nme nishü, 9ai zü le kazü aphu hen bin zun kethyü genyu, nsu gü le dun lo kegwa bin fü kendila. Tson-o tsü le nye-o run gü ki rani ryüla, tsontsin Noah le a-ben ketape tsügü khi nipe run gü nyu shü lola. 10Tsüsiki jontsenyü bin tseo a-le nsu gü ni nishü. 11Tsontsin ngwün ki nsu gü le oliv nyü kerhün nme ndu pen-o a-ki rani ryü. Tsü ka Noah le zü le se tsükela shala. 12A-le Jontsenyü khwe nitseo nsu gü ni nishü, higü ka we tsü le rani ryü mvula.
13Noah keyhun chen tsitsero-o nme ka she keri gü jon keri nyü zü le sela. Noah le run gü kehen rholao lizin hizin shwi keshü ka kazü le sin bin kela hyulo. 14She hvu gü jon nkio tsenyü ka kazü güle sinshü lola,.
15Sunggigü le Noah ka zoshü. 16“Nnu, nnyu lo a-nyugun nunyu dan zen-o run günyu chwi lalo. 17Tegü lo nyukhu dan aphu zen chwilo, tson-o anyugun no chvükenye pe kazü aphu kesü thyü gun lo nrün genyu.” 18Tson-o Noah le a-nu, a-nyudan lo a-nyu gun nyenyu dan zen-o run gü nyu chwila. 19Nyukhu lo tegü dan aphu a-kami a-dan thyüo run gü nyu chwila.
Noah le Kershvu Kethyü
20Noah le Npugü kershvu bin nme thyülo; tson-o a-le nyukhu lo tegü kenshün dan dan nyu nme me khilo-o kershvu bin gü ge rope kershvu thyüshü. 21Tsontsin Npugü le rope kershvu thyü keshü rün kegwa gü shalo-o, a-npfü a-nthon-o, “Ale temi tho genyu thame ka-e keswekesü pe kazü gü ge shüni lo hoso; temi le ntsenyu kanyu a-kerüchün le gwamvu tse kethyü ale sha bin nyo. Ale nthu gwen thyükeshü hihontse kerhün ronzin kebin aphu nke nila lo haso. 22Kazü güle kebin then, ntsikeshü lo gvükelo. Kekun lo keyün, ntsükerin lo kenda, keben lo kezün no ndila loha.”
נבחרו כעת:
BINZEN 8: REGSBSI
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.